‘Vakayacora na Cakacaka ni Veivakalotutaki’

“Mo yalomatua e na gauna kece ga, . . . mo vakayacora na cakacaka vakadauveivakalotutaki.”​—2 TIMOCI 4:5, VV.

1. Na ilesilesi cava a lesi iratou kina na nona imuri o Jisu?

ESA vunautaki tiko ena vuravura taucoko na yaca i Jiova kei na nona inaki. E yaco oqo baleta nira muria mai vu ni lomadra na tamata ni Kalou na ilesilesi a lesi iratou kina nona yapositolo o Jisu Karisito, ni a kaya: “Dou lako yani ka qisi ira me ra noqu tisaipeli na lewe ni veivanua kece ga, ka papitaisotaki ira e na yaca ni Tamamudou kei na Luvena kei na Yalo Tabu; vakavulici ira me ra muria na veika kece ga au sa vakarota tu vei kemudou.”​—Maciu 28:19, 20, VV.

2. Na cava a vakasalataki kina na ivakatawa o Timoci? Cava e dua na sala mera vakayacora vinaka kina nodra cakacaka vakavunau na ivakatawa lotu Vakarisito?

² Era taura vakabibi na ivakasala i Jisu o ira na tisaipeli ena imatai ni senitiuri. Kena ivakaraitaki, na yapositolo o Paula a uqeta na nona itokani o Timoci, e ivakatawa tale ga ni ivavakoso Vakarisito: “Mo vakayacora na cakacaka vakadauveivakalotutaki ka vakayacora vinaka sara na nomu i tavi.” (2 Timoci 4:5, VV) Nikua, e dua na sala ena vakayacora vinaka kina na nona cakacaka vakavunau na ivakatawa ke dau yalogu ni kacivaka na Matanitu ni Kalou, se na nona vakaitavi wasoma ena cakacaka vakavunau. Kena ivakaraitaki, o koya na iVakatawa ni Vulivola ni iVavakoso e nona itavi dokai me liutaka sara ga na cakacaka vakavunau kei na nodra vukei e so tale. A vakayacora vinaka o Paula na nona itavi ni vunautaka na itukutuku vinaka, kei na nona vakavulici ira tale e so mera cakava na cakacaka vata ga oya.​—Cakacaka 20:20; 1 Korinica 9:16, 17.

Daukaulotu Yalogu e Liu

3, 4. Cava e so na ivakaraitaki ni nona cakacaka vakaulotu o Filipi?

³ Era kilai na lotu Vakarisito taumada ena nodra dau kaulotu ena yalogu. E dua oqo na daukaulotu o Filipi. O koya e dua vei ira na “lewe vitu na tamata sa rogorogo vinaka, eratou sinai e na Yalo Tabu kei na vuku,” eratou digitaki me ratou vota yani e veisiga na kakana vei ira na yada lotu Vakarisito era vosataka na vosa vakirisi kei ira na vosataka na vosa vakaiperiu era tiko e Jerusalemi. (Cakacaka 6:1-6) Ni sa mai cava na itavi oqo, era veidroyaki na lotu Vakarisito ena vuku ni veivakacacani vakavo ga o iratou na yapositolo, a mani gole i Samaria o Filipi. A lai vunautaka kina na itukutuku vinaka, ena kaukaua ni yalo tabu a vakatalai ira kina na timoni, qai vakabulai ira na lokiloki kei ira na paralase. Era ciqoma kina e levu na kai Samaria na itukutuku vinaka ni Matanitu ni Kalou, ra papitaiso sara. Ni ratou rogoca na ka oqo o iratou na yapositolo e Jerusalemi, eratou talai Pita kei Joni i Samaria mera lai sobuti kina ena yalo tabu o ira na papitaiso vou oqo.​—Cakacaka 8:4-17.

⁴ Ni oti oya, a vakauti Filipi na yalo tabu ni Kalou me rau lai sota kei na matanivanua ni Iciopea ena gaunisala e gole i Kesa. Ni sa vakamacalataka oti vakamatata o Filipi na parofisai i Aisea, e vakabauti Jisu Karisito qai papitaiso sara kina na “tamata levu i Kadasi na nodra ranadi na kai Iciopea” oqo. (Cakacaka 8:26-38) Ni oti oya, a lako i Asoto vaka kina i Sisaria o Filipi, a “lakova na veikoro kecega ka vunautaka nai tukutuku vinaka.” (Cakacaka 8:39, 40) E ivakaraitaki vinaka dina ni nona dau yalogutaka na cakacaka vakaulotu!

