“Au Raica, ia au Sega ni Kila”

Rau veisere na noqu itubutubu niu se gonedramidrami, a qai susugi keitou na le va na veitacini o Tinaqu. Ena gauna ya, na veivakavulici e dau caka vei ira na didivara mai Varanise e sega ni tautauvata kei na veivakavulici e caka tu nikua, era dau vakalolomataki tale ga ena so na gauna na didivara. Ia au bau kalougata toka ni vakatauvatani kei ira na kena vo. Meu talanoataka mada.

E levu na qasenivuli era vakabauta ni dodonu mera vakavulici na gone era didivara mera vosa, mera wilika tale ga na tebenigusu. Ena vanua au susugi kina, e sega sara ga ni vakatarai e koronivuli na veivosaki vagalu. Eso mada ga na gone e vesu na ligadra e dakudra ena gauna ni kalasi.

Niu se bera ni yabaki ono, e dau vakavulici au e dua na marama meu kila na vosa. Au dau vuli me vica vata na aua e veimacawa. Ena boboki na galegalequ se uluqu, qai vinakati meu cavuta tiko ga eso na vosa au sega mada ga ni rogoca. Au sega tale ga ni rawa ni veivosaki kei ira na vo ni gone. Sa bau gauna rarawataki dina qori.

Niu sa yabaki ono, au lai curuibure ena nodra koronivuli na didivara. Qori na imatai ni gauna meu sotavi ira kina eso tale na gone era didivara. E sega tale ga ni vakatarai ena koronivuli qori na veivosaki vagalu. Ke keimami veivosaki vagalu ena kalasi, keimami na ququnipusi se laudre na ului keimami. Ia keimami qai bulia e dua iwalewale ni vosa vagalu me keimami veivosaki kina. Qori na itekitekivu ni va na yabaki marautaki niu sa rawa ni veivosaki kei ira noqu icaba.

Niu sa yabaki tini, au toki ena dua tale na paraimari era sega kina na didivara. Dua na ka na noqu rarawa! Au nanuma nira sa mate kece na vo ni didivara, sa qai vo ga o au. Era nanuma na vuniwai ni na sega ni yaga na noqu vakavulici meu vosa, ke ratou vulica na vosa vagalu na noqu vuvale se meu veimaliwai kei ira na gone era didivara. Au se vakasamataka tiko ga na gauna au lai laurai kina vua e dua na vuniwai e dau qaravi ira na didivara, a taqa toka ena dela ni nona teveli e dua na ivola ni vosa vagalu. Au raica na iyaloyalo ena waqana e liu, au dusia sara qai matanataka niu vinakata na ivola, ia e totolo ga nona vunia o vuniwai na ivola.a

VULICA NA KA DINA ENA IVOLATABU

A saga o Na me tuberi keitou vakaveitacini ena ivakavuvuli vaKarisito. E dau kauti keitou ena nodra soqoni na iVakadinadina i Jiova ena ivavakoso o Mérignac volekati Bordeaux. Niu se gone, e sega ni levu sara na ka au vulica ena soqoni. Era na dabe vata kei au na lewe ni ivavakoso mera vakavola na ka e tukuni tiko. E tarai au sara ga na nodra loloma kei na nodra veikauaitaki. Au dau vuli iVolatabu ga i vale kei Na, ia au sega ni kila vinaka sara na ka au vulica tiko. Au vakataki koya ga na parofita o Taniela ena gauna a rogoca kina na parofisai a tukuna na agilosi, e kaya: “Ka’u a rogoca, ia ka’u sa sega ni kila.” (Taniela 12:8) Ia o au, “Au raica, ia au sega ni kila.”

Ni toso na gauna, sa qai matata vei au na yavu ni ivakavuvuli ena iVolatabu. Au marautaka na ka au sa kila rawa, au saga meu bulataka sara. Au vuli tale ga mai na nodra itovo eso. Kena ivakaraitaki, e tukuna na iVolatabu meda dau vosota. (Jemesa 5:7, 8) Au sega tu ni kila na ibalebale ni vosota. Ia niu raica na nodra vakaraitaka qori o ira keimami vakabauta vata, au sa qai kila na kena ibalebale. Io, e yaga dina vei au na ivavakoso vaKarisito.

RARAWA KEI NA MARAU

Niu se itabagone, au raica nira veivosaki tiko vagalu e gaunisala ena dua na siga eso tale na itabagone era didivara. Eratou sega ni kila e vale niu dau veimaliwai kei ira, au vulica kina na Vosa Vagalu ni Varanise. Ia au se lako tiko ga ena soqoni vaKarisito, au mani sotavi Stéphane e dua na cauravou iVakadinadina e dauveikauaitaki. E dau saga me keirau veivosaki, keirau veitokani dredre sara. Ia e dua na ka rarawataki a qai yaco. A bala i valeniveivesu o Stéphane ni a sega ni via vakaitavi ena mataivalu. Au rarawataka dina qori! Dua na ka noqu yalolailai ni sa yali o Stéphane, qai tu tu yadua meu lai soqoni.

Oti e tinikadua na vula, a sere o Stéphane qai mai raici au tale e vale. Au kidacala ni sa vosa mai vagalu. Au sega sara ga ni vakabauta! A kila vakacava qori? A vulica o Stéphane mai valeniveivesu na Vosa Vagalu ni Varanise. Niu raica ni matanataka na ka e tukuna, dua na ka na noqu marau niu kila ni na yaga tale ga vei au na ka e vulica qori.

