Vakalagilagia na Kalou Sega ni Tamata

ENA vica na vula wale tiko ga oqo, era vulica mera vakalagilagia na Kalou o ira era lomana na yalododonu e vuravura raraba, nira mai tiko ena Soqo ni Tikina ni iVakadinadina i Jiova, e kena usutu “Vakalagilagia na Kalou.” Meda railesuva mada na veika e cauraki ena porokaramu ni veivakavulici oqo.

E tolu na siga na kena vakayacori na porokaramu yavutaki vakaivolatabu oqo, ia e va na siga na kena e caka ena soqo ni veimatanitu. Era rogoca e sivia e 30 na vunau vakaivolatabu o ira kece na tiko kina, oqo e okati kina na vunau e vakatitobutaka noda vakavinavinakataka na ka vakayalo, na vakasavuirogorogo e vakaukauataka noda vakabauta, na vakatasuasua e vakaraitaka ni yaga na muri ni ivakavuvuli vakaivolatabu, kei na drama e vakaraitaka na dredre era sotava na lotu Vakarisito ena imatai ni senitiuri. Ke o a tiko ena soqo oqo, vakacava mo railesuva tale mada na ka o vakavola ena gauna o wilika tiko kina na ulutaga oqo? Keitou kila ni o na nanuma lesu tale na magiti totoka vakayalo kei na veivakavulici e vakarautaki kina.

Usutu ni iMatai ni Siga: ‘Sa Ganiti Kemuni Jiova me Cabo Vei Kemuni na Veivakalagilagi’

Ni oti na imatai ni sere kei na masu, e kidavaki ira na soqo yani o koya e vosa e liu ena nona vakamacalataka vakatabakidua na vuna levu e caka kina na soqo oqo: “Eda Soqo mai Meda Vakalagilagia na Kalou.” Ni cavuqaqataka na Vakatakila 4:11, e vakabibitaka kina na usutu levu ni soqo. E vakamacalataka tale ga na ibalebale ni nona vakalagilagi na Kalou. Ni vakayagataka na ivola na Same, e vakadreta kina ni okati ena nona vakalagilagi na Kalou na “lotu” se sokalou, “vakamolimoli,” kei na “vakavinavinaka.”​—Same 95:6; 100:4, 5; 111:1, 2.

Na itavi e tarava e kena ulutaga, “Kalougata o Ira Era Vakalagilagia na Kalou.” E taleitaki na ka e tukuni ena tikina oqo. E sivia e ono na milioni na iVakadinadina i Jiova ena 234 na vanua ena vuravura raraba, e rawa ni tukuni kina nira vakalagilagi Jiova tiko ena siga kei na bogi. (Vakatakila 7:15) Na nodra vakatarogi e so na lotu Vakarisito era vakaitavitaki ira tu ena taba ni cakacaka vakaitalatala vakatabakidua, e taleitaki dina qai tarai ira na vakarorogo.

Na ulutaga e tarava “Tukuna na Lagilagi ni Kalou na Veika Buli.” Dina ga ni galu tu na veika buli ni lomalagi, ia era vakavotuya na uasivi ni Kalou, qai vukei keda meda vakavinavinakataka mai vu ni yaloda nona veimaroroi. E vakamacalataki sara ga vakavinaka na tikina oqo.​—Aisea 40:26.

E dau vakatovolea na nodra vakabauta na lotu Vakarisito dina na veivakacacani, veitusaqati, idre vakavuravura, kei na gagadre ca. Era vakatudaliga vinaka gona na vakarorogo ina ulutaga “Muria na Sala ni Yalododonu.” E veivosakitaki tale ga kina na veitikina ena Same 26, kei na nona vakatarogi e dua na iVakadinadina e se vuli tiko e cata ni cakava na ivalavala tawakilikili, kei na dua tale e dau vakayagataka na ka ni veivakalasai e sega soti ni vinaka, ia e qai cakava na ka me walia kina na leqa oqori.

E mai cava na porokaramu ena mataka ena ulunivosa, “Uqeti Keda na Raivotu Vakaparofisai Lagilagi!” E tukuni kina na ivakaraitaki ni parofita o Taniela, na yapositolo o Joni kei Pita, e vakaukauataka nodratou vakabauta na raivotu vakaparofisai lagilagi e dusia na tauyavutaki kei na liutaki ni Matanitu Vakamesaia ni Kalou. Ia e kaya o koya e vosa me baleti ira era sa rairai guilecava na ivakatakilakila nida sa bula tu ena iotioti ni veigauna: “Eda nuitaka nira na saga mera raica dei tale ni sa tiko dina o Jisu ena gauna qo ena nona Matanitu lagilagi, me rawa nira vakabulabulataki tale kina vakayalo.”

