E Veivakalougatataki na iTukutuku Vinaka

“Sa lumuti au ko Jiova, me’u vunautaka nai rogorogo vinaka vei ira era sa yalomalumalumu; sa talai au mai me’u vakabulai ira sa ramusu na yalodra; . . . me vakacegui ira kecega era sa tagi.”​—AISEA 61:​1, 2.

1, 2. (a) A vakatakilai koya vakacava o Jisu, ia na itukutuku cava a kaya ni na vakarogoya? (b) Na isolisoli totoka cava soti e rawati ena itukutuku vinaka a vakarogoya o Jisu?

NI SE qai tekivu toka ga na cakacaka vakaitalatala i Jisu, a curu yani ena dua na Sigatabu ena nodra valenilotu na Jiu mai Nasareci. E tukuni ni a “soli vua nai vola nei Aisea na parofita. Ia ni sa tevuka nai vola, sa kunea na tikina sa volai kina, Sa tu vei au na Yalo i Jiova, ni sa lumuti au ko koya me’u vunautaka nai tukutuku-vinaka.” A wilika o Jisu e so tale na parofisai oya. Ni sa wiliwili oti, sa qai dabe sobu, a kaya: “E na siga oqo sa vakayacori e na daligamudou nai Vola Tabu oqo.”​—Luke 4:​16-​21.

² Ena ka e cakava oya, a vakatakila kina o Jisu ni o koya ga na tamata a parofisaitaki ni na vunautaka na itukutuku vinaka kei na itukutuku ni vakacegu. (Maciu 4:​23) Qai totoka vakaoti na itukutuku vinaka i Jisu! A kaya vei ira na rogoci koya: “Oi au na rarama kei vuravura: ko koya sa muri au ena sega ni lako e na butobuto, ena tu ga vei koya na rarama ni bula.” (Joni 8:​12) A kaya tale ga: “Kevaka dou sa muria tikoga na noqu vosa, dou sa qai noqu tisaipeli dina; ia dou na kila na ka dina, ia na ka dina ena sereki kemudou.” (Joni 8:​31, 32) Io, a tu vei Jisu “na vosa ni bula tawa mudu.” (Joni 6:​68, 69) Meda vakamareqeta mada ga na isolisoli ni rarama, na bula, kei na noda sereki!

3. Na itukutuku vinaka cava era vunautaka na tisaipeli i Jisu?

³ Oti na Penitiko ni 33 S.K., era tomana na tisaipeli na cakacaka i Jisu me vunautaki na itukutuku vinaka. Era vunautaka “na i Tukutuku Vinaka ni matanitu” vei ira na Isireli kei ira na lewe ni so tani tale na matanitu. (Maciu 24:​14, VV; Cakacaka 15:7; Roma 1:​16) Era mai kila na Kalou o Jiova o ira na vakarorogo. Era sereki mai na ivau ni lotu lasu ra qai lewe ni dua na matanitu vou vakayalo, “na Isireli ni Kalou,” era vakanuinui na lewena nira na lai veiliutaki tawamudu e lomalagi vata kei na nodra Turaga, o Jisu Karisito. (Kalatia 5:1; 6:​16; Efeso 3:​5-7; Kolosa 1:​4, 5; Vakatakila 22:5) Sa bau uasivi dina na veivakalougatataki oya!

Vunautaki ni iTukutuku Vinaka Edaidai

4. Sa vakayacori tiko vakacava edaidai na ilesilesi me vunautaki na itukutuku vinaka?

⁴ Era vakayacora tiko ga nikua, na lotu Vakarisito lumuti kei “nai soqosoqo levu” e tubu tiko ga na kedra iwiliwili, na ilesilesi vakaparofisai a lesi taumada vei Jisu. (Vakatakila 7:9; Joni 10:16) Mai raici gona kina ni vunautaki na itukutuku vinaka ena kena ivakatagedegede e se sega ni rawati vakadua e liu. Era sa lako yani na iVakadinadina i Jiova ena 235 na vanua kei na yalava mera ‘vunautaka na irogorogo vinaka vei ira era sa yalomalumalumu; mera vakabulai ira sa ramusu na yalodra, mera vunautaka na veisereki vei ira na bobula, kei na veisereki vei ira era tiko e na vale ni veivesu, mera vunautaka na yabaki vinaka i Jiova, kei na siga sa ia kina na veisausaumi na noda Kalou, mera vakacegui ira kecega era sa tagi.’ (Aisea 61:​1, 2) O koya gona, na itukutuku vinaka era dau vunautaka na lotu Vakarisito era se vakalougatataki tiko ga kina e levu, qai vu ni vakacegu vei ira “sa rarawa” voli.​—2 Korinica 1:​3, 4.

