Taro na Dauwiliwili

A cakitaka beka na yapositolo o Paula na nona lotu Vakarisito ni lai kaya e matadra na Sanadrini: “Koi au na Farisi”?

Me kilai vinaka na ibalebale ni vosa oqo i Paula ena Cakacaka 23:6, ena gadrevi meda dikeva na ituvaki a tu kina.

Ni oti toka ga na nodra via vakamavoataki Paula e Jerusalemi na Jiu, a vosa vei ira na lewenivanua. E kaya ni “a susugi e na koro oqo [o Jerusalemi], ka sa vakatavulici au vakadodonu ko Kamalieli me vaka na nodra vunau na qase.” Era a vakarorogo toka na lewenivanua, oti oya sa ra qai tekivu ue, mani kauti Paula sara na turaga levu ni ivalu ina nodra bure na sotia. Ni vakarau kanakuita, sa qai kaya cake mai o Paula: “E tara beka vei kemudou mo dou vakanakuitataka na kai Roma, ka sega mada ni lewai?”​—⁠Cakacaka 21:27–22:29.

Ena siga ga e tarava, e kauti Paula na turaga levu ni ivalu ina nodra mataveilewai cecere na Jiu, na Sanadrini, me lai lewai kina. E vakaraici ira matua o Paula, qai dikeva nira wase rua tu na lewe ni Sanadrini, oya o ira na Setoki kei ira na Farisi. Sa qai kaya: “Oi kemuni na veiwekani koi au na Farisi, a luve ni Farisi, e na vuku ni’u sa vakadinata ni na tu cake tale na mate ka’u sa tarogi kina.” Era veileti kina na Farisi kei na Setoki, “ni sa daukaya ko ira nai tokani i Setoki sa sega na tu cake tale mai na mate, se agilose, se yalo; a sa daukaya ko ira na Farisi sa dina ruarua.” E so na Farisi era gumatua ena nodra kaya: “Keitou sega ni kunea e dua na ka ca vua na tamata oqo.”​—Cakacaka 23:6-10.

Ni kilailevu o Paula me dua na lotu Vakarisito gugumatua, e macala nira kila tu na Sanadrini ni sega ni lotu Farisi kaukaua o koya. O ira sara tale mada ga na Farisi era tu e kea, era sega ni vinakata e dua e cakitaka nodra vakabauta, se sega ni duavata vakaoti kei na nodra ivakavuvuli. Koya gona, nona kaya o Paula ni dua vei ira na Farisi, e sega ni vakabekataki ni yalani ga na kena ibalebale, e sega tale ga ni vakataratutu nira kila vinaka oya na Farisi era vakarogoci koya toka.

Ni kaya gona o Paula ni veilewaitaki ena vuku ni nona vakabauta na inuinui ni veivakaturi, e matata ni oqori sara ga na sala e tautauvata kina kei ira na Farisi. Ke veiletitaki na ulutaga ni veivakaturi, o Paula ena tokoni ira na Farisi, sega ni Setoki, baleta nira sega ni vakabauta na veivakaturi na itokani i Setoki.

Na ka e vakabauta o Paula, ni lotu Vakarisito, e sega ni veisaqasaqa kei na so na nodra vakabauta na Farisi, me vaka na veivakaturi, na nodra rai me baleti ira na agilosi kei na so na tiki ni Lawa. (Filipai 3:5) Ni duavata gona o Paula kei na so na vakabauta oqori, e rawa kina me vakatauvatani koya kei ira na Farisi, era kila vinaka sara tale ga na Sanadrini era a vakarogoci koya tu na ibalebale ni ka e tukuna tiko. E vakayagataka gona o Paula na nona tikitiki Jiu me sabaya kina na nodra vakaduiduitaki koya na mataveilewai levu vakajiu.

Ia, na ivakadinadina levu duadua ni a sega ni cakitaka nona vakabauta o Paula, oya ni a vakadonui koya tiko ga o Jiova. Ni tukuna oti ga o Paula ena bogi oya ni o koya e dua na Farisi, ena mataka ga e tarava a kaya vua o Jisu: “Kakua ni yalo lailai! Me vaka ni ko sa tukuni au e Jerusalemi, ko na la’ki tukuni au tale ga ki Roma!” Laurai e ke, ni a vakadonui Paula tiko ga na Kalou, e sega gona ni rawa ni tukuni ni a cakitaka nona vakabauta vakarisito.​—Cakacaka 23:11, VV.