Eda Oca, ia Eda Sega ni Vakacauoca
“Ko Jiova, ko koya ka bulia nai yalayala kei vuravura; . . . Sa dausolia na kaukauwa vei ira era sa malumalumu: ia ena vakalevutaka na kaukauwa vei ira era sa sega ni gumatua rawa.”—AISEA 40:28, 29.
1, 2. (a) Na veisureti cava e vakamuai vei ira kece era vinakata mera qarava na Kalou dina? (b) Na cava e rawa ni vakaleqa na noda bula vakayalo?
NIDA tisaipeli i Jisu, eda sega ni vulagi ina nona veisureti ni a kaya: “Dou lako mai vei au, koi kemudou vakaaduaga sa oca ka colata nai colacola bibi, ia ka’u na vakacegui kemudou. . . . Ni sa rawarawa na noqui vua, ka mamada na noqui colacola.” (Maciu 11:28-30) Era vakila tale ga na lotu Vakarisito e so na “gauna ni vakacegu mai na mata ni Turaga” o Jiova. (Cakacaka 3:19) Sega ni vakabekataki ni o sa bau vakila tale ga na vakacegu ena nomu mai kila na ka dina ena iVolatabu, nomu marautaka na veika o vakanuinuitaka ena gauna e se bera mai, kei na nomu cakava na veika e vinakata o Jiova ena nomu bula.
2 Ia, e so na tamata i Jiova era sa dau vakila na oca kei na yalolailai. So na gauna e dau tarai ira ga vakalekaleka na yalolailai vaka oqo. So tale na gauna e rawa ni tarai ira ena dua na gauna balavu. Ni toso na gauna, e so tale era na nanuma ni sa icolacola bibi vei ira na nodra itavi vakarisito. E sa sega ni veivakacegui me vaka a yalataka o Jisu. Na nanuma cala vaka oqo e rawa ni vakaleqa sara ga na nona veiwekani e dua na lotu Vakarisito kei Jiova.
3. Na cava e tauca kina o Jisu na ivakasala e kunei ena Joni 14:1?
3 Ni vo toka ga vakalailai me vesu qai vakamatei o Jisu, a kaya vei iratou nona tisaipeli: “Dou kakua ni lomaleqa. Dou vakabauta tiko ga na Kalou, dou vakabauti au tale ga.” (Joni 14:1, VV) E cavuta na veivosa oqo o Jisu ni sa voleka me ratou sotava na yapositolo e dua na gauna dredre sara. Na gauna oqo ena qai tarava mai na veivakacacani kaukaua. E kila o Jisu ni rawa ni ratou tarabe na yapositolo ena vuku wale ga ni yalolailai. (Joni 16:1) Ke ratou sega ni qarauna, na yalolailai vaka oqo e rawa ni vakamalumalumutaki iratou vakayalo, e rawa tale ga ni vakavuna me ratou sega ni nuitaki Jiova. E rawa tale ga ni yaco oqo vei keda na lotu Vakarisito ena gauna oqo. E rawa ni bikai keda na rarawa kei na lomabibi ke sa rui balavu tale noda yalolailai voli. (Jeremaia 8:18) E rawa ni malumalumu na lomada me yacova noda sa sega ni vakatulewa rawa. Tarava mai na noda sa na malumalumu vakayalo, rawa ni tini sara me yali vei keda na yalo ni qaravi Jiova.
4. Na cava ena vukei keda ena noda taqomaka na lomada meda kakua ni vakacauoca?
4 E veiganiti dina na ivakasala ni iVolatabu oqo: “Vakatawa vakavinaka sara na yalomu; ni sa taka maikina nai vurevure ni bula.” (Vosa Vakaibalebale 4:23) E vakarautaka na iVolatabu e so na ivakasala yaga me vukei keda ena noda taqomaka na lomada mai na yalolailai kei na oca vakayalo. Ia, taumada ena daumaka meda kila na ka e dau vakavuna na noda oca.
E Sega ni Veivakaocai na Bula Vakarisito
5. Na cava e vaka e veisaqasaqa kina na ka e tukuni me baleti ira na tisaipeli vakarisito?
5 Nida lotu Vakarisito, na noda bula ena bula ni sasaga. (Luke 13:24) E kaya sara mada ga o Jisu: “Ko koya talega ena sega ni colata na nona kauveilatai [“kaunirarawa,” NW], ka muri au, sa sega ni rawa me noqu tisaipeli.” (Luke 14:27) So era na nanuma ni veivosa oqo e via veisaqasaqa kei na nona kaya o Jisu ni mamada na nona icolacola qai veivakacegui, ia e sega ni veisaqasaqa.
