Sucu i Jisu​—E Yaco Vakacava? Ena Vuku ni Cava?

“AU SEGA ni vakabauta!” Oqo na ka era na kaya e levu era sega ni lotu Vakarisito nira rogoca na italanoa ni sucu i Jisu. Era kaya ni sega ni tokoni vakasaenisi ke vakabauti ni rawa ni kunekune qai vakasucuma e dua na gonetagane na yalewa e se sega ni taratagane. Cava nomu nanuma?

Ena 1984, e tabaki ena Times mai Lodoni e dua na ivola e vakamacalataka na ka oqo, e kaya: “E sega ni veiganiti me taurivaki na saenisi me saqati kina na cakamana. Na vakabauta ni sega ni rawa ni yaco na cakamana e tautauvata ga kei na vakabauta ni na rawa ni yaco dina.” Era vakadonuya na ivola oqo e 14 na parofesa ni saenisi ena univesiti mai Peritania. Era kaya: “Keimami ciqoma ni yaco dina nona vakaluveni na yalewa e se sega ni taratagane, na itukutuku ni cakamana e volai ena Kosipeli, kei na vakaturi i Jisu.”

Io, e namaki me na kurabui e dua ni rogoca ena imatai ni gauna na italanoa ni nona vakasucumi Jisu na yalewa e se sega ni taratagane. A kurabui mada ga na tina i Jisu ni tukuna vua na agilosi ni Kalou: “Raica, ko na kunekune, ko na vakasucuma talega e dua na gonetagane; ia mo vakayacani koya ko JISU.” A qai taroga o Meri: “Ena yaco vakabekaevei na ka oqo, ni’u sa sega ni veiyacovi kaya e dua na tagane?” Sa qai vakamacalataka na agilosi ni na cakamana na Kalou ena kaukaua ni yalona tabu, qai kuria: “[E] sega ni dredre vua na Kalou e dua na ka.” (Luke 1:​31, 34-37) Macala e ke ni o koya ga a bulia na gacagaca ni vakatubukawa e rawa tale ga ni vakavuna nona kunekunetaki kei na nona vakasucumi Jisu na yalewa e se sega ni taratagane. Ke sa bulia na Kalou na vuravura kei na lomalagi kei na kena veilawa vakasakiti, e rawa tale ga ni vakayagataka na yaloka mai na katonigone i Meri me bulia kina na Luvena tagane uasivi.

Na Vuna e Yaco Kina

Sa duguci tu o Meri me wati Josefa, na turaga itovo vakalou, ena gauna e kunekune kina. Sa qai vakatakila na agilosi ni Kalou vei Josefa ena tadra, na vuna e sa tiko bibi kina na yalewa savasava sa duguca tu. E kaya na agilosi: “Kakua ni rere ni kauta vei iko na watimu ko Meri: ka ni sa tubu mai vua na Yalo Tabu na ka sa kunekunetaka: ia ena vakasucuma ko koya e dua na gonetagane; ia mo vakayacani koya ko JISU; ka ni sai koya ga ena vakabulai ira na nona tamata mai na nodrai valavala ca.” (Maciu 1:​20, 21) Na ibalebale vakaiperiu ni yaca Jisu “E Veivakabulai o Jiova.” Eda nanuma kina ni gadrevi na veivakabulai mai na ivalavala ca kei na mate kei na ituvatuva ni Kalou o Jiova me na vakayacora na veivakabulai oqori ena vuku i Jisu.

Ni valavala ca na imatai ni tagane o Atama, era sucu ivalavala ca tale ga kina na luvena, ra qai dau via voroka na lawa ni Kalou. (Roma 5:​12) Era na vakabulai vakacava na kawa i Atama mai na ivalavala ca mera bula uasivi? E veiganiti me saumi ena dua tale na bula ni tamata uasivi me tautauvata kei na talei ni bula i Atama me veiraurau kina na tau ni lewadodonu. Oya na vuna a vakarautaka kina na Kalou nona sucu vakacakamana na tagane uasivi o Jisu. Oya tale ga na vuna a vakatara kina o Jisu mera vakamatei koya na kena meca. (Joni 10:​17, 18; 1 Timoci 2:​5, 6) Ni sa vakaturi oti o Jisu me lai bula e lomalagi, a rawa kina ni tukuna ena doudou: “Ka’u a mate eliu, ka raica, au sa bula ka tawa mudu, Emeni; au sa taura talega nai dola kei etesi [ibulubulu ni kawatamata] kei na mate.”​—Vakatakila 1:​18.

