Vakatotomuria na Dauvosota i Jiova

“Sa sega ni berabera na Turaga [o Jiova] ni vakayacora na nona vosa ni yalayala, . . . sa vosoti keda ga.”​—2 PITA 3:9.

1. Na isolisoli uasivi cava e via solia vei keda o Jiova?

SA TU vakarau o Jiova me solia vei keda e dua na ka ena sega tale ni dua e rawa ni solia. Oqo e dua na ka e uasivi qai talei, ia e sega ni rawa nida volia se cakacakataka meda rawata. E via solia o koya vei keda na isolisoli ni bula tawamudu ena parataisi e vuravura. (Joni 3:​16) Sa na gauna marautaki mada ga! Sa na oti na veika e dau vakavuna vakalevu na rarawa​​—⁠veivala, itovo kaukaua, bula dravudravua, basulawa, tauvimate, kei na mate sara mada ga. Ena qai kunea na tamata na bula vakacegu dina kei na sautu ni sa veiliutaki na Matanitu ni Kalou. Eda diva dina me totolo mai na Parataisi oya!​​—⁠Aisea 9:​6, 7; Vakatakila 21:​4, 5.

2. Na cava e se sega ni tinia kina o Jiova na veiliutaki i Setani?

² E vakanamata tale tu ga o Jiova ena gauna sa na vakataudeitaka kina na Parataisi e vuravura. Ni o koya li e dau vinakata na ivalavala dodonu kei na lewa dodonu! (Same 33:⁠5) E sega ni taleitaka vakalailai na kena sa sega ni kauaitaki na nona ivakatagedegede savasava e vuravura ena gauna oqo, beci nona veiliutaki, kei na nodra vakacacani na nona tamata. Ia, e tiko na vuna vinaka e se sega tiko kina ni tinia na veiliutaki i Setani kei ira era tokona. Na vuna oqo e okati kina na vakalewai ni nona veiliutaki cecere. Ena nona waraka o Jiova me qai macala na vakalelewa oqo, sa vakaraitaka tiko kina e dua na itovo vakasakiti e sa kunekunei dredre ena gauna oqo​​—⁠na vosota.

3. (a) Cava na ibalebale ni vosa vakirisi kei na vosa vakaiperiu e vakadewataki ena iVolatabu me “vosota”? (b) Na taro cava eda na dikeva?

³ E tiko e dua na vosa vakirisi e vakadewataki vakatolu ena New World Translation me “vosota.” Na vosa oqo e kena ibalebale taumada na “yalo balavu” oya na vuna e dau vakadewataki kina vakalevu me “vosota vakadede” qai vakadua na kena vakadewataki me “yalovosota.” Na vosa vakirisi kei na vosa vakaiperiu ni “vosota” e tiko ruarua kina na vakasama ni kena vakalaivi tiko mada e dua na ka, kei na berabera ni cudru. E yaga vakacava vei keda na vosota i Jiova? Na cava eda vulica ena vosota i Jiova kei ira nona tamata yalodina? Eda kila vakacava ni vakaiyalayala na vosota i Jiova? Meda raica mada.

Dikeva Mada na Vosota i Jiova

4. Na cava e vola na yapositolo o Pita me baleta na vosota i Jiova?

⁴ E vola na yapositolo o Pita me baleta na vosota i Jiova: “Kemudou sa lomani, mo dou kakua ni lecava na ka oqo, ni sa tautauvata vua na Turaga e dua na siga kei na yabaki e dua na udolu, kei na yabaki e dua na udolu kei na siga e dua. Sa sega ni berabera na Turaga ni vakayacora na nona vosa ni yalayala, me vaka era sa nanuma na tamata eso sa berabera: sa vosoti keda ga vakadede, ni sa sega ni vinakata me rusa e dua, me yacova ga na veivutuni ko ira kecega na tamata.” (2 Pita 3:​8, 9) Dikeva e rua na ka eda vulica ena tikinivolatabu oqo me baleta na vosota i Jiova.