6, 7. Na cava eda kaya kina ni ivakarau ni noda qaravi Kalou e sega ni veivakaocai?
6 Na sasaga kei na cakacaka kaukaua e rawa ni veivakacegui qai veivakabulabulataki ke caka ena inaki vinaka, e dina ni na vakaocai keda vakayago. (Dauvunau 3:13, 22) Qai inaki vinaka cava tale e uasivia na noda vota na itukutuku dina mai na iVolatabu vei ira na wekada? Na noda sasaga tale ga meda muria na veika cecere e vinakata vei keda na Kalou e tawayaga sara nida vakatauvatana kei na kena yaga ena noda bula. (Vosa Vakaibalebale 2:10-20) Nida vakacacani mada ga, ena ka dokai vei keda baleta nida vakacacani tiko e na vuku ni Matanitu ni Kalou.—1 Pita 4:14.
7 E veivakacegui dina nida cola na ivua i Jisu, vakauasivi nida vakatauvatana kei na nodra butobuto vakayalo o ira na colata voli ga na ivua i lotu lasu. E dau kauaitaki keda na Kalou, e sega ni namaka vakasivia vei keda na ka. Na ka e vinakata o Jiova meda cola e “sega ni i colacola bibi.” (1 Joni 5:3, VV) Na bula ni lotu Vakarisito dina e tukuni ena iVolatabu e sega ni dau veivakaocai. E macala vakasigalevu ni ivakarau ni noda qaravi Kalou e sega ni veivakaocai, e sega tale ga ni veivakayalolailaitaki.
‘Biuta Laivi na Ka Bibi Kece’
8. Na cava e dau vakavuna na oca vakayalo?
8 Na oca vakayalo eda dau vakila e vu vakalevu ga ena veika bibi e vakataqara mai usousonidomoda na ituvaki kei vuravura ca oqo. Na vuravura oqo e “sa koto ga vua na vu-ni-ca,” oya na vuna eda na sotava tiko ga kina e levu na ka dredre me vakayalolailaitaki keda. Oqo e rawa ni vakamalumalumutaki keda sara ga, vakavuna tale ga meda sega ni dei vakayalo. (1 Joni 5:19) E rawa tale ga ni vakaosota na noda bula kei na noda ituvatuva vakarisito e so na ka eda vakaogai keda voli kina. Na veika oqo e rawa nira bikai keda, e rawa tale ga nira vakaocai keda. Sa rauta me vakasalataki keda na iVolatabu meda ‘biuta laivi na ka bibi kece.’—Iperiu 12:1-3.
9. E rawa ni vakamalumalumutaki keda vakacava na qarai vakasivia ni veika vakayago?
9 Me kena ivakaraitaki, e rawa ni curumi keda tale ga na yalo ni vuravura nikua ena nodra dau qara na rogo, na ilavo, na ka ni marau, na gade ena qarai ni vakacegu, kei na qarai ni ka vakayago tale e so. (1 Joni 2:15-17) E so na lotu Vakarisito ena imatai ni senitiuri e curuoso wale ga na lomadra kei na nodra vakasama nira sa rui qara vakasivia na iyau. E kaya na yapositolo o Paula: “Ko ira era sa gadreva me ra vutuniyau, era sa bale ki na dauvere kei nai cori, kei na gagadre ca e vuqa, ka lialia, ka dauveivakacacani, oqori sa luluvuraki ira na tamata e na mate kei na rusa. Ni sa vu ni ka ca kecega na daulomana nai lavo: era sa daukocova eso, a ra sa vakacalai kina e na vakabauta, a ra sa cokai ira sara vakai ira e na yaluma vakavuqa.”—1 Timoci 6:9, 10.
