O se Nanuma Tiko?
O taleitaka na ka o wilika ena itabataba ni Vale ni Vakatawa era se qai taba oti ga? Raica mada ke rawa ni o sauma e vica na taro oqo:
• Na cava na Complutensian Polyglot, cava e bibi kina?
Oqo na kena tabaki e dua na iVolatabu ena vica na vosa, me tiko vata kece kina na vosa vakaiperiu, vakirisi, vakalatina, kei na so na kena vakaaramea e vinaka duadua. Na ivakadewa ni iVolatabu na polyglot e ikalawa bibi sara ga ni kena vakadewataki vakadodonu na iVolatabu ena vosa a volai taumada kina.—4/15, tabana e 28-31.
• Eda na vakamarautaka vakacava na Kalou?
Me vakataki keda ga, o Jiova tale ga e rawa ni vakasama, e cakava na ka, qai vakila tale ga. E “Kalou mamarau” qai rekitaka ni vakayacora na nona inaki. (1 Timoci 1:11, NW; Same 104:31) Na levu ga ni noda vulica na ivakarau ni yalo e tu vua na Kalou, na levu tale ga ni noda kila na veika meda cakava meda vakamarautaki koya kina.—5/15, tabana e 4-7.
• Na cava e vakatara kina o Tevita me maroroya tiko ga na watina o Maikali na matakau?
Na gauna e bukia kina na vere o Tui Saula me vakamatei Tevita, a vukei koya o Maikali me dro, a biuta ena imocemoce e dua na matakau e vaka na ibulibuli ni dua na tamata. Na nona maroroya tiko gona o Maikali na matakau e vakaraitaka ni sega ni qaravi Jiova tiko mai vu ni lomana. E kena irairai ni a sega ni kila o Tevita se a vakatara beka me tiko vei Maikali na matakau, baleta ni luve i Tui Saula. (1 Veigauna 16:25, 26)—6/1, tabana e 29.
• Na ka dina cava e dusia tiko vei keda na ivakaro ni Kalou me baleta na dra?
Na ka e tukuna na Kalou ena Lawa i Mosese ni oti na Waluvu, vaka kina na ivakaro ena Cakacaka 15:28, 29, e dusia tiko ga na ka e okati ena kena vakacabori na dra i Jisu. Noda vosoti kei na noda veivinakati kei na Kalou ena rawa ga ena vuku ni dra oya. (Kolosa 1:20)—6/15, tabana e 14-19.
• E vica na cakamana i Jisu e tukuni tu ena iVolatabu?
E volatukutukutaki tu ena Kosipeli e 35 na cakamana i Jisu. Ia e sega ga ni kilai na kena levu kece, wili kina na kena e sega ni volai. (Maciu 14:14)—7/15, tabana e 5.