Meda Karoni Ira na Tacida Era Vosa Vagalu!

ERA lewena na dauveiqaravi ni Kalou nikua e dua na matavuvale levu vakayalo, wili kina na tagane kei na yalewa ena gauna makawa. E okati kina o Samuela, Tevita, Samisoni, Reapi, Mosese, Eparama, Sera, Noa, kei Epeli. Era maliwai ira tale tu ga na dauveiqaravi yalodina i Jiova o ira na galu. Kena ivakaraitaki, erau veiwatini galu na imatai ni iVakadinadina i Jiova e Mongolia. Ena vuku ni nodra yalodina na tacida galu era tiko mai Rusia, a marautaki nodra ciqomi vakalawa ena dua na veilewai ena European Court of Human Rights.

Nikua, sa vakarautaka na “dauveiqaravi yalo dina ka vuku” na nodra ivola na galu, tauyavutaki nodra ivavakoso, qai tuvanaki na soqo ni tabacakacaka kei na soqo ni tikina me baleti ira. (Maciu 24:45, VV) E yaga dina na veika qori vei ira na tacida era galu.a Ke sega ni vakarautaki na veika qori, o bau vakasamataka se ra na vulica vakacava na veika me baleta na Kalou dina ra qai toso vakayalo? Sa bau vakasamataka tu na sala mo vukei ira kina na galu era tiko ena nomu yalava?

Na Ka Era Dau Cakava e Liu

Vakacava mo taroga eso na tacida itabaqase galu ena vuku ni veika era sotava ena nodra mai vulica na veika me baleta na Kalou? Era na rairai tukuna na ka ra vakila ena gauna era vulica kina ni tiko na yaca ni Kalou. Nodra kila na ka dina qori e veisautaka nodra bula qai vakaukauataki ira me vicavata na yabaki, ni bera mada ga na kena yaco mai na vidio ni vosa vagalu vaka kina na DVD, mera vakavulici kina ena veika titobu vakaivolatabu. Era na rairai vakamacalataka na gauna a sega ni dau vakadewataki kina na soqoni vaKarisito ena nodra vosa. Ia ena rairai dabe kei ira na galu e dua me vola na veika e vunautaki tiko me vukei ira kina. A vuli va qori e dua na tacida me vitu yabaki, ni bera ni dua e vakadewataka vua na veika e vulici tiko ena soqoni.

E levu na tacida itabaqase galu era nanuma lesu nodra cakacaka vakavunau kei ira na mataveitacini. Era na taura ena dua na ligadra na tikinipepa ni ivakamacala rawarawa baleta na itukutuku vinaka me wilika o itaukeinivale. Ena dua tale na ligadra era na taura tiko kina na ilavelave vovou ni Yadra! kei na Vale ni Vakatawa. E dredre sara nona vuli iVolatabu kei na dua tale na galu ni sega ni matata vei rau na ka e volai tiko ena ivola e vulici. O ira na dautukutuku qase era nanuma lesu na gauna e dau tuburi ira kina na yalolailai ni sega ni kilai vinaka na ka era tukuna, e yalani kina na nodra vakamacalataka na ka dina vakaivolatabu. E macala ni titobu vinaka tu nodra lomani Jiova, ia era sega ga ni yalodei mera vakaraitaka ena kena ivakatagedegede era vinakata. Na vuna? Nira sega ni vakadeitaka ni sa donu na nodra rai me baleta e dua na iulutaga.

E dina nira sotava na ituvaki dredre va qori, ia era yalodina tiko ga. (Jope 2:3) Era dau waraki Jiova. (Same 37:7) Sa vakalougatataki ira dina o Jiova ena veika era sega ni bau namaka tu me caka vei ira.

Vakasamataka mada na nona sasaga e dua na tama, e ulunivuvale tale ga. Ni bera ni yaco mai na nodra vidio na galu me ivukevuke, a dau yalodina voli ni liutaka na vuli vakavuvale. Kaya o luvena tagane: “E dau dredre vei tamaqu na caka vuli ni vakayagataka na ivola ni isoqosoqo. Levu na gauna e sega ni dau matata vua na ka e volai tiko kina. Keitou dau vakadredretaka tale ga na vuli na gone. Dau totolo ga neitou tukuna vua ke cala tiko nona vakamacala. Dina ni dau va tu qo na ituvaki, ia e dau cakava ga na vuli vakavuvale. E kila o koya ni bibi na neitou vulica na veika me baleti Jiova, a sega ni kauaitaka na nona madua ni lailai nona kila na vosa vakaValagi.”

E dua tale na tacida o Richard, e yabaki 70 vakacaca, e galu qai mataboko. A vakaitikotiko mai Brooklyn, e Niu Yoka, mai Mereke. E kilai levu ni sega ni dau calata na soqoni vaKarisito. E dau vodo sitimanivanua me lako ina soqoni, e dau wilika na gauna e kele kina me kila na vanua e sobu kina. Ena dua na vulaililiwa, a draki ca vakalevu qai lutu na cevata, mani daro na soqoni. Sa tukuni vei ira kece ena ivavakoso ni sa na daro na soqoni, ia a sega ni vakadewataki rawa vei Richard na itukutuku qori. Ena gauna era kila kina na mataveitacini na ka a yaco, era vaqarai koya ra qai kunei koya ni duri tu ena mata ni Kingdom Hall. Ni tarogi se cava e bolea kina na draki ca, e sauma, “Au lomani Jiova.”

