Vunau ena Yalava ni Bisinisi
1. Na cava e vinaka kina na vunau ena vanua ni bisinisi?
1 O via vunau beka ena yalava o na kidavaki kina, qai sega ni dau lala na kena veivale? Na vanua vaka oqori e tiko sara ga ena yalava ni nomu ivavakoso. E vei? Ena sitoa se vanua ni bisinisi. E dau vuavuaivinaka na nodra vunau na dautukutuku ena yalava oqori.
2. Me tuvanaki vakacava na vunau ena vanua ni bisinisi?
2 E tiki sara ga ni nodra yalava e so na ivavakoso na vanua ni bisinisi. Na tacida tagane e qarava tiko na yalava ni ivavakoso e rawa ni vakarautaka na mape lalai ni vanua ni bisinisi lelevu. Ke dua na mape erau tiko vata kina na veivale vakaitaukei kei na vanua ni bisinisi, me vakatakilakilataki me kua ni tarai vata. Ena so tale na yalava e rawa ni tarai vata ga na vanua ni bisinisi kei na veivale vakaitaukei. Ke se bera vakadua ni o vunau ena vanua ni bisinisi, tekivu vunau ena sitoa lalai.
3. Ena laulau vakacava na noda vunau ena veisitoa?
3 Me Rawarawa ga na Nomu Vosa: Ni o vunau ena veisitoa, e bibi mo vakaisulu me vaka ga ni o lai soqoni ena Kingdom Hall. E vinaka tale ga mo digia e dua na gauna ena sega ni osooso sara kina na sitoa. Ke rawa, qai vosa ni sega ni dua e volivoli. Kerea mo vosa vua na manidia se itaukeinisitoa. Mo vosa ga vakalekaleka. Cava o rawa ni kaya?
4-6. Na cava eda rawa ni kaya nida vunau vei ira na itaukeinisitoa se manidia?
4 Ke o vosa vei itaukeinisitoa se manidia, o rawa ni kaya: “Ni oni dau osooso na vakabisinisi keimami sa sega kina ni dau sotavi kemuni e vale, oya na vuna keimami mai sikovi kemuni ga kina ena nomuni vanua ni cakacaka. E vakamacalataki tu ena neimami ivola na veika sara ga e yaco tiko e vuravura nikua.” Vakamacalataka sara e dua na tikina lekaleka mai Na Vale ni Vakatawa kei na Yadra!
5 O rawa ni tovolea tale ga na kena icakacaka rawarawa oqo: “E levu era via vakalevutaka na nodra kila na iVolatabu ia e lailai ga na nodra gauna. Na ivolacebaceba oqo e vakamacalataka e dua na porokaramu ni vuli iVolatabu e sega ni saumi, oni na kunea kina na isaunitaro vakaivolatabu.” Vakaraitaka sara na tabana 4-5 ni ivolacebaceba Oni Via Kila Vinaka na iVolatabu?
6 Ke sa rui osooso na itaukeinisitoa, solia na ivolacebaceba qai kaya: “Au na qai mai rai tale ena gauna o sa na galala kina. Au via rogoca kina se cava nomu nanuma me baleta na ivolacebaceba oqo.”
7. E rawa vakacava nida vakabulabulataka na tataleitaki eda sotava ena yalava ni bisinisi?
7 Vakauqeti Ira na Tataleitaki: E rawa sara ga ni o veivakavulici ena iVolatabu ena yalava ni bisinisi. E dua na painia lavotaki e dau kauta tiko na nona voladraudrau e dua na daubisinisi. A taleitaka sara na turaga oqo na ka e wilika tiko, mani vakaraitaka vua na painia oqo na icakacaka ni vuli iVolatabu ena nona vakayagataka na brochure Loma ni Kalou. A tekivu sara ga ena nona vanua ni cakacaka na vuli iVolatabu. E 10 se 15 ga na miniti na balavu ni nodrau vuli baleta na ituvaki ni vanua erau vuli tiko kina. Meda vaka tale ga oya ena noda vakasaqarai ira tiko ga na tamata yalomalumalumu ena noda vunau ena yalava ni bisinisi.