iTalanoa ni Nona Bula

Vakamamadataka na Rarawa na Qaravi Ira na Tani

TALANOATAKA O JULIÁN ARIAS

Ena1988, gauna au se yabaki 40 kina, e kena irairai ni a dei tu na noqu cakacaka saumi. Au a lesi meu regional director ni dua na kabani era lewena na veimatanitu. Na noqu cakacaka isau vinaka oqo e soli tale ga kina e dua na motoka isaulevu, kei na dua na valenivolavola totoka e koto ena loma kei Madrid, e Sipeni. Au a siqema mai na noqu veitaratara kei na kabani ni ratou na qai lesi au meu nodratou national director. Ia au a sega ni kila ni na yaco e dua na veisau levu ena noqu bula.

DUA na siga ena yabaki oya, a tukuna vei au na noqu vuniwai niu tauvi multiple sclerosis, qai sega na kena iwali. Dua na ka na noqu rarawa. E muri, na gauna au wilika kina na ka e rawa ni cakava na mate oqo vua e dua e tauva, au rere sara ga.a Kena irairai niu na bula rerere voli me yacova niu mate. Au na qarava vakacava na watiqu, o Milagros, kei na luvequ tagane e yabaki tolu, o Ismael? Au na walia vakacava na leqa oqo? Niu se qara voli na isau ni veitaro oqori, sa yacovi au tale e dua na ituvaki rarawataki.

Oti e dua na vula nona tukuna vei au na kequ mate o noqu vuniwai, a kacivi au noqu boso ni cakacaka ina nona valenivolavola qai tukuna ni vinakata na kabani na tamata e “bulicaki vinaka.” Ena sega ni boroya na iyaloyalo oqo e dua e tauvi koya tiko e dua na mate e veivakaleqai vaka oqo​—dina ni se qai tekivu wale ga. Gauna vata oya, sa vakasakei au kina noqu boso. Sa mai tini koso tu vakasauri na noqu cakacaka saumi!

Au dau vakaukauataki au e matadrau na noqu veitinani, ia dua na ka na noqu gadreva meu tiko taudua ga meu vakasamataka kina na kequ ituvaki vou, kei na bula sa tu oqo e liu. Au saga meu valuta na yalolailai e dau tuburi au. E mositi au ni vakasauri ga sa okati au na noqu kabani ni cakacaka meu tawayaga.

Au Vakaukauataki Niu Malumalumu

Au vakavinavinakataka ga ni gauna rarawataki oqo, au rawa ni vakanuinui ina vuqa na ivurevure ni veivakaukauataki. Rauta na 20 na yabaki e liu, au mai dua kina na iVakadinadina i Jiova. Au masulaka gona vei Jiova na veika e tu e lomaqu kei na bula veilecayaki sa tu oqo e liu. O watiqu e dua tale ga na iVakadinadina, e dau vakayaloqaqataki au vakalevu, ra qai veivakayaloqaqataki tale ga e so na noqu itokani voleka. Na nodra veikauaitaki kei na nodra veinanumi e yaga vakalevu.​—Vosa Vakaibalebale 17:17.

E bau veivuke tale ga na noqu kila ni tiko na noqu itavi vei ira na tani. Au vinakata meu susuga vinaka na luvequ, meu vakavulica, qito vata kei koya, qai vakavulici koya ena cakacaka vakavunau. Au sega ni rawa kina ni soro koso. Kuria, au dua na qase ni ivavakoso ni iVakadinadina i Jiova, era gadreva na noqu veitokoni o ira na taciqu tagane kei ira na taciqu yalewa lotu Vakarisito. Keu vakalaiva na kequ ituvaki me vakamalumalumutaka na noqu vakabauta, au na qai ivakaraitaki vakacava vei ira na tani?

Ia, e veisau na noqu bula vakayago kei na noqu bula vakailavo​—so na veisau e vinaka, so e ca. Dua na gauna au a rogoca ni kaya e dua na vuniwai: “Na tauvimate e sega ni vakarusa na tamata, ia ena veisautaki koya ga.” Au vulica ni so na veisau oqo e dau vinaka.