5. Era duidui vakacava na iVakadinadina i Jiova mai na lotu ni Veivanua Vakarisito ena vunautaki ni itukutuku vinaka?

⁵ E so na lotu ni Veivanua Vakarisito era dau cuqena na vunautaki ni itukutuku vinaka qai duidui na iwalewale era taurivaka. E levu era talai ira yani na nodra italatala mera lai veivakalotutaki ena so tale na vanua. Me kena ivakaraitaki, na ivoladraudrau na Orthodox Christian Mission Center Magazine, e kaya nira cakacaka tiko na daukaulotu ni lotu Orthodox mai Madagascar, na ceva kei Aferika, Tanzania, kei Zimbabwe. Ia era sega ni vakaitavi ena cakacaka oya na iwase levu ni lotu Orthodox kei na so tale na lotu ni Veivanua Vakarisito. Na kena veibasai o ira na iVakadinadina i Jiova, ni o ira kece era sa yalataki ira era vakaitavi ena kacivaki ni itukutuku vinaka. Era kila ni nodra kacivaka na itukutuku vinaka ena vakadinadinataka ni tiko vei ira na vakabauta dina. A kaya o Paula: “Sa vakadinata na tamata e na vu ni yalona me sa vakadonui kina, ia na gusuna sa vakatusa kina me bula.” E mate na vakabauta e sega ni cakacakataki.​—Roma 10:10; Jemesa 2:​17.

Vu ni Veivakalougatataki Tawamudu na iTukutuku Vinaka

6. Na itukutuku vinaka cava sa vunautaki tiko edaidai?

⁶ Sega tale ni dua na itukutuku me uasivia na itukutuku vinaka era vunautaka na iVakadinadina i Jiova. Era dau dolava na nodra iVolatabu ra qai vakaraitaka mai kina vei ira na via vakarorogo ni o Jisu a solia na nona bula me rawa kina nida torova na Kalou na tamata, me vosoti na noda ivalavala ca, me rawa tale ga nida nuitaka na bula tawamudu. (Joni 3:​16; 2 Korinica 5:​18, 19) Era kacivaka ni sa tauyavu oti mai lomalagi na Matanitu ni Kalou e kena Tui lumuti o Jisu Karisito, sa voleka tale ga me yavala na Matanitu oya me vakawabokotaka na ca mai vuravura qai vakalesuya mai kina na Parataisi. (Vakatakila 11:15; 21:​3, 4) Me vaka ga sa parofisaitaka oti mai o Aisea, era vakarogoya vei ira na tamata kece ga ni gauna sara ga oqo “na yabaki vinaka i Jiova,” ni se rawa nira cakava e dua na ka na tamata ena itukutuku vinaka era rogoca. Era vakadreta tale ga ni sa voleka oqo na “siga sa ia kina na veisausaumi na noda Kalou,” na siga me vakarusai ira kina na tamata ca era sega ni veivutuni o Jiova.​—Same 37:​9-​11.

7. Na itukutuku cava e vakavotuya na nodra duavata na iVakadinadina i Jiova, ia na cava na vu ni nodra duavata?

⁷ Ena vuravura e tatara tu kina na leqa lelevu, oqo ga na itukutuku vinaka ena tawamudu na kena yaga. O ira na ciqoma era lewena sara e dua na isoqosoqo ni veitacini Vakarisito era sega ni vakatara na duidui vakamatatamata, vakayavusa, se vakailavo me vakavuveisei vei ira. Era “dauloloma, o koya sai vau vinaka sara.” (Kolosa 3:​14; Joni 15:12) A vakadinadinataki na tikina oya ena yabaki sa oti mai na dua na matanitu e Aferika. Dua na mataka lailai, era kidacala na lewe ni koroturaga e kea ni sa rogo na domo ni dakai. Era a via vuaviri e so. Ia, ni sa yaco tale na veitovaki vakaduiyavusa, eratou vakalewai vakaca e dua na vuvale iVakadinadina ni ratou a maroroya e so na iVakadinadina eratou lewe ni dua tale na yavusa. Ratou kaya sara na vuvale oqo: “O iratou na tiko e vale eratou iVakadinadina i Jiova.” A sega ni bibi vei iratou na duidui vakayavusa; a bibi ga na veilomani vakarisito​—mera vakacegui o ira na vakaleqai. A kaya e dua na wekadratou na vuvale oya e sega ni iVakadinadina i Jiova: “Na lewe ni veilotu kece era vakatukutukutaki ira na lewe ni nodra lotu, vakavo ga o ira na iVakadinadina i Jiova.” Levu tale na itukutuku vata ga vaka oqo e yaco mai na veivanua era vakadavedra kina vakataki ira na lewenivanua e vakadinadinataka ni o ira na iVakadinadina i Jiova era “dau veilomani vakaveitacini.”​—1 Pita 2:​17, VV.

