Bucina na Lomasoli
E SEGA ni dua e sucukaya mai na lomasoli. E laurai oqo vei ira na gonedramidrami nira dau vinakata ga mera vakaceguya ga na yalodra, era sega ni kauaitaka na veika era gadreva na dau veisusu. Toso na gauna, sa na kila na gone ni sega ni o koya ga e tiko na ka e gadreva. E dodonu me kauaitaki na veika era gadreva e so tale, ena sega wale ga ni vulica me taura na ka ia me dau solia se wasea tale ga. Ena gadrevi gona me bucina na lomasoli.
Sega ni o ira kece era dau soli ka e kune vei ira na lomasoli. E so era soli ka me rawa nira rawata ga kina na ka e lomadra. E so tale era na rairai soli ka me rawa nira vakacerecerei kina vei ira tale e so. Ia, e duidui na ivakarau ni nodra soli ka na lotu Vakarisito dina. Na cava sara mada na ivakarau ni soli ka e uqeta na Vosa ni Kalou? Ena saumi na taro oqo nida dikeva vakalekaleka na ivakarau ni nodra soli ka na lotu Vakarisito ena imatai ni senitiuri.
E So na iVakaraitaki ni Soli Ka Vakarisito
Na soli ka vakarisito, me vaka e vakamacalataka na iVolatabu, oya na “dausoli ka” vei ira era gadreva dina. (Iperiu 13:16; Roma 15:26) E sega ni dodonu me caka ena voraki. A vola na yapositolo o Paula: “Me ra dui solia me vaka na ka sa vinakata ko koya yadua e na yalona; me kakua e na voraki, se ni sa vakasaurarataki: ia ko koya sa solia e na marau sa vinakata na Kalou.” (2 Korinica 9:7) Na soli ka me kua tale ga ni caka vakarairai. Erau cakava oqo o Ananaiasa kei Safaira, rau sotava kina na kena ca.—Cakacaka 5:1-10.
A gadrevi vakalevu sara na soli ka nira soqovata mai e Jerusalemi e levu na Jiu, kei ira era tavuki ina lotu Vakajiu era lako mai vakayawa ena soqo ni Penitiko ena 33 S.K. E ke gona era ‘vakasinaiti kina ena yalo tabu, ra qai tekivu vosataka na vosa tani e so’ na imuri i Jisu. E dua na ilawalawa levu era tomani iratou mera rogoca na nona ivunau veivakauqeti o Pita me baleti Jisu Karisito. E muri, sa ra qai raica nodrau vakabula o Pita kei Joni na tagane lokiloki ena matamata ni valenisoro, ra qai rogoca tale kina nona tukuni Jisu o Pita kei na bibi ni veivutuni. Vica na udolu era veivutuni ra qai papitaiso mera imuri i Karisito.—Cakacaka, wase 2 kei na 3.
Era via tiko ga e Jerusalemi o ira na tavuki vou oqo mera ciqoma kina e so tale na nodratou ivakasala na yapositolo i Jisu. Ia era na qarava vakacava na yapositolo na veika era gadreva na vulagi kece? E kaya vei keda na iVolatabu: “Ko ira kecega sa taukena na vanua se na veivale, era sa volitaka, a ra sa kauta nai voli ni ka era sa volitaka, a ra sa tauca ki na yavadra nai apositolo: a sa votai vei ira kecega me vaka na nodra dui dravudravua.” (Cakacaka 4:33-35) Io, a laurai dina na lomasoli ena ivavakoso tauyavutaki vou mai Jerusalemi!