Kena imatai, e vukei au na ‘votonikau sa lauta tiko na lewequ’ meu kila vinaka na kedra ituvaki tautauvimate na so kei na noqu kauaitaki ira. (2 Korinica 12:7) Au mai kila vinaka kina na ibalebale ni veivosa ena Vosa Vakaibalebale 3:5: “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua.” Kena ilutua, au vulica rawa mai na kequ ituvaki vou oqo na ka e bibi duadua ena noqu bula, na cava e vu ni veivakacegui dina, kei na noqu vakila ni se tiko na kequ yaga. E levu na ka au se rawa ni cakava ena isoqosoqo i Jiova. Au kila kina na ibalebale dina ni veivosa i Jisu: “A ka ni veivakalougatataki vakalevu me soli ka, ka vakalailai ga me taura na ka.”​—Cakacaka 20:35.

Dua na Bula Vou

Gauna a dikevi oti kina na noqu tauvimate, au a sureti ina dua na vuli a vakayacori mai Madrid, era vakavulici kina na lotu Vakarisito era bole yani mera vukei ira na vuniwai kei ira na iVakadinadina tauvimate mera cakacaka vata. E muri, era lesi na bolecakacaka oqo mera lewe ni Komiti Veitaratara kei na Valenibula. Vei au mada ga, na vuli oqo e yaco donu mai. Au sa mai kunea e dua na cakacaka vinaka, na kena e vakamarautaki au cake ni vakatauvatani kei na dua na cakacaka saumi.

Keimami vulica ni na gadrevi vua na Komiti Veitaratara kei na Valenibula e se qai tauyavutaki vou oqo me sikova na veivalenibula, veivosaki kei ira na vuniwai, vakamacala vei ira era qarava na tabana ni bula, ena inaki mera bucina na yalo ni cakacaka vata qai tarovi kina na duiyaloyalo. Na komiti oqo e vukei ira na iVakadinadina mera kunea na vuniwai e bole me veiqaravi ena kena sega ni vakayagataki na dra. E dina niu sega ni vuli vuniwai, ia e gadrevi meu kila na vosa era vakayagataka na vuniwai, nodra ivakavuvuli, kei na ituvatuva ni valenibula. Na vuli oqo e veisautaka na ivakarau ni noqu vakasama, qai vakarautaki au ina ka ni bolebole vou e vakamarautaki au.

E Veivakacegui na Veisiko e Valenibula

Dina ga ni sa vakaleqa tiko vakamalua na yagoqu na noqu tauvimate, ia e sa qai levu ga na noqu itavi me vaka niu dua na lewe ni Komiti Veitaratara kei na Valenibula. Au dau taura tiko e veivula na ilavo e vakarautaki me baleti ira e vakaleqai tu na yagodra, e rawa kina meu dau veisiko e valenibula. Au dau yalolailai ena so na gauna, ia na veisiko vaka oqo e rawarawa qai marautaki dina. Ena gauna oqo au sa veitosoyaki voli ga ena idabedabe qiqi, ia oqo e sega ni leqataki vakalevu sara ni keirau dau salavata kei na dua na noqu itokani e lewe ni komiti tale ga. Kuria oya, era matau na vuniwai mera veivosaki kei ira na tamata era vodo ena idabedabe qiqi, qai so na gauna nira raica na noqu sasaga meu sikovi ira era na vakatudaliga ena nodra veidokai.

