E Tubu Tiko ga na Lotu Vakarisito Dina

E TOTOLO na kena vakilai na cakacaka vakaitalatala i Jisu Karisito e vuravura ena imatai ni senitiuri. Era qoroya nona itukutuku na tamata, ni veivakabulabulataki, veivakararamataki, qai veiuqeti. Levu vei ira na rogoci koya e tarai ira sara ga na ka e kaya.​—Maciu 7:28, 29.

A sega vakadua ni vakaitavi o Jisu ena dua na ka ni lotu se na politiki e veivakasaurarataki ena nona gauna, ia e dau vakarawarawataka na nodra torovi koya na lewenivanua. (Maciu 11:25-30) A vakavotuya e matanalevu na nodra veivakamuai cala na yalo velavela e vuravura kei na nona vakamalumalumutaki ira ena kaukaua soli vakalou. (Maciu 4:2-11, 24; Joni 14:30) E maqosa nona vakatakila o Jisu nodrau veisemati na rarawa kei na ivalavala ca, qai dusimaka vakayalololoma ni Matanitu ni Kalou ga ena kauta mai na vakacegu ena tawamudu. (Marika 2:1-12; Luke 11:2, 17-23) Sa qai mai cekata vakadua kina na iubi ni butobuto e tabonaka tu mai vakadede na itovo dina i Tamana, ni vakatakila na yaca ni Kalou vei ira kece era via veiwekani kei koya.​—Joni 17:6, 26.

Dina nira vakacacani vakaca sara vei ira na isoqosoqo vakapolitiki kei na lotu, era vakatetea tiko ga na itukutuku i Jisu na nona tisaipeli. Ena rauta ga e 30 na yabaki, era tauyavu sara na ivavakoso vakarisito bulabula e Aferika, Esia, kei Urope. (Kolosa 1:23) Na ka dina ga a vakavulica o Jisu e vakararamataka na lomadra na tamata era yalomalumalumu qai lomadina ena vanua kece e lewa na matanitu o Roma.​—Efeso 1:17, 18.

E rawa gona vakacava vei ira kece na tisaipeli vou oqo e duidui na veika vakailavo era rawata, duidui matatamata, vosa, e duidui tale ga na nodra isususu vakalotu mera mai duavata ena ka e vakatoka na yapositolo o Paula me “dua bauga na vakabauta”? (Efeso 4:5) Era na “tauvata kecega” vakacava “e na vosa” mera kua kina ni veisei? (1 Korinica 1:10) Nida raica nodra veisei o ira era kaya voli nira lotu Vakarisito nikua, de vinaka meda dikeva mada na ka a vakavulica o Jisu.

Na Yavu ni Duavata Vakarisito

Ena gauna e lewai tiko kina vei Ponitio Pailato o Jisu, a qai vakatakila na yavu ni duavata vakarisito. A kaya: “A ka oqo ka’u sa sucu mai kina, ia na ka oqo ka’u sa lako mai kina ki vuravura, me’u dautukuna na ka dina. O koya yadua sa vakabauta na ka dina, sa rogoca na noqu vosa.” (Joni 18:37) Koya gona, na ciqomi ni ivakavuvuli i Jisu kei na Vosa uqeti kece ni Kalou ena iVolatabu, e vakaduavatataki ira na tisaipeli dina i Karisito.​—1 Korinica 4:6; 2 Timoci 3:16, 17.

Io, ena so na gauna, era na dau lomatarotaro, se sega ni yalovata na tisaipeli i Jisu. Na cava ena vukei ira? E vakamacalataka o Jisu: “Ni sa lako mai ko koya, na Yalo Tabu na vu ni ka dina, ena tuberi kemudou ki na ka kecega e dina: ni na sega ni vosa vakataki koya: ia na ka kecega ena rogoca, ena vosataka: ka na vakatakila vei kemudou na veika ena yaco maimuri.” (Joni 16:12, 13) Na yalo tabu ni Kalou ena vukei ira na tisaipeli dina i Jisu mera kila na ka dina e sa tekivu vakatakila tiko mai vei ira na Kalou. Na yalo tabu tale ga ena vuataka na itovo e so me vaka na loloma, reki, kei na vakacegu, ena qai vakaduavatataki ira.​—Cakacaka 15:28; Kalatia 5:22, 23.