E muri, sa ra qai vakaraitaka e so tale na ivavakoso na lomasoli vaka oya. Kena ivakaraitaki, o ira na lotu Vakarisito mai Masitonia, dina nira dravudravua, era saga mera solia na ka e sivia na ka era rawata me baleti ira na tacidra mai Jutia era gadreva na veivuke. (Roma 15:26; 2 Korinica 8:1-7) E vakasakiti sara na ivavakoso mai Filipai nira tokona na cakacaka vakaitalatala nei Paula. (Filipai 4:15, 16) Era cautaka e veisiga na ivavakoso mai Jerusalemi na kakana vei ira na yada era gadreva dina na veivuke, ratou qai digitaka na yapositolo e vitu na tagane rogorogo vinaka me ratou raica me kua ni raibaleti e dua na yada.—Cakacaka 6:1-6.
Era vukitotolo na lotu Vakarisito taumada ena gauna e namaki kina na ituvaki dredre. Kena ivakaraitaki, ni tukuna na parofita o Akapo ni na yaco e dua na lauqa levu, sa ra qai lewa na tisaipeli ena ivavakoso mai Siria Anitioki “me ra solia yadua na nodra ka-ni-loloma, me vaka era sa dui rawata, vei ira na veiwekani era sa tiko mai Jutia.” (Cakacaka 11:28, 29) Era ivakaraitaki vinaka dina nira kauaitaka na veika era na gadreva e so tale!
Na cava e uqeti ira na lotu Vakarisito taumada mera lomasoli ra qai yalololoma? E rawa vakacava vua e dua me bucina na yalo ni lomasoli? Levu na ka e rawa nida vulica ke da dikeva mada na ivakaraitaki nei Tui Tevita.
Tokona ena Lomasoli o Tevita na Sokalou Dina
E voleka ni 500 na yabaki na kena a sega tu ni dua na itikotiko dei ni kato ni veiyalayalati—na kato tabu e vakatakarakarataka nona tiko o Jiova. A dau tu ga ena valelaca, se ena vale ni Kalou, dau qai tokitaki nira veilakoyaki voli na Isireli ena vanualiwa mera lai tini sara ena Vanua Yalataki. Dua na ka nona gadreva o Tui Tevita me tara e dua na vale vinaka nei Jiova me tokitaka kina na kato ni veiyalayalati. Kaya gona kina o Tevita vua na parofita o Necani: “Raica, au sa tiko e na vale sitari, ia sa tiko na kato ni veiyalayalati i Jiova e ruku ni vale laca.”—1 Veigauna 17:1.
E turaga dau vala o Tevita. A lewa gona kina o Jiova me na tara na luvena o Solomoni na valenisoro ena dabe kina na kato ni veiyalayalati, ena gauna ni nona veiliutaki sautu. (1 Veigauna 22:7-10) Ia, a sega ni tarova oqo na nona lomasoli o Tevita. A tuvanaki ira e dua na ilawalawa levu, qai liutaka sara ga na kena qarai na iyaya me na vakayagataki ena tara ni valenisoro. A qai kaya e muri vei Solomoni: “Au sa vakarautaka . . . me yaga ki na nona vale ko Jiova, na koula e dua na drau na udolu na taledi, kei na siliva sa udolu vakaudolu na taledi; kei na parasa kei na kaukamea sa sega ni kilai na kena bibi; ni sa ka levu sara: na kau talega, kei na vatu, au sa vakarautaka.” (1 Veigauna 22:14) Nona sega ni lomavakacegu, a mani cautaka o koya mai na nona iyau ga na koula kei na siliva, na kena isau nikua e sivia vakalailai e $1,000,000,000 na ilavo ni Mereke. Kuria, nira a cau tale ga e so na ravouvou. (1 Veigauna 29:3-9) Macala ni a lomasoli dina o Tevita!
