O se Nanuma Tiko?

O taleitaka na ka o wilika ena itabataba ni Vale ni Vakatawa era se qai taba oti ga? Raica mada ke rawa ni o sauma e vica na taro oqo:

• Cava e via vaka kina na mate ni kawa na ivalavala ca taumada—⁠oya na talaidredre i Atama?

E via vaka e dua na mate ni kawa baleta ni a vakadewa o Atama na bula ivalavala ca vei keda na nona kawa. Eda sucukaya mai na ivalavala ca, me vaka ga e so na gone era sucukaya mai na tauvimate era vakadewa vei ira na nodra itubutubu.​—8/15, tabana e 5.

• Cava e so na ka e vakavuna na torocake ni itovo kaukaua nikua?

E saga tiko o Setani meda yawaki Jiova ena nona bucina e lomada meda vakayacora na itovo kaukaua. E dau vakayagataka na iyaloyalo, ivakatagi, kei na qito era tu ena kompiuta, koya era uqeti sara tiko ga kina na qitora mera vakasamataka na veivakalolomataki torosobu duadua kei na veivakamatei. Na itovo kaukaua e vu sara ga vakalevu ena kena dau vakaraitaki ena tabana ni itukutuku.⁠—9/1, tabana e 29.

• O cei o Ponitio Pailato?

O koya e turaga ni Roma qai rawati koya, rairai a curu tale ga ena mataivalu. A lesi koya o Tiperiu na empara ni Roma me kovana ena yasana o Jutia ena 26 S.K. Ena veilewai i Jisu, a rogoca o Pailato na nodra veibeitaki na iliuliu vakajiu. Me vakamarautaki ira na vosa kudrukudru, a vakatauca kina me totogi mate o Jisu.​—9/15, tabana e 10-12.

• Na “ivakatakilakila” cava e cavuti ena Maciu 24:3 (NW)?

E levu na tiki ni ivakatakilakila oqo, ia era wiliki vata kece mera dua ga na ivakatakilakila. Na ivakatakilakila oqo e okati kina na ivalu, dausiga, matedewa, kei na uneune, ena rawa tale ga kina me ratou kila na imuri i Jisu na nona sa na “tiko tawarairai,” vaka kina na “iotioti ni veisiga ni ituvaki kei vuravura.”​—10/1, tabana e 4-5.

• Na vanua cava soti ena taudaku kei Palesitaina era vakaitikotiko kina na Jiu ena imatai ni senitiuri?

Ena imatai ni senitiuri, era vakaitikotiko vakalevu na Jiu e Siria, Esia Lailai, Papiloni, kei Ijipita, qai tiko tale ga e so na itikotiko lalai ena vanua vakaurope e qali ina matanitu vakaroma.​—10/15, tabana e 12.

• Ena savasava tiko beka ga na nona lewaeloma e dua na lotu Vakarisito ke ciqoma na cakacaka ena vinakati kina me vakaiyaragi?

Na noda vakaitavi ena cakacaka e taurivaki kina na dakai se dua tale na mataqali iyaragi, eda dui vakatulewa sara ga kina. Ia, na cakacaka e vakaiyaragi ena rawa ni lai tini vakadavedra kina e dua ke gadrevi me vakayagataka na nona iyaragi, e rawa tale ga ni mavoa se mate ni yaco na vakacaca se saumi vua na ka e yaco. Na lotu Vakarisito e vakayagataka e dua na iyaragi vaka oqori ena sega ni soli vua na itavi dokai ena ivavakoso. (1 Timoci 3:3, 10, VV)​—11/1, tabana e 31.

• Me vaka na vosa “Amaketoni” e kau mai na vosa vakaiperiu “Har–Magedon,” se “Ulunivanua o Mekito,” kena ibalebale beka ni ivalu na Amaketoni ena vakayacori ena dua na ulunivanua ena Tokalau e Loma?

Sega. E sega ni dua na ulunivanua o Mekito, e dua wale sara na delana lailai, e toka e cake qai koto e ra na vanua veibuca e Isireli. Na vanua o Mekito ena sega ni rauti ira kece ‘na tui kei vuravura, kei na nodra mataivalu.’ Na ivalu ni Kalou ena tara na vuravura taucoko, ena qai vakaotia tale ga na ivalu kece. (Vakatakila 16:14, 16; 19:19; Same 46:8, 9)​—12/1, tabana e 4-7.