Era Qaravi Ira na Tacidra Lotu Vakarisito e Vuravura Raraba

O SA bau rogoca mada na matavosa “dauveiqaravi raraba” (international servants) se “o ira na bolecakacaka raraba” (international volunteers)? O ira na iVakadinadina i Jiova era bolecakacaka ena tabana oqo, era solia nodra gauna kei na nodra kila mera tara na vale e tabaki qai veisoliyaki kina na itukutuku vakaivolatabu ni Matanitu ni Kalou. O ira oqo era veivuke ena kena tara na Assembly Hall kei na Kingdom Hall, na vanua ni veivakavulici ena iVolatabu. Ena gauna mada ga oqo era sa veivuke tiko ena taravale ena 34 na vanua, vakabibi ena veivanua dravudravua. Na dredre cava kei na marau era sotava o ira oqo nira qaravi ira na tacidra lotu Vakarisito e vuravura raraba? Cava nodra rai me baleta na ‘veiqaravi tabu’ era cakava tiko? (Vakatakila 7:​9, 15) Me saumi na taro oqori, da rogoci ira mada e so na bolecakacaka oqo ena nodra veiqaravi e Mexico.

Era yaco yani e Mexico na bolecakacaka oqo ena Me 1992. Oti ga oya, era sa liutaka sara na vakalevutaki ni valenitabana e qarava na cakacaka ni iVakadinadina i Jiova e kea. Na vakalevutaki ni valenitabana oqo e wili kina e 14 na vale vou, e oka kina na nodra itikotiko na bolecakacaka era veiqaravi ena valenivolavola ni tabana, na vale ni tabaivola, kei na valenivolavola.

Era mai veivuke ena kena tara na vale oqo e sivia e 730 na bolecakacaka era gole mai Kenada, Mereke, Peritania, kei na so tale na vanua, era cakacaka vakavoleka kei na vica tale na drau na bolecakacaka mai na veiyasa i Mexico. Kuria oya, e sivia na 28,000 na iVakadinadina era lewena e rauta ni 1,600 na ivavakoso era tiko volekata na valenitabana era dau veitomani ena cakacaka ena muanimacawa. Era soli ira vakarawarawa mera cakava na veika era kenadau kina, ra qai sega ni saumi. Era raica ni ka ni veivakalougatataki nodra qaravi Jiova ena sala oqo. Nira tara tiko na vale oya, era nanuma matua na vosa ni veivakauqeti ena Same 127:1: “Kevaka sa sega ni tara na vale ko Jiova, era sa oca wale ko ira era sa tara.”

Veika Dredre Era Sotava

Na veika dredre cava era sotava na dauveiqaravi raraba oqo nira lai cakacaka e vanuatani? Oqo e so na ka era dikeva rawa. E dua na veiwatini ni Mereke o Curtis kei Sally rau a veivuke ena taravale mai Idia, Jamani, Mexico, Paraguay, Romania, Rusia, Senegal, kei Zambia. A kaya o Curtis: “Na imatai sara ga ni ka dredre keirau sotava oya na neirau biuta tu mai na luve i keirau yalewa, e painia tiko [cakacaka vakatabakidua], kei na ivavakoso keirau lewena e Minnesota. Keirau lewena na ivavakoso oya kei watiqu ena loma ni 24 na yabaki, keirau sa matau tale ga kina.”

A dikeva o Sally: “E dredre dina na bula ena vanua vou eda sega ni matau kina, vakabibi vei keda na yalewa, ia au vulica ni rawa nida veisau. Au vulica tale ga na bula ena vanua e levu kina na manumanu lalai!” E kuria: “Ena dua na vanua, keitou tiko kina e lewe tini ena dua ga na vale e sega na kena valenikuro, qai rua ga na kena valenisili. Au vulica kina na yalovosovoso.”

E dredre tale ga na vulica na vosa ni dua tale na vanua, e gadrevi kina na sasaga kei na yalomalumalumu. Rau taravale ena levu na vanua o Sharon kei na watina, e kaya kina o Sharon: “E dredre dina ke da sega ni kila na vosa ni vanua eda lai veiqaravi kina. Taumada, e dredre meda volekati ira na tacida vakayalo, ni sega ni rawa meda tukuna vei ira na ka e tu e lomada. E veivakayalolailaitaki dina. Ia o ira na mataveitacini ena veivanua oqo era dau vosovoso, ra qai kauaitaka dina na neimami tiko vinaka. Sega ni dede keimami sa rawa ni veivosaki.”

Gadrevi na Yaloqaqa ena Cakacaka Vakaitalatala

O ira na tu vakarau mera soli ira ena cakacaka ni kena tara na vale vaka oqo, era kila ni bibi duadua na nodra kacivaka na itukutuku vinaka ni Matanitu ni Kalou. Oya na vuna era dau tokona kina na cakacaka vakaitalatala ni ivavakoso era lai lewena ena vanua oya. E dua na veiwatini o Åke kei Ing-Mari, rau veivuke ena tara ni vale e Guadeloupe, Malawi, Mexico, kei Nigeria, rau vakadinata ni gadrevi dina na yaloqaqa ena kena vosataki na vosa ni vanuatani ena cakacaka vakaitalatala.

