iTalanoa ni Nona Bula

Na iVola a Veisautaka Noqu Bula

TALANOATAKA O IRENE HOCHSTENBACH

A yaco oqo ena dua na yakavi ni Tusiti ena 1972. Au tomani rau na noqu itubutubu ena dua na soqo ni lotu e Eindhoven, e dua na siti ena yasana o Brabant, mai Necaladi, niu se qai yabaki 16. E sega ni dei na lomaqu qai dua na ka noqu diva meu a kua ni tiko e kea. Rau qai solia mai vei au e rua na goneyalewa e dua na ivola e volai toka kina: “Irene, keirau via vukei iko.” Au sega ni kila ni na qai veisautaka vakadua na noqu bula na ivola oya. Ia, ni bera niu kuria na veika tale a qai yaco, meu vakamacalataki au mada.

AU A sucu ena yanuyanu o Belitung, mai Idonisia. Au se nanuma tiko ga e so na rorogo mai na yanuyanu oya​​—⁠na tavasa ni drauniniu ni liwava na cagi, na drodro malua ni uciwai, na nodra veidredrevaki na gonelalai era qito e yasa ni neitou itikotiko kei na irorogo ni ivakatagi e vale. Ena 1960, niu se qai yabaki va, keitou a toki vakavuvale mai Idonisia i Necaladi. Keitou a vodo waqa ena neitou ilakolako balavu oqo, au sega tale ga ni guilecava rawa e dua na noqu matakau dau qiri dramu au dau kauta voli. Niu se qai yabaki vitu, e vakavuna noqu sega ni rogo rawa e dua na tauvimate, tekivu sara ga e keri noqu didivara. E sa qai balolo tu ga ni vakanananu na rorogo.

Tubu Tiko Niu sa Didivara

Ena vuku ni nodrau dau karoni au vinaka na noqu itubutubu au a sega sara ni vakila na ca ni didivara. Niu se gone, au dau nanuma ni ka ni lasa noqu irogorogo levu, ia a sega so ni yaga. Era dau volavola ena yasa ni sala na noqu icaba era tiko volekati keitou me rawa ni keimami veivosaki kina. Au dau vosa lesu vei ira, dina ga niu sega ni rogoca rawa na domoqu.

Ni toso tiko noqu yabaki au vakila niu duidui mai vei ira na tiko wavoliti au. Au raica tale ga ni so era vakalialiai au qai so tale era vakayawaki au ena vuku ga ni noqu didivara. Au dau tu duadua voli ga qai galili. Tekivu meu sa qai vakila na ibalebale dina ni didivara, kei na noqu rere na tiko vata kei ira na sega ni didivara.

Me rawa gona niu vuli ena nodra koronivuli na didivara, keitou toki vakavuvale mai na dua na koro ena yasana o Limburg ina korolevu o Eindhoven. A vaqara cakacaka sara o tamaqu, erau lai vuli tale ga na tuakaqu kei na ganequ gone ena dua na koronivuli vou. Au marautaka na veiveisau eratou cakava ena vukuqu. Au vakavulici mai koronivuli meu veiraurautaka na voqa ni domoqu qai vosa vakamatata. Dina nira sega ni vakayagataka na vosa vagalu na qasenivuli ia era qai vakavulici au ga kina na gonevuli.

Au Dau Tu Taudua Voli Ga

Dua na ka nodrau saga noqu itubutubu me keitou dau veivosaki niu sa tubu tiko, ia e levu na ka e sega ni dau matata vei au. Kena ivakaraitaki, au sega ni kila ni rau sa vuli iVolatabu tiko kei ira na iVakadinadina i Jiova na noqu itubutubu. Ia, au se nanuma tiko na siga keitou a lako kina vakavuvale ena dua na vanua e levu kina na tamata era dabe tiko ena idabedabe. Era rai kece tu ga i liu, so na gauna era vakasausau se ra tucake, ia au sega sara ga ni kila se cava era cakava tiko. E muri, au sa qai kila niu a tiko ena dua na nodra soqo ni tikina na iVakadinadina i Jiova. Erau dau kauti au tale ga na noqu itubutubu ina dua na valenisoqo ena korolevu o Eindhoven. Au vakila ni vinaka na lako e kea baleta ni vinaka na nodra itovo na tiko kina, ratou dau marautaka na noqu vuvale, ia au sega ga ni kila se cava keitou lako wasoma tiko kina. Au sa qai mai kila ni vale oya e nodra Kingdom Hall na iVakadinadina i Jiova.

E ka ni rarawa ni sega ni tiko kina e dua me rawa ni vakadewataka vei au na porokaramu. Au sa qai mai kila tale ga ni o ira na tiko kina era a via vukei au ia e leqa nira sega ni kila mera vosa vakacava vei yau. E dau tuburi au kina na galili qai dau votu mai na vakasama oqo, ‘au sega ni via tiko e ke, meu a lako ga i koronivuli.’ Niu se vakasamataka tiko na veika oqori, rau sa solia mai vei au e rua na goneyalewa e dua na tikinipepa. Oqori sara ga na ivola au a vakamacalataka ena iucu ni noqu italanoa. Sega vakadua niu kila ni ivola oqori ena tekivuna e dua na veikilai dredre qai sereki yau mai na galili.

