Na Tara ni Kingdom Hall kei na Kena Qaravi Tiko Ga—Tiki Bibi ni Noda Veiqaravi Tabu
1. Na cava na inaki bibi ni Kingdom Hall?
1 Na cakacaka bibi duadua ni lotu Vakarisito na noda vunautaka na Matanitu ni Kalou. (Mari. 13:10) Eda vakaroti tale ga meda vukei ira na tataleitaki mera mai tisaipeli, oya na vuna eda sureti ira kina mera mai soqoni vata kei keda ena Kingdom Hall, na vanua e dau vakarautaki kina na kakana vakayalo. E marautaki dina noda mai tiko ena vale totoka ni soqoni oqo, meda qaravi Jiova kina! Meda sureti ira gona na tataleitaki da qai kidavaki ira ena marau nira gole mai ena Kingdom Hall!
2. Na cava sa rawati ena sasaga ni tara Kingdom Hall? Na cava tale e tiki ni noda veiqaravi tabu?
2 Sega ni vakabekataki nida na marau meda kila ni levu na Kingdom Hall era sa tu nikua ena veivanua e qarava na valenitabana e Viti, era sa tara vou, vakavoutaki se vakavinakataki ena loma ga ni lima na yabaki sa oti. E vakavinavinakataki vakalevu na nodra cau na tacida ena vanua tale e so, na nodra gugumatua na Timi ni Tara Kingdom Hall, o ira na tacida era bole cakacaka e ke, vaka kina o ira na gole mai valagi era mai veitomani ena cakacaka levu oqo. Nira sa caka vakavinaka na veivalenisoqoni oqo, e noda itavi meda qarava vinaka ni na vakalagilagi kina o Jiova kei na nona isoqosoqo. Oqo e tiki tale ga ni noda veiqaravi tabu. Ia na cava eda rawa ni cakava yadua kina?—Vkta. 7:15.
3. Eda na tokona vakacava na sasaga ni tara Kingdom Hall?
3 Cuqena na Cakacaka: Kevaka eda dautukutuku papitaiso eda tiko e Viti, eda sureti meda bole meda lewena na Timi ni Tara Kingdom Hall. Meda vakalewena na kena fomu, e rawa ni kerei ena valenivolavola ni tabana. (Same 110:3) Kevaka eda sega ni rawa ni bole ena vuku ni keda ituvaki, e rawa ga nida uqeti ira e so era galala mera bole. Ia vakacava ke sega sara ga ni rawa nida lai veivuke ena tara ni Kingdom Hall, e kena ibalebale beka oya ni sega ni rawa nida vakaitavi ena tiki bibi ni veiqaravi tabu oqo?
4. Na cava eda rawa ni cakava kece? Meda raica vakacava na cakacaka oqo?
4 E rawa nida vakaitavi! Rawa nida tukuna vua na tacida e liutaka na qaravi ni Kingdom Hall eda soqoni kina ni rawa nida veivuke ena kena vakavinakataki se samaki. Na lewe ni ivavakoso kece e dodonu mera raica vakabibi na nodra dau solia nodra iyau kei na nodra gauna ena qaravi ni Kingdom Hall. E marautaka dina o Jiova nida duavata ena cakacaka ni kena tokoni na veika e vauca na nona Matanitu.—Iper. 13:16.
5. E rawa ni tuvanaki vakacava na samaki ni Kingdom Hall? Na cava e bibi kina meda vakaitavi?
5 Tuvai ni Cakacaka: Ena levu na ivavakoso e dau lesi e dua na qase se dua na dauveiqaravi ni ivavakoso me raica na kena qaravi kei na vakavinakataki ni Kingdom Hall, raica me tiko na iyaya ni sasamaki, iyaya mera voli mai me vakayagataki, kei na veika tale e so e dodonu me dau qaravi e veimacawa. Ke vica na ivavakoso e vakayagataka e dua ga na Kingdom Hall, ena qarava na itavi oqo na Kingdom Hall Operating Committee. Rawa ni tuvanaki mera sasamaki ena veimacawa na iwasewase lalai ni Vulivola, ra qai liutaka na cakacaka na kena ivakatawa se na nona ivukevuke. Ke lesi na iwasewase ni vulivola eda lewena me sasamaki, vakacava e dau gu na yaloda meda vakaitavi ena tiki bibi ni veiqaravi tabu oqo? Na noda vakaitavi wasoma ena tabana ni veiqaravi oqo e vakaraitaka na noda lomani Jiova, noda doka na savasava kei na rairai vinaka ni valenisoqoni, e vakaraitaka tale ga na noda lomani ira na tacida eda vakayagataka vata tiko na Kingdom Hall.
6. Na cava sa rawati nira veitokoni na lewe ni ivavakoso kece ena tiki bibi ni veiqaravi tabu oqo?
6 E kaya na yapositolo o Paula ni noda cakacaka vata na lewe ni ivavakoso ena “tubucake [kina] na yago taucoko, ka tara cake e na loloma.” (Efeso 4:16, VV) E vakadinadinataki na kena veitauriligataki na sasaga ni tara Kingdom Hall e vakayacori tiko ena yalava e qarava na noda valenitabana. Na noda tokona tiko na cakacaka oqo e vakaraitaka na noda lomani Jiova kei na noda raica vakabibi na sokalou dina. Toso na gauna, sa na gadrevi e so tale na Kingdom Hall vou. Ena vinakati tiko ga mera samaki, ra qaravi tale ga, vakabibi ni oqo na vanua duadua ga ni sokalou dina vei keda kei ira era taleitaka na itukutuku vinaka. Koya gona, meda raica vakabibi na noda vakaitavi ena tiki ni veiqaravi tabu oqo!