Na cava a uqeti Tevita me lomasoli kina? E kila ni veika kece e rawata e vu mai na veivakalougatataki i Jiova. E qaqa ni nona masu: “Kemuni Jiova na neimami Kalou, nai yau kece oqo keimami sa vakarautaka me tara kina e dua na vale me nomuni me tiko kina na yacamuni tabu, sa rawa mai na ligamuni, a sa nomuni kecega. Au sa kila talega, noqu Kalou, ni kemuni sa dauvakatovolea na yalo, ia ko ni sa vinakata na yalododonu. Koi au, ni sa dodonu na yaloqu au sa solia na ka kecega oqo e na yalo e vinakata: ia ka’u sa qai raica e na marau na nomuni tamata, era sa tiko eke, me soli ka vei kemuni e na yalo e vinakata.” (1 Veigauna 29:16, 17) A vakamareqeta o Tevita nodrau veiwekani kei Jiova. E kila na bibi ni qaravi Kalou “e na yalo dina, kei na loma e marautaka,” qai reki ni cakava vaka kina. (1 Veigauna 28:9) Na itovo vata ga oqo a uqeti ira na lotu Vakarisito taumada mera lomasoli.
Jiova —Na Dau Solisoli Levu Duadua
O Jiova e ivakaraitaki vinaka duadua vei keda ena soli ka. Na nona yalololoma kei na veinanumi e “vakacabea ko koya na nona mata-ni-siga vei ira na tamata ca kei ira na tamata vinaka, a sa vakatauca mai na uca vei ira na tamata yalododonu, kei ira na tamata tawa yalododonu.” (Maciu 5:45) E solia vei keda na kawatamata kece na “bula, kei na cegu, kei na ka kecega.” (Cakacaka 17:25) Io, me vaka e kaya na tisaipeli o Jemesa, “nai solisoli vinaka kecega kei nai solisoli kecega e yaga sara, a sa lako sobu mai vua na Tama ni rarama.”—Jemesa 1:17.
Na iloloma levu duadua nei Jiova vei keda oya nona talai “Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu.” (Joni 3:16) E sega ni dua e rawa ni kaya ni ganiti koya na iloloma oqo, “ni sai valavala ca ko ira kecega na tamata, ka ra sega ni yacova na ka e vakarokorokotaki kina na Kalou.” (Roma 3:23, 24; 1 Joni 4:9, 10) Na ivoli i Karisito e yavu qai sala e dewa mai kina na “[i]solisoli sa sega ni tukuni rawa” ni Kalou, oya na nona “loloma levu.” (2 Korinica 9:14, 15) Ena nona vakavinavinakataka na isolisoli ni Kalou, a raica o Paula me cakacaka bibi e nona bula na nona “vakatakila nai tukutuku-vinaka ni loloma ni Kalou.” (Cakacaka 20:24) E kila o koya ni vinakata na Kalou “me bula na tamata kecega, ka mai kila sara nai vakavuvuli dina.”—1 Timoci 2:4.
Nikua, sa vakayacori tiko oqo ena cakacaka vakavunau kei na veivakavulici ena 234 na vanua e vuravura raraba. A tukuna vakailiu o Jisu na tete ni cakacaka oqo ni kaya: “Ena vunautaki mada e vuravura taucoko nai tukutuku-vinaka oqo kei na matanitu, mei vakadinadina ki na veivanua kecega; sa na qai yaco emuri nai vakataotioti.” (Maciu 24:14) Io, “ena vunautaki dina mada eliu nai tukutuku-vinaka e na veivanua kecega.” (Marika 13:10) Ena yabaki sa oti e sivia e ononamilioni na dau kacivaka na itukutuku vinaka era vakayagataka e 1,202,381,302 na aua ena cakacaka oqo ra qai vakavulica ena iVolatabu e sivia e 5,300,000. E bibi dina na ivakaro oqo ni vauci kina na bula.—Roma 10:13-15; 1 Korinica 1:21.