KILAI NA KA DINA ENA IVOLATABU

A vakavulici au ena iVolatabu o Stéphane. Sa qai matata vei au na ka dina ena iVolatabu au dau vakavulici kina. Niu se gone, au dau taleitaka na iyaloyalo totoka ena neimami ivola vakaivolatabu, au saga meu vakilakilai ira na droinitaki tu kina qai dikeva na kedra itukutuku meu kila vinaka na kedra italanoa. Au kilai Eparama kina, nona “kawa,” kei na “isoqosoqo levu.” Ia sa qai matata ga vei au na ka kece qori ni vakamacalataki ena vosa vagalu. (Vakatekivu 22:15-18; Vakatakila 7:9) Au sa qai vakadinadinataka niu sa kunea na noqu vosa dina, na vosa e tara sara ga na lomaqu.

Au marautaka sara ga niu sa qai kila na ka e vakavulici ena soqoni, au vinakata meu kila e levu tale na ka. Sa qai vukei au kina o Stéphane. Ena 1992, au yalataka na noqu bula vua na Kalou o Jiova, au qai papitaiso. Dina niu sa toso vakayalo, ia au se mamadua tiko ga qai dredre meu veimaliwai.

VALUTI NA MAMADUA

Toso na gauna, sa qai cokovata na iwasewase lailai ni vosa vagalu au lewena tiko kei na dua na ivavakoso mai Pessac, e volekati Bordeaux. Na veisau qori e vukei au meu toso vakayalo. Au se mamadua tiko ga, ia era dau saga na noqu itokani era sega ni galu mera vukei au meu kila na ka kece e tukuni ena soqoni. Erau dau saga e dua na veiwatini, o Gilles kei Elodie, me rau vosa vei au. Ni oti na soqoni rau dau sureti au me keitou lai kanavata se lai gunu kofi, keitou mani veitokani vinaka sara. Au marautaki dina noqu dau maliwai ira era vakatotomuria na nona ivakatagedegede na Kalou dauloloma!

Au sotava tale ga ena ivavakoso qori e dua na marama totoka o Vanessa. Au taleitaka na nona dauveikauaitaki kei na nona dau vinakata na ka dodonu. A sega ni raica o Vanessa na kequ ituvaki me vakadredretaka na neirau veivosaki, ia e raica ga ni qo e dua na sala e rawa ni vukei ira kina era vosa vagalu. Au domoni koya, keirau mani vakamau ena 2005. E sega ni rawarawa meu dau veivosaki kei ira eso tale, ia a vukei au o Vanessa meu valuta na noqu mamadua, meu doudou tale ga. Au marautaka na nona tokoni au ena itavi au qarava.

DUA TALE NA VEIVAKALOUGATATAKI I JIOVA

Ena yabaki keirau vakamau kina, au sureti ena valenivolavola ni tabana ni iVakadinadina i Jiova mai Varanise e tiko mai Louviers, meu lai vulica na cakacaka ni vakadewa me dua na vula. Ena vica na yabaki sa oti, a saga na valenivolavola ni tabana me vakarautaka na DVD ni vica vata na ivola vakaivolatabu ena Vosa Vagalu ni Varanise. Ia me vaka ni levu na ka me caka, e gadrevi na veivuke ena timi ni vakadewa.

Keirau raica vakaveiwatini ni dua dina na ilesilesi dokai meu veiqaravi ena valenivolavola ni tabana mai Varanise, e dua tale ga na nona veivakalougatataki na Kalou o Jiova. Ia meu tukuna vakadodonu, keirau a lomalomarua vakalailai. Keirau vakasamataka: Vakacava na iwasewase ni vosa vagalu keirau lewena? Vakacava na neirau vale? Ena dua beka na nona cakacaka o Vanessa ena vanua ya? A vakarautaka vakayalololoma o Jiova na iwali ni leqa kece qori. Au raica ni lomani keirau dina o Jiova, e lomani ira tale ga na didivara.

MARAUTAKA NODRA VEITOKONI

Niu veivuke tiko ena tabana ni vakadewa, au sa qai kila vinaka na sala mera vukei kina vakayalo na didivara. Dua na ka na noqu marau niu raici ira keimami cakacaka vata nira saga mera vosa vei au! E tarai au sara ga na nodra dau matanataka eso na vosa vagalu era sa bau kila toka. Au marautaka vakalevu na nodra veikauaitaki. Na loloma va qori e vakaraitaka na nodra duavata na tamata i Jiova.—Same 133:1.

Au vakavinavinakataki Jiova ni vakayagataki ira na taciqu vakayalo ena ivavakoso vaKarisito mera vukei au. Au marau tale ga niu bau vakaitavi ena nodra vukei na noqu itokani era galu mera kila na Dauveibuli dauloloma, mera volekati koya tale ga. Au rai vakanamata ena gauna eda sa na rawa ni veivosaki kece kina na kawatamata da qai vosataka na “vosa savasava”—oya na ka dina me baleti Jiova kei na nona inaki—nida sa na dua ga na vuvale veiyaloni.—Sefanaia 3:9.