5. Cava eratou kilai kina na va na luve i Filipi?

⁵ Oti tale e 20 na yabaki, a se gugumatua tiko ga o Filipi ena cakacaka vakavunau e Sisaria. Gauna rau a lai tiko kina ena nona vale o Paula kei Luke, e “sa lewe va na luvena, eratou sa goneyalewa, a ratou sa dauparofisai.” (Cakacaka 21:8-10) E macala e ke ni ratou tuberi vinaka vakayalo, eratou dau yalogu ena cakacaka vakavunau, eratou rawata tale ga na isolisoli vakacakamana ni parofisai. Na nodra gugumatua gona na itubutubu nikua ena cakayaco sara ga vei luvedra, ena uqeti ira me nodra cakacaka tudei na cakacaka vakaulotu.

Daukaulotu Yalogu Nikua

6. Na cava era rawata vinaka na daukaulotu ena imatai ni senitiuri?

⁶ E dusia tiko na noda gauna na parofisai levu i Jisu, na gauna ni ivakataotioti, e kaya kina: “Ena vunautaki dina mada eliu nai tukutuku-vinaka e na veivanua kecega.” (Marika 13:10) Ena yaco na icavacava ni sa vunautaki oti na itukutuku vinaka ena “veivanua kecega.” (Maciu 24:14) Ena gauna era vunautaka tiko kina na itukutuku vinaka o Paula kei ira na daukaulotu ena imatai ni senitiuri, e levu era sa mai vakabauta, era tauyavu tale ga kina na ivavakoso ena vanua kece era vakarurugi ena veiliutaki vakaroma. O ira na qase era digitaki mera qarava na ivavakoso oqori era vakaitavi tale ga ena cakacaka vakaulotu, ra qai vunau yani ena levu tale na vanua. Ena gauna oya e tubu qai robota na vanua na vosa i Jiova, e vaka sara ga kina nikua na nodra cakava tiko na cakacaka oqo e milioni vakacaca na iVakadinadina i Jiova. (Cakacaka 19:20) O dua tale beka ga o vakacaucautaki Jiova tiko ena marau?

7. Cava era cakava tiko nikua o ira na vunautaka na Matanitu ni Kalou?

⁷ E levu vei ira na vunautaka na Matanitu ni Kalou nikua era sa vakalevutaka tiko na cakacaka oqo. E levu era sa daukaulotu, e drau vakaudolu era veitomani ena cakacaka vakatabakidua mera painia tudei se painia veivuke. Sa dua dina na cakacaka vinaka era cakava tiko na tagane, yalewa, kei ira na gone ena nodra yalogu ni kacivaka na Matanitu ni Kalou! Io, era sa marautaka tiko na veivakalougatataki levu na tamata i Jiova era kaulotu nira qaravi koya tiko ena lomavata.​—Sefanaia 3:9.

8. Na cakacaka cava ni veivakatakilakilataki e sa caka tiko, o cei era cakava tiko?

⁸ Na Kalou e solia vei ira na imuri lumuti i Jisu na itavi mera kacivaka yani na itukutuku vinaka ena vuravura taucoko. E tokoni ira tiko ena cakacaka oqo o ira na ‘so tani tale na sipi’ i Karisito e tubu tiko ga na kedra iwiliwili. (Joni 10:16) Na cakacaka ni veivakabulai oqo e vakatauvatani ena kena vakatakilakilataki na yadredra o ira na vutugutaka tiko ra qai qolouvaka na ka vakasisila sa yaco tu nikua. Sa voleka oqo me na vakarusai vakadua na veika ca kece. Ia ena gauna mada ga oqo e ka dokai dina meda kacivaka yani na itukutuku ni veivakabulai vei ira na lewe i vuravura!​—Isikeli 9:4-6, 11.

9. Sala cava e rawa nira vukei kina ena cakacaka vakavunau o ira na ka vou ena dina?

⁹ Ke sa dede na noda cakava tu mai na cakacaka vakaulotu, e vinaka meda vukei ira na ka vou ena ivavakoso. Ena so na gauna, e rawa nida veitomani ena cakacaka vakavunau. Era uqeti na qase mera tarai ira cake vakayalo na tacidra. Na vinaka gona ni nodra sasaga na ivakatawa yalomalumalumu era na uqeti tale kina e so mera yalogutaka na cakacaka vakaulotu, ra qai vua vakalevu.​—2 Pita 1:5-8.