5. E raica vakacava o Jiova na gauna, qai cakayaco vakacava oqo ena ka e cakava?

⁵ Kena imatai, e duidui sara na nona raica na gauna o Jiova mai vei keda. Vei koya e tawavakaiyalayala na nona bula, na duanaudolu na yabaki e tautauvata ga kei na dua bulu na siga. E sega ni lewai koya na gauna, ia ena gauna vata oya e sega ni berabera ke gadrevi me vakadodonutaka e dua na ka. Ni Kalou vuku o Jiova, e kila na gauna veiganiti duadua me qai yavala kina ena vukudra na nona tamata, qai vosota voli ena nona waraka me yaco mai na gauna oya. O koya gona, meda kua ni nanuma ni sega ni kauaitaka o Jiova na rarawa era sotava na nona tamata. E Kalou “yalo loloma,” e vatuka ni loloma. (Luke 1:​78, VV; 1 Joni 4:⁠8) E sega ni dredre vua me vakavinakataka na leqa cava ga ena yaco ena loma ni gauna lekaleka e vakalaiva tiko kina me yaco na veika rarawa.​​—⁠Same 37:⁠10.

6. Na cava meda kua ni nanuma me baleti koya na Kalou, ena vuku ni cava?

⁶ E dau sega ni rawarawa meda waraka e dua na ka eda vinakata. (Vosa Vakaibalebale 13:12) Ni so gona e berabera nodra vakayacora na ka era yalataka, e sa dau vakabauti sara nira sa sega ni dina ena nodra yalayala. Ena ka sesewa toka meda nanuma ni vaka tale ga oqo na Kalou! Kevaka eda taura cala na vosota i Jiova meda kaya ni vakaraitaka oya na nona rui berabera, ena rawarawa sara me yacovi keda na lomalomarua, yalolailai, se da sosovu sara vakayalo. Koya e ca sara, e rawa nira vakacalai keda o ira a sa veivakaroti mada kina o Pita​—⁠o ira na dau veivakalialiai kei ira na sega ni vakabauta. Era dau kaya ena veivakalialiai o ira oqo: “Evei na vosa ni yalayala ni na lako tale mai ko koya? ni ra sa moce ga na qase, a sa tu dei tiko vakakina na ka kecega me vaka ni sa buli e nai vakatekivu.”​​—⁠2 Pita 3:⁠4.

7. E salavata vakacava na vosota i Jiova kei na nona vinakata mera veivutuni na tamata kece ga?

⁷ Na ikarua ni ka eda vulica ena vosa i Pita oya ni o Jiova e vosota voli baleta ni vinakata mera veivutuni na tamata kece ga. O ira ga era lomaqa ra qai sega ni via lako tani mai na sala ca era sa muria tiko ena vakarusai ira o Jiova. Ia, e sega ni taleitaka o Jiova mera mate na tamata ca. E vinakata ga mera veivutuni, ra qai saumaki mai me rawa nira bula tiko ga. (Isikeli 33:11) Oya sara ga na vuna e vosota voli kina o Jiova ni vinakata me vunautaki na itukutuku vinaka ena veiyasa i vuravura kece me soli kina na galala vei ira na tamata kece ga mera digitaka na bula.

8. E laurai vakacava na vosota ni Kalou ena ka e baleti ira na nona tamata na Isireli?

⁸ E laurai tale ga na vosota ni Kalou ena ka e baleti ira na nona tamata na Isireli. Vica vata na senitiuri na nona vosota voli na nodra talaidredre. Ena gusudra na nona parofita, e dau vakavuqa na nona kaya: “Dou lesu mada mai na nomudoui valavala ca, ka vakabauta na noqu vunau, kei na noqui lesilesi, me vaka na vunau kece ka’u a vakarota vei ira na nomudou qase, ka’u a tukuna talega vei kemudou e na gusudra na noqui talatala na parofita.” Na cava e qai yaco? Ka ni rarawa nira “sega ni vakarorogo.”​​—⁠2 Tui 17:​13, 14.

