Laulau na Vunau ena Talevoni

¹ E sega ni noda isausau wale ga na iVakadinadina i Jiova meda vakaitavi ena cakacaka vakavunau, ia meda tarai ira kece tale ga eda rawata ena itukutuku ni Matanitu ni Kalou. (Caka. 10:42; 20:24) E dina ni sala levu duadua ni noda vunau vei ira na lewenivanua na cakacaka e veivale, ia eda kila nira se sega ga ni tarai kece. O koya gona nida ‘vakayacora vinaka sara na noda itavi,’ eda na cakava tale e so na kena iwalewale​—wili kina na vunau ena talevoni​—meda kunei ira kina na vaka na sipi.​—2 Tim. 4:5, VV.

² Ena so na vanua, era le levu era vakaitikotiko ena tabavale era taqomaki vinaka tu, so era tiko ena bareki me vica vata tu na vuvale era tawana, se na itikotiko era dau lokataki tu ga na kena matamata qai dredre na noda vosa vei ira na kena itaukei ena cakacaka vakavunau e veivale. Ena yalava mada ga eda dau vunau kina, e le levu ga era sega ni dau tiko e vale. Ia, e levu na dautukutuku e laulau sara na nodra vunau ena talevoni vei ira oqo.

³ O dau tu vakasuka beka ni vunau ena talevoni ena nomu cakacaka vakaitalatala? E kaya e dua na tacida tagane: “Au besetaka mada ga ni dua e qiri au mai vale me volitaka mai e dua na ka, o koya gona au besetaka na iwalewale ni vunau oqo.” Ia, ni tovolea ga vakarua na vunau ena talevoni, e kaya: “Dua na ka noqu taleitaka! Au sega ni tadra ni na va qo, au taleitaka sara ga! Era vakarorogo na itaukeinivale nida veitalanoa ena talevoni, o rawa ni tukuna na ka kece o via tukuna. Sa bau laulau dina!” E vakatale ga oya e dua na tacida yalewa: “Au sega soti ni taleitaka na vunau ena talevoni. Meu kaya vakadodonu, au a bese sara ga ni cakava. Ia au qai tovolea, au raica sara ga na kena laulau. E 37 kece kina na noqu veisikovi lesu qai levu tale ga noqu vuli iVolatabu!” Tovolea mada, de dua ena laulau tale ga.

⁴ O na kila vakacava na nodra naba ni talevoni? E rawa ni tauri mai na yacadra ena kena ivola e dau tu ena matamata ina itikotiko sa cavuti oti mai, se ena kena e kabi ena matanikatuba yadua, qai lai raica na yacadra ena ivolanitalevoni.

⁵ Mera kauaitaka na qase na iwalewale ni vunau oqo ra qai tuvanaka e so sa ra kenadau ena vunau ena talevoni mera tuberi ira na sega ni kila, e rawa ni caka oqo ena Porokaramu ni Nodra Veivukei na Painia. So na gauna ena Soqoni ni Cakacaka, de rawa ni lewe ni veika e gadrevi ena ivavakoso, ni rawa ni na vakavinakataka sara na laulau ni vunau ena talevoni.

⁶ Nira sikovi ira na tauvimate o ira na qase, mera uqeti ira mera dau vunau ena talevoni. Rawa ni qiri sara ga e dua na qase ni raici koya toka na dautukutuku. Ena rairai marautaka na dautukutuku me tovolea. Levu vei ira na sa tovolea na iwalewale ni vunau oqo era taleitaka na vica ga na miniti era vakayagataka ena vunau e veisiga.

⁷ So na Ka e Vakaturi me Laulau Kina na Vunau ena Talevoni: Ni talai ira nona tisaipeli o Jisu mera lai vunau, e “talai ira me ra lako yayarua.” (Luke 10:1) Baleta? E kila o koya ni nodrau cakacaka vata e lewe rua erau na veivukei rau qai veivakayaloqaqataki tale ga. E vakatale ga kina na vunau ena talevoni. Ni o cakacaka vata kei na dua, e rawa ni drau veivukei, veivosakitaka na ka drau cakava, drau qai vakatura e so tale na ka mo drau na qai tukuna. Ni dua vei kemudrau e vosa tiko ena talevoni, e rawa ni veivuke o koya kadua ena kena qarai na itukutuku veiganiti me tukuni.

⁸ Me taladrodro nomu vosa qai dei na nomu vakanananu, mo dabe ena vanua o rawa ni biuta vinaka kina e matamu na nomu iyaya ni vunau​—na iVolatabu, ivola na Reasoning, brochure na Loma ni Kalou, ivoladraudrau, kei na so tale. Vola rawa e so na iwalewale ni vosa mo na kaya, qai biuta toka ena vanua ena rawarawa kina na nomu wilika. Maroroya vinaka na ivolatukutuku kece o vola me baleta na ka e tukuna o itaukeinivale, me volai vakamatata, vakadodonu tale ga, vaka kina na tikinisiga kei na gauna, mo rawa ni kila na gauna o na qiri tale kina ni kune na tataleitaki.

