Vuli Tiko ga me Tawamudu

A VOLA na vuniwai ni Jamani o Ulrich Strunz e vica vata na ivola era vakatokai, Forever Young. E vakamacalataka na turaga oqo ena veivola oqori ni vakaukauayago, na noda kania na kakana bulabula, kei na noda qarava vinaka na noda bula ena vukea meda bulabula vinaka, da qai bula dede. Ia, e dina ni dulaka na kila oya, e sega ga ni yalataka vei ira era wilika na nona ivola nira na rawata na bula tawamudu ke ra muria na nona ivakasala.

Ia, e tiko e dua na mataqali kilaka e yalataki kina na bula tawamudu. Ena dua tale na vakasama, ke o bula tawamudu, ena tawamudu tale ga na nomu vulica na kilaka e yaga. A masuta o Jisu vua na Kalou: “Ia sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.” (Joni 17:3) Taumada, ena vinaka me vakamacalataki mada na ibalebale ni vosa “bula tawa mudu,” me vakadeitaki tale ga na veika e vauci ena kilaka oqo, kei na sala ena rawati kina.

Na iVolatabu e kaya ni na vakarau veisautaka na Dauveibuli na vuravura oqo me dua na parataisi, ena kune kina na ituvaki ena vakarawarawataka na bula dede. Ena dodonu me yaco e dua na ka levu me rawa ni paraitaisi na vuravura oqo, me vaka na kena a yaco na Waluvu ena gauna i Noa. Na Maciu wase 24, tikina e 37 ina 39, a vakatauvatana kina o Jisu na noda gauna oqo kei “na siga i Noa,” nira “sega mada ni kila eliu” na tamata ena gauna oya na leqa levu era na sotava. Era sega ni via rogoca na itukutuku a vunautaka voli o Noa me yacova “na siga sa vodo kina ki waqa ko Noa.” Ni yaco mai na Waluvu, era a rusa kece o ira era sega ni via rogoca na itukutuku oqori. A bula ga o Noa kei ratou na vodo vata kaya.

E tukuna o Jisu ni dua tale ga na “siga” vaka oya e sa roro voleka mai ena noda gauna oqo. O ira era cakacakataka na kilaka era sa vulica me baleta na siga oqori, era na sega wale ga ni bula ia era na rawa tale ga ni nuitaka na bula tawamudu. Kuria oya, o ira na sa mate e nanumi ira na Kalou, era na vakaturi ena inuinui nira na sega tale ni mate. (Joni 5:28, 29) Dikeva mada na sala e vakamacalataka kina o Jisu na vakasama e rua oqori. Nona tukuna tiko o Jisu vei Marica me baleta na nodra vakaturi na mate, a kaya: “Ko koya sa vakabauti au, kevaka sa mate, ena bula ga: ia ko koya yadua sa bula ka vakabauti au, ena sega sara ni mate.” Na ivakadinadina kece e tu e vakaraitaka ni sa roro voleka sara mai na “siga” oqori, e kena ibalebale ni rawa ni o na “sega sara [ga] ni mate.”​—Joni 11:25-27.

Sa qai tarogi Marica o Jisu: “Ko sa vakadinata na ka oqo, se segai?” A sauma o Marica: “Io, na Turaga.” Ke tarogi iko nikua o Jisu ena taro vata oqori, o na sauma vakacava? De na dredre beka mo vakabauta ni na rawa ni o sega sara ga ni mate. Kevaka mada ga e vaka oqori na nomu vakasama, sega ni vakabekataki ni o na vinakata mo na vakabauta. Vakasamataka mada na levu ni ka o rawa ni na vulica ke o na ‘sega ni mate’! Raitayaloyalotaka mada na nomu sa na cakava, o vulica rawa na ka kece o dau diva tu mo vakayacora nikua, ia e sega ga na gauna. Vakasamataka mada nomu na sotavi ira tale na wekamu lomani era sa mate tu! Na kilaka cava ena gadrevi me cakacakataki me rawati kina na ituvaki kece oqori, o na rawata vakacava na kilaka oqo?

O Rawa ni Rawata na Kilaka e Solia na Bula

E sa rui dredre beka na rawata na kilaka me baleta na Kalou kei Karisito? Sega. Dina ni tawavakaiyalayala na ka eda kila me baleta na nona cakacaka na Dauveibuli, ia e sega ni o koya na kila oya e vakaibalebaletaka o Jisu ena nona cavuta na vosa na ‘kila’ ena rawati kina na “bula tawa mudu.” Matata gona ni sega ni semata tiko kei na noda kila na veika buli e maliwalala se na ka vakasaenisi. Na Vosa Vakaibalebale wase 2, tikina e 1 kei na 5, e vakamacalataka ni “vosa” kei na “vunau” e volai tu ena iVolatabu e yavu bibi sara ga ni nomu kunea “na Kalou mo kilai koya.” Ia, me baleta noda kilai Jisu, e vakaraitaka na Joni 20:​30, 31 ni veika e volai tu ena iVolatabu, oqori sara ga na veika taucoko e gadrevi meda kila me baleti koya meda “rawata [kina] na bula.”