Vunau e Veivale

10. Na ivakaraitaki cava ni cakacaka vakavunau e kotora o Karisito kei iratou na nona imuri?

¹⁰ E kotora vei iratou na nona imuri o Jisu Karisito na ivakaraitaki vinaka ni daukaulotu. E vakamacalataki tu ena Vosa ni Kalou na nona cakacaka vakavunau na Karisito kei iratou na nona yapositolo, e kaya: “Sa qai lako voli emuri ko koya e na veikoro kecega kei na veikoro lalai kecega, ka vunau, ka tukuna nai tukutuku-vinaka ni matanitu ni Kalou; kei ira vata kaya na lewe tinikarua.” (Luke 8:1) Ia vakacava ga o iratou na yapositolo? Ni oti na kena sovaraki na yalo tabu ena Penitiko 33 S.K., “e na veisiga kecega e na vale ni soro, kei na veivale kecega, era sa sega ni mudu ni vakatavuvuli ka vunautaki Jisu ni sai koya na Karisito.”​—Cakacaka 5:42.

11. Cava a cakava o Paula ena cakacaka vakavunau me vaka e tukuni ena Cakacaka 20:20, 21?

¹¹ Na nona dau yalogutaka o Paula na kaulotu, e tukuna kina vei ira na qase lotu Vakarisito e Efeso: “Ka’u a sega ni rere me’u kua kina ni tukuna e dua na ka sa yaga vei kemudou, ka’u vakavulici kemudou, ni dou sa soqoni vata, e na veivale talega.” Ni veivakavulici tiko ena veivale o Paula, a sikovi ira tiko beka na tacina vakayalo era qaravi Jiova tiko me vakatawani ira? E sega, a vakamacalataka: “Ni’u a vakarota tiko kivei ira na Jiu, vei ira talega na veimatanitu tani, na veivutuni vua na Kalou, kei na vakabauta na noda Turaga ko Jisu Karisito.” (Cakacaka 20:20, 21) Io, o ira na sa yalataki ira oti vei Jiova e sega ni gadrevi tale mera vakavulici mera “veivutuni vua na Kalou, kei na vakabauta na noda Turaga ko Jisu Karisito.” A vakavulici ira na qase lotu Vakarisito e Efeso o Paula ena vunau e veivale, qai vakavulici ira na sega ni vakabauta na veika me baleta na veivutuni kei na vakabauta. Ena nona cakava oqo o Paula e sa vakadamurimuria tiko kina na ivakaraitaki i Jisu.

12, 13. Me salavata kei na Filipai 1:7, cava era cakava na tamata i Jiova me baleta na nodra galala mera vunau?

¹² E ka ni bolebole toka na cakacaka vakavunau e veivale. Kena ivakaraitaki, e levu era sega ni dau taleitaka na itukutuku mai na iVolatabu eda kauta yani vei ira. E sega ni noda inaki meda lai vakacudrui ira. Na cakacaka vakavunau e veivale e yavutaki vakaivolatabu, na noda lomana gona na Kalou kei na noda lomani ira na wekada e uqeti keda meda cakava kina na cakacaka oqo. (Marika 12:28-31) Na ‘totaki kei na vakadinadinataki’ ni noda galala meda vunau, e rogoci kina e vica vata na noda kisi ena mataveilewai, okati kina na Mataveilewai Levu e Mereke. (Filipai 1:7) Levu ga na gauna e dau noda na qaqa ena kisi vaka oqori. Oqo e dua na ivakaraitaki ni lewa a tau ena mataveilewai:

¹³ “Dua na iwalewale makawa ni kaulotu na veisoliyaki ni ivola vakalotu​—a se rairai vakayagataki tu mai oqori ena gauna sara e buli kina na imatai ni misini ni tabaivola. E mana vakalevu na iwalewale oqo vei ira na veisoqosoqo vakalotu ena veiyabaki sa sivi yani. Levu sara na veisoqosoqo lotu lalai era vakayagataka tiko na iwalewale ni kaulotu oqo nikua. Era kauta na kosipeli ina udolu vakaudolu na veivale mera rawati ira kina na itaukeinivale. . . . Na iwalewale ni cakacaka vakalotu oqo e tautauvata ga na kena bibi ena Yavu ni Vakavulewa [ni Matanitu o Mereke], me vaka ga na sokalou ena valenilotu se na vunau e talaucaki mai ena kena tevale.”​—Murdock v. Pennsylvania, 1943.

Cava Meda Vunau Tiko ga Kina?