Veisautaka na Tamata na iTukutuku Vinaka

8, 9. (a) Era veisau vakacava o ira na ciqoma na itukutuku vinaka? (b) E vakadinadinataki vakacava na yaga ni itukutuku vinaka?

⁸ E vauci tiko ena itukutuku vinaka na veika a vakatoka o Paula me “ka ni bula oqo, kei na ka ni bula talega ena muri mai.” (1 Timoci 4:8) E sega wale ga ni nuitaki kina na bula mai muri e rui totoka, ia e laurai tale ga ni vakavinakataka na noda bula ena “bula oqo.” O ira na iVakadinadina i Jiova yadua era dusimaki ena Vosa ni Kalou na iVolatabu mera vakaitovotaka sara ga na loma ni Kalou ena nodra bula. (Same 119:101) E vaka ga e vakavoutaki na nodra itovo nira sa tekivu vakamatauna mera dau yalodina ra qai bulataka na ivalavala dodonu.​—Efeso 4:​24.

⁹ Vakasamataki Franco mada. E sega ni dau lewa rawa na yalona. Ni tavere ga e dua na ka, ena tuburi koya na cudru katakata qai vorovorolaka na ka ga e tu e matana. A vuli iVolatabu kei ira na iVakadinadina i Jiova o watina, qai raica rawa vei ira oya o Franco ni na vinakati vua me veisau. A vuli iVolatabu sara kei ira, mani vakaitovotaka rawa na vua ni yalo tabu na vakacegu kei na yalomalua. (Kalatia 5:​22, 23) O koya a dua vei ira na le 492 era papitaiso mai Belgium ena yabaki vakacakacaka ni 2001. Vakasamataki Alejandro tale ga. Na levu ni nona vakayagataka na wainimate gaga na cauravou oqo, sa lai tini bula tu kina ena ibenubenu, e vakacacara kina me kunea e so na ka e rawa ni volitaka me ivoli ni mena wainimate gaga. Ni sa yabaki 22 o Alejandro, a ciqoma na nodra veisureti na iVakadinadina i Jiova mera vakavulici koya ena iVolatabu. A wilika e veisiga na iVolatabu qai lakova na soqoni vakarisito. Na totolo ni nona veisau, se bera ni vulaono vinaka nona vuli, sa tekivu vakaitavi ena kena kacivaki na itukutuku vinaka. O koya e dua vei ira na 10,115 era vunautaka na itukutuku vinaka mai Panama ena yabaki sa oti.

iTukutuku Vinaka​—Ra Vakalougatataki Kina na Yalomalumalumu

10. O cei era ciqoma na itukutuku vinaka, ia e veisau vakacava na nodra itovo ni rai?

¹⁰ A parofisaitaka o Aisea ni na vunautaki na itukutuku vinaka vei ira na yalomalumalumu. O cei o ira na yalomalumalumu oqo? Era tukuni ena ivola na Cakacaka mera tamata “era a sa vakarautaki tu ki na bula tawa mudu.” (Cakacaka 13:​48, VV) Oqo o ira na tamata yalomalumalumu era kune ena veivanua kece ga era dau dolava na lomadra mera ciqoma na ka dina. Era vulica ni veivakalougatataki cake vakalevu me caka na loma ni Kalou, sega soti na kena guti na veika e solia tu o vuravura. (1 Joni 2:​15-​17) Ia, nira vunautaka na itukutuku vinaka na iVakadinadina i Jiova, era tara vakacava na lomadra na vakarorogo?

