Soli Ka e Vakamarautaka na Kalou
A MARAUTAKA tiko o Jisu kei ira nona tisaipeli e dua na kanavata e Pecani, era tiko tale ga kina e so na nona itokani voleka wili kina o Meri, Maca kei koya se qai vakaturi oti ga o Lasarusa. A mani kauta mai o Meri e dua na waiwai saulevu me lumuta kina na yava i Jisu, a qai vosa mai ena cudru o Jutasa Isikarioti. A kaya: “Cava sa sega ni volitaki na waiwai oqo e na pene e tolu na drau, [e via tauvata na isau ni cakacaka ni dua na yabaki ena gauna oya] ka soli vei ira na dravudravua?” Tekivu mai kea sa ra kudruvaka tale ga na vo ni tisaipeli na ka vata oya.—Joni 12:1-6; Marika 14:3-5.
A qai sauma o Jisu: “Laivi koya ga: . . . Sa tiko vakadua kei kemudou ko ira na dravudravua; ia ni dou sa via cakava na ka sa yaga vei ira, sa rawarawa ga: ia koi au, ka’u na sega ni tiko vakadua kei kemudou.” (Marika 14:6-9) Era vakavulica na iliuliu ni lotu Vakajiu ni sega wale ga ni ivalavala vinaka na soli ka, e rawa sara mada ga ni vosoti kina na ivalavala ca. Ena yasana adua, e vakamatatataka o Jisu ni soli ka e vakamarautaka na Kalou e sega ni yalani ga vei ira na dravudravua.
Eda na dikeva vakalekaleka na nodra dau soli ka na ivavakoso lotu Vakarisito taumada, ni vakabibitaki kina e so na sala yaga e rawa nida vakaraitaka kina noda veikauaitaki qai marautaka na Kalou na ka eda solia. Ena vakaraitaka tale ga e dua na mataqali soli ka e yaga vakalevu.
“Solia Nai Loloma”
E dau uqeti ira vakalevu nona tisaipeli o Jisu mera “solia nai loloma,” se me vaka e vakadewataki ena dua tale na iVolatabu Vakaviti me “solia na kena i lavo vei ira na dravudravua.” (Luke 12:33, Ena I Vakavakadewa Vou) A veivakasalataki gona o Jisu me kua na soli ka vakarairai, e kena inaki me vakacaucautaki ga kina o koya e solia na ka, e sega ni Kalou. E kaya: “Ni ko sa soli ka ni loloma, kakua ni uvu davui e matamu, me vaka era dau cakava na dauveivakaisini e na veivalenilotu kei na veigaunisala, me ra dokai ira kina na tamata.” (Maciu 6:1-4, VV) Nodra muria na ivakasala oqo na lotu Vakarisito taumada era levea kina nodra soli ka vakarairai me vakataki ira na iliuliu ni lotu qaciqacia ni gauna oya, ia era vukei ira na gadreva dina tu na veivuke ena nodra golevi ira sara ga se na nodra soli iloloma vei ira.
Kena ivakaraitaki ena Luke 8:1-3, e tukuni kina ni o Meri na yalewa ni Makitala, Joana, Susana, kei na so tale era vakayagataka na “nodrai yau” ena sala lokomi mera vukei Jisu kina kei iratou nona yapositolo. Eratou sega ni dravudravua na yapositolo, ia eratou biuta na nodratou cakacaka e rawati kina nodratou bula e veisiga me ratou qarava vakatabakidua na cakacaka vakaitalatala. (Maciu 4:18-22; Luke 5:27, 28) O ira na marama oqo era vakacaucautaka na Kalou ena nodra vukei iratou na yapositolo me ratou vakaotia vinaka na nodratou itavi e lesi vakalou. E vakaraitaka tale ga na Kalou nona vakavinavinaka ni maroroya na kedra itukutuku ena iVolatabu mera wilika na itabatamata mai muri.—Vosa Vakaibalebale 19:17; Iperiu 6:10.
O Tokasa e dua tale ga na marama dau veikauaitaki qai dau oga ena “cakacaka vinaka, kei na cakacaka loloma.” E dau cula na nodra isulu na dawai dravudravua ena koro o Jopa. E sega ni kilai se a dau volia na isulu kei na iyaya ni culacula, se solia wale ga na isulu sa cula oti. Ia, e macala ga ni veika vinaka e cakava e veivolekati kina kei ira, vaka tale ga kina vua na Kalou ni qai vakalougatataka na nona cakacaka loloma.—Cakacaka 9:36-41.
