Vakacaucautaki Jiova e Koronivuli

ENA veiyasa i vuravura, era dau saga na itabagone iVakadinadina i Jiova mera vakacaucautaka na Kalou e koronivuli​​—⁠ena nodra vosa kei na nodra itovo. Raica mada e so na ivakaraitaki ni yalogu vakaitabagone oqo.

A lesi e dua na itabagone iVakadinadina mai Kirisi me vola e dua na itukutuku me baleta na benuci ni vuravura. Lai vakekeli sara o koya ena Watch Tower Publications Index, qai raica ena Yadra! e levu sara na ivakamacala yaga. E cavuta tale ga ena itinitini ni nona ivola na Yadra! oqori. E kaya o nona qasenivuli ni itukutuku e vola e dua dina na itukutuku totoka e bau wilika. E vakayagataka tale ga nona qasenivuli na itukutuku oqori ena dua na bose, qai yaga sara vakalevu. Mani nanuma na tacida gone oqo me solia vua e so tale na ilavelave ni Yadra!, okati kina e dua e kena ulutaga “Teachers​​—⁠What Would We Do Without Them?” E muri sa qai tukuna na qasenivuli na yaga ni Yadra! vei ira na lewenikalasi, ra qai kerea e so mera yadua. Mani kauta gona mai na tacida oqo e so tale na kena ilavelave mera wilika na nona icaba.

E dua na itabagone iVakadinadina mai Benin, e Aferika, a sotava e duatani tale na mataqali veivakatovolei. Dau kena ivakarau ena vanua oqo mera kumuni ilavo na itubutubu, ra qai sauma e dua na dauniveivakavulici me vukei luvedra ena lesoni dredre nira vakavakarau ena veitarogi. Ia na dauniveivakavulici e digia na mataka ni Vakarauwai me veivakavulici kina. A sega ni duavata kina na itabagone iVakadinadina oqo: “E siga ni cakacaka vakavunau ni ivavakoso na mataka ni Vakarauwai. Dau siga marautaki dina vei au ena muanimacawa, au na sega ni veisautaka meu cakava kina e dua tale na ka!” O Tamana, e itubutubu le dua, e iVakadinadina tale ga e duavata kina, e bau kerei ira e so tale na itubutubu vaka kina e so na dauniveivakavulici me veisautaki na ituvatuva ni vuli oqori. Ia, era sega kece ni via tokoni koya. Mani vakatulewataka na tacida gone me sa kua ga ni tiko ena gauna ni vuli. Na siga gona oqori e sa na lako ga kina ena vunau vakaivavakoso. Era vakalialiai koya na nona lewenikalasi, ra qai uqeti koya me sa rauta na nona vunau kei na nona qarava na Kalou. Nodra nanuma ni sa na sega tu ga ni rawata nona veitarogi. Na kena veibasai e qai yaco, ni o ira sara ga na vakavulici tiko era qai sega ni rawata na veitarogi, ia a rawata na tacida oqo. Oti tale ga kina na nodra dau veivakalialiai. Ia, era sa qai dau tukuna tiko vua, “Mo qarava tiko ga nomu Kalou.”

Mai na Czech Republic, a lesi e dua na goneyalewa yabaki 12 me vakarautaka e dua na ivakamacala lekaleka ni dua na ivola. A uqeti koya o tinana me vakayagataka Na Tamata Rogo Duadua A Bau Bula. E tekivuna nona vosa ena taro: “Na cava oni nanuma? O cei sara mada na tamata rogo a bau bula?” Sa qai vakamacalataki Jisu, nona bula e vuravura, vaka kina na nona ivakavuvuli. E vakamacalataka tale ga na ulutaga “Na Ka ni Vuli me Baleta na Veivosoti.” E kaya na nona qasenivuli, “E bau dua vei ira na ivakamacala totoka oya!” e marau tale ga ni taura e dua na nona ivola. Era vinakata tale ga e so na gone era vuli vata mera yadua. E marau na tacida oqo ena siga e tarava ni solia e 18 na ivola oqori.

Era marau na itabagone vaka oqori ena nodra sa vakacaucautaki Jiova tiko e koronivuli. Meda vakatotomuria mada ga na nodra ivakaraitaki vinaka ni gugumatua vakaitabagone.