Vakavulici Mera Vunau Vakavinaka Sara

“Dou na qai dautukuni au mai Jerusalemi, kei Jutia taucoko, kei Samaria, ka yacova nai yalayala kei vuravura.”—CAKACAKA 1:8.

1, 2. Na cava na ilesilesi i Pita, o cei a lesi koya?

‘O JISU na kai Nasareci, a vakaroti keitou me keitou vunau vei ira na tamata me ivakadinadina ni o koya ga a lesia e liu na Kalou me lewai ira na bula kei na mate.’ (Cakacaka 10:38, 42) Oqo na veika a vakamacalataka na yapositolo o Pita vei Konilio kei na nona vuvale me ratou kila kina ni a lesi o koya me daukaulotu.

² Na gauna cava a veilesi kina o Jisu? A rairai vakasamataka tiko o Pita na veika a tukuna o Jisu sa vakaturi oti ni bera ni lako i lomalagi. A kaya o Jisu ena gauna oya vei iratou nona tisaipeli yalodina: “Dou na qai dautukuni au mai Jerusalemi, kei Jutia taucoko, kei Samaria, ka yacova nai yalayala kei vuravura.” (Cakacaka 1:8) Ia, ni bera vakalailai oya, na nona kila o Pita ni o koya e dua na tisaipeli i Jisu, e dodonu me na tukuna vei ira tale e so na veika e vakabauta me baleti Jisu.

Vakavulici me Tolu na Yabaki

3. Na ka veivakurabuitaki cava a cakava o Jisu, na cava na nona veisureti vei Pita kei Adriu?

³ Ni sivi e vica vata na vula nona papitaiso o Jisu ena 29 S.K., a mani lai vunau sara ena Wasa o Kalili, na yalava ni nodrau iqoliqoli o Pita kei na tacina o Adriu. Dua na bogi taucoko nodrau qoli voli, ia e sega ni dua na ka e rawa. Sa qai kaya vei rau o Jisu: “Sudra yani ki na wai titobu ka vakasobura na nomudou lawa me rawa e so na ika.” Ni ratou muria na ka e kaya o Jisu, “sa ka levu sara na ika e ratou sa tagava mai; ka sa tekivu me bote na nodratou lawa.” Sa qai tuburi Pita na rere ni raica na ka veivakurabuitaki e yaco, ia a qai vakacegui koya o Jisu ni kaya: “Kakua ni rere, me tekivu oqo ko sa na dau qolivi ira na tamata.”—Luke 5:4-10, VV.

4. (a) A vakarautaki iratou vakacava nona tisaipeli o Jisu me ratou vunau? (b) E duidui vakacava na cakacaka vakavunau i Jisu kei na nodratou vunau na nona tisaipeli?

⁴ Gauna vata ga oya eratou biuta kina nodratou waqa o Pita, Adriu, vaka kina o Jemesa kei Joni na luve i Sepete me ratou muri Jisu. Rauta ni tolu na yabaki nodratou tomani Jisu voli ena vunau kei na nodratou vakavulici me ratou daukaulotu. (Maciu 10:7; Marika 1:16, 18, 20, 38; Luke 4:43; 10:9) Ni sa cava na gauna oya ena 14 Naisani, 33 S.K, a qai kaya vei iratou o Jisu: “O koya sa vakabauti au, ena kitaka talega na cakacaka ka’u sa kitaka, ia ena kitaka na cakacaka e uasivi cake e na ka oqo.” (Joni 14:12) Era na vunau na tisaipeli i Jisu me vakataki koya ia ena raba toka na vanua era na kovuta. Me vaka eratou a qai kila, ni o iratou kei ira era na qai yaco e muri mera na tisaipeli, era na vunau ena “veivanua kecega” me yacova ‘na iotioti ni veisiga ni ituvaki kei vuravura.’—Maciu 28:19, 20, VV.

5. Ena yaga vakacava vei keda na nona vakavulici iratou nona imuri o Jisu?

⁵ Eda sa bula tu oqo ‘ena iotioti ni veisiga ni ituvaki kei vuravura.’ (Maciu 24:3) Eda sega ni vakataki iratou na imatai ni tisaipeli, meda salavata kei Jisu da qai raica nona vunau vei ira na lewenivanua. Ia, e rawa ni yaga vei keda nona veivakavulici nida wilika ena iVolatabu na ivakarau ni nona vunau kei na nona ivakaro vei iratou nona imuri. (Luke 10:1-11) Na ulutaga oqo ena veivosakitaki kina e dua tale na tikina bibi a vakaraitaka o Jisu vei iratou nona tisaipeli—na rai dodonu me baleta na cakacaka vakavunau.