Na Cava o Rawa ni Cakava?

Era tiko beka na galu ena vanua o vakaitikotiko kina? Rawa beka ni o vulica na nodra vosa mo ni veivosaki kina? Era dau yalomalua, ra yalovinaka tale ga na galu nira vakavulici ira tiko eso tale ena nodra vosa. O na rairai sotava e dua ena cakacaka vakavunau se dua tale na vanua, na cava o na cakava? Tovolea mo veivosaki kei ira. Rawa ni o matanataka, volavola ena pepa, droini qai dusia vei ira na iyaloyalo, se cakava kece. Ke sega ni kauaitaka na ka dina, tukuna vua e dua na tacimu galu se dua e kila na nodra vosa me baleta na nomudrau a sota. Era na rairai taleitaka cake na galu ni tukuni na ka ena nodra vosa.

De dua o sa vulica tiko na vosa vagalu, sa tiko tale ga ena nodra soqoni vakaivavakoso. O rawa vakacava ni kenadau ena nomu kila na ka e tukuni kei na nomu matanataka? Rawa sara mada ga ni o vosa qai matanataka na ka o tukuna tiko vei ira na sega ni galu. Ena yaga qo ena nomu vakasama me vaka sara ga ni o sa vosa tiko vagalu, ya na nomu raica na kena matanataki na vosa. So na gauna sa na rui dredre tale, o na rairai vinakata mo sa vosa ga yani. Ni o vulica e dua na vosa, ena vinakati na yalovosovoso ni bera ni taladrodro nomu vakayagataka na vosa qori.

Na nomu sasagataka mo kila na vosa vagalu e vakaraitaka na nomu loloma kei na nomu dokai ira na tacimu, vaka kina o ira na ganemu vaKarisito. Vakasamataka mada na ka ra vakila o ira na galu ena veisiga, nira sega ni taura na ibalebale ni ka e tukuni tiko ena gauna ni vuli kei na cakacaka. “O ira kece na maliwai au era dau veivosaki e veisiga,” e kaya e dua na tacida galu. “Au dau galili, au qai sega ni kila na ka era tukuna tiko, e vakavuna noqu dau cudru. Sega ni vakamacalataki rawa na ka au dau vakila ena so na gauna.” Na soqoni e dodonu me gauna marautaki vei ira na mataveitacini galu, ni vakarautaki kina na kakana vakayalo, ra marautaka na veivosaki kei na veimaliwai vinaka.​—Joni 13:34, 35.

Mera dau nanumi tale ga na iwasewase lalai ni galu era dau soqoni tiko ena so na ivavakoso. E dau vakadewataki na soqoni vei ira. Era dau dabe ena iyatu i liu na galu, me vakarawarawataka kina nodra raici koya e vunau kei koya e vakadewa tiko. E laurai ni toso na gauna sa na dau matau vei ira na lewe ni ivavakoso qori, qai sega ni dau vakaleqa nodra vakarorogo. Sa muri tale ga na ituvatuva qori ena soqo ni tabacakacaka kei na soqo ni tikina e vakadewataki kina na vosa vagalu. Era vakacaucautaki na lewe ni ivavakoso ena nodra vakadewataka na itukutuku, me vaka ga e matanataka tiko e dua na galu—ni vakaibalebale qai taladrodro vua na ka e matanataki tiko ena nona vosa.

De dua o lewena tiko e dua na ivavakoso e qarava na iwasewase ni vosa vagalu, se tiko kina e vica ga na galu, qai dau vakadewataki na soqoni e na vukudra. O na kauaitaki ira vakacava na tacida qori? Sureti ira ina nomu vale. Ke rawa, mo vulica eso na nodra vosa. Me kua ni vakalatilati na dredre ni veivosaki. Lakolako ga o sa na veivosaki rawa kei ira, nomu vakaraitaka na loloma va qori ena vakamarautaki iko dina. (1 Joni 4:8) E levu na ka e rawa nira dolea na tacida lotu vaKarisito galu. Era sega ni mamadua na vosa, ra dau taro, ra dau veiwali tale ga. E kaya e dua na tacida tagane erau galu nona itubutubu: “Noqu bula taucoko au dau maliwai ira tu ga na galu, au na sega ni sauma rawa na veika era cakava vei au. Levu na ka eda rawa ni vulica vei ira na tacida vakayalo era galu.”

O Jiova e lomani ira era sokalou ena yalodina, okati kina o ira na tacida era galu. Nodra ivakaraitaki ni vakabauta kei na vosota e vakaikuritaki kina na vutuniyau ni isoqosoqo i Jiova. Meda karoni ira mada ga na mataveitacini galu!

[iVakamacala e ra]

[iYaloyalo ena tabana e 31]

Era na rairai taleitaka cake na galu ni tukuni na itukutuku ni Matanitu ni Kalou ena nodra vosa

[iYaloyalo ena tabana e 32]

Na soqoni e dodonu me gauna era vakaukauataki kina vakayalo na mataveitacini era galu