O koya gona, na kilaka me baleti Jiova kei Jisu Karisito e volai tu ena iVolatabu, e sa dusia sara tiko ga vei iko na sala mo rawata kina na bula tawamudu. Na iVolatabu e dua na ivola vakasakiti. E vakavuna na Dauveibuli me volai ena sala e rawa sara mada ga vua e dua e sega ni vuli me rawata na kilaka me bula tawamudu kina. Ena yasana kadua, vua e dua e totolo nona vakasama, ke tu vua na gauna kei na iyaya ni vuli, ena levu sara na ka vovou ena rawa ni vulica mai na iVolatabu. Na nomu wilika mada ga na ulutaga oqo e vakadinadinataka ni rawa mo vuli, ia na cava o na vulica?

Ena veiyasa i vuravura, e laurai ena nodra ivakaraitaki e vuqa, ni sala vinaka duadua ni kena rawati na kilaka oqo, oya na nomu vuli iVolatabu kei na dua e sa matata vinaka tu vua na veika drau na vulica. Me vaka ga nona a saga o Noa me wasea na kilaka vei ira era a bula tu ena gauna oya, era tu vakarau tale ga na iVakadinadina i Jiova mera tuberi kemuni ena iVolatabu ena nodra sikovi kemuni sara ga ena nomuni vale. Era na rairai vakayagataka na brochure Na Cava e Loma ni Kalou Vei Keda? se na ivola Na Ka Mo Kila Mo Bula Tawamudu Kina.a Kevaka mada ga e dredre mo vakabauta nira na “sega sara ni mate” na tamata yalodina ena Parataisi e vuravura, na kena veivosakitaki gona vaka oqo na iVolatabu ena rawa ni o nuitaka kina na vosa ni yalayala oqori. O koya gona, ke o taleitaka mo na bula tawamudu se o via vakadinadinataka ni o rawa ni na bula tawamudu, na cava mo cakava? Ciqoma na veisureti oqo ena nomu vulica na iVolatabu.

Ena vakacava na dede ni vuli? Na brochure e sa cavuti oti mai cake e 32 na tabana, e tabaki ena vica na drau na vosa, qai koto kina e 16 na lesoni leleka. Ni vakayagataki na ivola Na Ka Mo Kila Mo Bula Tawamudu Kina, ena taura e vica ga na vula mo vulica kina na veitikina bibi vakaivolatabu ke o vakatikitikitaka e dua na aua e veimacawa. E rua na ivola oqori e sa vukea e levu mera vakarabailevutaka na nodra kilaka ra qai bucina tale ga mera lomana dina na Kalou. Na Dauveibuli ena vakalougatataki ira era lomani koya dina, ra qai rawata tale ga kina na bula tawamudu.

Eda rawa ni rawata na kilaka e solia na bula, sa tu tale ga vakarawarawa. Na iVolatabu mada ga e sa vakadewataki taucoko, se vakatikina ena 2,000 vakacaca na vosa. Era tu vakarau na iVakadinadina i Jiova ena 235 na vanua mera vukei kemuni yadudua, ra qai dau solia tale ga e so na ivola vakaivolatabu me vakarabailevutaka na nomuni kilaka.

Vuli Vakataki Keda

Nomu veiwekani kei na Kalou e dua na ka o na bukia ga kei koya na Dauveibuli. O iko ga o rawa ni qarauna se mo vakaukauataka na nomudrau veiwekani. E vakatau vua na Dauveibuli na nona na solia vei iko na bula tawamudu. Oqori na vuna e dodonu mo vulica tiko ga kina na nona Vosa volai. Ni dua gona e veisiko wasoma yani e nomu vale, o na kunea ni rawarawa cake kina nomu biuta vakatikitiki e dua na gauna ni vuli.

Me vaka ni iVolatabu kei na ivola vakaivolatabu e vakarautaki meda ‘kilai koya kina na Kalou,’ sa dodonu ga meda vakamareqeta. (Vosa Vakaibalebale 2:5) Ena rawa tale ga ni vakayabaki kina na noda taukena tu. Ke o vakaitikotiko ena dua na vanua e se vakatorocaketaki tiko, ena rairai sega ni levu na ivola o vulica e koronivuli. Vuqa na ka e vulici e rawati ga mai na vakarorogo kei na vakadikevi ni ka. E Benin, me kena ivakaraitaki, e 50 vakacaca na vosa e vosataki kina. Sega ni ka vou vei ira na itaukei e kea me taladrodro nodra vosataka e va se lima na vosa tani, ia era sega ni vuli vosa mai na ivola e tabaki ena veivosa oqori. O kalougata gona ke o rawa ni vuli mai na ka ga o rogoca, na ka o dikeva kei na nomu vakasamataka vakamatua. Ia, o na kunea ni yaga sara vakalevu ena nomu vuli na vakayagataki ni ivola.