E tekivu na porokaramu ena yakavi ena ulutaga “Vakatakilai Vei Ira na Yalomalumalumu na Lagilagi i Jiova.” E tukuna kina o koya e vosa ni ivakaraitaki levu ni yalomalumalumu o Jiova dina ga ni Turaga Sau ni lomalagi kei vuravura. (Same 18:35) E vakadonui ira na yalomalumalumu dina o Jiova, ia e sega ni dau vakadonui ira e vakarairai ga nodra yalomalumalumu vei ira era itabavata se o ira na cecere cake vei ira, ra qai dau vakacolasau vei ira na tiko e rukudra.​—Same 138:6.

Tarava, na parofisai vakaivolatabu ena vosa veitaravi, e veivosakitaki kina ena vica na basoga na usutu: “Parofisai i Emosi—Kena iBalebale me Baleta Noda Gauna.” Nona dusia tiko na ivakaraitaki i Emosi, e vakamacalataka o koya e nona na imatai ni vosa ni noda itavi mera vakasalataki na tamata kece ga me baleta na siga ni lewa i Jiova sa roro tiko mai. E ulutaga ni vosa oqori “Tukuna ena Doudou na Vosa ni Kalou.” E taroga o koya e nona na ikarua ni vosa veitaravi: “Ena vakaotia beka o Jiova mai vuravura na ca kei na rarawa?” E vosa ena ulutaga, “Lewai Ira na Ca na Kalou,” e vakaraitaka kina ni tawavakamelei na lewa ni Kalou, ena sega ni dua me na drotaka rawa, e dau digidigi tale ga. Na iotioti ni vosa veitaravi e kena ulutaga “Dikeva na Loma ni Tamata o Jiova.” O ira kece e lomadra mera vakamarautaki Jiova era na rogoca na ka e tukuni ena Emosi 5:15: ‘Cata na ka ca, vinakata na ka vinaka.’

Na gunu me vaka na waini e vakamarautaka na loma ni tamata, ia e rawa ni vakayagataki cala. O koya e vosa ena ulutaga “Qarauna De O Coriti ena Gunu Vakasivia,” e vakamacalataka na ca ni kena sega ni lewai vinaka na gunu ena noda bula vakayago se vakayalo, dina ga nida na sega beka ni mateni. E solia na idusidusi: Nida duidui na tamata, duidui tale ga na levu ni ka eda rawa ni gunuva, ke sa vakaleqa nomu “vuku dina kei na lewa vinaka” na levu ni ka o gunuva, kena ibalebale sa sivia.​—Vosa Vakaibalebale 3:21, 22.

Nida sa bula tu ena veigauna dredre, e veivakacegui dina na ulutaga e tarava, “O Jiova e Noda ‘Kaukaua ena Gauna ni Rarawa.’” E rawa gona nida vosota na ituvaki rarawataki ena masu, yalo tabu, kei ira na tacida lotu Vakarisito.

Na iotioti ni vunau ena imatai ni siga, “‘Na Vanua Vinaka’​—iVakaraitaki Lailai ni Parataisi,” e mai tini ena marau ena kena soli na ivola vou era tu kina e levu na mape vakaivolatabu! Na yaca ni ivola na Raica na Vanua Vinaka.

Usutu ni iKarua ni Siga: “Tukuna na Nona Lagilagi ki na Veimatanitu”

Ni oti na kena veivosakitaki na dikevi ni iVolatabu e veisiga, na ikarua ni vosa veitaravi e kena usutu,“Meda ‘Vaka na Iloilo ena Noda Vakaraitaka na Lagilagi i Jiova.’” Na imatai ni vosa e vakarabailevutaka na ulutaga “Vakatetea na iTukutuku Vinaka e Veivanua Kece,” e vakatasuasuataki tale ga kina na ka e yaco dina ena cakacaka vakavunau. Na ikarua ni vosa, “Luvata na iUbi Vei Ira na Vakamatabokotaki,” e okati kina na vakatasuasuataki ni veisikovi lesu. Na iotioti ni vosa veitaravi “Vakayacora Vakavinaka na Noda Cakacaka Vakaitalatala,” e vakamakaretaki tale ga ena veitarotarogi na veika vinaka e sotavi ena cakacaka vakavunau.