A kaya o Ing-Mari: “Ni tekivu, keirau dau vakaitavi ga vakalalai, keirau dau salavata kei ira na iVakadinadina ena vanua oya, keirau dau tukuna vei ira mera na vunau tiko ga ni keirau madua. Ia, dua na mataka keirau nakita me keirau sa lako taurua ga ena cakacaka vakavunau. Keirau sega soti sara ni lomanuidei. Keirau sotava e dua na marama e rogoca na noqu ivakamacala au a vakarautaka yani. Au wilika e dua na tikinivolatabu qai solia vua e dua na ivola. A qai kaya na marama oya: ‘Tukuna mada vei au e dua na ka. Dua na wekaqu e vuli iVolatabu tiko kei na dua na iVakadinadina i Jiova. Au rawa ni vuli tale ga vaka oya?’ Noqu kurabui au sega sara ga ni tukuna e dua na ka. Au mani tauri au vakamalua qai sureti koya me vuli iVolatabu.”

E kuria o Ing-Mari: “Dua na ka na noqu marau kei na noqu vakavinavinakataki Jiova ni vakalougatataka na neirau sasaga kei na neirau gadreva me keirau wasea yani na ka dina.” A toso vinaka na marama oqo, a qai papitaiso me dua na iVakadinadina ena soqo ni tikina ena korolevu o Mexico. Rau a qai tinia vaka oqo o Åke kei Ing-Mari na nodrau cakacaka vakaitalatala: “Dua na ka na neirau vakamareqeta na neirau ilesilesi ena vanua keirau lai taravale kina, ia e sega ga ni sivia na marau kei na lomavakacegu ni noda vukea e dua me mai ciqoma na ka dina.”

Na Yalo ni Lomasoli

Dina ga ni o ira na soli ira mera cakava na cakacaka oqo era biuta mai na nodra vuvale kei na nodra itokani mera veiqaravi ena veivanua, ia e levu sara na ka era marautaka. Na cava soti oya?

Rau vakamacalataka o Howard kei na watina o Pamela, rau a veiqaravi ena vanua o Angola, Colombia, Ecuador, El Salvador, Guyana, Mexico, kei Puerto Rico: “E dua dina na ka dokai meda lai sotavi ira na mataveitacini ena veivanua, da qai vakadinadinataka sara ga na loloma e vauci keda vata na mataveitacini e vuravura raraba. Vuqa na gauna keirau dau wilika tu ga, ia nida tiko da qai cakacaka vata kei ira mai na duidui vanua kei na itovo ni bula, eda na vakamareqeta kina vakalevu na duavata ni mataveitacini e vuravura raraba.”

O Gary, a veivuke ena tabana ni taravale ena veivanua me vakataki Colombia, Costa Rica, Ecuador, Mexico, kei Zambia, e vakila ni vukei koya sara ga vakalevu na porokaramu oqo. E kaya: “Na veika au vulica ena veiyabaki ni noqu dau vakailala kei ira na taciqu tagane matua era tiko ena veivalenitabana au lai veiqaravi kina, e vakarautaki au ena veituvaki dredre au na sotava ena veivanua au lesi kina. E vakaukauataka dina noqu vakabauta, niu vakila na duavata e vakatakilakilataki kina na isoqosoqo i Jiova e vuravura raraba​—na duavata e ulabaleta na duidui vosa, duikaikai, kei na veivanua eda cavutu mai kina.”

Ia, a qai vakaoti na tara ni valenitabana e Mexico, a vakatatabutaki ena yabaki oqo. Ni uqeti ira na dauveiqaravi raraba kei ira na bole cakacaka raraba na nodra lomana na Kalou, era veivuke kina vakalevu ena kena vakatetei na sokalou dina ena vanua o Mexico kei na veivanua tale e so. Na nodra tu vakarau kei na nodra soli ira vakarawarawa mera qaravi ira na tacidra lotu Vakarisito ena so tale na vanua, era vakavinavinakataka vakalevu na iVakadinadina i Jiova e vuravura raraba.

[iYaloyalo ena tabana e 25]

Ecuador

[iYaloyalo ena tabana e 25]

Colombia

[iYaloyalo ena tabana e 25]

Angola

[iYaloyalo ena tabana e 26]

Na basenikau ena valenitabana

[iYaloyalo ena tabana e 26]

Tekivu na vakavoutaki ni valenitabana e Mexico

[iYaloyalo ena tabana e 26]

E ra: E so vei ira na lewe ni Tabana ni Taravale ena matanivale se ra qai tara vou

[iYaloyalo ena tabana e 27]

Era marautaka na lewe ni timi ni taravale nodra tokona na cakacaka vakaitalatala ena veivavakoso era lesi kina