9. E tautauvata vakacava na vosota i Jisu kei na vosota i Tamana?

⁹ E muri sa qai talai Luvena mai o Jiova vei ira na Jiu. Sega ni oca na Luvena oqo ena nona vakamasuti ira na Jiu mera qarava tale na Kalou ena yalodina. Na vosota i Jisu e ucuya vinaka sara ga na vosota nei Tamana. Ena nona kila vinaka o Jisu ni sa vakarau vakamatei, sa qai kaya ena rarawa: “Isa! Jerusalemi, Isa! Jerusalemi, ko iko sa vakamatei ira na parofita, ka vakaviriki ira sa talai yani vei iko, au a nanuma vakavica me’u vakasoqoni ira vata na nomu gone, me vaka na toa yalewa sa vakasoqoni ira na luvena e ruku ni tabana, ia dou a sega ni vinakata!” (Maciu 23:37) Na vosa oqo e sega ni vaka na ivosavosa ni dua na turaganilewa e sa vinakata ga me totogitaka e dua, ia e itautau ni vosa ni dua na itokani dau loloma e dau veivosoti. Me vakataki Tamana ga mai lomalagi, o Jisu e vinakati ira ena gauna oya mera veivutuni, me kua kina ni tau vei ira na cudru ni Kalou. E so era a rogoca na ivakasala i Jisu ra mani bula kina ni totogitaki Jerusalemi na Kalou ena 70 S.K.​​—⁠Luke 21:​20-​22.

10. E sa mai yaga vakacava vei keda na nona dau vosota na Kalou?

¹⁰ Sega li ni vakadrukai keda na nona dau vosota na Kalou? Sa torosobu sara nikua na talaidredre ni tamata, ia e solia ga vei keda yadua o Jiova na gauna​​—⁠vei ira tale ga e vica vata tale na milioni​​—⁠meda vulica kina na veika e baleti koya, da qai ciqoma na inuinui ni bula tawamudu. A vola na yapositolo o Pita vei ira na nona itokani lotu Vakarisito: “Dou dinata na vosota vakadede ni noda Turaga me ka eda sa bula kina.” (2 Pita 3:​15) Sega li nida marau ni nona vosota voli o Jiova e sa rawa nida nuitaka tale ga kina na bula tawamudu? Sega ni vakabekataki nida na via kerei Jiova tale ga me vosoti keda tiko ga nida qaravi koya tiko e veisiga.​​—⁠Maciu 6:⁠12.

11. E uqeti keda vakacava na noda kila na vuna e vosota voli kina o Jiova?

¹¹ Nida kila na vuna e vosota voli kina o Jiova, ena vukei keda meda vosota tale ga nida waraka tiko na veivakabulai ena kauta mai, eda na sega vakadua ni kaya ni sa berabera na nona vakayacora nona vosa ni yalayala. (Lele i Jeremaia 3:​26) Nida masulaka tiko vua na Kalou me yaco mai na nona Matanitu, eda sa nuitaki koya tale tiko ga ni kila vinaka na gauna me qai sauma kina noda masu. Kena ikuri, e uqeti tale ga na lomada meda vakatotomuria na vosota i Jiova ena noda veimaliwai kei ira na tacida, vaka kina o ira eda sota ena cakacaka vakavunau. O keda tale ga eda sega ni vinakata me dua e rusa, eda vinakata ga mera veivutuni ra qai mai nuitaka vata kei keda na bula tawamudu.​​—⁠1 Timoci 2:​3, 4.

Dikeva na Nodra Dau Vosota na Parofita

12, 13. Me salavata kei na Jemesa 5:​10, e vakaraitaki koya vakacava na parofita o Aisea ni dau vosota?