11. A kaya o Paula me vunautaki vakacava na itukutuku vinaka?

¹¹ Vakasamataka mada na ivakaraitaki i Paula na yapositolo, a vola oqo vei ira na kai Korinica: “Kemuni na veiwekani; e na gauna au a lako yani kina vei kemuni au a sega ni lako yani ka vunautaka vei kemuni na i tukutuku ni Kalou e na vosa matau se vosa vuku. Ni’u a sa vakadeitaka tu e lomaqu me’u kakua ni kila e dua tale na ka e na kemuni maliwa, ko Jisu Karisito duadua ga kei na nona lauvako.” (1 Korinica 2:​1, 2, VV) A sega ni loma i Paula me vakadrukai ira na rogoci koya ena levu ni ka e kila. A vakavuvulitaka ga na veika sa vakadeitaki vakalou, na veika era volai tu edaidai ena iVolatabu. Vakasamataka tale ga na vosa ni veivakadreti i Paula vei Timoci, e dua e dau vunautaka na itukutuku vinaka: “Vunautaka na vosa ni Kalou ka gumatua sara.” (2 Timoci 4:2, VV) Io, a vakadreti o Timoci me vunautaka “na vosa,” se na itukutuku ni Kalou. A vola tale ga o Paula vei Timoci: “Gumatua sara mo vakaraitaki iko mo vinaka e na mata ni Kalou, a tamata daucakacaka sa sega e dua na ka me madua kina, mo wasea vakadodonu nai vakavuvuli dina.”​—2 Timoci 2:15.

12. Era taura vakabibi vakacava edaidai na iVakadinadina i Jiova na vosa i Paula kei na nona ivakaraitaki?

¹² O ira na iVakadinadina i Jiova era taura vakabibi na ivakaraitaki i Paula, vaka kina na nona vosa vei Timoci. Era vakadinata ni mana na Vosa ni Kalou ra qai vakayagataka vakavinaka oqori, nira saga mera vakaraitaka vei ira na tamata kece ga na vosa ni vakanuinui vinaka kei na vakacegu. (Same 119:52; 2 Timoci 3:​16, 17; Iperiu 4:​12) E dina nira dau veisoliyaka na nodra ivolatabaki vakaivolatabu, mera na qai wilika kina ena nodra gauna galala na tataleitaki e levu tale na itukutuku vakaivolatabu. Ia era dau tovolea na iVakadinadina i Jiova mera cega sara ga vei ira na vakarorogo na ka e kaya na iVolatabu. Era kila tiko ni Vosa ni Kalou ena uqeti ira na tamata yalomalumalumu. Era vakila tale ga ni vaqaqacotaki na nodra vakabauta nira taurivaka vaka oqo na iVolatabu.

“Vakacegui Ira Kecega Era sa Tagi”

13. Na leqa lelevu cava ena yabaki 2001 a gadrevi kina vakalevu na vakacegu vei ira sa tagi?

¹³ Bau dua toka na ka na leqa lelevu a yaco ena yabaki 2001, qai levu sara era gadreva kina na vakacegu. Dua na kena ivakaraitaki levu ga a yaco ena Sepiteba sa dromu mai Mereke, na vakacacani ni World Trade Center mai Niu Yoka kei na dua na iwase ni Pentagon mai Washington, D.C. Dua na ka na levu ni nodra nuiqawaqawa na lewe ni vanua taucoko! Ni tatara tu vaka oya na leqa lelevu, era gu na iVakadinadina i Jiova mera vakayacora na nodra ilesilesi mera “vakacegui ira kecega era sa tagi.” Vica na itukutuku dina oqo ena vakaraitaka se ra dau vakayacora vakacava oya.

14, 15. Era vakayagataka vakacava na iVolatabu na iVakadinadina mera vakacegui ira kina era tagi tu?

¹⁴ A torova yani e dua na marama e dua na iVakadinadina, e nona cakacaka vakatabakidua na kacivaka na itukutuku vinaka, qai tarogi koya se cava e nanuma me baleta na vakacaca levu mai Niu Yoka. Ni taro oti ga, sa tabaka na tagi na marama oya. A kaya ni rui rarawataka dina na ka sa yaco qai diva me bau veivuke. A kaya na iVakadinadina ni kauaitaki keda kece na Kalou, qai wilika vua na Aisea 61:​1, 2. A lauti koya na marama oya na vosa uqeti vakalou oqo. E kaya ni tamata kece ga era tagi voli. A ciqoma na ivolacebaceba a soli vua qai kerei koya na iVakadinadina me gole yani i nona vale.

