“E Dau Vukei Au O Jiova”

E Dau Vakalougatataka o Jiova na Yalo ni Solibula

DIKEVA mada na ka eratou tautauvata kina na tolu na ivakaraitaki oqo. E vodo basikeli e dua na turaga me gole yani ina veikauloa mai na vanua o Cameroon. Vica vata na aua nona vodo tiko ena gaunisala soso qai so na vanua e luvu tale tu ga. Ena sotava e so na ituvaki ririkotaki me rawa ga kina ni lai vakaukauataki ira tale e so. Mai Zimbabwe, erau taubaletaka e rua na turaga e 15 na kilomita me rau lai veivakavulici ena dua na iwasewase lailai ribayawa. Erau vuto kosova e so na uciwai e luvu tu, rau qai taqara e uludrau na nodrau isulu kei na nodrau ivava me kua ni suasua. Ena dua tale na vanua, e yadra ena va na kaloko ena matakalailai e dua na marama me lai vakavulica ena iVolatabu e dua na nasi, ni oya ga na gauna galala e rawa ni vuli kina.

Eratou tautauvata vakacava na tolu na ivakaraitaki oqo? Era cavuti kina na iVakadinadina i Jiova era cakacaka vakaitalatala vakatabakidua, ra qai veivakavulici ena ka dina mai na iVolatabu. Ra okati kina na painia tudei, painia lavotaki, daukaulotu, ivakatawa dauveilakoyaki, kei na vica vata na udolu na bolecakacaka e Peceli e veiyasa i vuravura. Era kilai tani ena yalo ni solibula era dau vakaraitaka.a

Me Donu na iNaki

Era muria na iVakadinadina i Jiova na ivakasala ni yapositolo o Paula vei Timoci: “Gumatua sara mo vakaraitaki iko mo vinaka e na mata ni Kalou, a tamata daucakacaka sa sega e dua na ka me madua kina, mo wasea vakadodonu nai vakavuvuli dina.” (2 Timoci 2:15) Ia, na cava sara mada e uqeti ira e vica vata na udolu na iVakadinadina mera cakacaka vakaitalatala vakatabakidua?

Ke o tarogi ira se cava na vuna era cakacaka kina vagumatua ena nodra qaravi Jiova, era na kaya nira lomani Jiova kei ira na wekadra. (Maciu 22:37-39) E veiganiti dina oqo baleta ke sega ni uqeti ira na loloma, ena sega ni yaga na nodra cakacaka vagumatua.​—1 Korinica 13:1-3.

Solibula ina Colaitavi

O ira kece na lotu Vakarisito yalayala oti era ciqoma na veisureti i Jisu: “Kevaka e dua sa via muri au, me kakua ni muria na lomana, ia me colata na nona kauveilatai [“kaunirarawa,” NW], ka muri au.” (Maciu 16:24) Na noda sega ni murilomada e kena ibalebale meda soli keda vakarawarawa me rau taukeni keda na Kalou o Jiova kei Jisu Karisito, rau qai dusimaki keda tale ga. Levu gona era sa solibula ena nodra vakaitavi ena cakacaka vakaitalatala vakatabakidua.

E levu na iVakadinadina era saga vagumatua mera vakarabailevutaka na nodra qaravi Jiova. Dikevi Júlia mada, e dua na kena marama yabaki 56, e painia tudei mai São Paulo, e Brazil. E kaya: “A qiriti au mai e dua na tacida tagane, e turaga ni Jaina, e taroga keu tu vakarau meu vulica na vosa vakajaina. Ena yabaki ni bula au tiko kina, au sega ni bau vakasamataka meu vulica e dua tale na vosa. Ia ni oti e vica na siga, au mani bolea meu vulica. Ena gauna oqo, sa rawa niu vunau vei ira na tani ena vosa vakajaina niu vakayagataka na iVolatabu.”

Na valenivolavola ni tabana ni iVakadinadina i Jiova e Peru e volatukutukutaka: “Ena loma ni vica na yabaki oqo, era toki e vica na drau na painia tudei ina yalava e sega ni lesi ina dua na ivavakoso mera lai cakacaka vakaitalatala kina, era vakaraitaka na yaloqaqa kei na yalo ni solibula. So era toki ina tauni e se sega sara tu ga ni vakatorocaketaki qai dredre me kune kina na cakacaka vagauna. Era tu vakarau na mataveitacini oqo mera cakava na ka e gadrevi mera veiqaravi tiko ga ena yalava era lesi kina. Ia o koya e bibi sara, e laurai ni vuavuaivinaka na nodra cakacaka vakaitalatala ena veivanua era lesi kina. Era ripotetaka gona na ivakatawa dauveilakoyaki ni sa tauyavutaki e so na iwasewase lalai ena nodra veivuke na painia tudei oqo era vakaraitaka na yalo ni solibula.”

So na lotu Vakarisito era bolemate sara ga me rawa kina mera vukei ira nodra itokani ena vakabauta. (Roma 16:3, 4) Kaya e dua na ivakatawa ni tabacakacaka ena dua na yasayasa mai Aferika e carubi tu kina na veivaluvaluti: “Ni se bera ni keirau yacova yani vakaveiwatini na iyala ni vanua e wase kina na yasana e lewa na matanitu kei na kena era lewa na ito era saqata na matanitu, eratou tarovi keirau e va na turaganivalu kei na nodratou yadra mai na ito era saqata na matanitu, ni ratou via kila se cava keirau cakava tu e kea. Ena gauna eratou raica kina na neirau ivakatakilakila, ratou dikeva ni keirau tiko ena yalava e lewa na matanitu, e vakavuna na nodratou taqaya. Ratou beitaki au niu dua na yamata. Ratou mani lewa meu biu ena loma ni dua na qara. Ia au a vakamacalataki keirau, ratou mani vakatara me keirau lako.” Dua na ka nodra vakavinavinaka na veivavakoso erau sikova na veiwatini oqo ena vuku ni nodrau solibula me rawa ni rau veisiko yani!

Dina ga nira sotava na ituvaki dredre na mataveitacini era cakacaka vakaitalatala vakatabakidua, ia e tubu tiko ga na kedra iwiliwili ena veiyasa i vuravura. (Aisea 6:8) Era vakamareqeta na dau cakacaka gugumatua oqo na nodra itavi dokai mera qaravi Jiova. E vica na milioni era sa vakalagilagi Jiova tiko edaidai era vakaraitaka tale ga na mataqali yalo ni solibula vaka oqo. Yaco kina mera vakila na veivakalougatataki levu i Jiova. (Vosa Vakaibalebale 10:22) Era nuidei ni na vakalougatataki ira qai tokoni ira o Jiova, era duavata na dau cakacaka gugumatua oqo kei na nona rai na daunisame ena nona lagata: “E dau vukei au o Jiova.”​—Same 121:2, NW.

[iVakamacala e ra]

[Tikina bibi ena tabana e 9]

“O ira na nomuni tamata era na via vakacabori ira . . .e na siga ni nomuni kaukauwa.”​—SAME 110:3

[Kato ena tabana e 8]

O JIOVA E VAKAMAREQETI IRA NONA TAMATA YALODINA

“Mo dou qai tu dei sara, mo dou kakua ni yavala, mo dou uasivi cake e na cakacaka ni Turaga e na gauna kecega, ni dou sa kila sa sega ni ka walega na nomudou cakacaka e na vuku ni Turaga.”​—1 Korinica 15:58.

“Sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana.”​—Iperiu 6:10.