14. E yaga vakacava na noda cakacaka vakavunau?

¹⁴ Levu na vuna meda vunau tiko ga kina e veivale. Ena gauna kece eda vosa kina vua na itaukeinivale, eda saga tiko meda teivaka na sore ni ka dina vakaivolatabu. Ia nida veisikovi lesu, e vaka ga nida lai vakasuasuana na sore ni ka dina oqori. Na ka oqo ena lai vakila na kena yaga o itaukeinivale, ni a vola o Paula: “Au sa tea koi au, sa vakasuasuataka ko Apolosa; ia na Kalou ga sa vakatubura.” (1 Korinica 3:6) Meda tomana tiko ga noda ‘tea’ na sore ni ka dina kei na noda ‘vakasuasuana’ nida nuidei ni na ‘vakatubura’ o Jiova.

15, 16. Cava eda na lako tiko ga kina ena veivale?

¹⁵ E vakatau na nodra bula na tamata mai na noda kaulotu. Eda na rawa ni vakabulai keda vaka kina o ira na rogoci keda. (1 Timoci 4:16) Ke da kila ni dua e tu ena ituvaki leqataki, eda na saga beka ga vakadua meda vukei koya? Sega! Ni na vakatau kina na nodra bula na tamata, eda na lakovi ira tiko ga ena nodra vale. Ia e dau veiveisau tu ga na ituvaki. E dua beka e osooso qai sega ni rawa ni vakarorogo, ena rawa ni vakarorogo ena dua tale na gauna. Ena duatani beka na lewenivuvale e dolava mai na katuba, e rawa ni tekivu sara kina na veivosaki vakaivolatabu.

¹⁶ E sega wale ga ni veisau na kedra ituvaki na itaukeinivale, e rawa tale ga ni veisau na nodra rai. Kena ivakaraitaki, na nona rarawataka e dua na mate ni wekana lomani e rawa ni uqeti koya me rogoca na itukutuku vinaka ni Matanitu ni Kalou. Eda nuitaka meda na vakacegui ira, da vukei ira tale ga mera kauaitaka na nodra gagadre vakayalo, qai vakaraitaka vei ira na sala mera vakaceguya kina na gagadre oya.​—Maciu 5:3, 4, NW.

17. Cava na inaki levu ni noda vunau?

¹⁷ Na inaki levu ni noda vunau e veivale se dua tale na basoga ni noda cakacaka vakavunau oya na noda via vakatakila yani na yaca i Jiova. (Lako Yani 9:16; Same 83:18) E marautaki dina na noda vukei ira na lomana na ka dina kei na ivalavala dodonu mera mai vakacaucautaki Jiova tale ga! E lagata kina na daunisame: “Na cauravou, kei na goneyalewa; na tamata qase, kei na gone: me ra ia na vakavinavinaka ki na yaca i Jiova: ni sa ka talei duaduaga na yacana; sa sivia na vuravura kei na lomalagi na nona lagilagi.”​—Same 148:12, 13.

Yaga Vei Keda na Cakacaka ni Kaulotu

18. Ena yaga vakacava vei keda na cakacaka vakaulotu?

¹⁸ E vukei keda ena levu na sala na cakacaka vakaulotu. Na noda lako e veivale eda na bucina kina na yalomalumalumu, vakabibi ke ra sega ni dau ciqomi keda na itaukeinivale. Meda vakadamurimuri Paula ke da vinakata meda dua na daukaulotu yalogu, oya meda ‘ka kece ga vei ira na tamata kece ga meda vakabulai ira kina e so e na sala kece ga e rawa.’ (1 Korinica 9:19-23) Eda na qai matai ga ni cakava na cakacaka oqo ke da vakaitavitaki keda kina vakalevu. Noda nuitaki Jiova kei na noda digia vinaka na noda vosa, eda rawa ni muria kina na ivakasala i Paula: “Me ia tikoga na nomudou vosa e na yalovinaka, ka vakatuituinataki e na masima, mo dou kila kina se cava sa dodonu mo dou kaya tale vei ira na tamata yadua.”​—Kolosa 4:6.

19. Ena vukei ira vakacava na daukaulotu na yalo tabu?

¹⁹ E vukei keda tale ga na cakacaka vakaulotu meda nuitaka na yalo tabu ni Kalou. (Sakaraia 4:6) Ena cakayaco kina ena noda cakacaka vakavunau na vua ni yalo tabu—⁠“na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, nai valavala malua.” (Kalatia 5:22, 23) Ena laurai oqo ena noda veitaratara kei ira na tamata, na noda yalorawarawa gona ena veidusimaki ni yalo tabu ena vukei keda meda vakaitovotaka na loloma, na reki, na vakacegu, na vosota vakadede, yalomalua, yalololoma, yalomalumalumu, kei na ivalavala malua nida vunautaka tiko na itukutuku vinaka.

