Na Cava Meda Cabori Keda Kina?

O Bill e dua na turaga vakawati uabula e qasenivuli ni matai. Ena loma ni dua na yabaki e dau vakayagataka e vica vata na macawa me veivuke kina ena kena tuvanaki, kei na kena tara na Kingdom Hall e nodra na ivavakoso ni iVakadinadina i Jiova, qai sega ni saumi kina. O Emma e dua na goneyalewa yabaki 22, e rawata vinaka nona vuli, e toka sara tale ga e cake na ivakatagedegede ni nona kila. Ia e sega ni bau saga e so na isausau e yaga ga vua se vaqara marau, e dau vakayagataka e sivia e 70 na aua ena nona cakacaka vakaitalatala me vukei ira na lewenivanua mera kila na iVolatabu. Rau sa vakacegu mai na nodrau cakacaka o irau na veiwatini o Maurice kei Betty. Erau sega ni via gade wale voli ga e vale, ia erau toki ina dua tale na matanitu me rau lai vukei ira na lewenivanua e kea mera vulica na inaki ni Kalou me baleta na vuravura.

O IRATOU oqo eratou sega ni wiliki iratou me ratou duatani se ratou kaya ni ratou sa dua na ka. Eratou vakataki keda ga, ratou qai cakava na ka eratou nanuma ni dodonu me ratou cakava. Na cava eratou vakayagataka kina na nodratou gauna, kaukaua, taledi, kei na nodratou iyau vei ira na tani? E uqeti iratou na titobu ni nodratou lomana na Kalou kei na nodratou lomani ira na tani. Na loloma gona oqo e bucina vei iratou na yalo ni via cabori iratou dina.

Na cava na ibalebale ni yalo ni cabori keda? Ni dua e cabori koya e sega ni gadrevi sara me vakuai koya vakasivia mai na bula. E sega ni tukuni meda sa vakatabui keda mai na ka kece, ni oqori ena rawa ni kauta tani na noda marau se na noda vakacegu. E kaya kina na Shorter Oxford English Dictionary ni ibalebale ga ni nona cabori koya e dua oya me “vakuai koya mai na ka e dau taleitaka, na marau, kei na ka e dau gadreva ena vuku ni itavi me qarava, se ena vukudra na tani.”

O Jisu Karisito​—iVakaraitaki Uasivi Duadua

Na Luve ni Kalou duabau ga a vakatubura, o Jisu Karisito, e ivakaraitaki uasivi duadua ni dua e tu vua na yalo ni cabori koya. Ni se bera ni mai bula vakatamata, a rairai marautaka tu na bula lagilagi kei na bula vakacegu ena kena cecere duadua. Rau veimaliwai veivolekati sara kei Tamana kei ira tale ga na kabula vakayalo. E vakayagataka tale ga na nona taledi na Luve ni Kalou ena cakacaka dredre ia e marautaki, ni o koya e “matai daucakacaka.” (Vosa Vakaibalebale 8:​30, 31) A bula dina ena ituvaki cecere duadua, e uasivi sara mai na kena e rawa ni marautaka na tamata vutuniyau duadua e vuravura. E taravi Jiova na Kalou o koya ena itutu cecere qai dokai e lomalagi.

Ia, na Luve ni Kalou oqo a “vakadravudravuataki koya, ka kauta vua nai tovo ni tamata dauveiqaravi, a sa caka me tautauvata kei na tamata.” (Filipai 2:7) A lomasoli ni biuta yani na ka kece e tu vua me mai bula vakatamata qai cabora nona bula me ivoli, me sereki keda kina mai na leqa e vakavuna o Setani. (Vakatekivu 3:​1-7; Marika 10:45) Kena ibalebale ni mai bula maliwai ira na kawatamata ivalavala ca ena vuravura e tu ena kaukaua i Setani na Tevoro. (1 Joni 5:​19, VV) Vakatale ga kina ni mai vosota tu na bula vakaloloma kei na bula dredre. E bolea na ka kece, qai saga vagumatua o Jisu Karisito me cakava na loma i Tamana. (Maciu 26:39; Joni 5:​30; 6:​38) A vakatovolei na loloma kei na yalodina i Jisu me yacova sara ga na kena iyacoyaco e cake duadua. E vakacava sara mada na levu ni nona via soli koya? E kaya na yapositolo o Paula, “sa vakamalumalumutaki koya, a sa talairawarawa me mate, io me mate ena kauveilatai.”​—Filipai 2:8.

