Vakaukauataka na Ligada

E SIVIA na 1,800 na kena cavuti na liga ena iVolatabu. E levu na sala e dau vakayagataki tale ga kina na ivosavosa e vauca na liga. Kena ivakaraitaki, na liga savasava e vakaraitaka na nona galala e dua mai na cakacala e beitaki kina. (2 Samuela 22:21; Same 24:​3, 4) Ni dua e dodoliga e vakaraitaka nona lomasoli me veivuke. (Vakarua 15:11; Same 145:16) Ena ivosavosa vakaiperiu ni dua e biuta nona bula e ligana e kena ibalebale ni bolemate. (1 Samuela 19:5) Ni dua e malumalumu na ligana e vakaraitaka ni yalolailai. (2 Veigauna 15:7) Na ivosavosa vakaiperiu ni vakaukauataki na liga e vakaibalebaletaka nona vakayaloqaqataki e dua me gu ni cakacaka.​—1 Samuela 23:16.

E bibi meda vakaukauataka na ligada nikua, nida bula tu oqo ena “gauna cacamatua, lewalewai dredre.” (2 Timoci 3:​1, NW) Nida yalolailai, e dau noda ivalavala meda soro, me vaka na malumalumu ni ligada nida wawale. Sa dau matau meda raica na nodra biuvuli na gone, nodra biubiu e vale na tama, kei na nodra sa sega ni via qaravi luvedra na tina. O koya gona nida lotu Vakarisito, e bibi meda vakaukauataka na ligada meda rawa ni vosota kina na veivakatovolei eda sotava nida qarava tiko na Kalou. (Maciu 24:13) Noda cakava oqo, eda vakamarautaki Jiova kina.​—Vosa Vakaibalebale 27:11.

Sala e Vakaukauataki Kina na Ligada

A gadrevi vei ira na Jiu era bula ena gauna i Esera mera vakaukauataka na ligadra, mera vakaotia kina na taravaki tale ni valenisoro i Jiova e Jerusalemi. A vakaukauataki vakacava na ligadra? E kaya na kena itukutuku: “A ra sa soqoni vata e na marau ka kana madrai sa sega ni vakaleveni, ka bogi vitu: ni sa vakamarautaki ira ko Jiova, ka sa vagolea na lomana na tui Asiria vei ira, me vakaukauwataka na ligadra e na cakacaka ni vale ni Kalou, na nodra Kalou na Isireli.” (Esera 6:​22) E matata e ke, ni kaukaua ga i Jiova a uqeta “na tui Asiria” me vakalesui ira na tamata ni Kalou, qai vakauqeti ira tale ga na lewenivanua mera vakaotia na cakacaka era tekivutaka.

Gauna qai vinakati kina e muri me vakavinakataki na bai kei Jerusalemi, a yavala o Niemaia me vakaukauataki ira nona itokani. Eda wilika: “Au a qai tukuna vei ira ni sa vinaka vei au na ligana na noqu Kalou; kei na vosa talega ni tui ka vosataka vei au ko koya. Era sa qai kaya, Tou ia, ka viribai. A ra sa vakaukauwataka na ligadra ki na cakacaka vinaka oqo.” Ni sa vakaukauataki na ligadra, a tara rawa kina o Niemaia kei ira nona itokani Jiu na bai kei Jerusalemi ena loma ga ni 52 na siga!​—Niemaia 2:​18; 6:​9, 15.

E vakaukauataka tale ga na ligada o Jiova meda vunautaka na itukutuku vinaka ni Matanitu ni Kalou. (Maciu 24:14) E vakayacora oqo ena nona ‘vakarautaka vei keda na veika vinaka kece ga meda cakava na lomana.’ (Iperiu 13:​21, NW) E vakarautaka vei keda o Jiova na iyaya e toka sara e cake na kena ivakatagedegede. Era tu gona vei keda na iVolatabu, ivola vakaivolatabu, ivoladraudrau, brochure, ivolacebaceba, kei na tepi ni retio kei na vidio mera tarai kina na tamata e veiyasa i vuravura. Na veivola oqo e tabaki ena sivia na 380 na vosa. Kena ikuri, ena soqoni vakaivavakoso, soqo ni tabacakacaka, kei na soqo ni tikina, e veidusimaki qai veivakavulici kina o Jiova ena ivalavala ni kena vakayagataki na iyaya oqo meda vakayacora vinaka kina noda cakacaka vakaitalatala.