Dau Veikauaitaki

6, 7. Na itovo cava i Jisu a vakavuna me vuavuaivinaka na nona cakacaka vakavunau, eda na vakatotomuri koya vakacava?

⁶ Na cava na vuna e laulau kina na vunau i Jisu? Dua na vuna oya ni nanumi ira qai kauaitaki ira dina na tamata. A tukuna vakailiu na daunisame ni o Jisu ‘ena lomana na tamata malumalumu kei na dravudravua.’ (Same 72:13) A qai vakayacora dina o Jisu na parofisai oya. E kaya na iVolatabu e dua na kena ivakaraitaki: “Ni sa raici ira na lewe vuqa ko koya, sa lomani ira, ni ra sa malumalumu, ka biu wale tu, me vaka na sipi sa sega na nodrai vakatawa.” (Maciu 9:36) Era vakila sara mada ga na tamata ivalavala ca nona veikauaitaki ra qai toro voleka vua.—Maciu 9:9-13; Luke 7:36-38; 19:1-10.

⁷ Ena laulau na noda cakacaka ena gauna oqo ke da veikauaitaki dina. Ni bera nida lai vunau, vakacava meda vakasamataka na levu ni nodra gadreva na tamata na itukutuku eda vakarau lai vakasavuya? Vakasamataka mada na veika era rairai leqataka tu ena qai walia rawa ga na Matanitu ni Kalou. Kua ni nanuma nira na sega ni vakarorogo na itaukeinivale, ni o sega ni kila se o cei ena ciqoma na itukutuku. O na rairai veivosaki sara beka kei na dua a masulaka voli me vukei!

Me Uqeti Keda na Loloma

8. Ena nodra vakatotomuri Jisu, na cava e uqeti ira na nona imuri mera vunautaka na itukutuku vinaka?

⁸ Na itukutuku vinaka a kacivaka o Jisu e vauci kina na vakayacori ni loma ni Kalou, na vakalagilagi ni yacana, kei na vakacerecerei ni nona veiliutaki —na ka ni bolebole levu duadua e vauca na kawatamata. (Maciu 6:9, 10) Na nona lomani Tamana o Jisu, a uqeti koya me yalodina me yacova na nona mate, qai vunautaka vinaka sara na Matanitu ni Kalou, ena mai vakadodonutaka na bolebole oya. (Joni 14:31) Na ka tale ga oqo e uqeti ira na imuri i Jisu nikua, era gugumatua kina ena vunau. E kaya na yapositolo o Joni: “Oqo na loloma vua na Kalou, me da muria na nona vunau,” okati kina na vunau se ivakaro mera vunautaka na itukutuku vinaka kei na nodra vukei e so mera tisaipeli.—1 Joni 5:3; Maciu 28:19, 20, VV.

9, 10. Na loloma cava tale, sega ni wili kina na loloma ni Kalou, e uqeti keda meda vunau vakavinaka sara?

⁹ A kaya o Jisu vei ira nona imuri: “Kevaka dou sa lomani au, dou talairawarawa ki na noqu vunau. Ko koya sa nanuma na noqu vunau ka talairawarawa kina, sai koya oqo sa lomani au.” (Joni 14:15, 21) Koya gona, me uqeti keda noda lomani Jisu meda vunautaka na ka dina da qai muria na veika tale e so a vakarota. Ena gauna a rairai kina vei Pita o Jisu ni sa vakaturi oti, a vakauqeti koya: “Vakani ira na noqu lami. . . . Vakatawana na noqu sipi. . . . Vakani ira na noqu sipi.” Na cava ena uqeti Pita me vakayacora na ka e tukuni vua? E tukuna o Jisu na kena isau ena nona tarogi Pita: “Ko sa lomani au? . . . Ko sa lomani au? . . . O sa lomani au?” Io, na nona lomani Jisu o Pita ena uqeti koya me vunau vakavinaka sara, me vakasaqarai ira na “sipi” qai nodra ivakatawa vakayalo.—Joni 21:15-17.