A sega ni vakatara o Jisu na duiyaloyalo se veisei ena kedra maliwa nona tisaipeli; se solia vei ira na dodonu mera moica na ka dina ena iVolatabu me vakadonuya na nodra itovo vakavanua se vakabauta na tamata era na sotava. Ia ena iotioti ni nona bogi kei iratou na tisaipeli a masulaka ga vagumatua: “Ka’u sa sega ni masu e na vukudra walega oqo, ia e na vukudra talega era na vakabauti au e na vuku ni nodra vosa: me ra dua bau kecega; me vaka edaru sa dua bau, Tamaqu, me ra dua bau kei kedaru: me vakadinata ko vuravura ni kemuni sa talai au mai.” (Joni 17:20, 21) A dodonu gona me ivakatakilakila laurai votu vei ira na tisaipeli i Karisito mai na ivakatekivu me yacova mai edaidai, na duavata vakayalo me salavata kei na dina ni Vosa ni Kalou. (Joni 4:23, 24) Ia era sega tu ni duavata na lotu edaidai, era veisei ga. Ena vuku ni cava?

Cava Era Sega ni Duavata Kina na Veilotu?

Na kena dina ga nira sega ni muria na ivakavuvuli i Karisito, oya na vuna sa rui levu kina na vakabauta kei na ivakavuvuli ena lotu era kaya nira lotu Vakarisito. E kaya e dua na dauvolaivola: “Me vaka ena veigauna sa oti, o ira na lotu Vakarisito vovou nikua era ciqoma ga na veika era via taura ena iVolatabu—⁠ra qai cata na kena e sega ni duavata kei na nodra lotu makawa.” Oqo sara ga na ka a kaya o Jisu kei iratou nona yapositolo ni na yaco.

Kena ivakaraitaki, ena veiuqeti ni Kalou e vola kina na yapositolo o Paula vei nona itokani, e ivakatawa tale ga, o Timoci: “Ni na yaco na gauna era na sega ni vosota kina nai vakavuvuli dodonu; ia ena vaka na nodra gagadre ca, era na vakalewevuqataki ira kina na nodrai vakavuvuli, ni sa qasikanunu na daligadra; a ra na vagolea tani na daligadra mai na ka dina, ka lesu ki nai tukutuku wale.” Era na vakacalai beka na lotu Vakarisito kece? Sega. E tomana o Paula: “Ia ko iko, mo yalomatua e na ka kecega, mo vosota na ka rarawa, mo kitaka na cakacaka ni vakavuvuli, vakayacora sara na ka ko sa lesi kina moi talatala.” (2 Timoci 4:3-5; Luke 21:8; Cakacaka 20:29, 30; 2 Pita 2:1-3) Era muria na ivakasala vakalou oqo o Timoci kei ira tale e so na lotu Vakarisito yalodina.

Era se Duavata Tiko ga na Lotu Vakarisito Dina

Me vakataki Timoci, o ira na lotu Vakarisito dina nikua era yalomatua nira cata na vakasama vakatamata ra qai ciqoma ga na ivakavuvuli ena iVolatabu me nodra vakabauta vakalotu. (Kolosa 2:8; 1 Joni 4:1) Ena nodra vakatotomuri ira na lotu Vakarisito ena imatai ni senitiuri, sa ra vakayacora tiko kina na iVakadinadina i Jiova nodra ilesilesi vakaitalatala ena sivia e 230 na vanua, nodra kacivaka vei ira na tamata ena veivanua kece na itukutuku vinaka ni Matanitu ni Kalou me vaka a kacivaka o Jisu. Dikeva mada e va na sala bibi era duavata kina ni vakatotomuri Jisu kei na nodra bulataka na bula dina vakarisito se mani vanua cava era tiko kina.

