‘Kemuni na Kalou, na Cava Oni Vakatara Kina?’

E SE nanuma vinaka tiko o Ricardo na siga rau a waraki vuniwai tiko kina ena rumuniwawa kei na watina o Maria.a A sega ni doudou e dua vei rau me wilika na macala ni nona raici vakavuniwai o Maria. Ia, a mani dolava na waqanivola o Ricardo, rau a raica vakatotolo ga na ivakamacala nei vuniwai. Ni rau raica kina na vosa “kenisa,” rau a veitagicaki ni rau kila vinaka sara tu ga na ibalebale ni vosa oya.

“A yalovinaka dina na vuniwai oya,” e kaya o Ricardo, “qai kila vinaka tu na bibi ni mate oqo ni a tukuna tiko ga me keirau vakararavi vua na Kalou.”

Ni bera ni tekivu caka vei Maria na veiqaravi vakavuniwai e vakatokai na radiation, a dikeva rawa na nona vuniwai ni sa sega ni tarova rawa o Maria na yavavala ni yavana imatau. Nona dikevi tale vakavuniwai a qai kunei ni sa tete ina nona mona na kenisa. Ni caka oti ga vua na radiation ena dua na macawa, sa mai muduki yani. Yaco me sa sega ni vakilai koya o Maria, a qai mate ni oti ga e rua na vula. A vakamacalataka o Ricardo: “Au marau ni sa mai tini na nona rarawa, ia sa dua na ka na levu ni noqu galili au lai nanuma kina meu mate tale ga. Vakavuqa, au dau tagi vua na Kalou: ‘Na cava oni vakatara kina me yacovi au na ka oqo?’ ”

Vure e Levu na Taro ni Yaco na Leqa

Me vakataki Ricardo, e sega ni wiliki rawa na levu ni tamata e vuravura era sotava ena voraki na rarawa. Vuqa na gauna, e dau kedra ga na isamunidawa na tawacala. Vakasamataka mada na rarawa taratarasui e vu mai na levu ni veiraravui era sotava na kawatamata. Se dikeva mada na rarawa era sotava na lewe vuqa era kucuvi, ibinibini gone era tulivaki, e caka vei ira na ivakarau kaukaua e vale, kei na ivakarau ca tale e so era cakava na tamata. Ena veitabagauna, e kunei ni tawayalani rawa na levu ni veivakalaboci kei na mosi e rawa nira vakayacora na tagane vei ira na yalewa, vaka kina na yalewa vua na tagane. (Dauvunau 4:​1-3) Era sotava tale ga na rarawa o ira era vakaleqai ena leqa tubukoso se o ira e vakaleqai na lomadra, nodra vakasama kei ira era tauvimate vakayago. Sa rauta mera taroga e vuqa: “Na cava e vakatara kina na Kalou na rarawa vaka oqo?”

Vei ira mada ga na dau lotu, e sega ni ka rawarawa na vosota na veika rarawa. De rairai o na vaqaqa lo tale ga se cava na vu ni nona vakatara tu na Kalou dau loloma, qai kaukaua duadua na rarawa. Na noda kunea na kena isau e dina qai veivakacegui e bibi ina noda bula kei na noda veiwekani kei na Kalou. Na iVolatabu ga e rawa ni sauma vei keda. E kerei gona mo ni dikeva mada na ka e vakamacalataki ena ulutaga e tarava.

[iVakamacala e ra]

[iYaloyalo ena tabana e 3]

E tukuna tiko ga na vuniwai me keirau vakararavi ga vua na Kalou