¹⁰ Nikua, eda sega ni veikilai vinaka sara kei Jisu me vakataki Pita ena gauna oya. Ia, e titobu na noda kila na veika a vakayacora ena vukuda. E uqeti keda na levu ni nona loloma e lai tini ‘mate kina ena vuku ni tamata kece ga.’ (Iperiu 2:9; Joni 15:13) Eda duavata kei Paula ena nona vola: “Sa rawai keitou sara na loloma i Karisito . . . sa mate ko koya e na vuku ni tamata kecega, me ra kakua ni bula tiko me yaga vei ira ga, ko ira era sa bula, me ra yaga ga vua.” (2 Korinica 5:14, 15) Eda vakaraitaka nida doka na nona lomani keda o Jisu da qai lomani koya nida taura vakabibi na noda ilesilesi meda vunau vakavinaka sara. (1 Joni 2:3-5) Eda na sega ni via taura vakamamada na cakacaka vakavunau, meda vakawalena kina na isoro i Jisu.—Iperiu 10:29.

Dei ena Veika e Bibi Cake

11, 12. Na cava na inaki ni nona mai bula e vuravura o Jisu, qai vakaraitaka vakacava nona dei ena veika bibi oqo?

¹¹ Ni sa lai duri tu o Jisu e mata i Ponitio Pailato, sa qai kaya: “A ka oqo ka’u sa sucu mai kina, ia na ka oqo ka’u sa lako mai kina ki vuravura oqo, me’u dautukuna na ka dina.” (Joni 18:37) A sega ni vakalaiva o Jisu e dua na ka me vakalatilati ena nona tukuna na ka dina. Oqori sara ga na loma ni Kalou vua.

¹² Na ka oqo a vakatovolei Jisu sara ga kina o Setani. Ni oti ga nona papitaiso, a saga sara o Setani me tamata kilai duadua e vuravura o Jisu, me solia vua “na matanitu kecega e vuravura, kei na kedrai ukuuku.” (Maciu 4:8, 9) E muri, sa ra qai via buli koya na Jiu me tui. (Joni 6:15) E so era na rairai vakasamataka na veika vinaka ena yaco ke ciqoma o Jisu na veika e dulaki vua, de dua ni sa na tui e vuravura, ena levu sara na ka vinaka e vakayacora me baleta na kawatamata. Ia, a cata o Jisu na mataqali rai oya. A dei voli ga ena nona vunautaka na ka dina.

13, 14. (a) Na cava a sega ni vakaleqa na nona cakava o Jisu na cakacaka bibi duadua? (b) E dina ni dravudravua vakayago o Jisu, na cava ga a rawata?

¹³ Kena ikuri, a sega ni vakaleqai Jisu na qarai ni iyau. A sega ni vutuniyau. A sega mada ga na nona vale. Ena dua na gauna a kaya: “Sa vaqara na fokise, a sa vakairoro na manumanu vuka; ia na Luve ni tamata, sa sega vua na tikina me kotora kina na uluna.” (Maciu 8:20) Gauna e mate kina o Jisu, na ka duadua a volai ni taukena oya na nona itutuvi, eratou a vakawirimadigitaka na sotia ni Roma. (Joni 19:23, 24) E kena ibalebale beka ni a tawayaga na bula i Jisu? Sega sara!

¹⁴ A uasivi cake sara na veika a vakayacora o Jisu ni laurai vata kei na ka ena cakava o koya e vutuniyau duadua ena nona solia nona iyau me wali kina na leqa ni kawatamata. A kaya o Paula: “Dou sa kila na loloma ni noda Turaga ko Jisu Karisito, ni sa vutuniyau ko koya, ia sa yaco me dravudravua e na vukumudou, mo dou vutuniyau mai e na vuku ni nona dravudravua.” (2 Korinica 8:9; Filipai 2:5-8) E dina ni dravudravua vakayago, a vakarautaka o Jisu vei ira na tamata yalomalumalumu na sala mera marautaka kina na bula uasivi me tawamudu. Eda vakavinavinaka dina vua! Dua tale ga na ka noda rekitaka na icovi e rawata ena vuku ni nona dei tiko ga ni vakayacora na loma ni Kalou!—Same 40:8; Cakacaka 2:32, 33, 36.

15. Na cava e bibi cake ena iyau?

¹⁵ O ira na lotu Vakarisito era saga mera vakatotomuri Jisu nikua, era sega tale ga ni via vakaleqai ena qarai ni iyau. (1 Timoci 6:9, 10) Era kila ni ilavo e rawa ni veivakacegui, ia e sega ni vakatautaki kina na bula tawamudu. Ni mate e dua na lotu Vakarisito, sa tawayaga na iyau e taukena me vaka ga na kena tawayaga vei Jisu na nona itutuvi ena gauna e mate kina. (Dauvunau 2:10, 11, 17-19; 7:12) Na ka e bibi duadua vua na lotu Vakarisito ni sa mate, oya na nona veiwekani kei Jiova vaka kina o Jisu Karisito.—Maciu 6:19-21; Luke 16:9.