Ni tu vei Jisu na idola vakaivakatakarakara ni mate kei Etesi, e rawa kina vua me dolava na sala vei ira na tamata ivalavala ca mera rawata tale na veika a vakayalia o Atama. E kaya o Jisu: “Oi au na vu ni tu-cake-tale, kei na vu-ni-bula: ko koya sa vakabauti au, kevaka sa mate, ena bula ga: ia ko koya yadua sa bula ka vakabauti au, ena sega sara ni mate.” (Joni 11:​25, 26) Sa dua na yalayala totoka dina! Io, e tiko tale na vuna bibi a sucu kina o Jisu.

Na Vuna Bibi Duadua

E sega ni tekivu na bula i Jisu ena gauna e kunekunetaki koya kina o Meri. “[Au] lako sobu mai lomalagi,” e vakamatatataka o koya. (Joni 6:​38) O Jisu a bula tu vakayalo kei Tamana vakalomalagi ni tekivu na bulibuli. E vakatokai koya kina na iVolatabu na “i vakatekivu ni cakacaka ni Kalou.” (Vakatakila 3:​14) Ni se tiko mai lomalagi o Jisu a vakadinadinataka nona talaidredre na agilosi ca e vakamua na imatai ni tamata me vorata na veiliutaki ni Kalou. Oqo na vuna bibi duadua a vinakata kina o Jisu me vakasucumi mai vakatamata me Luvena tagane uasivi na Kalou. Na cava me cakava?

Me vakadinadinataka ni tu vua na Tamana mai lomalagi na dodonu me liutaka na vuravura kei na lomalagi. Na nona yalodina me tekivu mai nona sucu me yacova nona mate e vuravura, e vakaraitaka kina o Jisu nona tu vakarau me muria na ivakarau ni nona liutaka na kawatamata o Jiova. Ni bera nira vakamatei koya na meca ni Kalou, e tukuna vakamatata o Jisu na vuna e solia kina nona bula me mate vakaisoro. Mera kila kina o ira e vuravura ni lomani Tamana. (Joni 14:31) Ke rau bucina na mataqali loloma vaka oqo na imatai ni tamata, o Atama kei Ivi, ke rau a yalodina ena veivakatovolei rawarawa rau sotava.​—Vakatekivu 2:​15-​17.

Na yalodina nei Jisu e vakavotuya tale ga nona lasulasu na agilosi ca o Setani. E vakaucacataka na Kalou kei na tamata o Setani e matadra na agilosi mai lomalagi ni kaya: “Na nona ka kecega ena solia na tamata me bula kina.” (Jope 2:​1, 4) E lasutaka o Setani ni kawatamata kece era na talaidredre vua na Kalou ke ra sotava na leqa.

Na ile oqo e bolei kina na dodonu ni Kalou me veiliutaki. Me vakalasui na bolebole oqo, a lomasoli kina o Jisu me sucu mai vakatamata qai vakaraitaka nona yalodina tiko ga me yacova na mate.

E kaya o Jisu ni vuna bibi duadua a mai bula kina e vuravura, oya me “dautukuna na ka dina.” (Joni 18:37) Ena veika e kaya kei na nona itovo e vakaraitaka kina o koya ni veiliutaki ni Kalou e dodonu vakaoti, ena rawati tale ga kina na marau ke muri. E vakamacalataka o Jisu ni vuna tale ga a lako mai kina e vuravura me solia nona bula me “kedrai voli e lewe vuqa,” e dolava na sala vei ira na tamata ivalavala ca mera vakadonui ra qai bula tawamudu. (Marika 10:45) Mera kila na kawatamata na bibi ni ka e yaco oqo, e yaga kina na itukutuku ni sucu i Jisu. Kuria, na veika era yaco ni sucu o Jisu e tiko kina e so na ka me vulici, ena qai laurai oqo ena ulutaga e tarava.

[iYaloyalo ena tabana e 4]

Era na vakabulai vakacava mai na ivalavala ca na kawa i Atama?