⁹ Era dau lomatarotaro na itaukeinivale nira rogoca e dua na domo vou ena talevoni. O koya gona, mo vosavosa vinaka, veikauaitaki, qai tau vakamatau na ka o tukuna. Ni rogoca ga na domomu o itaukeinivale, ena kila sara se o mataqali tamata vakacava. Kua ni o taqaya, vosa sara ga mai lomamu. Vosa vakamalua, vakamatata tale ga, vosa toka i cake me rogoci iko vinaka. Solia tale ga na gauna me vosa kina o itaukeinivale. Tukuna kece na yacamu, vakamacalataka ni o tiko voleka ga. Mera kua ni nanuma nida via volitaka vei ira e so na ka. Kua ni tukuna ni o qiri ira kece tiko na vakaitikotiko e kea, qiri me vaka ga drau sa veikilai makawa tu.

¹⁰ iWalewale ni Vunau ena Talevoni: E levu na iwalewale ni vunau e tiko ena ivola lailai Na Sala me Tekivu Qai Tomani Kina na Veivosaki Ena iVolatabu, taqana 2-7, e rawa ni moici ga vakalailai me ganita na vunau ena talevoni. O rawa ni kaya: “Au qiri kemuni tiko yani ni sega tiko ni rawa me daru sota. Na vu ni noqu qiri yani niu via taroga se cava na nomuni nanuma ena taro oqo.” Taroga sara e dua na taro.

¹¹ O rawa ni tukuna vaka oqo na imatai ni iwalewale ni veivosaki ena ulutaga “Basulawa/Noda Taqomaki”: “Ni bula. Na yacaqu o​—. Au tiko tale ga ena itikotiko oqo. Na vu ni noqu qiri yani niu kauaitaka na noda taqomaki na lewenivanua. Sa levu dina na basulawa, e tara sara ga noda dui bula. Oni bau vakabauta tu ni na yaco na gauna meda na taubale tu ena bogi da sega ni rerevaka e dua na ka? [Waraka me sauma.] Meu wilika mada vei kemuni na ka e yalataka tu na Kalou me na cakava.”

¹² E laulau tale ga ke da veisureti sara ga vakadodonu ina vuli iVolatabu. O rawa ni vakatovotovotaka vua na icakacaka ni vuli ena vica ga na miniti. Tukuna ni o na qai sikovi koya yani i nona vale me lai tomani kina na vuli, ke sega ni vakadonuya, tukuna ga ni na qai tomani na vuli ena talevoni ena dua tale na siga.

¹³ Ni o tinia nomudrau veivosaki, tukuna e dua na vakasama ena dolava na sala mo na sikovi koya kina i nona vale, se mo vakauta kina vua ena meli e dua na ivola. Ke bese ni tukuna o itaukeinivale na nona katonimeli, tukuna ni o na qai qiri koya tale yani. O na rairai qiri beka vakavica vata sa na qai rawa ni nuidei me sureti iko i nona vale.

¹⁴ Vakaliuliu: A tekivuna nona cakacaka vakavunau vakamataka ena talevoni e dua na tacida goneyalewa yabaki 15. E vosa vua e dua na marama qai taleitaka na marama oya me dua nona ivola na Kila. Ni lai solia nona ivola na tacida yalewa i nona vale, e via kila sara ga na marama oya se kila vakacava na goneyalewa oqo na nona naba ni talevoni ni sega tu ni volai na yacana ena ivolanitalevoni. E tabaka cala na tacida yalewa oqo na nona naba ni talevoni! E taleitaka sara me vuli na marama oya, sa dua tiko na dautukutuku bera ni papitaiso ena gauna oqo.

¹⁵ E kaya e dua na tacida yalewa ni sa vakarau sara tu ga me tekivu nona vunau ena talevoni, ia e mani sega ni cakacakataka me tolu na macawa ni tuburi koya na rere. Na cava e qai uqeti koya me tekivu rawa kina? E nanuma sara na ulutaga oqo, “When I Am Weak, Then I Am Powerful,” (Niu Tauvimate, Au Yaloqaqa Tu Ga) ena Awake!, 22 Janueri, 1997. E vakamacalataki kina e dua na tacida yalewa e dau vunau ena talevoni dina ga ni tuvaki ca tu na yagona. E kaya na tacida oqo: “Au masuti Jiova me vakaukauataki au. Au kerei koya me solia vei au na vosa matau meu vakamacala rawa kina.” E vakayacoka beka na imatai ni nona vunau ena talevoni? E kuria: “E rogoca noqu masu o Jiova. Era vakarorogo na itaukeinivale, tuvanaki sara na veisikovi lesu.” Tini vuli iVolatabu sara e dua na nona veisikovi lesu. E tinia: “E vakavulici au o Jiova meu kua ni dau nuitaki au ia meu nuitaki koya ga.”​—Vkai. 3:5.

¹⁶ Na vunautaki ni ka dina ena talevoni e dua na sala laulau ni kena kuruvaki na itukutuku vinaka. Vakavakarau vinaka, vosa sara ga mai vu ni lomamu. Kua ni yalolailai ke sega ni rogoci nomu qiri ena imatai ni vica na gauna o tovolea kina. Masuta na veidusimaki i Jiova, veitalanoa tale ga kei ira era dau vakayagataka na iwalewale totoka oqo ni vunau. Nida sega ni via calata e dua ena noda yalava, meda vakayacora sara ga vakavinaka na noda cakacaka vakaitalatala, da qai kua ni vakaberabera.​—Roma 10:13, 14.