Taro na Dauwiliwili
Ena sega beka ni vakacaraki nona lewaeloma e dua na lotu Vakarisito ke ciqoma na cakacaka ena vinakati kina me vakaiyaragi?
Era raica vakabibi na iVakadinadina i Jiova e vuravura raraba na nodra itavi lesi vakalou, oya ena nodra qaravi vakayago na nodra lewenivuvale. (1 Timoci 5:8) Ia, e tiko e so na mataqali cakacaka e veisaqasaqa sara ga kei na ivakavuvuli vakaivolatabu qai cala meda vakaitavi kina. Oqo e okati kina na cakacaka e veisemati kei na veimauilavo, vakayagataki vakatawadodonu ni dra, kei na kena e uqeta na vakatavako. (Aisea 65:11, NW; Cakacaka 15:29; 2 Korinica 7:1; Kolosa 3:5) E tiko e so tale na mataqali cakacaka e sega sara ni vakacala na iVolatabu, ia ena rawa ni vakaleqa na nona lewaeloma e dua se na nodra lewaeloma e so tale.
Na noda vakaitavi ena cakacaka e taurivaki kina na dakai se dua tale na mataqali iyaragi, eda dui vakatulewa sara ga kina. Ia, na cakacaka e vakaiyaragi ena rawa ni lai tini vakadavedra kina e dua ke gadrevi me vakayagataka na nona iyaragi. O koya gona, ena gadrevi vua na lotu Vakarisito me masulaka qai vakasamataka se sa na tu vakarau me ciqoma na itotogi ni nona vakatulewa totolo ke vauci kina na bula ni tamata. Vei koya tale ga e vakaiyaragi ena rawa ni mavoa se mate ni yaco na vakacaca se saumi vua na ka e yaco.
Nona vakatulewa e dua, ena rairai cakayaco tale ga vei ira e so. Me kena ivakaraitaki, na nona itavi bibi e dua na lotu Vakarisito me vunautaka na itukutuku vinaka ni Matanitu ni Kalou. (Maciu 24:14) Ena rawarawa beka na vakavulici ira na tani mera ‘veilomani kei ira na tamata kece ga,’ qai gauna vata oqori o bula tiko ena cakacaka e vakaiyaragi? (Roma 12:18, VV) Vakacava o ira na gone se so tale na lewenivuvale? Ena ririkotaki beka na nodra bula ke maroroi tu e vale na dakai? Kena ikuri, era na bale se tarabe beka na tani ena nona vakatulewa e dua me baleta na tikina oqo?—Roma 14:21.
Ena “iotioti ni veisiga” oqo, sa qai levu ga na tamata era dau “cudrucudru,” ra qai “cata na ka vinaka.” (2 Timoci 3:1, 3, NW) Nona kila oqo e dua, ena galala beka ena ‘veibeitaki’ ke digia na cakacaka e vakaiyaragi, koya ena rawa ni veisaqasaqa kina kei ira na tamata vaka oqori? (1 Timoci 3:10, VV) Sega sara. Oqo na vuna, na ivavakoso ena “vakamelei” koya kevaka e vakaiyaragi tiko ga ni oti na nona vakadodonutaki vakaivolatabu. (1 Timoci 3:2, VV; Taito 1:5, 6) O koya gona, ena sega ni soli na itavi dokai ena ivavakoso vua e dua na tagane se yalewa vaka oqo.
A vakadeitaka o Jisu vei ira nona tisaipeli ni kevaka era vakaliuca na Matanitu ni Kalou, e sega ni dodonu mera lomaocaocataka vakasivia na veika mera bula kina. (Maciu 6:25, 33) Io, ke da nuitaki Jiova vakatabakidua, “ena tokoni [keda] ko koya. Ena sega ni laivi ira na yalododonu me ra vakayavalataki e na dua na gauna.”—Same 55:22.