Sa oti oqo e tini na yabaki, au sa sikova oti e vica na drau na vuniwai. So era tu vakarau mera vukei keitou ena imatai ni veisiko. O Vuniwai Juan Duarte​—e dua na vuniwai ni uto mai Madrid e dau doka na nona lewaeloma na tauvimate​—a tu vakarau me veiqaravi. Tekivu mai kea, sa sivia oqo e 200 na nona veisele vei ira na iVakadinadina tauvimate ena levu na yasa i Sipeni ni sega ni vakayagataka na dra. Ena vica vata na yabaki sa sivi e levu sara na vuniwai era sa veisele tiko ena nodra sega ni vakayagataka na dra. E rawa ni vakavuna oqo na neitou dou veisiko wasoma, ia e rawa ni vakavuna tale ga na toso vakavuniwai sa rawati ena gauna oqo kei na nodra bula totolo na tauvimate ni sega ni vakayagataki na dra ena gauna ni veisele. Keitou vakadeitaka ni vakalougatataka o Jiova na neitou sasaga.

A vakauqeti au vakalevu na ka era cakava e so na vuniwai ni uto era dau qaravi ira na gone. Sa oti oqo e rua na yabaki na neitou dau sikova tiko e dua na timi eratou lewena e rua na vuniwai kei na rua na dauveivakamoceri. Keitou solia vei iratou e so na ivola vakavuniwai e vakamacalataki tu kina na ka era sa cakava tiko e so tani tale na vuniwai ena ituvaki vata vaka oqo. A vakavatukana na neitou sasaga ena 1999 na gauna a vakayacori tiko kina na Medical Conference on Infantile Cardiovascular Surgery. O rau na vuniwai keitou a vukea​—kei na nona veitokoni e dua na vuniwai mai Igiladi​—eratou a cakava e dua na veisele dredre sara vua e dua na gonedramidrami e luve ni iVakadinadina me vakavinakataki na nona sala levu ni dra.b Au duavata kei rau na itubutubu ena neitou marau ena gauna e mai tukuna kina e dua vei iratou na vuniwai mai na rumu ni veisele ni a lako vinaka na veisele qai rokovi tale ga na nodratou lewaeloma na vuvale. Nikua, o rau na vuniwai oqo, erau dau ciqomi ira na iVakadinadina tauvimate mai na veiyasa i Sipeni.

Na ka au marautaka vakalevu mai na veikisi oqo na noqu kila niu rawa ni vukei ira na taciqu lotu Vakarisito. Nira veitaratara kei na Komiti Veitaratara kei na Valenibula, oqo e dua na gauna dredre ena nodra bula. E gadrevi mera sele, o ira na vuniwai ena valenibula e kea era sega ni bolea se sega ni rawa ni seleti ira ni na sega ni vakayagataki na dra. Ia, nira kila na mataveitacini ni tu vakarau e so na vuniwai ena tabana kece ni veiqaravi vakavuniwai e Madrid mera veisele, dua na ka nodra lomavakacegu. Au raica sara ga na veisau ni kena irairai e dua na tacida tagane mai na lomaleqa ina lomavakacegu, ni keitou lai raici koya e valenibula.

Turaganilewa kei na iVakavuvuli Vakavuniwai

Ena veiyabaki wale tiko ga oqo, era a sikovi ira tale ga na turaganilewa na lewe ni Komiti Veitaratara kei na Valenibula. Ena veisiko oya, keitou a solia kina vei ira na ivola e vakatokai na Family Care and Medical Management for Jehovah’s Witnesses, na inaki ni kena tabaki me vakamacalataka vei ira na vakailesilesi na noda vakabauta me baleta na vakayagataki ni dra, vaka kina na wainimate e rawa ni vakayagataki me isosomi ni dra. E gadrevi vakalevu na veisiko oqo, baleta e dau kena ivakarau e Sipeni me lewa na turaganilewa vei vuniwai na kena soli na dra vei tauvimate, kevaka mada ga a besetaka.

E veivakadrukai na nodra rumu na turaganilewa, ena imatai ni noqu veisiko e kea, au beci au niu veitosoyaki voli ena pasese ena idabedabe qiqi. Kuria oya, au a lutu vakacalaka mai na noqu idabedabe. E so na turaganilewa kei na loya era a mai veivuke nira raica na kequ ituvaki, ia au a madua dina e matadra.

