Sa Wasei Tiko Vakacava na iYau ni Veivuke?

NI OTI na vakacaca levu ena 11 Sepiteba, 2001, e Niu Yoka kei Washington, D.C., e sega ni tukuni rawa na nodra veitokoni na lewenivanua vei ira na vakaleqai. Era drukataka na isoqosoqo ni veivuke na levu ni ilavo e cautaki mai mera vukei kina na matavuvale era vakaleqai, rauta ni $2.7 na bilioni na ilavo ni Mereke. Era via veivuke na tamata kece ga nira rarawataka na levu ni vakacaca.

Ia, sa veisau na yalo ni nodra via veivuke e so na lewenivanua nira rogoca ni sa vakayagataka tiko vakaveitalia e so na isoqosoqo ni veivuke kilai levu na ilavo e cautaki yani. E cudruvaki vakalevu kina na itukutuku ni nona lalawataka e dua na isoqosoqo levu ni veivuke, me vakayagataka ena so tale na inaki e rauta ni veimama ni $546 na milioni na ilavo ni Mereke e cautaki yani. Dina ga ni qai veisautaka tale na isoqosoqo ni veivuke oya na nona vakatulewa qai kere veivosoti, e kaya e dua na dauvolaitukutuku: “Era raica na dauvakalelewa ni sa bera na nodra kere veivosoti nira sa sega ni qai nuitaki” me vaka e liu ni bera na vakacaca levu e Niu Yoka. Vakacava o iko? O se nuitaki ira tiko beka ga na isoqosoqo ni veivuke ena gauna oqo?

E Yaga Dina se Maumau?

E dau raici raraba me ivalavala vinaka na cau ina isoqosoqo ni veivuke. Ia, e sega ni vaka oya na rai ni tamata kece. A vola e dua na dauvolavola ni Peritania o Samuel Johnson ena 200 na yabaki sa oti: “O nuidei ni o cakava tiko na ka vinaka ke o soli ilavo vei ira na cakacaka, me kedra isau, ni vakatauvatani kei na nomu soli ilavo me ka ga ni veivuke.” E so tale ga nikua era lomalomaruataka na nodra cau ina isoqosoqo ni veivuke, na itukutuku ni nodra dau lewa ca kei na nodra dau vakasabusabutaka na cau era sega kina ni nuitaki mai vei ira na lewenivanua. Dikeva mada e rua na kena ivakaraitaki.

A vakasakei e dua na dairekita ni isoqosoqo ni veivuke ni lotu e San Francisco, a lawakitaka me sauma nona valenivolavola na bili ni nona sele me veisautaka na kena irairai, kei na nona bili ni kana e rauta ni $500 na ilavo ni Mereke dua na macawa ena loma ni rua na yabaki. Mai Peritania, e dua na siteseni ni retioyaloyalo a cicivaka na kena kumuni e dua na ilavo levu, ia era madua na kena vakailesilesi ni qai kilai ni rauta ni $10 na milioni na ilavo ni Mereke e cautaki me vukea na tara ni nodra vale na luveniyali e Romania, e 12 ga na vale e sega soti ni vinaka e se qai tara rawa qai vica na drau vakacaca na udolu na dola e sega ni kilai na vanua e vakayagataki kina. Na itukutuku rogorogo ca vaka oqo era rivarivabitaka kina na dau soli ka na levu ni ilavo mera cautaka, se mera solia vei cei.

Mo Cau se Kua

E sega ni ka vakayalomatua meda muduka na noda veikauaitaki se veilomani dina ena vuku ga ni nodra cakacaka vakatawadodonu e le vica se so na isoqosoqo. E kaya na iVolatabu: “Na lotu savasava ka sega ni cala e mata ni Kalou ko Tamada sa vakaoqo, Me sa dauraici ira na luveniyali kei ira na yada, ni ra sa rarawa.” (Jemesa 1:​27) Io, na noda kauaitaki ira dina na dravudravua kei ira na vakaloloma e tiki bibi ni dua na lotu Vakarisito.

Rairai o na lomatarotarotaka, ‘Meu soli ilavo beka ina isoqosoqo ni veivuke, se meu solia yadudua ga vei ira na vakaloloma tu?’ Na soli ka vakacava e marautaka na Kalou? Na ulutaga e tarava ena vakamacalataka na isaunitaro oqori.