Taro na Dauwiliwili

Era kaya e so ni a sega ni voca na waqa a vodo tiko kina o Paula ena yanuyanu o Melita, ena ceva kei Sicily. A voca ga e vei?

E vure mai na taro oqo ena dua na vakatutu wale tiko ga oqo ni a sega ni voca o Paula ena yanuyanu o Melita, a voca ga e Cephalonia (se i Kefallinía) volekati Corfu ena wasawasa o Ionia, ena ra kei Kirisi. E kaya na itukutuku uqeti vakalou ni a soko mai Sisaria o Paula kei ira na nona itokani, vaka kina e so na sotia, ena veitaqomaki i Juliase na turaganivalu ni Roma. Me vaka e vakaraitaki ena mape, era soko i Saitoni kei Maira. Era a dewa mada ena dua na waqa levu ni usa sila mai Alekisadria, e Ijipita, ia oqo era sa naulu sara tiko ina ra kei Nito. Sa sega ni muri na ilakolako a nakiti taumada, oya mera sokota yani na tai kadua ni wasawasa na Aegean, ra takosova na ucu ni vanua o Kirisi qai dewa sara i Roma. A labata na waqa e dua na cagi kaukaua qai vakavuna me ratou soko sobu ina ceva vaka i Kiriti, ra lai vakaruru sara toka ena kena matasawa. Mai kea sa ra qai biu ikelekele ena toba e vakatokai o Toba Vinaka. Nira sa “cavui ikelekele mai Kiriti,” e qai “lebuka” na laca ni waqa e dua na “cava levu, a yacana ko Urokilitoni.” Sa qai “veisavuyaki tiko ena wasawasa” na waqa bibi ni usa sila oqo me yacova sara na ika14 ni bogi. E qai voca na waqa era tiko kina na le 276 ena dua na yanuyanu e tukuni ena iVolatabu ena vosa vakirisi me o Me·liʹte.​​—⁠Cakacaka 27:1–​28:⁠1.

Ena veiyabaki sa oti, e dau levu sara na ivakamacala me baleta na yanuyanu oqo o Me·liʹte. E so era nanuma ni oya na yanuyanu o Melite Illyrica, sa Mljet tiko edaidai, e tiko ena wasawasa na Adriatic ena baravi kei Croatia. E vaka me veicalati na vakasama oqori, baleta ni sega sara ga na kedrau isema na vualiku kei Mljet kei na vanua e sokota tarava o Paula, e Sairakuse, mai Sicily, ni bera ni dewa ena baravi ni ra kei Itali.​​—⁠Cakacaka 28:​11-​13.

Era kaya e levu na dauvakadewataka na iVolatabu ni o Me·liʹte e vakaibalebaletaki ena yanuyanu o Melite Africanus, sa Malta tiko edaidai. Na iotioti ni vanua a kele kina na waqa e vodo tiko kina o Paula oya ena Toba Vinaka, e Kiriti. E dua na cagi kaukaua e qai vakavuna me ratou soko ina yasayasa vakara e mua i Kilota. E vakauta tu na waqa oqori na cagi me vica vata na siga. Sa rawa ni tukuni ga kina ni a kauta sara na waqa oqori na cagi kaukaua me yaco i Melita.

Ni vakasamataki na bati ni cagi e dau liwa ena vanua oya, na “vanua e muria kei na totolo ni kena savu,” erau vola kina o Conybeare kei Howson ena nodrau ivola The Life and Epistles of St. Paul: “E lailai mai na 770 na kilomita na kedrau veiyawaki o Kilota kei Melita. E vakatubuqoroqoro kina na ka e yaco oqo, ni sega ni vakatitiqataki tale ni o Melita ga na vanua eratou a yaco kina na dausoko ena ikatinikava ni bogi. E vakadinadinataka ni vanua ga oya o Melita.”

E dina ga ni levu tale na vanua e tukuni ni a voca kina na waqa, ia na vanua o Melita e veidonui vinaka sara ga kei na itukutuku vakaivolatabu me vaka ga e vakaraitaki toka oqori ena mape.

[Mape ena tabana e 31]

(Raica tale na ivola)

Jerusalemi

Sisaria

Saitoni

Maira

Nito

KIRITI

KILOTA

MELITA

Sairakuse

SICILY

Roma

MLJET

KIRISI

CEPHALONIA