E Bibi me Donu na iNaki
Na cava e uqeti ira oqo mera soli ka? E sega ni vure vakasauri vei ira na yalo ni via veivuke. Ia, era kila ni dodonu mera cakava e veisiga na ka era rawata mera vukei ira era dravudravua, ra sotava tiko na bula dredre, na tauvimate kei na veileqa tale e so. (Vosa Vakaibalebale 3:27, 28; Jemesa 2:15, 16) Na soli ka vaka oqo e marautaka na Kalou. E uqeti ira nodra lomana dina na Kalou kei na nodra vinakata mera vakadamurimuria nona yalololoma kei na lomasoli.—Maciu 5:44, 45; Jemesa 1:17.
E vakabibitaka na yapositolo o Joni na yaga ni soli ka vaka oqo ena nona taroga: “Ko koya sa tu vua nai yau ni vuravura oqo, a sa raica na wekana ni sa dravudravua, a sa sogota na lomana vua, sa tiko vakacava e na lomana na loloma vua na Kalou?” (1 Joni 3:17) E matata vakasigalevu na kena isau. Na nodra lomana na Kalou e uqeti ira mera soli ka. Na Kalou e taleitaka qai vakalougatataki ira era vakaraitaka na yalo ni soli ka me vakataki koya. (Vosa Vakaibalebale 22:9; 2 Korinica 9:6-11) E vakayacori tu beka nikua na mataqali soli ka vaka oqo? Dikeva mada na ka e se qai yaco oti ga ena dua na ivavakoso ni iVakadinadina i Jiova.
E gadreva dina e dua na kena marama lotu Vakarisito me vakavinakataki na nona vale. E tiko taudua qai sega na wekana me vukei koya. Ena veiyabaki sa oti, e dau vakayagataki na nona vale me caka kina na soqoni vakarisito, levu tale ga na gauna e dau ciqomi nona veisureti me dua me rau kanavata. (Cakacaka 16:14, 15, 40) Nodra raica na lewe ni ivavakoso nona leqa, ra saga mera cakava kina e dua na ka. E so era soli ilavo, so tale era soli ira sara ga mera veivuke. Ena vica na muanimacawa, era vakavinakataka rawa na delavuvu ni nona vale, tara vou na kena valenisili, era vakayagoyagovinakataka na lalaga ni imatai ni tabavale ra qai boroya, ra qai biuta tale ga na kovate vovou ni valenikuro. Na nodra veivuke e sega wale ga ni vakaceguya na leqa i koya na marama oya, e vakavolekataki ira vakaivavakoso, ra qai drukataka na tiko voleka e kea na ivakaraitaki ni soli ka ni lotu Vakarisito dina.
E vuqa tale tu na sala e rawa nida veivuke yadudua kina. E rawa beka nida solia noda gauna meda veimaliwai kina kei ira na luveniyali? Rawa beka nida volivoli se meda culacula vei ira na dawai qase eda kila? Rawa beka nida vakasaqa se meda soli ilavo vei ira e lailai na ka e tu vei ira? E sega ni tukuni meda vutuniyau sara me qai rawa nida veivuke. A vola na yapositolo o Paula: “Kevaka sa tu na via cakava, ena vinakati me vaka na ka sa tu vua e dua, ka sega ni vaka na ka sa sega ni tu vua.” (2 Korinica 8:12) Na mataqali veivuke beka ga vaka oqo e vakalougatataka na Kalou? Sega.
Vakacava Beka na Veivuke e Tuvanaki Vinaka?
So na gauna e sega ni rauta ga na soli ka yadudua. O Jisu kei iratou nona yapositolo e dau tiko na nodratou tobu ilavo me baleti ira na dravudravua, ratou dau ciqoma na nodra cau na dau veikauaitaki eratou sotava ena cakacaka vakaitalatala. (Joni 12:6; 13:29) Era dau soli tale ga na ivavakoso ena imatai ni senitiuri kevaka e gadrevi, qai dau tuvanaki na kere veivuke raraba.—Cakacaka 2:44, 45; 6:1-3; 1 Timoci 5:9, 10.
A yaco e dua na ka vaka oqo ena 55 S.K. Era sotava tiko na bula dravudravua na ivavakoso e Jutia ena vuku ni dua na lauqa levu e se qai yaco oti ga. (Cakacaka 11:27-30) E dau kauaitaki ira na dravudravua na yapositolo o Paula, e kerea kina na nodra veivuke na veivavakoso me yaco sara yani i Masitonia. E tuvanaka sara ga vakataki koya na veivuke oqo qai lesi ira na tagane nuitaki mera kauta na ka ni veivuke. (1 Korinica 16:1-4; Kalatia 2:10) Ia, eratou a sega ni saumi o Paula kei ira na vakaitavi ena kumuni ni ka ni veivuke oqo.—2 Korinica 8:20, 21.
