Tukutuku Mai na Daukacivaka na Matanitu

Vunau e Vanua ni Cakacaka

NA CAVA eratou tautauvata kina na yapositolo o Maciu, Pita, Adriu, Jemesa, kei Joni? E kacivi iratou o Jisu ena nodratou vanua ni cakacaka me ratou nona imuri. Eratou ogaoga tiko o Pita, Adriu, Jemesa, kei Joni ena nodratou bisinisi vagonedau ena gauna e sureti iratou kina o Jisu, ni kaya: “Muri au mai.” A tiko o Maciu ena vale ni soli ivakacavacava ena gauna a sureti koya kina o Jisu me nona tisaipeli.​—Maciu 4:18-21; 9:9.

E rawa ni cakayaco sara na vunau ena vanua ni cakacaka. Ena nodra kila oqo, era mani duavata kina na iVakadinadina i Jiova mai Japani, wale tiko ga oqo, mera tovolea mada na taba ni cakacaka vakavunau oqo. Na cava e rawati kina? Ena loma ga ni vica na vula, e vakayacori kina e vica vata na udolu na veisikovi lesu, ra qai vakavulici ena iVolatabu e rauta nira le 250. Dikeva mada e so na kena itukutuku.

Rau sota e dua na tacida e cakacaka vakaitalatala vakatabakidua mai Tokio kei na manidia ni dua na valenikana, se veivosaki sara kei na dua na iVakadinadina ni se vuli, ena rauta ni 30 na yabaki sa oti. Dina ni sega ni kila e levu na ka a tukuni vua ena gauna oya, ia a mani taleitaka na iVolatabu. Oqo ni sa bukani tale nona tataleitaki, a mani vakadonuya me vuli iVolatabu ena ivola Na Ka Mo Kila Mo Bula Tawamudu Kina.a A tekivuna tale ga e dua nona porokaramu ni wili iVolatabu e veibogi ni bera ni moce.

A sikova e dua na tacida yalewa e painia lavotaki e dua na valenivolavola. Kerei koya sara e qarava tiko na talevoni me qirita mada na manidia. A sega ni tiko na manidia, ia mani taroga na goneyalewa a sauma mai na talevoni, “O via vosa vei au?” Rau veitalanoa vakalekaleka ena talevoni kei na tacida yalewa, ni oti ga oya, a curu sara mai tuba na goneyalewa oqo qai kaya ni taleitaka me wilika na iVolatabu. A tuvanaka sara na tacida e painia lavotaki oqo me kauta mai e dua nona iVolatabu. Erau sa mani tekivu vuli iVolatabu sara, e vakayacori ga ena dua na rara voleka ena matakalailai ni bera na cakacaka.

Ena dua tale na valenivolavola, a raica e dua na turaga ni kolotaka tani na ivoladraudrau Na Vale ni Vakatawa kei na Yadra! nona itokani vakacakacaka ni sa biubiu na iVakadinadina. Ni yaco i vale na turaga oqo, a tukuna sara vei watina iVakadinadina na ka a yaco qai kaya ni na vakarorogo ke a soli vua na ivoladraudrau. Rogoca o luvena yalewa na veivosaki oqo, mani lai tukuna vua na iVakadinadina e dau vunau ena yalava ni bisinisi oya. Mani sikovi koya na turaga oqo na iVakadinadina ena nona valenivolavola, rau tekivu vuli iVolatabu sara. Sega ni dede sa dau tiko tale ga na turaga oqo ena soqoni ena Sigatabu.

Levu tale na veika yaga e rawati ni caka na vunau ena vanua ni cakacaka. Levu na dautukutuku mai Japani sa ra kenadau sara na veisikovi lesu ena vanua ni volivoli, vanua ni buliyaya, kei na valenivolavola. Na vunau tale ga vaka oqo, era kune kina e levu era sa mate tu vakayalo, ra sa tekivu vakavulici tale ena iVolatabu. Veivakurabuitaki sara na veika e rawati kina. Wale tiko ga oqo, a volatukutukutaka e dua na ivavakoso ena loma i Tokio, e 108 na vuli iVolatabu, e vakaruataki kina na iwiliwili a rawati ena yabaki yani e liu.

[iVakamacala e ra]