20, 21. Cava e so na ka ni veivakalougatataki ni noda vakaogai keda ena cakacaka vakaulotu?

²⁰ Dua tale na ka e veivakalougatataki kina na cakacaka vakaulotu oya nida na bucina kina na yalo ni veikauaitaki. Nira tukuna mai na tamata na nodra leqa​—na tauvimate, na sega ni cakacaka, se na leqa vakavuvale​—eda na sega ni via lai veivakasalataki ena nodra leqa, ia eda na vakayaloqaqataki ira ga da qai vakacegui ira mai na iVolatabu. Eda kauaitaki ira gona era vakamatabokotaki tu vakayalo ia era lomana na yalododonu. (2 Korinica 4:4) Ia e ka marautaki dina na noda vukei ira vakayalo ‘era sa vakarau tu mera vinakata na bula tawamudu’!—Cakacaka 13:48.

²¹ Na noda vakaitavi wasoma ena cakacaka vakaulotu ena vukei keda meda vakaliuca tiko ga na veika vakayalo. (Luke 11:34) E bibi dina oqo, ke sega, eda na rawa ni lai rawai tu ena domodomoiyau ni vuravura oqo. E vakasalataki ira kina na lotu Vakarisito na yapositolo o Joni: “Dou kakua ni lomani vuravura, se na veika sa vakavuravura. Kevaka sa lomani vuravura e dua, sa sega e na lomana na loloma vua na Tamada. Na ka kecega sa tu e vuravura, na gagadre ca ni yago, na gagadre ca ni mata, kei na dokadokai keda e na ka ni bula oqo, sa sega ni tubu maivei Tamada, mai vuravura ga. Ia ko vuravura sa lako tani yani, kei na kena gagadre talega; ia ko koya sa cakava na ka sa vinakata na Kalou, sa tu dei ga ka sega ni mudu.” (1 Joni 2:15-17) Na noda vakaogai keda tiko ena cakacaka vakaulotu eda na sega kina ni lomani vuravura.​—1 Korinica 15:58.

Kumuna na iYau Vakalomalagi

22, 23. (a) Na iyau cava era sa kumuna tiko na lotu Vakarisito daukaulotu? (b) Ena yaga vakacava vei keda na ulutaga e tarava?

²² E yaga tawamudu vei keda na noda yalogutaka na kacivaki ni Matanitu ni Kalou. A vakaraitaka oqo o Jisu ni kaya: “Dou kakua ni kumuna vata vei kemudou nai yau e vuravura, e dauvakacacana kina na sarasara kei na veveka, a sa ravabasuka kina na daubutako ka butakoca: ia mo dou kumuna vata na nomudoui yau mai lomalagi, sa sega ni vakacacana kina na sarasara se na veveka, a sa sega ni ravabasuka kina na daubutako me butakoca: ni na tiko talega na yalomudou e na yasana sa tiko kina na nomudoui yau.”​—Maciu 6:19-21.

²³ Meda kumuna tiko mada ga na noda iyau vakalomalagi, nida kila ni sega tale ni dua na itavi dokai me vaka na noda matataki koya tiko na Turaga Sau o Jiova ena noda vakadinadinataki koya. (Aisea 43:10-12) Nida cakava tiko na itavi vakaitalatala ni Kalou, eda rawa ni vakataki koya na marama lotu Vakarisito e sa yabaki 90 vakacaca, e kaya me baleta na balavu ni gauna e qarava tiko mai kina na Kalou: “Ena yabaki kece ni noqu veiqaravi, au vakavinavinakataki Jiova ni ciqomi au tiko ga dina ni tu na noqu malumalumu, au dau masulaka vagumatua me Tamaqu dauloloma tiko ga me tawamudu.” Kevaka eda vakamareqeta na noda veiwekani kei na Kalou, eda na cakava kina vakavinaka na cakacaka vakaulotu. Ena veivosakitaki ena ulutaga e tarava na sala meda vakayacora vinaka kina na noda cakacaka vakavunau.

O se Nanuma Tiko?

• Cava meda kaulotu kina?

• Cava o rawa ni tukuna me baleta na cakacaka vakaulotu ena gauna sa oti vaka kina nikua?

• Cava eda vunau kina e veivale?

• E yaga vakacava vei iko na cakacaka vakaulotu?

[iYaloyalo ena tabana e 10]

Era tu tale ga nikua o ira era vakataki Filipi kei iratou na luvena yalewa

[iYaloyalo ena tabana e 14]

E yaga vakacava vei iko na nomu wasea na itukutuku vinaka vei ira tale e so?