Dina ni levu na sala e vakaukauataka kina na ligada o Jiova, ia e namaka tale ga meda solia noda igu taucoko. Vakasamataka mada na veika a kaya na parofita o Ilaisa ni mai kere veivuke vua o Tui Joasi me valuti ira na kai Siria. A kaya o Ilaisa vua na tui me taura e so na gasau me mokuta kina na qele. E kaya na iVolatabu: “A sa yavita vakatolu, ka qai cegu. A sa cudru vua ko koya na tamata ni Kalou, ka kaya, E dodonu mo ni yavita vakalima, se vakaono; ko ni a qai mokuti ira na kai Siria, ka vakaotia sara; ia oqo, ko na mokuti ira na kai Siria vakatolu ga.” (2 Tui 13:​18, 19) Ni sega ni solia nona igu taucoko o Joasi, a vakaiyalayala ga nona gumatua vei ira na kai Siria.

Ena yaga tale ga vei keda na ivakavuvuli oqo ke da via cakava vinaka na veika e lesia vei keda o Jiova. Meda kua ni leqataka na veika dredre ena vakababa e matada se na dredre beka ni noda ilesilesi, ia meda gumatuataka ga da qai solia kina noda vinaka taucoko. Meda vakaukauataka ga na ligada da qai nuitaka na veivuke i Jiova.​—Aisea 35:​3, 4.

O Jiova ena Vakaukauataka na Ligada

Ena vukei keda qai vakaukauataka dina na ligada o Jiova meda cakava na veika e vinakata. Dua tale na yasana, na Kalou ena sega ni cakamana qai cakava kece na ka vei keda. E namaka meda cakava na noda itavi​—oya meda wilika e veisiga na iVolatabu, vakavakarau da qai tiko wasoma ena soqoni, vunau ena kena levu eda rawata, da qai masu tiko ga. Ke da yalodina da qai gumatuataka noda itavi ni se soli tu vei keda na gauna, ena vakaukauataki keda o Jiova meda cakava na veika e namaka vei keda.​—Filipai 4:​13.

Dikeva mada na ka e sotava e dua na tacida tagane lotu Vakarisito. A mate o tinana kei na watina ena loma ga ni dua na yabaki. E se mosi tu ga vua oya, sa biuti luvena tagane tale o vugona qai vakanadakuya na ivakarau ni bula vakarisito. E kaya na tacida oqo, “Au vulica nida sega ni rawa ni digia na veivakatovolei, na gauna eda sotava kina, kei na kena levu.” Cava e vakaukauataki koya tiko ga? “Noqu dau masu kei na vuli vakataki au, au vosota rawa kina na ituvaki au sotava. E vakacegui au tale ga vakalevu na nodra veitokoni na taciqu kei na ganequ vakayalo. Au vakadinadinataka na bibi ni noda bucina e dua na veiwekani vinaka kei Jiova ni bera nira basika na veituvaki dredre.”

Se mani ituvaki cava eda sotava, meda nuitaki Jiova vakatabakidua da qai vakayagataka vinaka na veika kece e vakarautaka me vakaukauataki keda. Nida cakava oqori eda na qaravi Jiova kina ena kena vinaka duadua, ena vakacerecerei qai rokovi kina na yacana dokai.​—Iperiu 13:15.

[iYaloyalo ena tabana e 31]

Ni sega ni solia nona igu taucoko o Joasi, e vakaiyalayala ga kina nona gumatua vei ira na kai Siria