Dina nira sega ni vakadeitaka na turaganilewa na vu ni neitou veisiko yani, ia era a veiciqomi ena yalovinaka. Na imatai ni turaganilewa au a sikova e sa dau lomatarotarotaka voli tu na noda vakabauta me baleta na dra, e tukuna o koya ni na taleitaka me veitalanoataka na tikina oqo. Ena neitou veisiko tarava, a vaqiqici au sara ina nona rumu qai vakarorogo vinaka. Na vuavuaivinaka ni veisiko oqo e vakauqeti au kei iratou na noqu itokani me keitou kua ni rere, sega ni dede keitou sa raica e vuqa tale na ka vinaka.

Ena yabaki vata tiko ga oya, keitou a solia na ivola na Family Care vua e duatani tale na turaganilewa, a ciqomi keitou qai yalataka ni na wilika na ivola. Au a solia vua na noqu naba ni talevoni ke gadreva me veitaratara kei keitou ni yaco e dua na leqa tubukoso. Oti e rua na macawa a qiriti au mai ni a kerei koya e dua na vuniwai ni vanua oya ke rawa ni vakadonuya me soli na dra vua e dua na iVakadinadina e gadrevi me na sele. A kaya vei keitou na turaganilewa ni gadreva na neitou veivuke me qarai e dua na iwali e rawa ni rokovi kina na gagadre ni iVakadinadina me kua ni vakayagataki na dra. A rawarawa sara ni kunei e duatani tale na valenibula, ra qai veisele kina na vuniwai nira sega ni vakayagataka na dra. Dua na ka na nona marau na turaganilewa ni rogoca na ka a yaco, qai vakadeitaka vei keitou ni oya sara ga na ka ena cakava ena gauna sa tu oqo e liu.

Ena noqu veisiko e valenibula, e dau veivosakitaki vakalevu na ivakavuvuli vakavuniwai, ni keitou vinakata mera kauaitaka tiko na vuniwai na nona dodonu kei na nona lewaeloma na tauvimate. E dua na valenibula e dau veitokoni mai Madrid a sureti au meu vakaitavi ena dua na vuli eratou vakarautaka me baleta na ivakavuvuli vakavuniwai. Na vuli oqo e vukei au meu vakamacalataka kina na noda rai vakaivolatabu vei ira e vuqa na kenadau ena tabana vakavuniwai. E vukei au tale ga meu kila na vakatulewa dredre era dau tauca na vuniwai.

E dua na qasenivuli ena vuli oqo, o Parofesa Diego Gracia, e dau tuvanaka wasoma na nodra vuli na vuniwai ni Sipeni ena kena vulici na ivakavuvuli vakavuniwai, qai dua e dau tokona sara ga na nona dodonu me tarogi na tauvimate ena vuku ni kena soli na dra.c Neitou dau veitaratara wasoma kei koya, e mani sureti ira kina e so na mata mai na nodra valenivolavola ni tabana na iVakadinadina i Jiova mai Sipeni, mera vakamacalataka na noda vakabauta me baleta na dra vei ira na gonevuli i Parofesa Gracia era vuli vuniwai, e so vei ira era okati mera vuniwai vinaka e nodra vanua.

Kequ iTuvaki Dina

E dina, e sega ni vakaotia vakadua na ituvaki rarawataki au sotava tiko na cakacaka marautaki au cakava ena vukudra na noqu itokani vakabauta vata. Sa qai tete ga na noqu tauvimate. Au kalougata ni tu vinaka tu ga na noqu vakasama. Au vakavinavinakataki watiqu vaka kina na luvequ tagane, rau sega vakadua ni vosakudrukudrutaka na kequ ituvaki, au se cakava rawa tiko ga na noqu itavi. E rawa wale ga oqori ni rau veivuke qai veitokoni kina o watiqu kei luvequ. Au sa sega mada ga ni bulukautaka rawa na noqu tarausese se dara na kote. Au dau marautaka vakalevu na lai vunau vata kei luvequ, o Ismael ena veivakarauwai, e dau biliga e veivanua na noqu idabedabe qiqi meu rawa ni vunau kina vei ira na duidui itaukeinivale. Au se qarava rawa tiko ga na noqu itavi vaqase ni ivavakoso.