10. Cava eda vulica me baleta na vutuniyau ena vosa vakatautauvata i Jisu me baleti koya na daukakaburaki?
10 Nida vakila na oca kei na yalolailai ena noda qarava noda Kalou, e sega li ni rawa ni vu oqo ena noda qara vakasivia na veika vakayago me sa lai vakaruguti kina na veika vakayalo? E rawa ni yaco dina oqo me vaka e vakaraitaka o Jisu ena nona vosa vakatautauvata me baleti koya na daukakaburaki. E vakatauvatana kina o Jisu ‘na lomaocaoca ena vuku ni vuravura oqo, na iyau e dauveivakaisini, vaka kina na daugadreva na ka tani e so’ kei na wa vakavotona e “vakaruguta” na ka dina ena Vosa ni Kalou e bau kaburaki rawa e lomada. (Marika 4:18, 19) E vakasalataki keda kina na iVolatabu: “Mo dou kakua ni daukocova nai lavo: ia dou lomavinaka e na ka sa tu vei kemudou: ni sa kaya ko koya, Au na sega sara ni biuti iko, se vakalaivi iko.”—Iperiu 13:5.
11. Eda na biuta laivi vakacava e so na ka e dau bikai keda?
11 So na gauna e dau curuoso na lomada kei na noda vakasama, sega ena vuku ni noda vakasaqara e levu tale na ka, ia ena vuku ni ka eda cakava ena veika e sa tu rawa vei keda. So e rawa ni tarai ira na rarawa, yalolailai, kei na oca ena vuku ni tauvimate bibi kei na nodra takali na wekadra lomani. Era raica ni bibi mera vakayacora e so na veisau ena nodra bula. E dua na veiwatini erau tekivu muduka sara ga na nodrau dau vakaitavi ena so na ka erau dau taleitaka, kei na so na cakacaka erau dau vakaogai rau kina. Erau tawana kece sara ga na iyaya ni cakacaka kei na itavi erau dau vakaogai rau tu kina, rau qai biuta laivi sara me kua tale ni laurai. E vinaka me so na gauna eda vakadikevi keda tale mada kei na ka eda taukena, de dua e rawa nida biuta laivi e so na ka bibi era dau vakaocai keda, na veika e rawa ni vakavuna meda soro koso.
Bibi na Lewa Vinaka kei na Yalomalumalumu
12. Na cava e dodonu meda kila me baleta na noda cala?
12 Na noda cala, ke mani cala lalai, e rawa ni vakavuna me curuoso na lomada kei na noda vakasama. Dina kina na ka a tukuna o Tevita: “Sa uasivia cake na uluqu na noqu caka ca: me vaka nai colacola bibi ka’u sa sega ni colata rawa.” (Same 38:4) E rawa tale ga ni vakamamadataki na noda icolacola bibi kevaka eda vakayacora e so na veisau ena noda bula.
13. Ena vukei keda vakacava na lewa vinaka ena noda raica vakayalomatua na noda cakacaka vakaitalatala?
13 E uqeti keda na iVolatabu meda “taura ga na vuku dina kei na lewa vinaka.” (Vosa Vakaibalebale 3:21, 22) “Na vuku maicake sa . . . yalomalua [“lewa vinaka,” NW],” e kaya na iVolatabu. (Jemesa 3:17) So era dau saga mera vakatotomuria na levu ni nodra cakacaka vakaitalatala vakarisito e so tale. Ia, e vakasalataki keda na iVolatabu: “Me lewa deivaka na nona cakacaka na tamata yadua, e na qai rekitaki koya e na vuku i koya ga ka segai e na vukuna na tani: ni na colata na nonai colacola na tamata yadua.” (Kalatia 6:4, 5) Io, na nodra ivakaraitaki vinaka na tacida vakayalo e rawa ni vakayaloqaqataki keda meda qaravi Jiova mai vu ni lomada, ia na vuku kei na lewa vinaka ena uqeti keda meda cakava na ka vinaka duadua eda rawata, me vakatau ena keda ituvaki.
14, 15. Eda na vakaraitaka vakacava na yalomatua ena vakacegui ni noda vakasama kei na lomada?
14 Ena rawa ni sega ni yacovi keda na oca ke da dau lewa vinaka na veika mada ga eda nanuma ni rui lailai. Kena ivakaraitaki, eda dau qarauna beka meda bulabula vinaka vakayago? Vakasamataka mada na nodrau ivakaraitaki e dua na veiwatini erau veiqaravi tiko ena dua na valenivolavola ni tabana ni iVakadinadina i Jiova. Erau sa raica na rua oqo na bibi ni noda qaqarauni me kua ni yacovi keda na oca. E kaya o yalewa: “Ke mani vakacava na levu ni cakacaka e tu me keirau qarava, keirau na dau saga ga me keirau kua ni dau yadra sivia e veibogi. Keirau dau vakaukaua yago tale ga. Keirau vakila sara ga na kena yaga. Keirau sa kila na ka ga keirau rawata, oqo tale ga na ka keirau sa dau gumatua kina. Keirau saga gona me keirau kua ni dau vakatotomuri ira era icegu bula.” Vakaevei, eda dau kana vinaka? Eda dau vakacegu vinaka? Na noda lewa vinaka noda bula ena rawa ni vakalailaitaka na lomaocaoca, vakalailaitaka tale ga na noda oca vakayalo.