O ira na iVakadinadina i Jiova nikua e dau totolo tale ga nodra veivuke ke yaco e dua na leqa tubukoso. Kena ivakaraitaki ena vula ikatakata ni yabaki 2001, a yaco e dua na cava levu qai waluvu kina e dua na iwase levu ni vanua mai Houston, Texas, e Mereke. E 723 na vale ni iVakadinadina i Jiova era vakacacani, e so era vakacacani sara vakaca. A tauyavu sara e dua na komiti ni veivuke era lewena na qase ni ivavakoso me raica na ka era gadreva na vakaleqai, sa qai wasei na ilavo ni veivuke me vukea na nodra leqa na iVakadinadina ena vanua oya, kei na kena vakavinakataki na nodra vale. Era cakava na cakacaka kece oqo o ira na bolecakacaka mai na veivavakoso e voleka ga e kea. Nona vakavinavinakataka e dua na iVakadinadina na veivuke e caka vua, a cautaka ina komiti ni veivuke na ilavo ni inisua a soli vua me vakavinakataka kina nona vale.
Ena mataqali veivuke lelevu e tuvanaki vaka oqo ena dodonu meda vakalewa vinaka na levu ni kerekere eda ciqoma. Ni so na isoqosoqo ni veivuke era vakayagataka na iwase levu ni lavo e cautaki me saumi ga kina o ira na kena vakailesilesi se na kena cicivaki na cakacaka ni kere veivuke, sa qai vo vakalailai ga me vakayagataki ena inaki taumada a tuvanaki kina na veivuke. E kaya kina na Vosa Vakaibalebale 14:15: “O koya sa yalowai sa vakabauta na vosa kecega: ia na tamata yalomatua sa daulewa vakavinaka na nonai lakolako.” E ka vakayalomatua gona meda dau dikeva vinaka na veika vaka oqo.
Na Soli Ka e Yaga Vakalevu
E tiko e dua na mataqali soli ka e yaga vakalevu mai na soli ina isoqosoqo ni veivuke. A vakamacalataka oqo o Jisu ena gauna a via kila kina e dua na iliuliu gone vutuniyau na ka me cakava me rawata kina na bula tawamudu. A qai tukuna vua o Jisu: “Lako, mo volitaka na nomui yau, ka solia vei ira sa dravudravua, ko na qai vakaiyau mai lomalagi: ia mo lako mai, mo muri au.” (Maciu 19:16-22) Dikeva ni sega ni tukuna o Jisu, ‘Soli ka vei ira na dravudravua o na qai rawata na bula.’ Ia, e kaya ga, “Lako mai, mo muri au.” E dina ni vinaka qai yaga na soli ka ina isoqosoqo ni veivuke, ia e bibi cake na nona vakayaco tisaipeli na lotu Vakarisito.
Na ka e vakabibitaka o Jisu nodra vukei vakayalo na tamata. A tukuna vei Pailato ni bera nona mate: “A ka oqo ka’u sa sucu mai kina, ki vuravura, me’u dautukuna na ka dina.” (Joni 18:37) Dina ga ni liutaka sara ga o Jisu nodra vukei na dravudravua, vakabulai na tauvimate, nodra vakani na waloloi, ia e vakabibitaka ga nona vakavulici ira nona tisaipeli mera vunau. (Maciu 10:7, 8) Na iotioti ni ivakaro e solia vei ira: “Dou lako yani ka qisi ira me ra noqu tisaipeli na lewe ni veivanua kece ga.”—Maciu 28:19, 20, VV.
Na vunau ena sega ni walia na leqa kece ni vuravura. Ia, na kena wasei na itukutuku vinaka ni Matanitu ni Kalou vei ira na tamata kece ga e vakacerecerei kina na Kalou ni vakayacori kina na nona inaki, ena yaga tawamudu tale ga vei ira na ciqoma na itukutuku ni Kalou. (Joni 17:3; 1 Timoci 2:3, 4) Vakacava mo rogoci ira mada na iVakadinadina i Jiova nira veisiko yani? Era wasea voli yani na isolisoli vakayalo nira kila ni oqo na sala vinaka duadua ni nodra soli ka.
[iYaloyalo ena tabana e 6]
E vuqa na sala e rawa nida vakaraitaka kina noda veikauaitaki
[iYaloyalo ena tabana e 7]
Noda vunautaka na itukutuku vinaka e vakamarautaka na Kalou qai yaga tawamudu