Na vosa e tarava e kena ulutaga “Sega na Vuna Meda Cati Kina.” E okati ena vunau oqo na veitarotarogi veiuqeti, era vakatarogi kina o ira era tudei tiko ga ena kaukaua ni Kalou dina ga nira vakacacani.

Dua na ka e dau namaki vakalevu ena soqo ni tikina na vunau ni papitaiso, e sala muria na nodra tabadromuci ena wai o ira kece era rawata na kena ivakatagedegede. Na papitaiso ena wai e vakaraitaka na nona yalataki koya e dua vei Jiova. E veiganiti dina kina na kena ulutaga: “Lagiti na Kalou Nida Dina Tiko ga ina Noda Yalayala.”

E tekivu na porokaramu ena yakavi ena ulutaga “Teivaka na Rai Vakarisito Baleta na Rogo,” e uqeta na noda dau dikevi keda vakataki keda. E kauta cake mai o koya e vosa ena ulutaga oqo e dua na tikina vinaka: Na rogo e vu mai na noda vakamurimuria na yalomalumalumu i Karisito. Me kua gona ni inaki ni nodra qara itavi na lotu Vakarisito mera via rogo kina. E dodonu me tarogi koya, ‘Au dau tu vakarau ni cakava e so na cakacaka yaga ena sega beka ni laurai levu?’

O dau oca beka? Io, eda dau vakila kece ga na oca ena so na gauna. E marautaki dina na ulutaga “Eda Dau Oca, ia Da Sega ga ni Vakacauoca.” Na nodra vakatarogi e so na iVakadinadina i Jiova dede, e vakaraitaka ni o Jiova ena ‘vakaukauataki keda ena yalona.’​—Efeso 3:16.

Eda sega ni sucukaya mai na itovo na lomasoli, ia e dodonu me vulici. Na tikina bibi oqo e veivosakitaki ena ulutaga “Meda Dau Yalovinaka, Da Qai Vakarau tu ni Vota na Ka e Tu Vei Keda.” A tarogi kina e dua na taro e vakavure vakasama: “Eda tu vakarau beka meda solia e so na noda gauna meda sikovi ira kina na tacida era sa qase, tauvimate, yalolailai, se galili?”

E uqeta na nodra vakasama na vakarorogo na ulutaga “Qarauna na ‘Domo ni Vulagi.’” Na vosa oqo e vakatauvatani ira na imuri i Jisu nira vaka na sipi era dau vakarorogo ga ina domona “nai vakatawa vinaka,” ia e uqeta o Setani e levu na sala vakatamata me rogo kina na “domo ni vulagi.”​—Joni 10:5, 14, 27.

Me matata na sere e lagati, e dodonu mera laga vata na lewenisere. Gadrevi vaka kina na duavata vei ira na sokalou dina me qai rawa nira lagita na Kalou. E vakamatatataki gona ena ulutaga, “Vakalagilagia na Kalou ena ‘Domovata’” na sala eda rawa ni vosataka kece kina na “vosa savasava,” da qai qaravi Jiova “e na lomavata.”​—Sefanaia 3:9.

Era marautaka na itubutubu vakabibi o ira na gone na iotioti ni vunau ena ikarua ni siga, “Era iSolisoli Talei na Luveda.” Era marau na vakarorogo ni a soli kina e dua na ivola vou e 256 na tabana. Ena vukei ira na itubutubu na ivola Vuli Vua na Qasenivuli Levu mera veivosakitaka kina kei luvedra na veika vakayalo, nira isolisoli ni Kalou vei ira na itubutubu.

Usutu ni iKatolu ni Siga: “Cakava na Ka Kece ga me Vakalagilagi Kina na Kalou”

E tekivutaki vakayalo na iotioti ni siga ni veivosakitaki na tikinivolatabu e veisiga. Na imatai ni wasewase ni porokaramu oqo e vakatabakidua ena vuvale. E tekivuna sara ga na imatai ni vosa, “Ra iTubutubu, Ni Tara Cake Nomuni Vuvale.” E railesuva na nodra itavi na itubutubu ena nodra qaravi vakayago na vuvale, qai vakadinadinataka tale ga ni nodra itavi bibi sara ga na nodra qaravi vakayalo na luvedra.

O koya e vosa tarava e vosa tiko vei ira na gone ena ulutaga “Sala Era Vakacaucautaki Jiova Kina na iTabagone.” E vakatauvatani ira ina “mata ni tegu,” nira lewe levu dina, qai dau veivakauqeti nodra yalogu vakaitabagone. Era marautaka na itabaqase na nodra duavata kei ira na itabagone ena veiqaravi vei Jiova. (Same 110:3) E okati ena itavi oqo na nodra vakatarogi na itabagone era ivakaraitaki vinaka.