15 So vei keda e duatani sara na ka era gadreva. Kena ivakaraitaki, e dua na tacida yalewa lotu Vakarisito sa veiqaravi voli mai vakatabakidua ena so na vanua dredre sara. Tauvi koya e so na mate lelevu, wili kina na kenisa. Cava e vukei koya me vosota rawa kina na veika dredre oqo? Kaya o koya: “E bibi sara ga ena noqu bula me so na gauna au tiko taudua kina ena dua na vanua vakanomodi sara. Niu dau vakila na oca kei na curuoso ni vakasama, au kila ni sa kena gauna oya meu lai toka vakanomodi kina ena dua na vanua meu wilivola, meu vakacegu tale ga.” Na noda yalomatua meda raica e so na ka vaka oqo meda vakacegui kina ena vukei keda ena noda saga tiko ga meda kua ni oca vakayalo.
Vakaukauataki Keda na Kalou o Jiova
16, 17. (a) Na cava e bibi kina meda qarauna na noda bula vakayalo? (b) Na cava meda dau cakava e veisiga?
16 E bibi dina meda dau qarauna na noda bula vakayalo. Ena rawa meda oca vakayago nida mai veiwekani voleka kei Jiova, ia eda na sega ga ni oca na qaravi koya. O Jiova ena “dausolia na kaukauwa vei ira era sa malumalumu: ia ena vakalevutaka na kaukauwa vei ira era sa sega ni gumatua rawa.” (Aisea 40:28, 29) E vola na yapositolo o Paula, o koya e vakila sara ga na dina ni vosa oya: “Keitou sa sega ni datuvu kina. Kevaka sara mada ga e sa vuca mai na yago ga e sau, sa dauvakavoui na noda bula e loma e na veisiga yadua.”—2 Korinica 4:16, VV.
17 Vakasamataka mada na vosa “e na veisiga yadua.” Oqo e kena ibalebale meda ciqoma na isolisoli i Jiova e veisiga. E dua, sa daukaulotu voli ena 43 na yabaki, e dau oca qai yalolailai ena so na gauna. Ia e sega ga ni vakacauoca. E kaya: “E dau noqu ivakarau meu yadra sara vakatotolo meu masu vei Jiova au qai wilika tale ga na nona Vosa. Na ka oqo au cakava e veisiga, e vukei au meu vosota tiko me yacova mai oqo.” E rawa nida nuitaka na kaukaua i Jiova kevaka eda dau masu vua da qai vakananuma na nona itovo uasivi kei na nona vosa ni yalayala “e na veisiga yadua.”
18. Na veivakacegui cava e solia na iVolatabu vei ira na yalodina voli mai era sa qase ra qai tautauvimate?
18 Ena yaga vakalevu oqo vei ira na vakila nira yalolailai ena vuku ni nodra sa qase ra qai tautauvimate. Na nodra yalolailai e rawa ni vu mai na nodra vakatauvatana na ka era rawata ena gauna oqo kei na ka era dau rawata ena gauna e liu, e sega ni baleta nodra vakatauvatani ira kei na so tale. E veivakacegui dina na noda kila ni o Jiova e dokai ira na sa qase! E kaya na iVolatabu: “Ai sala vakaiukuuku na ulu sika, ni sa kune e na sala ni valavala dodonu.” (Vosa Vakaibalebale 16:31) E kila o Jiova na veika ga eda rawata, e kauaitaka tale ga na noda sokaloutaki koya ena lomada taucoko dina ga nida malumalumu. E nanuma vinaka tu na Kalou na cakacaka vinaka eda sa vakayacora. E vakadeitaka vei keda na iVolatabu: “Ni sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana ni dou a qaravi ira era sa lotu, ia dou sa qarava tikoga.” (Iperiu 6:10) Eda marautaka dina nira maliwai keda tiko o ira na sa vakadinadinataka na nodra yalodina vei Jiova ena vicasagavulu na yabaki!
