Taro na Dauwiliwili

Ena rawa beka ni vakaleqa nomu veiwekani kei Jiova na qitora na qito voravora ena kompiuta?

E vola o Tui Tevita e Isireli makawa ni o Jiova, e dikeva na tamata yalododonu kei na tamata ca, ia o “koya sa vinakata nai valavala kaukauwa, sa cati koya na yalona.” (Same 11:5) Ena vosa taumada na vosa e vakadewataki me ‘cata’ e rawa ni kena ibalebale “e dua e meca.” O koya gona ni dua e taleitaka na ivalavala kaukaua e sa meca sara tiko ga ni Kalou. Ia na taro meda vakasamataka oqo: Ena rawa ni bucini beka na ivalavala kaukaua ena qitotaki ni so na qito ena kompiuta?

Na qito voravora e tu ena kompiuta, e dau vakabibitaki kina na vakayagataki ni iyaragi. E vakalevu ni o koya e qitora e vulica kina na iwalewale ni vala. Na ivoladraudrau na Economist e kaya: “E vakanuinui vakalevu na mataivalu ni Mereke ena qito ena kompiuta mera vuli kina. Qai so sara mada ga na qito era vakayagataka na mataivalu era volitaki tu vei ira na lewenivanua.”

E dina ni o ira na qitotaka na qito voravora ena kompiuta era sega ni vakamavoataki ira tiko na tamata dina. Ia na cava e rairai sa na cakava tiko e lomadra na ka ni veivakamarautaki vaka oqo? (Maciu 5:21, 22; Luke 6:45) Na cava o rawa ni kaya me baleta e dua e taleitaka me suaka, vana, vakamavoataka vakaca qai vakamatei ira na tamata era vakasamataki tu ga? Vakacava ke dau vakayagataka e veimacawa e vica vata na aua na tamata oqo ena nona qitora tiko na qito voravora me vakaceguya kina nona gagadre, qai voleka sara ni bobula kina? Se mani cava e yaco, e rawa ni o tukuna ni sa bucina tiko o koya nona taleitaka na ivalavala voravora, me vaka ga e dua e dau sarava na iyaloyalo vakasisila e sa bucina tiko na ivalavala dukadukali.​—Maciu 5:27-29.

E vakacava sara mada na levu ni nona cata o Jiova e dua e taleitaka na ivalavala kaukaua? E kaya o Tevita ni o Jiova e “cati” koya dina. Ena gauna i Noa a vakaraitaka kina o Jiova nona cati ira dina era taleitaka na ivalavala kaukaua. A kaya o Jiova vei Noa: “Sa rairai mai ki vei au nai otioti ni tamata kecega; ni ra sa vakasinaiti vuravura e nai valavala kaukauwa; ka raica, ka’u na vakarusai ira vata kei vuravura.” (Vakatekivu 6:13) Na Kalou dina a vakarusai ira na tamata ena vuku ni nodra itovo kaukaua. Qai vakabulai Noa ga kei na nona vuvale​—o iratou na le walu eratou cata na ivalavala kaukaua.​—2 Pita 2:5.

O ira era vinakata mera itokani i Jiova era “tukitukia na nodrai seleiwau mei bati ni siviyara, kei na nodra moto mei sele ni samaki.” Era sega ni taleitaka na ivalavala kaukaua, era sega “ni vulica tale nai valu.” (Aisea 2:4) O koya gona, meda itokani tiko ga ni Kalou e dodonu meda “lesu tani mai na ca, . . . ka kitaka na ka vinaka.” E dodonu meda “vakasaqara na vakacegu, ka muria sara.”​—1 Pita 3:11.

Vakacava ke da sa dau qitora tiko mai na qito voravora era tu ena vidio? Ena vinaka meda vakadeitaka sara ga nida via vakamarautaki Jiova ena noda muduka na cakava na ka e cata. Sega ni vakabekataki nida na masuta na yalo tabu ni Kalou me vukei keda meda muduka na ivalavala e veivakaleqai vakayalo oqo. E rawa nida na muduka ke da bulataka na itovo me vaka na vakacegu, yalovinaka, kei na lewai koya vinaka me rawa kina ni salavata kei na ivalavala ni Kalou na noda ivakarau ni bula.​—Luke 11:13; Kalatia 5:22, 23, VV.