Taro na Dauwiliwili

Na cava e vakatara kina o Tevita, na dauveiqaravi yalodina i Jiova, me maroroya tiko ga na watina o Maikali na matakau me vaka e volai ena 1 Samuela 19:12, 13?

Meda dikeva mada na ka a yaco. Ena gauna sa rogoca kina o Maikali na vere e bukia o Tui Saula me vakamatei kina na watina o Tevita, sega ni bera na nona sa yavala. E kaya na iVolatabu: “A sa tukuci Tevita sobu ko Maikali mai na katuba lailai ecake: a sa lako yani ko koya, ka dro, ka sa bula. A sa kauta ko Maikali e dua na matakau [kena irairai ni matakau oqo e tautauvata kei na balavu ni dua na tamata], ka vakotora enai mocemoce, a sa kauta nai lokoloko vutika ni me me kenai lokoloko, ka tutuvitaki e na dua nai tutuvi.” Ena gauna sa ra gole mai kina na tamata i Saula mera vesuki Tevita, sa qai tukuna vei ira o Maikali: “Sa tauvi mate ko koya.” Na ilawaki oqo e solia na gauna me dro sara yani kina o Tevita.​—1 Samuela 19:11-16.

E kilai mai na so na iyaya makawa a kune ena vakekeli ni sega wale ga ni dau maroroi me ka ni lotu na matakau, e maroroi tale ga me baleta na ka vakalawa. Me vaka ga na kena vakatau ina title kei na will na votai ni iyau ena gauna oqo, e vaka kina na matakau ena gauna makawa. So na gauna ke taura tu na matakau vaka oya e dua na tagane vakawati, sa rawa ni soli vua na dodonu me taukena na qele i vugona sa mate. Sa rauta me taura o Rejeli na matakau i tamana, qai saga vakaukaua o tamana me vakasukai vua. Ena gauna oya a sega ni kila o Jekope na wati Rejeli na ka e cakava na watina.​—Vakatekivu 31:14-34.

Ena gauna sa dua kina na matanitu o ira na Isireli, a soli vei ira na Vunau e Tini, na ikarua ni vunau e vakatabuya na kena caka e dua na matakau. (Lako Yani 20:4, 5) E muri, a qai cavuta na lawa oqo o Samuela ena nona vosa vei Tui Saula. E kaya: “Ni sa tautauvata na kena ca ni talaidredre kei na cakai sausau, ia na yalokaukauwa sa ka ca, ka vaka na dauqarava na matakau.” (1 Samuela 15:23) Oqo na vuna, e rairai sega ni dau vakayagataki e Isireli na matakau me kilai kina se o cei me soli vua na ivotavota. E sega gona ni vakataratututaki ni itovo makawa vakajiu oqo e se tiko ga ena so na vuvale e Isireli. (Dauveilewai 17:5, 6; 2 Tui 23:24) Na nona maroroya tiko gona o Maikali na matakau e vakaraitaka ni sega ni qaravi Jiova tiko mai vu ni lomana. E kena irairai ni vakatara se sega ni kila o Tevita ni tiko vei Maikali na matakau, baleta ni luve i Tui Saula.

Eda na kila na rai i Tevita me baleta na nona qaravi vakatabakidua o Jiova ena ka e tukuna: “Sa levu ko Jiova, a sa dodonu me vakacaucautaki vakalevu: Me rerevaki vakalevu cake talega ko koya vei ira na kalou kecega. Ni ra sa matakau walega na nodra kalou kecega na tamata: Ia ko Jiova ga sa bulia na lomalagi.”​—1 Veigauna 16:25, 26.

[iYaloyalo ena tabana e 29]

Na ikarua ni Vunau e Tini e vakatabuya na kena caka na matakau me vaka e tabaki koto oqo

[Credit Line]

Ena ivola The Holy Land, Vol. II, 1859