“E Dau Vukei Au O Jiova”

E Vinaka na Nodra Bula na Gone Era Vakacaucautaki Jiova

“AU VINAKATA me vinaka na noqu bula!” Oqo na ka e kaya e dua na cauravou me baleta na ka e namaka. Ia, e rawa vakacava ni vinaka na nona bula e dua na itabagone? E sauma sara ga vakadodonu na iVolatabu: “Mo nanumi koya ka Buli iko ni ko sa cauravou tiko.”​—Dauvunau 12:1.

E sega wale ga ni nodra itavi na itabaqase mera qaravi Jiova ra qai vakacaucautaki koya. Na gonetagane o Samuela, na luvedrau o Elikana kei Ana, a lai qaravi Jiova ena valeniveitavaki ena gauna e se gone kina. (1 Samuela 1:​19, 20, 24; 2:​11) E dua na goneyalewa lailai Iperiu, a vakaraitaka na dei ni nona vakabauti Jiova ena gauna e tukuna kina vei Neamani, na kavetani ni mataivalu kei Siria, ni na bula mai na nona vukavuka ke lai raica na parofita o Ilaisa. (2 Tui 5:​2, 3) Era vakaroti gona na cauravou kei na goneyalewa ena Same 148:​7, 12, mera vakavinavinaka vei Jiova.a Ni se qai yabaki 12 o Jisu, a vakaraitaka na nona gagadre me qaravi Tamana vakalomalagi. (Luke 2:​41-​49) Nira a tuberi ena iVolatabu na gonelalai era raici Jisu ena valenisoro, era mani kacivaka: “Osana vua na Luve i Tevita!”​—Maciu 21:​15, 16.

Vakacaucautaki Jiova Nikua

E levu na gone iVakadinadina i Jiova nikua era cibitaka na nodra vakabauta, ra qai doudou na wasea e koronivuli kei na veivanua tale e so. Dikeva mada oqo e rua na kena ivakaraitaki.

Mai Peritania, era veivosakitaka na kalasi i Stephanie, e yabaki 18, na vakalutu kei na so na itovo e dodonu me bulataka na tamata. Me baleta na vakalutu, e kaya o qasenivuli ni sa ciqomi raraba tu, me kua tale ga ni nanuma e dua na goneyalewa ni ca. Nira tokona kece na kalasi na rai oqo, e mani nanuma o Stephanie me vakamacalataka na nona rai e yavutaki ena iVolatabu. E vakamacala sara ena gauna sa tarogi koya kina o qasenivuli me baleta na nona rai. Dina ni a rere vakalailai, ia e vakayagataka na gauna oya o Stephanie me vakamacalataka na rai vakaivolatabu. E tukuna umauma na vakasama e koto ena Lako Yani 21:​22-​24, qai vakamacalataka ni cala na kena vakamavoataki na gone e se bera ni sucu, sa macala tu ga ni vakalutu e veisaqasaqa kei na loma ni Kalou.

E se bera ni wilika vakadua na tikinivolatabu oqo o qasenivuli, dina ga ni dua na dauvunau. Na nona doudou o Stephanie me vakamacalataka nona vakabauta e vakavuna mera veivosaki kei koya na nona lewenikalasi ena vuqa tale na ulutaga. E dua na goneyalewa ena nona kalasi sa dau taura tiko na ilavelave vovou kece ni Vale ni Vakatawa kei na Yadra!, e rua tale na goneyalewa erau a tiko ena dua na soqo ni tikina ni iVakadinadina i Jiova me rau raica na nona papitaiso o Stephanie me vakadinadinataka kina na nona sa yalataki koya vua na Kalou.

O Vareta, e dua na goneyalewa lailai yabaki ono, e vakaitikotiko mai Suriname, e Sauca Amerika. A gauna veiganiti me vakalagilagi Jiova kina, oya na nona vakayagataka na itukutuku veivakacegui e kune ena iVolatabu me vukei nona qasenivuli. Ni a sega ni veivakavulici tu o qasenivuli ena tolu na siga, ena nona lesu mai a tarogi ira na gonevuli se ra kila na vuna a yali tu kina se sega. Era sauma, “Oni tauvimate?” “Sega,” e sauma o qasenivuli. “A takali o tuakaqu, au rarawataka vakalevu. Au kerea gona mo ni kua ni vakasosa.”

Ni moce toka o tinana ena yakavi oya, e ogaoga sara o Vareta na vakacega na ivoladraudrau makawa me wilika na kedra ulutaga. Raica sara o koya Na Vale ni Vakatawa, 15 Julai, 2001, e kena ulutaga “Sa iTinitini Beka ga ni Bula na Mate?” Ena levu ni nona marau, e lai vakayadrati tinana sara ga qai kaya, “Nau, Nau, raica! Au kunea e dua na ivola me baleta na mate meu na solia vei qasenivuli!” A vakau sara na ivoladraudrau oya vei qasenivuli kei na dua na ivola e vola o Vareta vua: “Oqo saka na nomuni ivola. Oni na raici tacimuni tale ena Parataisi, baleta ni sega ni lasu rawa o Jiova. E yalataka tu ni na parataisi sara ga na vuravura oqo, sega ni lomalagi.” Dua na ka na nona vakavinavinaka nona qasenivuli ni a vakacegui koya na ivoladraudrau oya e yavutaki ena iVolatabu.

Yavutaka Vinaka Nomu Bula Mai Muri

E “Kalou mamarau,” o Jiova, e vinakata tale ga mera marau na itabagone. (1 Timoci 1:​11, NW ) E tukuna sara ga nona Vosa: “Mo reki, ko iko na cauravou, ni ko sa cauravou tiko.” (Dauvunau 11:9) E kila o Jiova na veika ena yaco mai muri qai kila na vanua e tini kina na itovo vinaka kei na itovo ca. Oya na vuna e vakasalataki ira kina na itabagone ena nona Vosa: “Mo nanumi koya ka Buli iko ni ko sa cauravou tiko, ni sa bera ni yaco na veisiga ca, ka ni sa sega ni toro mai na veiyabaki, ko na kaya kina, Au sa sega ni vinakata na ka oqo.”​—Dauvunau 12:1.

Io, e vinakata o Jiova me yaga vinaka vei ira na itabagone na isolisoli talei ni bula. Ena vakaibalebale qai vuavuaivinaka na nodra bula kevaka era nanuma na Kalou, ra qai vakalagilagi koya. Kevaka mada ga era sotava e so na ituvaki dredre, se rawa tiko ga nira kaya ena nuidei: “E dau vukei au o Jiova.”​—Same 121:​2, NW.

[iVakamacala e ra]

[Tikina bibi ena tabana e 9]

“Dou vakavinavinaka vei Jiova mai vuravura, . . . na cauravou, kei na goneyalewa.”​—SAME 148:7, 12

[Kato ena tabana e 8]

E TOKONI IRA NA GONE O JIOVA

“Sai kemuni ga, na Turaga Jiova, ka’u sa nuinui tiko kina: oi kemuni ga ka’u a vakararavi kina ni’u a cauravou ka yacova na gauna oqo.”​—Same 71:5.

“O koya [na Kalou] sa vakamamautaka na gusumu e na ka vinaka; sa vakavoutaki kina na nomu cauravou me vaka na nona na ikeli.”​—Same 103:5.