Ra iTabagone​—Oni sa Toso Tiko Vakayalo?

“DINA niu dau tiko ena veisoqoni vakarisito, ia e sega ni lomaqu sara meu qaravi Jiova,” e kaya o Hideo ni nanuma lesu na nona se vuli ena sekedri. “Au dau wainidivataka niu dua na ka e koronivuli, qai yabe vakadinamati tu e yasaqu o noqu itau yalewa. E sega ni matata tu na veika meu sauva, e sega tale ga ni lomaqu meu toso vakayalo.” Levu na itabagone era ucui Hideo, nira veiciriyaki voli ga, qai vaka me sega vei ira na yalo ni via guta e so na isausau yaga se mera toso vakayalo.

Ke o se gone, sega ni vakatitiqataki ni o dau marautaka na gauna ni qito se lasa. Ia na kena veibasai vei iko na veika vakayalo. E vakaevei, ena rawa beka ni ka marautaki vei keda na sasagataki ni veika vakayalo? Vakasamataka mada na vosa ni daunisame: “Sa dina nai tukutuku i Jiova, ka sa vakavukui ira era sa sega ni vuku. . . . Sa savasava nai vakaro i Jiova, ka sa vakararamataka na matada.” (Same 19:​7, 8) Na Vosa ni Kalou e rawa ni dusimaka e dua e “sega ni vuku” me yalomatuataka na ka e cakava, qai ka oqori e lai ‘rarama kina na matana.’ Io na veika vakayalo e rawa ni vakavureki ina yalomu. Na cava e gadrevi me rawa ni vaka kina oqori na yalomu? Mo tekivu e vei?

Me Gu na Yalomu ni Via Qarava na Kalou

Taumada me gu na yalomu. Vakasamataki Josaia mada na tui gone kei Juta. A vakarota me wiliki na Lawa i Jiova ena gauna e kune kina ena valenisoro na kena ivola, qai uqeti koya dina na ka e rogoca. Kena itinitini, “sa kauta tani ko Josaia na ka vakasisila kecega mai na nodra vanua kecega na Isireli.” (2 Veigauna 34:​14-​21, 33) Na wiliki ni Vosa ni Kalou e uqeti Josaia me yalogutaka na sokalou savasava.

O iko tale ga o rawa ni bucina e lomamu na yalo ni qaravi Jiova ena nomu wilika na iVolatabu kei na nomu vakasamataka vakatitobu na ka o wilika. Oya sara ga na ka e yavalati Hideo. Tekivu vakavolekati koya vua e dua na painia e qase cake vua, oqo e dua na iVakadinadina i Jiova e goleva vakatabakidua na cakacaka vakavunau. Dau gumatuataka na vuli iVolatabu na painia oya qai saga me bulataka sara na kena ivakavuvuli. E uqeti Hideo vakalevu na nona ivakaraitaki, tekivu muria tale ga o koya na ka vata ga oya, qai gu vakalevu kina na yalona me qarava na Kalou, me vukea tale e so. Na nona toso vakayalo e lai vakainaki kina na nona bula.

Rawa ni veivakauqeti vei ira na itabagone na wili iVolatabu e veisiga. E vakamacalataka o Takahiro: “Keu sa lai moce au qai kidava niu se bera ni wilika na iwase ni iVolatabu e dodonu meu wilika ena siga oya, au na matacake meu cakava sara. Au vakila sara ga kina na veidusimaki i Jiova. E yaga vakalevu ena noqu toso vakayalo na wili iVolatabu e veisiga. E gu na yaloqu meu vakarabailevutaka noqu veiqaravi vei Jiova, au mani goleva kina na cakacaka vakapainia tudei niu sa biubiu mai koronivuli. Au marautaka tiko vakalevu edaidai na cakacaka oqori.”