E dau namaki vakalevu ena soqo ni tikina na drama. Na kena ulutaga “Vunau Tiko ga ena Doudou—Kua ni Rerevaka na Veivakacacani” era vakaraitaki kina na imuri i Jisu ena imatai ni senitiuri. E marautaki dina, ia o koya e bibi sara ni veivakavulici. Na ulutaga e tarava na vunau ni drama, “‘Kua ni Cegu’ ni O Kacivaka na iTukutuku Vinaka,” e vakabibitaki kina na tikina bibi a vakatasuasuataki ena drama.

Era vakanamata kece na tiko ena porokaramu ena vunau soqovi levu ena Sigatabu, “O Cei Sara Mada Era Vakalagilagia Tiko Edaidai na Kalou?” E vakamacalataka o koya e vosa ena ulutaga oqo e so na ivakadinadina ni nodra sega ni vakalagilagia na Kalou na saenitisi kei na lotu. O ira ga e tiko vei ira na yacana, kei ira era vunau ra qai vakavulica na ka dina me baleti Jiova, era vakalagilagi Jiova dina tiko nikua.

Na ivunau e tarava oya na ivakamacala lekaleka ni Vale ni Vakatawa ni macawa oya. E qai mai tini ena iotioti ni vosa, “‘Vua Tiko ga Vakalevu’ me Vakalagilagi Kina o Jiova.” E kacivaki kina e tini na inakinaki mera ciqoma na tiko ena soqo oqo. E tiko ena inakinaki oqo e levu na sala me vakalagilagi kina na Dauveibuli o Jiova. Era vakaio kece na tiko ena soqo ni tikina mai na yasa ni vuravura adua ina yasa tale e dua.

E qai mai tini na soqo ni tikina ena nodra sa rogoca matua na tiko kina na usutu “Vakalagilagia na Kalou.” Ena veivuke ni yalo tabu kei na nona isoqosoqo rairai, meda qara tiko ga na sala meda vakalagilagia kina na Kalou, sega ni tamata.

[iYaloyalo ena tabana e 23]

Soqo ni Veimatanitu

E va na siga na kena vakayacori tiko e Aferika, Esia, Ositerelia, Urope, Mereke, kei Sauca Amerika na soqo ni veimatanitu. Era sureti na iVakadinadina ena veiyasa i vuravura mera mata ena soqo levu oqo. Ena sala oqo era ‘veivakacegui’ o ira na veisureti kei ira na itaukeinisoqo. (Roma 1:12) E vakaukauataka tale ga na nodra veiwekani o ira na veikilai tu e liu, vaka tale ga kina o ira na ka vou. Dua vei ira na porokaramu lavotaki ena soqo ni veimatanitu na ulutaga “iRogo Mai na Veivanua.”

[iYaloyalo ena tabana e 25]

iVola Vou e Vakalagilagia na Kalou

E soli e rua na ivola vou ena soqo ni tikina “Vakalagilagia na Kalou.” Na ivola Raica na Vanua Vinaka era tu kina na mape kei na itaba ni veivanua era cavuti ena iVolatabu, e 36 na tabana qai waqa kaukaua toka. E rokataki na veitabana yadua, na mape e vakaraitaka na vanua era kovuta na veimatanitu me vakataki Asiria, Papiloni, Mitia kei Perisia, Kirisi, kei Roma. E tiko tale ga na mape e dusia na vanua e vunau voli kina o Jisu, kei na vanua e tete kina na lotu Vakarisito.

Na ivola Vuli Vua na Qasenivuli Levu e 256 na tabana qai rauta ni 230 na iyaloyalo era tu kina. Era na marautaka dina na gone ke da sarava wale toka ga na iyaloyalo kei ira, ra qai sauma na taro e vakavure vakasama e koto ena ivola. Na ivola vou oqo ena vukei ira na itubutubu mera sabaya kina na nona valuti ira na gone o Setani, ena nona saga me vakaleqa na nodra itovo vinaka.

[iYaloyalo ena tabana e 23]

E veivakayaloqaqataki na nodra vakasavuirogorogo na daukaulotu

[iYaloyalo ena tabana e 24]

Na papitaiso e dua na tiki bibi ni soqo ni tikina e kena usutu “Vakalagilagia na Kalou”

[iYaloyalo ena tabana e 24]

Era marautaka na qase kei na gone na drama vakaivolatabu