¹⁵ Ni rau vunautaka tiko na itukutuku vinaka e rua na iVakadinadina, rau sotava sara e dua na turaga ni cakacaka tiko ena nona volau. Ena vuku ni ka a yaco mai Niu Yoka, rau kerei koya sara ke rawa ni ratou wasea vata e dua na tikina e veivakacegui mai na iVolatabu. A vakadonuya o koya, ratou mani wilika vata na 2 Korinica 1:​3-7, e kune kina na vosa oqo: “Sa vakacegui keitou sara vakakina na Karisito.” A vakavinavinakataki rau na iVakadinadina na turaga oya ni rau bau nanuma tu me rau wasea na itukutuku ni vakacegu vei ira e so tale, qai kaya: “Me vakalougatataka mada ga na Kalou na cakacaka totoka oni vakayacora tiko.”

16, 17. Vakamacalataka na rua na ituvaki e vakadinadinataki kina na mana ni iVolatabu vei ira era rarawataka se vuturitaka na leqa lelevu e dau yaco.

¹⁶ E dua na iVakadinadina a lesuva tiko e dua na marama a tataleitaki, ia rau mani sota kei na tagane e luve i koya na marama oya, qai kaya vua na iVakadinadina ni nanumi ira vakalevu na wekana, vakabibi ena vuku ni vakacaca e se qai yaco oti ga. Kurabui dina na turaga oya ni solia nona gauna na iVakadinadina me sikovi ira tale e so, me raica kina se ra sa vakacava tiko. A kaya ni a cakacaka volekata na World Trade Center ena gauna e coqa kina na waqavuka, qai raica sara ga na ka kece e yaco. A taroga se cava e vakatara kina na Kalou me yaco na veika rarawataki, mani wilika vua na iVakadinadina e vica na tikina mai na iVolatabu, wili kina na Same 37:​39, e kaya: “Sa ka maivei Jiova na nodra vakabulai na yalododonu: a nodra kaukauwa ko koya e na gauna rarawa.” Tarogi koya na iVakadinadina na turaga oya se ratou vakacava tiko na nona vuvale, sureti koya me lesu tale yani, qai vakavinavinakataka mai vu ni lomana na nona sikovi.

¹⁷ Ena vica na siga ni oti na vakacaca levu mai Niu Yoka, le vica vata na udolu era tagicaka na veika oya era vakacegui mai vei ira na iVakadinadina i Jiova. E dua vei ira na marama era sotava na iVakadinadina nira vunau voli e veivale. Sa dua na ka na nona rarawa, ia e vakarorogo ni sa wiliki na Same 72:​12-​14: “Ni na vakabula ko koya na dravudravua ni sa tagi; kei koya sa vakararawataki ka sa sega e dua me vukei koya. Ena lomana ko koya na tamata malumalumu ka dravudravua, ka vakabula na yalodra na dravudravua. Ena vakabula na yalodra mai na lawaki kei nai valavala kaukauwa: ena ka talei talega e matana na kedra dra.” Sa bau veilauti dina na vosa oqo! A kerei rau na iVakadinadina me rau wilika tale mada na tikinivolatabu oya, oti sa qai sureti rau i vale me lai tomani kina na veivosaki. Oti ga na veivosaki, sa tekivutaki sara na vuli iVolatabu.

18. E vakaraitaka vakacava na nona veinanumi e dua na iVakadinadina ni sa sureti me masu?

¹⁸ E dua na iVakadinadina e cakacaka ena valenikana e toka ena vanua era vakaitikotiko kina na tamata vutuniyau era sega ni dau kauai ni vunautaki yani na itukutuku vinaka ni Matanitu ni Kalou. Ni oti na vakacaca mai Niu Yoka, era taqaya vakalevu o ira oya. Ena yakavi ni Vakaraubuka ni oti na vakacaca, a kerekere na manidia ni valenikana mera lako i tautuba o ira kece era tiko e loma mera lai yadua na kadrala, ra qai duri vakanomodi mera vakananumi ira kina na vakamatei. Ni kauaitaka na nodra lomararawa, a curu tale ga i tuba o koya na iVakadinadina, qai tucake galugalu toka ga ena tutunisala. E kila o manidia ni o koya e dua na italatala ni iVakadinadina i Jiova, ia ni sa oti na vica na miniti ni duri vakanomodi, mani kerei na tacida me masu ena vukudra kece na tu oya. A vakadonuya na iVakadinadina. A cavuta ena nona masu na nodra tagicaka tu e levu na ka sa yaco, ia a masulaka tale ga ni rawa nira kunea na vakacegu o ira na rarawa tu. A cavuta ena nona masu ni na yaco na gauna sa na oti vakadua na veika rarawataki vaka oya, qai kaya tale ni rawa vei keda kece na tamata meda vakavolekati keda vua na Kalou ni vakacegu ena noda vulica na iVolatabu. Ni sa vakaemeni oti, sa qai gole yani vua na iVakadinadina na manidia, vakavinavinaka vua, mokoti koya, qai kaya ni nona bula taucoko, sa qai rogoca tu e dua na masu totoka. Era duavata kei koya na le 60 vakacaca era tu e kea.

