Tukutuku Mai na Daukacivaka na Matanitu

Veivuke ena Kena Rokovi Tiko ga na Dra

ERA vakaraitaka na dauveiqaravi i Jiova e vuravura raraba na nodra yalodina vua na Kalou ena kena rokovi na dra. (Cakacaka 15:​28, 29) E dodoliga na dauveiqaravi yalodina ka vuku ena nodra vukei na mataveitacini e vuravura raraba. (Maciu 24:​45-​47, VV) Meda raica mada na veika a yaco ena Yatu Filipaini.

E volaitukutukutaka na valenitabana mai na Yatu Filipaini: “Ena 1990 a tukuni vei keimami nira na mai vakayaco vuli ena Yatu Filipaini na mata mai na Peceli e Brooklyn. Era sureti kina na tacida mai na vica na valenitabana e Esia, wili kina o Korea, Taiwan kei Hong Kong. E kena inaki me tauyavutaki e dua na Tabana ni iTukutuku ni Valenibula ena veivalenitabana yadua, qai tuvanaki tale ga na Komiti Veitaratara kei na Valenibula. Era tauyavutaki na komiti ena va na korolevu mai na Yatu Filipaini.” Eratou saga na lewe ni komiti mera qarai na vuniwai ena tu vakarau me vukei keda ena vuku ni noda vakabauta vakarisito me baleta na dra. Eratou na vukei ira tale ga na tacida ke basika e so na ituvaki dredre me baleta na dra.

A digitaki o Remegio me lewe ni Komiti Veitaratara kei na Valenibula mai Baguio. Ni toso na gauna, era sa qai tekivu kila mai na vuniwai na veiqaravi ni Komiti oqo. E nanuma lesu o Remegio na gauna era a bose tiko kina na Komiti kei ira na vuniwai, era via kila na vuniwai se ra na qaravi vakacava na iVakadinadina nira sega ni tauri dra. E kaya o Remegio: “Eratou vakataroga e levu na ka, au qai rarawataka baleta nira sa rui taro dredre.” A mani masu vei Jiova me vukei koya. E tomana o Remegio: “Na gauna e taro oti kina e dua, era laveliga e so tale na vuniwai mera vakamacalataka na ka era dau cakava ena ituvaki vata oya.” A marautaka o Remegio na veivuke oqori, vakabibi nira veitarotarogi tiko me rua na aua.

E 21 taucoko na komiti ena vanua oya, ra qai lewena e 77 na tacida. E kaya o Danilo, e dua na iVakadinadina e vuniwai: “Era kila na vuniwai ni dau tokoni ira vakayalololoma na iVakadinadina era tauvimate e dua na isoqosoqo.” E dua na vuniwai a sega ni via seleta e dua na tacida ena imatai ni gauna ni na sega ni vakayagataki kina na dra. Ia, a dei tiko ga ena nona vakabauta na tacida oya. A mani seleti koya qai sega ni sotava kina e dua na leqa. E volaitukutukutaka na Tabana ni iTukutuku ni Valenibula: “A kurabuitaka na vuniwai na nona bula totolo na tacida oya. E kaya: ‘Ena vuku ni ka e yaco oqo, au tu vakarau meu veisele ke dua tale vei kemuni e vinakata me caka vua na veisele e sega ni vakayagataki kina na dra.’”