Me salavata kei na wili iVolatabu, na cava tale e rawa ni uqeti iko mo vakacaucautaki Jiova? A tuberi Tomohiro ena ka dina vakaivolatabu na tinana. E kaya: “Niu sa yabaki 19, sa qai lauti au tu na loloma levu i Jiova kei na yaga ni isoro i Jisu niu sa qai taleva vakavinaka na ivola Life Does Have a Purpose [E Vakainaki Dina na Bula]. E qai yavalati au meu toroya cake noqu veiqaravi vei Jiova na noqu liaca na loloma ni Kalou.” (2 Korinica 5:​14, 15) Me vaka ga a vakila o Tomohiro, oni uqeti na itabagone mo ni vulica vagumatua vakataki kemuni na iVolatabu mo ni toso kina vakayalo.

Vakacava ke o sa cakava oqori, ia e se sega tiko ga ni lomamu mo qaravi Jiova? E tiko beka e dua mo kere veivuke kina? A vola na yapositolo o Paula: “Sai koya na Kalou sa cakacaka e na lomamudou . . . mo dou nakita ka kitaka.” (Filipai 2:​13) Ke o masuta na veivuke i Jiova, ena solia wale vei iko na yalona tabu. Ena vakaukauataki iko oqori mo sega wale ga ni “kitaka,” ia mo “nakita” tale ga. Kena ibalebale oqo, na yalo tabu ni Kalou ena vakalevutaka nomu gagadre mo qaravi Jiova ena nomu vinaka duadua, ena vukei iko tale ga mo tubu vakayalo. O koya gona, mo nuitaka na kaukaua i Jiova, qai vaqaqacotaka na lomamu!

Me So na Nomu iSausau

Ke sa lomamu mo qaravi Jiova, e bibi me so sara nomu isausau me na tosoi iko vakayalo. E kaya o Mana, e dua na goneyalewa lotu Vakarisito: “Bau veivuke dina vei au noqu kelea e so na isausau meu kakavaka. Rawa kina vei au meu kua ni suka i muri, ia meu toso i liu ena doudou. Niu vakasamataka tiko na ka meu na sauva, au masu vagumatua vei Jiova me dusimaki au kina. Au raica niu toso rawa kina vakayalo qai sega na ka me vagolea tani noqu vakasama.”

Na nomu isausau me rawarawa ga, me kua soti ni ka e sagasagai dredre. Dua na isausau veiganiti na nomu wilika e dua na wase ni iVolatabu ena dua na siga. Rawa tale ga ni o digitaka e dua na usutu mo vakekeli kina. Me kena ivakaraitaki mada, de o na via vulica vakamatailalai ena vosa vakavalagi na veitovo e divi kina o Jiova era tuvai toka ena ulutaga lailai, “Qualities by Name [Yacadra na Dui iTovo],” ena ivoladusidusi na Watch Tower Publications Index. Rauta ni 40 taucoko na levu ni ka o rawa ni dikeva, qai sega ni vakatitiqataki ni nomu vakadidike oqori ena qai vakavolekati iko ga vei Jiova, qai uqeti iko mo toroya cake na levu ni ka mo cakava ena vukuna. Na isausau o rawa tale ga ni sauva oya na nomu tovolea mo bau vakamacala vakadua mada ga ena soqoni vakarisito, nomu saga mo kila vakavinaka e dua ena veigauna ni soqoni vaka oqori, kei na nomu tovolea me kua ni dua na siga mo sega ni masu kina vei Jiova kei na nomu tukuni koya vei ira tale e so.

Ke o se sega ni curu ena Koronivuli ni Vuli Vunau, ena dua na isausau vinaka vei iko oya. Vakacava, o sa dau lako tale tiko ga ena cakacaka vakavunau? Ke sega, de vinaka mo sasagataka mo dua na dautukutuku bera ni papitaiso. Na ikalawa sa dodonu me veimuri kei na kena oqori na nomu vakasamataka vakabibi nomu veiwekani kei Jiova kei na nomu yalataki iko sara vua. Levu na itabagone era goleva na cakacaka vakaitalatala vakatabakidua me rawa nira dina tiko ga kina ina nodra vosa ni yalayala vei Jiova.

Dina ni yaga me tiko na isausau me kakavaki, qarauna ga na yalo ni veisisivi. O na marau cake ke o sega ni vakatauvatani iko kei na dua tale.​​—⁠Kalatia 5:​26; 6:⁠4.