E yavutaki nodra vakabauta ena Vosa ni Kalou. (Joni 17:17) A vola e dua na bete mai Belgium me baleti ira na iVakadinadina i Jiova: “E rawa nida vulica mai vei ira [na iVakadinadina i Jiova] na nodra tu vakarau ni rogoca na Vosa ni Kalou kei na nodra yaloqaqa ni vunautaka.”

Era nuitaka na Matanitu ni Kalou ni na vakaotia na leqa kece e sotavi e vuravura. (Luke 8:1) E Barranquilla, mai Colombia, erau veivosaki e dua na iVakadinadina kei Antonio, e dau tutaka vakaukaua e dua na isoqosoqo vakapolitiki. Na iVakadinadina oqo a sega ni tovata kei koya, se tokona e dua tale na vakasama vakapolitiki. Ia a kerea ga me vuli iVolatabu o Antonio kei iratou na ganena, me sega ni saumi. Sega ni dede sa qai kila o Antonio ni Matanitu ni Kalou duadua ga e nodra inuinui na dravudravua e Colombia kei na vo ni tamata e veiyasa i vuravura.

Era doka na yaca ni Kalou. (Maciu 6:9) O Maria, e dua e dau dina ena lotu Katolika e vakaitikotiko mai Ositereli. Ena imatai ni gauna era sotavi koya kina na iVakadinadina i Jiova, a vakadonuya mera vakaraitaka vua na yaca ni Kalou ena iVolatabu. Na cava a qai yaco? “Au tagi niu raica na yaca ni Kalou ena iVolatabu ena imatai ni gauna. E tarai au sara ga na noqu kila kei na noqu rawa ni vakayagataka na yaca ni Kalou.” E tomana nona vulica na iVolatabu o Maria, qai vakadua ena nona bula me kila se mataqali Kalou vakacava o Jiova qai rawa tale ga ni bucina me rau veiwekani me tawamudu.

E vakaduavatataki ira nodra dau veilomani. (Joni 13:34, 35) E kaya na edita ni niusiveva The Ladysmith-Chemainus Chronicle, mai Kenada: “Se mani cava nomuni vakabauta vakalotu, se oni sega ni muria e dua na vakabauta vakalotu, e dodonu ga mo ni vakavinavinakataki ira na 4,500 na iVakadinadina i Jiova era cakacaka vagumatua ena dua veimama na macawa sa oti mera tara kina na nodra Assembly Hall e Cassidy, e 2,300 na mita vakarivirivi na kena levu . . . Na nodra cakava oqo ena nodra sega ni veileti, sega ni duiyaloyalo se dokadoka e ivakatakilakila ni lotu Vakarisito dina.”

O koya gona, dikeva na kena ivakadinadina. Era se sasaga tiko ga na daunicioloji ena lotu ni Veivanua Vakarisito, nodra daukaulotu, kei ira na lewena mera walia na leqa sa vakarau yaco ena nodra lotu, ia e bulabula qai tetevi vuravura na lotu Vakarisito dina. Era ogaoga tiko ga na lotu Vakarisito dina ena nodra vakayacora nodra ilesilesi mera vunautaka ra qai vakavuvulitaka na Vosa ni Kalou. (Maciu 24:14; 28:19, 20) Ke o maliwai ira na “vutugu ka qoqolou” ena vuku ni veika vakasisila sa vakayacori tu oqo, qai rarawataka tale ga na nodra veisei na lotu ni Veivanua Vakarisito, o uqeti mo tomani ira na iVakadinadina i Jiova ena nodra duavata ni sokaloutaka na Kalou dina duaduaga, o Jiova.​—Isikeli 9:4; Aisea 2:2-4.