“Me Tiko e na Lomamudou na Yalo Oqo”

Eda uqeti meda muria na ivakaraitaki i Jisu. “Me tiko e na lomamudou na yalo oqo ka tiko talega vei Karisito Jisu,” e veivakauqeti o Paula. (Filipai 2:5) Eda na rawata vakacava? Dua na sala oya, “mo dou kakua ni nanuma na nomudou ka ga koi kemudou yadua, ia mo dou dui nanuma talega na nodra ka na tamata tani.” (Filipai 2:4) Na loloma dina e “sega ni qara na ka me nona ga.”​​—1 Korinica 13:5.

Era vakaraitaka o ira na dau veikauaitaki na nodra sega ni nanumi ira ga ena nodra dau qaravi ira na tani. Ia sa levu edaidai na yalo ni dui nanumi koya ga. Na rai ni vuravura oya meda dui vakaliuci keda ga. E vinakati meda qarauni keda mai na yalo ni vuravura baleta ni rawa ni veisautaka noda rai na yalo oqo, e rawa tale ga nida vakaliuca na noda gagadre me bibi duadua ena noda bula. O koya gona na ka kece eda cakava​—noda vakayagataka noda gauna, noda kaukaua, noda iyau​—e sa na baleti keda tiko ga. Ena gadrevi gona vei keda meda valuta vakaukaua na gagadre oqo.

Na vosa ni loloma sara mada ga e rawa ni vakaseavutaka na yalo ni via cabori keda. Nona kila o Pita na vanua ena lai tini kina na nona cabori koya o Jisu, mani kaya kina: “Me kakua sara, Turaga.” (Maciu 16:​22, VV) A rairai dredre me ciqoma o Pita na nona lomasoli ni cabori koya o Jisu me mate ena vuku ni nona vakacerecerei o Tamana kei na vakabulai ni kawatamata. A qai saga gona kina me vagolei Jisu tani mai na nona via cabori koya.

‘Kua ni Muri Lomamu’

Na cava e qai cakava o Jisu? E kaya na kena itukutuku: “Ni sa vuki mai ko koya [o Jisu], ka vakaraici iratou na nona tisaipeli, sa vunauci Pita, ka kaya, Lako tani ki dakuqu, Setani; ni ko sa sega ni vakananuma na ka ni Kalou, na ka ga ni tamata.” Sa qai kacivi ira na lewe vuqa kei iratou na nona tisaipeli o Jisu qai kaya: “O koya yadua sa via muri au, me kakua ni muria na lomana, me colata ga na nona kauveilatai, ka muri au.”​—Marika 8:​33, 34.

Ni oti tale e 30 na yabaki mai na nona cavuta o Pita vei Jisu na veivosa a tukuna, e vakaraitaka ni sa qai kila na ibalebale ni nona cabori koya e dua. Sa sega ni qai uqeti ira na nona itokani vakabauta mera vakawelewele se mera gade voli ga. Ia, e vakasalataki ira o Pita me yadra tiko na nodra vakasama me baleta na itavi e tu mera cakava, ra qai kakua ni muria na nodra gagadre vakavuravura a dau tu vei ira e liu. Dina nira na vakatovolei, mera vakaliuca tiko ga ena nodra bula na vakayacori ni loma ni Kalou.​—1 Pita 1:​6, 13, 14, VV; 4:​1, 2.

Na sala yaga duadua meda muria oya meda soli keda vei Jiova, da yalodina ena noda vakatotomuri Jisu Karisito, da qai vakararavitaka vua na Kalou me dusimaki keda ena ka eda cakava. E laiva gona kina o Paula e dua na ivakaraitaki vinaka. Na nona sega ni lokuyara kei na nona vakavinavinaka vei Jiova, e uqeti koya me vakanadakuya kina na gagadre vakavuravura, kei na veika a rawa ni taukena o koya e rawa ni vagolei koya tani mai na nona cakava na loma ni Kalou. E kaya o koya, “Au taleitaka me’u vakayagataka na veika e tu vei au, ka vakayagataki au tale ga” meu qaravi ira kina na tani. (2 Korinica 12:​15, VV) E vakayagataka o Paula na nona taledi me vakatetea kina na veika vakalou, sega ni nona gagadre.​—Cakacaka 20:24; Filipai 3:8.