Kua ni Soro Koso
19. E yaga vakacava vei keda na noda ogaoga ena caka vinaka?
19 Levu era vakabauta ni vakaukaua yago wasoma e rawa ni vakamamadataka na oca. E rawa tale ga ni vakamamadataka na oca vakayalo na noda cakava wasoma na cakacaka vakayalo. E kaya na iVolatabu: “Me da kakua kina ni oca e na caka vinaka ni da na tamusuka e na kena gauna, kevaka eda sega ni datuvu koso. O koya gona me da caka vinaka kina vei ira na tamata kece ga e na gauna kece ga e rawa kina, ka vakauasivi vei ira era lewe ni matavuvale e na vakabauta va-Karisito.” (Kalatia 6:9, 10, VV) Vakasamataka mada na vosa na “caka vinaka” kei na “me da caka vinaka.” E kena ibalebale oqo meda cakava e so na ka. Eda na sega ni oca ni cakava na cakacaka i Jiova kevaka eda dau cakava na veika vinaka vei ira tale e so.
20. O cei meda kua ni veimaliwai kaya nida valuta tiko na yalolailai?
20 Me kena veibasai, na veimaliwai kei na cakacaka vata kei ira na sega ni muria na lawa ni Kalou e rawa ni veivakaocai. E vakasalataki keda na iVolatabu: “Sa ka bibi na vatu, sa ka bibi talega na nuku; ia sa uasivi cake na kena bibi na nona cudru na tamata lialia.” (Vosa Vakaibalebale 27:3) Meda valuta gona na yalolailai kei na oca, ena vinaka meda kua ni veimaliwai kei ira na dauvakatitiqa se veivakalewai.
21. Eda na veivakayaloqaqataki vakacava ena soqoni vakarisito?
21 Na soqoni vakarisito e isolisoli i Jiova e vakaukauataki keda vakayalo. Eda dau vakayaloqaqataki mai kina ena ivakasala momona da veimaliwai tale ga kina. (Iperiu 10:25) Meda saga kece na lewe ni ivavakoso meda veivakayaloqaqataki nida vakamacala ena soqoni se nida vakaitavi ena buturara ni vosa. E nodra itavi na veiliutaki ena veivakavulici mera dau veivakayaloqaqataki. (Aisea 32:1, 2) Ke mani vinakati mera veivakadodonutaki se veivakaroti, ia me veivakacegui tiko ga na itautau ni nodra vosa. (Kalatia 6:1, 2) Na noda lomani ira tale e so ena vukei keda meda qaravi Jiova tiko ga da qai sega ni vakacauoca.—Same 133:1; Joni 13:35.
22. Dina ga ni malumalumu wale na yagoda, ia na cava meda doudou tu ga kina?
22 E vinakati na cakacaka nida sokalou vei Jiova ena gauna ni ivakataotioti oqo. Ia era vakila tale ga na lotu Vakarisito na oca ni vakasama, na rarawa kei na ituvaki lewalewai dredre e so. E malumalumu wale na yagoda ivalavala ca oqo, e vaka ga e dua na iyaya qele. Ia, e kaya na iVolatabu: “Ko i keitou sa tu vei keitou na i yau oqo, keitou sa vaka na kuro qele, me vakaraitaki kina ni sa nona na Kalou na kaukauwa levu, ka sega ni neitou.” (2 Korinica 4:7, VV) Io, eda na oca, ia meda kua ga ni vakacauoca. Meda “kaya ga ena doudou: ‘E dau vukei au o Jiova.’ ”—Iperiu 13:6, NW.
Railesu
• Na cava e so na ka bibi eda rawa ni biuta laivi?
• E rawa vakacava “me da caka vinaka” vei ira noda itokani lotu Vakarisito?
• E vakaukauataki keda vakacava o Jiova nida oca se yalolailai?
[iYaloyalo ena tabana e 23]
Kila o Jisu ke tarai ira vakabalavu na nona yapositolo na yalolailai, era na vakaleqai
[iYaloyalo ena tabana e 24]
So era muduka nodra vakaitavi ena ka era taleitaka kei na cakacaka era dau vakaogai ira kina
[iYaloyalo ena tabana e 26]
E kauaitaka vakalevu na noda sokalou o Jiova baleta ni kila na ka eda rawata