De o nanuma ni se lailai nomu kila qai dredre kina mo kelea e so na isausau veiganiti mo sauva. Ke dina oqori, muria na ivakasala vakaivolatabu oqo: “Mo vakalakala daligamu, mo rogoca na nodra vosa na vuku.” (Vosa Vakaibalebale 22:17) Kere veivuke vei rau nomu itubutubu kei na so tale na lotu Vakarisito matua. Ia e bibi mera yalorawarawa ra qai dau veivakauqeti ena tikina oqo na itubutubu kei na so tale. Ke ra biligi na gone mera kakavaka e so na isausau, era na sega ni marautaka oqori, ena sega tale ga ni yaga vei ira. Na ka oya e sotava e dua na goneyalewa. E kaya kina: “Veitarataravi ga na isausau erau biuta e mataqu na noqu itubutubu, me vaka na vakaitavi ena Koronivuli ni Vuli Vunau, na cakacaka vakavunau, papitaiso, kei na cakacaka vakapainia. Dua na ka noqu sasaga meu sauva kece. Niu sa rawata e dua, erau sega ni vakavinavinakataki au na noqu itubutubu, ia erau baci tukuna meu sasagataka tale e dua. Vaka meu vakila niu biligi meu rawata na veisausau oya. Au tini oca wale ga, au sega tale ga ni marautaka na ka au rawata.” Na cava e leqa? Era isausau vinaka kece oya, ia era sega ni nona isausau. O na gumatua wale ga ke o iko sara ga o guta mo kelea vakataki iko na nomu isausau!

Vakasamataki Jisu Karisito. Ni sa lako mai vuravura, e sega tale ni qai buawa vei koya na ka e loma i Tamana vua. A sega ni vaka wale tu ga e dua na isausau oya vei Jisu me sauvi, ia e okata me nona ilesilesi sara ga. Raica beka vakacava o Jisu na nona ilesilesi? E kaya: “A qau kakana me’u kitaka na loma i koya sa talai au mai; ka me’u vakaotia na nona cakacaka.” (Joni 4:​34) E ka ni reki vei Jisu me cakava na loma i Jiova qai vakayacora kece na ka e vinakata vua o Tamana. Na ka oqo e vaka na kakana vei Jisu​​—⁠e marautaka qai taleitaka dina me vakaotia na cakacaka e soli vua me cakava. (Iperiu 10:​5-​10) Ke donu na nomu rai me baleta na ka erau uqeti iko kina nomu itubutubu mo cakava, o iko tale ga o rawa ni marautaka dina ni vakayacora na ka oqori.

Kua ni Datuvu Koso ena Caka Vinaka

Ke sa dei ena nomu vakasama e dua na isausau mo sasagataka, tovolea sara vakaukaua mo rawata. E kaya na Kalatia 6:9 (VV): “Me da kakua kina ni oca e na caka vinaka ni da na tatamusuki e na kena gauna, kevaka eda sega ni datuvu koso.” Kua ni nuitaka nomu kaukaua se nomu vakasama ga. Macala tu ga ni o na sotava e so na ka dredre, qai so na gauna o na via yalolailai. Ia e tauca na vosa veivakacegui oqo na iVolatabu: “Mo vakarogotaka vua [na Kalou] na nomu sala kecega, ia ena vakadodonutaka na nomui lakolako ko koya.” (Vosa Vakaibalebale 3:⁠6) Ena tokoni iko o Jiova ena nomu sasaga vakaukaua mo rawata na nomu isausau vakayalo.

Io, ke o bucina e lomamu na gagadre ni via qaravi Jiova o qai kakavaka e so na isausau vakayalo, era na qai ‘raica kece na nomu tubucake’ na tamata. (1 Timoci 4:​15) Nomu cakava oqori ena qai vakainaki cake kina nomu bula ni veiqaravi vua na Kalou.

[iYaloyalo ena tabana e 9]

Ke o dau wili iVolatabu o qai vakasamataka vakatitobu na ka o wilika, ena uqeti iko oqori mo qaravi Jiova

[iYaloyalo ena tabana e 10]

E cakava kece o Jisu na ka e vinakata vua o Tamana