Tauyavutaka e Dua na Veitokani Dredre

Erau yabaki 20 vakacaca o Colette kei Hermine, o rau na goneyalewa rau a solia vei au na ivola. E muri, au qai kila ni rau se qai mai lewena ga na ivavakoso ni iVakadinadina i Jiova keitou tiko kina ni rau mai cakacaka vakapainia tudei. Erau sega ni kila na vosa vagalu, ia keitou veivosaki rawa ga vakavinaka niu wanonova matua na tebenigusudrau ni rau vosa tiko.

Rau marautaka na noqu itubutubu nodrau via vakavulici au ena iVolatabu o Colette kei Hermine, ia e sega ni yaco wale ga e kea. Dua na ka nodrau dau saga me rau vakadewataka vei yau na ivunau ena veisoqoni ena Kingdom Hall kei na nodrau okati yau ena nodrau dau veimaliwai kei ira na lewe ni ivavakoso. Keitou dau vakatovotovotaka vata na ivakamacala vakaivolatabu me na vakayagataki ena cakacaka vakavunau, kei na nodrau vukei au ena kena vakarautaki na noqu itavi ena Koronivuli ni Vuli Vunau. Vakasamataka mada, ena gauna oqo au sa doudou na vakaitavi ena matadra e levu na sega ni didivara.

Kena ikuri, erau vukei au o Colette kei Hermine meu nuitaki rau. Erau dau vosovoso rau qai dau vakarogoci yau. Dina ni keitou dau dredrevaka na noqu cala ia erau sega vakadua ni vakamaduataki au; se rau madualaki au. Erau saga me rau kila na lomaqu rau qai sega ni vakatikitikitaki yau. Erau solia vei yau e dua na iloloma totoka​—⁠nodrau loloma kei na veitokani.

O koya e bibi, nodrau vakavulici au o Colette kei Hermine meu kilai koya na noda Kalou o Jiova, me dua na itokani eda rawa ni vakararavi vua. Erau kaya vei au ni raica o Jiova na noqu dabe toka ena Kingdom Hall qai kila vinaka na veika dredre au sotava tiko niu didivara. Au marautaka dina ni vakavuna na neitou veitokani na neitou lomani Jiova! E tarai au na nona veikaroni o Jiova, au vakaraitaka kina noqu lomani koya niu yalataki au vua, au qai papitaiso ena Julai 1975.

Veitomani kei na Dua na iTokani Dredre

Ena veiyabaki e tarava, au kilai ira e levu tale na taciqu kei na ganequ vakarisito. Ena 1980 au vakamau kina kei na dua noqu itokani dredre. Sega ni dede, au sa tekivu painia. Keirau lesi kei watiqu o Harry ena 1994 me keirau painia lavotaki ena nodra yalava na galu e Necaladi. Au sotava e so na veika dredre ena yabaki e tarava. Au tomani watiqu, e sega ni didivara, ena nona sikovi ira na ivavakoso ni a veisosomitaki me ivakatawa ni tabacakacaka.

Oqo na veika au qai cakava. Ni keirau se qai sikova vakadua e dua na ivavakoso au saga sara meu kilai ira e levu na mataveitacini. Au tukuna vei ira niu didivara, au kerei ira tale ga mera raici au ra qai vosa vakamalua. Au saga tale ga meu dau saumitaro sara ga e liu ena gauna ni soqoni. Au kerea tale ga me dua e dauvakadewa vei au ena macawa ni soqoni oya se ena gauna ni cakacaka vakavunau.

Niu cakava oqo era lai guilecava kina e so na mataveitacini niu didivara, qai dau tini ena veidredrevaki. Me kena ivakaraitaki, era kaya nira dau vakatagi sici nira raici yau e tauni, ia au sega ni bau kauai. Au dau guilecava ena so na gauna niu didivara, me vaka noqu dau via kaya lo vei watiqu e so na ka. Ia, ni damudamu vakasauri na matana au kila ni sa rui rogo levu tale na noqu “vakasolokakana.”

Era dau vukei au tale ga na gone ena so na sala e sega ni namaki. Ena dua na ivavakoso keirau se qai sikova vakadua, a raica rawa e dua na gone yabaki ciwa nira sega ni doudou na vosa vei au e so na mataveitacini, mani nanuma me cakava kina e dua na ka. E kauti yau ena lomadonu sara ga ni Kingdom Hall qai kacivaka: “Au vinakata mo ni kilai Irene​​—⁠e didivara o koya!” Era lako sara mai vei yau o ira na tiko e kea, ra qai vakamacalataki ira.

Niu tomani watiqu voli ena cakacaka ni veisiko, ra sa qai levu ga mai noqu itokani. Sa duidui sara na noqu bula edaidai ni vakatauvatani kei na veiyabaki au vakila niu dau tu duadua voli kina! Mai na bogi rau a solia kina vei au o Colette kei Hermine na ivola oya, au sa qai kila tu kina na yaga ni veitokani kei na noqu mai sotavi ira na tamata au taleitaka vakalevu. E bibi sara na noqu sa mai kilai Jiova, na iTokani talei duadua. (Roma 8:​38, 39) Io, a veisautaka dina na noqu bula na ivola oya!

[iYaloyalo ena tabana e 24]

Au se nanuma tiko ga na irorogo ni noqu matakau

[iYaloyalo ena tabana e 25]

Niu vunau tiko. Keirau vata kei watiqu, o Harry