E tabaki e veiyabaki e vica vata na milioni na ivola ni isoqosoqo—okati kina na iVolatabu, ivola, kei na brochure mera vukei kina na gadreva na ka dina ena iVolatabu. Kuria, ni sivia e duanabilioni na ilavelave ni Vale ni Vakatawa kei na Yadra! era tabaki. Nira ciqoma na tamata na itukutuku vinaka, e vakavuna mera tara kina e levu tale na Kingdom Hall kei na Assembly Hall ni iVakadinadina i Jiova, na vanua e vulici kina na iVolatabu. Era tuvanaki e veiyabaki na soqo ni tabacakacaka, soqo lavotaki, kei na soqo ni tikina. E sega ni mudu nodra vakavulici na daukaulotu, na ivakatawa dauveilakoyaki, qase ni ivavakoso, kei na dauveiqaravi vakaitalatala. Eda vakavinavinaka vei Jiova ni vakarautaki rawa na veika oqo ena nona vakayagataka “na dauveiqaravi yalo dina ka vuku.” (Maciu 24:45-47, VV) Eda via vakavinavinaka dina vei Jiova!
Me Vakavinavinakataki o Jiova
Na vakailavotaki ni tara ni valenisoro se na kena vakarautaki na veika era gadreva na ivavakoso lotu Vakarisito taumada, e rawa ga mai na cau. Ia me nanumi ni sega ni dua e rawa ni vakavutuniyautaki Jiova, na iTaukei ni ka kece ga. (1 Veigauna 29:14; Akeai 2:8) Na noda cau gona, e vakadinadinataka noda lomani Jiova kei na noda vinakata meda vakatetea na sokalou dina. Na ivakaraitaki ni lomasoli oqo, e kaya o Paula, e ‘vakavinavinakataki kina na Kalou.’ (2 Korinica 9:8-13) E vakauqeta o Jiova na soli ka vaka oqo baleta e vakaraitaka nida lomasoli qai vinaka na lomada vua. O ira era dau lomasoli ra qai vakararavi vei Jiova era na vakalougatataki ra qai tubu vakayalo. (Vakarua 11:13-15; Vosa Vakaibalebale 3:9, 10; 11:25) E vakadeitaka o Jisu ni na sotavi na kalougata, ena nona kaya: “A ka ni veivakalougatataki vakalevu me soli ka, ka vakalailai ga me taura na ka.”—Cakacaka 20:35.
O ira na lotu Vakarisito dau lomasoli era sega wale ga ni waraka na gauna e gadrevi kina na veivuke. Era vakasaqara na sala mera “caka vinaka [kina] vei ira na tamata kecega, ka vakalevu vei ira era veitokani e na vakabauta.” (Kalatia 6:10) Ni vakauqeta na lomasoli vakalou, e vola o Paula: “Kakua talega ni guilecava na caka vinaka kei na dausoli ka: ni sa vinakata sara na Kalou nai madrali vakaoqo.” (Iperiu 13:16) E marau na Kalou o Jiova nida vakayagataka na veika eda taukena—noda gauna, kaukaua, iyau—meda vukei ira tale kina e so da qai vakatetea na sokalou savasava. Io, e vinakata o koya na lomasoli.
[Kato/iYaloyalo ena tabana e 28, 29]
Sala Era Bolea Kina e So Mera Soli Ka
CAU INA CAKACAKA E VURAVURA RARABA
Levu era vakatikitikitaka e dua na iwase ni ilavo mera biuta ina katonicau e vakatokai “iSolisoli ena Cakacaka e Vuravura Raraba—Maciu 24:14.”
Era dau vakauta e veivula na ilavo oqo na ivavakoso yadua ina valenivolavola ni iVakadinadina i Jiova ena nodra dui vanua. Na ilavo e cautaki e rawa ni vakau sara ga vakadodonu ina Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483, se ina valenivolavola ni tabana ena nomu vanua. Na jeke me volai kina na “Watch Tower.” E rawa ni cautaki tale ga na iyau talei e so. Me dua na ivola me vakau vata kei na cau oya, me vakamacalataka vakalekaleka ni ka e cautaki tiko oya e soli vakailoloma.