E levu sara na ituvaki mosimosi au sotava ena loma ni 12 na yabaki sa oti. So na gauna, noqu raica na kena tara na noqu vuvale na kequ ituvaki e dau mositi au vakalevu ka sega so na noqu tauvimate. Au kila ni rau rarawataka, dina ni rau sega ni vakaraitaka. Ena loma ni dua ga na yabaki, a mate na noqu nei kei tamaqu. Ena yabaki vata tiko ga oya, au sa veitosoyaki rawa ga ena idabedabe qiqi. Ni bera ni mate o tamaqu keitou a tiko vata, a tauvi koya e duatani tale na mate e kakana vakamalua. A qaravi tamaqu o Milagros, e vaka e raica tiko na ka ena yacovi au ena dua na gauna sa tu oqo e liu.

Ia, ena yasana vinaka, keitou duavata vakavuvale ni keitou sotava vata na ituvaki dredre oqo. Dina ni sa mai sosomitaka na idabedabe ni regional director na idabedabe qiqi, ia au rawa ni kaya ni vinaka cake na noqu bula niu vakayagataka vakatabakidua ina nodra qaravi na tani. Noda solia vakatabakidua na noda gauna kei na noda igu me baleti ira na tani e rawa ni vakamamadataka na noda rarawa, qai dau dina o Jiova ena nona vosa ni yalayala me vakaukauataki keda ena gauna eda gadreva kina. Me vakataki Paula ga, au rawa ni kaya vakaidina: “Au sa rawata na kaukaua ena ka kece ga ena vuku i koya sa vakaukauataki au.”​—Filipai 4:​13, NW.

[iVakamacala e ra]

[Kato ena tabana e 24]

Nona Rai o Watina

Me dua na yalewa vakawati e tiko vata kei watina e tauva tu na multiple sclerosis ena sotava na rarawa​—ni yalo, vakasama, vaka kina vakayago. Ena dodonu meu veinanumi ena ka au lalawataka meu cakava kei na noqu tu vakarau meu biuta tani na kena nuiqawaqawataki wale na gauna sa bera mai. (Maciu 6:​34) Ia, nida bula voli ena rarawa e rawa ni basika kina na nona veitovo vinaka e dua. Sa qai qaqaco vinaka ga na neirau bula vakawati, vaka kina na noqu veiwekani kei Jiova. Na italanoa ni nodra bula na so era sotava na ituvaki rarawataki vaka oqo e dau vakaukauataki au sara ga vakalevu. Au duavata kei Julián ena lomavakacegu e vu mai na nona marautaka na qaravi ira na mataveitacini, vaka kina noqu raica ni sega vakadua ni guilecavi keitou o Jiova, dina ni veisiga ena rairai basika vata mai kei na dua na ka ni bolebole vou.

[Kato ena tabana e 24]

Nona Rai o Luvena

E ivakaraitaki totoka dina o tamaqu ena vuku ni nona vosota kei na nona rai donu, au okata me dua na kequ yaga niu kauti koya e veivanua ena nona qiqi. Au kila niu sega ni cakava rawa na ka au dau taleitaka meu cakava. Ena gauna oqo au se cauravou, niu tamata uabula, au na vinakata meu lewe ni Komiti Veitaratara kei na Valenibula. Au kila mai na vosa ni yalayala ena iVolatabu ni na sega ni tudei na rarawa eda sotava, au kila tale ga ni vuqa na tacida tagane se tacida yalewa era sotava vakalevu cake sara na rarawa mai na kena keitou sotava tiko.

[iYaloyalo ena tabana e 22]

E vu ni veivakaukauataki o watiqu

[iYaloyalo ena tabana e 23]

Veitalanoa tiko kei na vuniwai ni uto o Juan Duarte

[iYaloyalo ena tabana e 25]

Au marautaka na cakacaka vakavunau vata kei luvequ tagane