Ke mani lailai vakacava na loma ni nomu vale, tovolea mo vagalalataka e dua na vanua veiganiti mo maroroya kina na nomu iVolatabu kei na ivola vakaivolatabu. Biuti ira ena vanua era na kunei vakarawarawa kina ia era na sega tale ga ni vakacacani.

Vuli Vakavuvale

Ke o dua na itubutubu, o na vinakata mo vukei ira na luvemu mera kila tale ga na kilaka o sa vulica tiko. Ena veivanua e se qai vakatorocaketaki tiko, e dau kena ivalavala vei ira na itubutubu mera vakavulici luvedra ena cakacaka mera na bula kina. De na okati kina na vakasaqa, cabuka, takiwai, teitei, siwa, kei na volivolitaki ena makete. Na mataqali vuli oqo ena tauri ira ena nodra bula taucoko. Ia, e vuqa na itubutubu era sega ni okata ena vuli oqo na kilaka ena rawati kina na bula tawamudu.

Se mani vakacava na kemu ituvaki, o na rairai nanuma ni sega nomu gauna. E kila vinaka tu oqori na Dauveibuli. Nona vakamacalataka tiko na sala mera vulica kina na gone na nona ivunau, a vakarota ena gauna makawa sara: “Mo ni gumatua ni vakavulica vei ira na luvemuni, ka dauvosataka ni kemuni sa tiko e na nomuni vale, ni kemuni sa lako voli talega e na sala, ka ni kemuni sa koto sobu, ni kemuni sa duri cake talega.” (Vakarua 6:7) Ena yavu ni vakasama oqori, vakacava mo saga ni tuvanaka e dua na nomu porokaramu ni vuli, me vaka na kena oqo:

1. “Ni kemuni sa tiko e na nomuni vale”: Saga mo veivosakitaka wasoma na iVolatabu kei ira na luvemu e vale, ena vinaka sara ke caka ena veimacawa me vaka ga na sala a rairai vukei iko kina e dua. Ra dau veisoliyaka tale ga na iVakadinadina i Jiova na nodra ivola vakaivolatabu e ganita mera vakavulici kina na gone e duidui na yabaki ni nodra bula.

2. “Ni kemuni sa lako voli talega e na sala”: Tukuna vei luvemu na veika e baleti Jiova ena gauna drau dau veitalanoa kina, me vaka ga na nomu dau vakavulici ira ena veika ni bula oqo, o dau qai dusimaki ira tale ga.

3. “Ni kemuni sa koto sobu”: Masu vata kei luvemu ena veibogi.

4. “Ni kemuni sa duri cake”: Levu na vuvale era sa vakila na kena yaga nira dau dikeva e dua na tikinivolatabu e veimataka. Era dau vakayagataka na iVakadinadina i Jiova na ivola lailai na Dikeva na iVolatabu e Veisigab me yavutaki kina na nodra veivosaki.

Ena veivanua e se qai vakatorocaketaki tiko, era saga vakaukaua e vuqa na itubutubu me dua mada ga na luvedra e vuli vinaka. Ena sala oqo ni sa qase o itubutubu sa rawa ni veiqaravi o gone. Ia, ke o vulica na iVolatabu o qai vukei ira kece na luvemu mera cakava vaka kina, o na rawata kina na kilaka ena rawa kina vei iko kei ratou kece na lewe ni nomu vuvale me ratou bula tawamudu.

Ena tiko beka na gauna eda sa na kila kece kina na ka? Sega. Me vaka ni sega ni cegu na kena sowiri tu ga na noda vuravura ena maliwalala tawavakaiyalayala, ena sega tale ga ni cegu na kena vinakati meda na vuli tiko ga. Ni kaya na Dauvunau 3:​11: “Sa cakava [na Kalou] na ka kece me rairai vinaka e na kena gauna: ia sa vakatikora ki lomadra na gauna ena sega ni mudu, sa sega kina na tamata sa kunea rawa na cakacaka sa cakava na Kalou mai na kenai vakatekivu ka yacova na kenai otioti.” Na vuli e dua na ka talei e tawavakaiyalayala.

[iVakamacala e ra]

[Tikina bibi ena tabana e 5]

“Ia sai koya oqo na bula tawa mudu, me ra kilai kemuni . . . ”

[iYaloyalo ena tabana e 7]

Vukea na nomu vuvale mera vuli tiko ga me tawamudu