Tudei ni Tusaqati

16. Na cava a cakava o Jisu ni tusaqati?

¹⁶ Na veitusaqati a sega tale ga ni vakamalumalumutaka nona vunautaka o Jisu na ka dina. Na nona kila mada ga ni na tini ena mate vakaisoro na nona cakacaka vakavunau a sega ni vakayalolailaitaki koya. A tukuni Jisu o Paula: “E na vuku ni marau sa viritu e matana, sa vosota na kauveilatai, ka sa sega ni madua ni sa vakalialiai kina, a sa qai tiko sobu ko koya e na liga i matau ni tikotiko-vakaturaga ni Kalou.” (Iperiu 12:2) Dikeva ni o Jisu a “sega ni madua ni sa vakalialiai.” A sega ni leqataka na ka era nanuma na dau veitusaqati me baleti koya. A dei tiko ga ena vakayacori ni loma ni Kalou.

17. Na cava e rawa nida vulica ena vosota i Jisu?

¹⁷ Na veika a vulica o Paula ena vosota i Jisu, a qai vakayaloqaqataki ira kina na lotu Vakarisito ni kaya: “Dou qai vakananumi koya sa vosota ni sa vosavakacacataki koya vakalevu ko ira na tamata ca, de oca ka waicala na lomamudou.” (Iperiu 12:3) Io, e rawa ni vakamalumalumutaki keda na noda tusaqati se vakalialiai e veisiga. E rawa ni veivakaocai na noda vosota tiko ga na idre kei vuravura, vakabeka na nodra veivakalewai na wekada era saga meda “dua toka na ka” ena vuravura oqo. Ia, me vakataki Jisu eda ravi vei Jiova me vukei keda ena noda vakatulewa meda vakaliuca taumada na Matanitu ni Kalou.—Maciu 6:33; Roma 15:13; 1 Korinica 2:4.

18. Na lesoni vinaka cava e rawa nida vulica ena vosa i Jisu vei Pita?

¹⁸ Na nona cata o Jisu me vakamuai tani e votu ena veika a qai kaya vei iratou nona tisaipeli me baleta nona mate. A qai vakayaloqaqataki Jisu o Pita ni kaya, “me vakayawa vei kemuni na Turaga,” ena nona vakadeitaka ni na ‘sega sara ni yaco vua’ na ka oya. A sega ni via rogoca o Jisu na veika e rawa ni vakamalumalumutaka nona inaki me cakava na loma i Jiova. A mani vakanadakui Pita qai kaya: “Lako tani ki dakuqu, Setani: ko sa via vakatarabetaki au; ni ko sa sega ni vakananuma na ka ni Kalou, na ka ga ni tamata.” (Maciu 16:21-23) Me vakatale mada ga oya na noda dei ni cata na vakasama vakatamata, da qai laiva me dusimaki keda tiko ga na vakasama ni Kalou.

Tawamudu na Kena Yaga

19. E dina ni dau cakamana, na cava e tiki bibi duadua ni cakacaka vakavunau i Jisu?

¹⁹ A levu nona cakamana o Jisu me vakaraitaka ni o koya na Mesaia. A vakabulai ira sara mada ga na mate. Na cakacaka oqo era marautaka na lewenivanua, ia a sega ni lako mai e vuravura o Jisu me vakayacora na cakacaka vaka oqo. A mai vunautaka na ka dina. E kila ni veika kece vakayago e vakarautaka ena sega ni dei. O ira mada ga na sa vakaturi era na mate tale. Na nona vunautaka ga na ka dina ena vukei ira e so mera rawata na bula tawamudu.—Luke 18:28-30.

20, 21. Era lewai ira vinaka vakacava na lotu Vakarisito ena nodra caka vinaka?

²⁰ Nikua, e so era saga mera vakatotomuria na ivakaraitaki vinaka i Jisu ena nodra tara valenibula se nodra vakayacora e so tale na cakacaka ena vanua dravudravua. E so era vakayagataka sara ga kina na nodra ilavo, era vakacaucautaki kina ena nodra lomadina; ia na nodra veivuke ena sega ni dei. Na Matanitu ni Kalou ga ena qai kauta mai na veivakacegui e dei. Oya na vuna, era gumatua kina na iVakadinadina i Jiova me vakataki Jisu ena vunautaki ni ka dina me baleta na Matanitu ni Kalou.