Vakilai na Kedra Yaga

19. E kilai vakacava ni so era qoroi ira na iVakadinadina i Jiova?

¹⁹ Vakalevu ga ena veisiga oqo, e levu era kaya sara ga ni vakilai na kedra yaga na iVakadinadina i Jiova ena vanua era vakaitikotiko kina. Me qai sega vakacava, nira dau vakabibitaka na veivinakati, na dau dina, kei na muri ni itovo rakorako? Ena dua na matanitu mai Esia e Loma, era sota na iVakadinadina i Jiova kei na dua na ovisa vakalecaleca vakacegu ni matanitu. A kaya o koya ni a lesi ena dua na gauna me vaqaqai ira e vica na matalotu. Ni sa donui ira na iVakadinadina i Jiova, e lauti koya dina na nodra itovo vinaka kei na nodra dau dina. E qoroi ira ena dei ni nodra vakabauta, qoroya tale ga na nodra ivakavuvuli e yavutaki vakaivolatabu. Mani vakadonuya na turaga oqo me vuli iVolatabu.

20. (a) Na cava e laurai ena nodra cakacaka na iVakadinadina i Jiova ena yabaki sa oti? (b) Na cava e vakadinadinataka ni se levu sara tu na cakacaka, ia eda raica vakacava noda itavi me vunautaki na itukutuku vinaka?

²⁰ E vakadinadinataki, ena vica wale na itukutuku e sereki rawa ena ulutaga oqo, mai na vica vata na udolu e rawa ni tukuni, nira ogaoga dina vakalevu na iVakadinadina i Jiova ena yabaki vakacakacaka ni 2001.a Era vosa rawa vei ira e vica vata na milioni, ra vakaceguya e levu era tagi tu, qai vuavuaivinaka na nodra vunautaka na itukutuku vinaka. Era papitaiso e 263,431 me ivakadinadina ni nodra sa yalataki ira vua na Kalou. A tubu cake e vuravura raraba ena 1.7 na pasede na kedra iwiliwili na dau vunautaka na itukutuku vinaka. Ia na 15,374,986 era tiko ena soqo vakayabaki e nanumi kina na mate i Jisu e dusia ni se levu tale tu na cakacaka. (1 Korinica 11:​23-​26) Meda kua mada ga ni cegu ni qarai ira na yalomalumalumu era na ciqoma na itukutuku vinaka. Ia, ni se toso tiko ga na yabaki vinaka i Jiova, meda tomana na noda cakacaka ni vakacegui ira “sa ramusu na yalodra.” Sa dua dina na itavi totoka e noda! Sega ni vakatitiqataki nida na duavata kece kei na vosa i Aisea e vaka: “Au na rekitaki Jiova vakaidina; na yaloqu ena rekitaki koya na noqu Kalou.” (Aisea 61:10) Me vakayagataki keda tiko mada ga na Kalou ni sa vakayacora na vosa vakaparofisai oqo: “Ena vakatubura . . . na Turaga ko Jiova, nai valavala dodonu kei na vakavinavinaka, e na matadra na veimatanitu kecega.”​—Aisea 61:11.

[iVakamacala e ra]

O se Nanuma Tiko?

• Era vakalougatataki vakacava na yalomalumalumu ena vuku ni itukutuku vinaka a vunautaka vei ira o Jisu?

• Era vakalougatataki vakacava o ira na ciqoma na itukutuku vinaka era vunautaka voli na tisaipeli i Jisu ena imatai ni senitiuri?

• Era vakalougatataki vakacava o ira edaidai era ciqoma na itukutuku vinaka?

• Eda raica vakacava na noda itavi meda vunautaka na itukutuku vinaka?

[Chart ena tabana e 19-22]

2001 RIPOTE NI YABAKI VAKACAKACAKA NI IVAKADINADINA I JIOVA E VURAVURA

(Raica na bound volume)

[iYaloyalo ena tabana e 15]

Era dau nanuma tu ga na iVakadinadina i Jiova na nodra itavi mera vunautaka na itukutuku vinaka

[iYaloyalo ena tabana e 17]

O ira na ciqoma na itukutuku vinaka era mai lewena e dua na isoqosoqo duavata ni veitacini vakayalo e roboti vuravura na kena levu