Eda na dikevi keda vakacava meda raica ni sa tiko vei keda na rai vata a tu vua na yapositolo o Paula? E rawa nida tarogi keda ena veitaro oqo: Au vakayagataka tiko vakacava na noqu gauna, na noqu kaukaua, na noqu taledi kei na noqu iyau? Au vakayagataka tiko beka na veika oqo kei na so tale na isolisoli talei me baleti au ga, se, meu vukei ira kina na tani? Au sa vakasamataka tiko beka meu vakarabailevutaka na noqu cakacaka ni veivakabulai ena kena kacivaki na itukutuku vinaka, me yaco sara meu dua e kacivaka vakatabakidua na Matanitu ni Kalou? E rawa beka niu vakaitavi vakalevu ena so na cakacaka me vaka na tara Kingdom Hall se na kena qaravi? Au sa vakayagataka vinaka tiko beka na gauna meu vukei ira kina era gadreva tu na veivuke? Au sa qaravi Jiova tiko beka ena kena vinaka duadua au rawata?​—Vosa Vakaibalebale 3:9.

‘A Ka ni Marau Vakalevu na Solika’

E vakasama beka vakavuku meda cabori keda? Io e vakadina kina! E kila o Paula mai na ka sara ga e sotava ni yalo oya e vu ni veivakalougatataki. E solia vua na marau levu kei na lomavakacegu dina. A vakamacalataka na ka oqo vei ira na qase mai Efeso ena gauna e sotavi ira kina mai Milito. E kaya o Paula: “E na ka kecega au sa vakatakila vei kemudou, ni sa kilikili mo dou daucakacaka vakaoqo [mo dou cabori kemudou] mo dou vukei ira sa malumalumu, mo dou nanuma talega na vosa ni Turaga ko Jisu, ni sa kaya ko koya, A ka ni veivakalougatataki [se, “marau,” NW] vakalevu me soli ka, ka vakalailai ga me taura na ka.” (Cakacaka 20:35) Vica vata na milioni era raica ni nodra vakaraitaka na yalo oqo e vakamarautaki ira ena gauna sara ga oqo. Era na qai marau sara vakalevu ena gauna se bera mai ni sa na qai vakaicovitaki ira o Jiova o ira na vakaliuca na veika e baleti koya, kei na veika e baleti ira na tani.​—1 Timoci 4:​8-​10.

Ni tarogi o Bill se cava e saga kina me vukei ira na tani ena tara Kingdom Hall, e kaya o koya: “Noqu vukei ira na ivavakoso lalai ena sala oqo e solia sara ga vei au na marau dina. Au marau niu vakayagataka na noqu kila ena vukudra na tani.” Na cava e digitaka kina o Emma me vakayagataka nona kaukaua kei na nona taledi me vukei ira kina na tani mera vulica na ka dina ena iVolatabu? “Au sega ni vakasamataka rawa se cava tale meu cakava. Niu se gone qai tu vei au na kaukaua, au vinakata meu cakava na levu ga ni ka au rawata meu vakamarautaki Jiova kina kei na noqu vukei ira tale ga na tani. O koya gona, e sega sara ga ni bau dua tu na ka na noqu vakuai au mai na so na iyau vakayago. Oqo ga na ka e dodonu meu cakava meu dolea kina na veika e vakayacora vei au o Jiova.”

Erau sega ni veivutunitaka o Maurice kei Betty na nodrau sega ni bau gade, dina ga ni vakayabaki na nodrau cakacaka vakaukaua tu ena nodratou susugi kei na nodratou qaravi na lewe ni nodrau vuvale. Ni rau sa vakacegu ena gauna oqo, erau vinakata me rau cakava tiko ga e dua na cakacaka e yaga qai vakainaki kina na nodrau bula. “Keirau sega ni vinakata me keirau mokusiga wale tu ga ena gauna oqo,” erau kaya. “Na neirau vukei ira mai vanua tani mera kilai Jiova e solia vei keirau na gauna me keirau cakava kina na ka e yaga.”

O saga beka mo dau cabori iko? E sega ni ka rawarawa. Sa bau dua na veimulomulo vinaka na noda saga vakaukaua meda vakamarautaka na Kalou, kei na noda valuta na gagadre vakatamata e tu vei keda nida valavala ca. (Roma 7:​21-​23) Ia e rawa nida qaqa ke da vakararavitaka vei Jiova me dusimaki keda. (Kalatia 5:​16, 17) Ena sega vakadua ni guilecava na noda cabori keda ena nona cakacaka, ena qai vakalougatataki keda kina vakalevu o koya. Io, na Kalou o Jiova ena ‘dolava na katuba ni lomalagi qai sovaraka vei keda na ka ni veivakalougatataki meda na sautu dina sara.’​—Malakai 3:​10; Iperiu 6:​10.

[iYaloyalo ena tabana e 23]

E tu vei Jisu na yalo ni cabori koya. E tu tale beka ga vei iko?

[iYaloyalo ena tabana e 24]

E vakabibitaka o Paula ena nona sasaga na cakacaka ni vunautaki ni Matanitu ni Kalou