²¹ Io, era dau caka vinaka na lotu Vakarisito dina. E vola o Paula: “Ni sa rawa, me da caka vinaka vei ira na tamata kecega, ka vakalevu vei ira era veitokani e na vakabauta.” (Kalatia 6:10) Ena gauna ni leqa se gauna e gadreva kina na veivuke e dua, eda sega ni tuvakasuka ni “caka vinaka” vei ira eda tiko veitikivi se vei ira na tacida vakarisito. Ia, eda dei tiko ga ena kena vunautaki na ka dina.

Vuli ena iVakaraitaki i Jisu

22. Na cava era vunau kina na lotu Vakarisito vei ira na wekadra?

²² A vola o Paula: “Sa ca sara vei au, kevaka ka’u sa sega ni vunautaka nai tukutuku-vinaka!” (1 Korinica 9:16) A sega ni vakawalena o Paula na itukutuku vinaka baleta ni kena vunautaki ena bula kina kei ira era rogoci koya. (1 Timoci 4:16) E vakatale ga oya noda raica noda cakacaka vakavunau. Eda via vukei ira na wekada. Eda via vakaraitaka noda lomani Jiova. Eda via vakadeitaka tale ga noda lomani Jisu kei na noda vakavinavinakataka na levu ni nona lomani keda. Oya na vuna, eda vunautaka kina na itukutuku vinaka da qai bula me ‘kakua ni vaka na gagadre ca ni tamata me vaka ga na loma ni Kalou.’—1 Pita 4:1, 2.

23, 24. (a) Na cava eda vulica ena cakamana me baleta na qoli? (b) O cei nikua era gumatua ni vunau?

²³ Me vakataki Jisu, eda dei voli ga nida vakalialiai se sega ni taleitaki na itukutuku eda vakasavuya. Eda vuli ena cakamana i Jisu ena gauna a kacivi Pita kina kei Adriu me rau muri koya. Eda kila ni kevaka eda muri Jisu, eda na balata noda lawa ena wasawasa mada ga ena rairai drava tu, ena rawa ni katoa. Levu na lotu Vakarisito dauqoli era katoa sara ena yalava mada ga e nanumi ni na sega ni katoa. E so tale era toki ena yalava ni iqoliqoli vinaka, ra qai katoa sara. Se mani cava eda cakava, eda na sega ni soro ni balata noda lawa. Eda kila ni se bera ni tukuna o Jisu ni sa cava na cakacaka vakavunau e vuravura.—Maciu 24:14.

²⁴ Sa sivia oqo e ononamilioni na iVakadinadina i Jiova era ogaoga voli ena sivia na 230 na vanua. Ena tabaki ena ilavelave ni Vale ni Vakatawa, 1 Feperueri, 2005, na itukutuku ni nodra cakacaka e vuravura raraba ena yabaki vakacakacaka ni 2004. Na itukutuku oqori ena vakaraitaka nona vakalougatataka o Jiova na cakacaka vakavunau. Ena vo ni gauna se cici tiko kina na ituvaki kei vuravura nikua, meda taura dei tiko mada ga na vosa veivakauqeti i Paula: ‘Vunautaka na vosa, gumatuataka.’ (2 Timoci 4:2) Meda gumatua tiko mada ga ni vunau me yacova ni sa kaya o Jiova me sa rauta.

Me tekivu ena yabaki oqo, ena sega ni tabaki na Ripote ni Yabaki Vakacakacaka ni iVakadinadina i Jiova e Vuravura ena Vale ni Vakatawa, 1 Janueri. Ena qai tabaki ena ilavelave ni 1 Feperueri.

O Rawa ni Sauma?

• Ena yaga vakacava vei keda na nona vakavulici iratou nona tisaipeli o Jisu?

• E vakacava na ivakarau ni rai i Jisu vei ira e vunau kina?

• Na yalo vakacava e uqeti keda meda vunau tiko ga?

• Sala cava soti ena dei kina na noda vakayacora na loma ni Kalou me vakataki Jisu?

[iYaloyalo ena tabana e 15]

Ena vuavuaivinaka noda cakacaka vakavunau ke da vakatotomuria na nona veikauaitaki o Jisu

[iYaloyalo ena tabana e 16]

A lako mai e vuravura o Jisu me vunautaka na ka dina

[iYaloyalo ena tabana e 17]

Era gumatua na iVakadinadina i Jiova mera vunau vakavinaka sara