CAU E TIKO NA KENA VEIDINADINATI
E rawa ni cautaki na ilavo ena veidinadinati e tiko, ni na suka tale vua e cau ke mani gadreva o koya. Me baleta e so tale na ivakamacala, yalovinaka qai veitaratara kei na Treasurer’s Office ena itikotiko e volai toka ena imawi.
SOLI KA E LALAWATAKI
Me ikuri ni kena cautaki vakadodonu na ilavo kei na cau ni veidinadinati, e tiko tale e so na mataqali cau me yaga ena cakacaka ni Matanitu ni Kalou e vuravura. Oqo e okati kina na:
Inisua: E rawa ni volai vua na Watch Tower Society na nona inisua e dua se nona ilavo ni vakacegu se peniseni.
Akaude ena Baqe: Na akaude ena baqe, na sitivikiti ni ilavo e curu ena baqe, se na akaude ni nona sa vakacegu mai na cakacaka saumi e dua e rawa ni dau tauri tu ga vakawawa ena vuku ni Watch Tower Society, se me qai soli me taukena na Watch Tower Society ni sa mate e dua, me lakolako vata ga kei na ivakarau ni veiqaravi ni baqe ena noda dui vanua.
Stock kei na Bond: E rawa me dau soli na stock kei na bond ina Watch Tower Society me dua na cau taucoko.
Qele kei na Vale: E rawa me soli vakadua na qele se na vale se, e rawa tale ga me caka e dua na veiyalayalati me se tei tawana tiko mada ga na qele se vale o koya e solia me yacova nona mate. Me veitaratara kei na valenivolavola ni tabana ena nona vanua o koya e via solia na qele se na vale ni bera ni vakadeitaka na veiyalayalati.
Will kei na Trust: E rawa ni soli na iyau se na ilavo ina Watch Tower Society ena kena tabaki e dua na will, se na rawa ni vagolei ina Watch Tower Society na ka e rawati ena vuku ni dua na veidinadinati. Ena rawa ni vakalailaitaka na ivakacavacava e saumi ena kena vagolei na trust ina dua na isoqosoqo vakalotu.
Na cau vaka oqo era vakatokai mera “soli ka e lalawataki,” e kena ibalebale ni soli ka vaka oqo e dodonu me lalawa sara kina vakavinaka o koya e via soli ka. Me vukei ira na via soli ka ina cakacaka ni iVakadinadina i Jiova e vuravura raraba ena sala vaka oqo, sa vakarautaki kina e dua na ivola lailai vakavalagi kei na kena vakasipeni e vakatokai na Charitable Planning to Benefit Kingdom Service Worldwide. E volai na ivola oqo ena vuku ni vakatataro e tauri me baleta na iloloma, will kei na trust. E tiko tale ga kina e so na ivakamacala yaga me baleta na qele taukeni, na lalawa vakailavo kei na ivakacavacava. E vakamacalataki tale ga kina e so na sala ni soli ka vakailoloma ena gauna sara ga oqo, se me qai soli ena gauna sa mate kina. Ni levu era wilika na ivola lailai oqo ra qai veitaratara kei na nodra dui daunivakasala ni lawa se ivakacavacava kei na Charitable Planning Office, era sa vukei ira kina na iVakadinadina i Jiova e vuravura raraba, qai gauna vata oqori era vakalailaitaka kina na ivakacavacava e dau lavaki vei ira. E rawa ni kerei na ivola lailai oqo ena Charitable Planning Office.
Ena so tale na ivakamacala, e rawa ni o veitaratara kei na Charitable Planning Office, e rawa ni o volavola se qiri ina itikotiko se talevoni e toka oqo e ra, se ina valenivolavola ni iVakadinadina i Jiova ena nomu vanua.
Charitable Planning Office
Watch Tower Bible and Tract Society of Pennsylvania
100 Watchtower Drive,
Patterson, New York 12563-9204
Talevoni: (845) 306-0707
[iYaloyalo ena tabana e 26]
Na cava e vakavuna mera lomasoli na lotu Vakarisito taumada?