¹² Noda kila na dau vosota i Jiova ena vukei keda meda vakamareqeta na itovo vakasakiti oqo, da qai saga tale ga me tiki ni noda bula. Nida tamata ivalavala ca, e sega ni ka rawarawa meda dau vosota, ia e rawa nida saga. Era ivakaraitaki vinaka vei keda ena tikina oqo na tamata ni Kalou ena gauna makawa. E vola na tisaipeli o Jemesa: “Oi kemudou na wekaqu, vakadamurimuri ira na parofita, e na nodra vosota na ka rarawa, kei na nodra dauvosota, era a vosa e na yaca ni Turaga.” (Jemesa 5:​10) Eda marau, eda yaloqaqa tale ga meda kila ni levu era sa vosota rawa na ka dredre vata ga eda sotava tiko.

¹³ Dua vei ira oqo na parofita o Aisea. A gadrevi vakalevu vua na vosota ena vuku ni nona ilesilesi. Oya na vuna e tukuna kina vua o Jiova: “Mo lako, ka kaya vei ira na tamata oqo, Dou na rogoca tiko, ka lecava ga; ia dou na raica tikoga, ka sega ga ni kunea. Mo vakabibitaka na yalodra na tamata oqo, ka vakadidivarataka na daligadra, ka vakabobotaka na matadra; de ra rai e matadra, ka rogo e na daligadra, ka kila e na lomadra, ka saumaki mai, ka ra vakabulai.” (Aisea 6:​9, 10) E dina nira sega ni via kauai na tamata, a vosota voli ga o Aisea ena nona tukuna na itukutuku ni veivakaroti i Jiova me 46 vakacaca na yabaki! Ke tiko vei keda na vosota me vakataki Aisea, eda na vunautaka tiko ga na itukutuku vinaka veitalia ke sega ni kauaitaki na noda itukutuku.

14, 15. Na cava a vukei Jeremaia me vosota rawa kina na veika dredre kei na yalolailai?

¹⁴ Nira vakayacora na nodra itavi na parofita, e levu tale na ka dredre era sotava; era tini vakacacani sara. A vesu ena ivesu kau o Jeremaia, bala i “vale ni veivesu,” biu tale ga ena loma ni dua na ikeli lolobo. (Jeremaia 20:​2; 37:​15; 38:⁠6) A lako yani o Jeremaia me lai vukei ira oqo, ia era qai vakayacora tale mai vua na veika mosimosi. E sega ni lai cudru kina o Jeremaia, e sega tale ga ni via sauma lesu. Vicasagavulu na yabaki na nona vosota voli.

¹⁵ A sega ni vagalui Jeremaia na veivakacacani kei na veivakasewasewani, me kua tale ga ni vagalui keda nikua. E macala nida na yalolailai ena so na gauna. A yalolailai tale ga o Jeremaia. E vola o koya: “Sa yaco na vosa i Jiova me ka ka’u sa rogo ca kina, ka dredrevaki kina e na veisiga. Au a qai kaya, Au na sega ni cavuti koya, se vosa tale e na yacana.” Na cava e qai yaco? Sa muduka beka kina o Jeremaia na nona vunau? E tomana: “Ia na nona vosa, sa tu e lomaqu me vaka na bukawaqa, sa sogo tu e na suiqu, ia ka’u sa oca ni’u kinoca, ka sega ni’u rawata.” (Jeremaia 20:​8, 9) Eda dikeva rawa e ke ni yali sara ga vei Jeremaia na marau ena gauna e kauaitaka kina vakalevu na nodra veivakasewasewani na lewenivanua. Ia, ni vakasamataka na totoka ni itukutuku me kacivaka kei na kena bibi, e vakila sara ga na marau. E vukei Jeremaia tale ga na nona tiko vata kei koya o Jiova “me vaka e dua na qaqa rerevaki,” e vakaukauataki koya me tukuna yani na vosa ni Kalou ena yaloqaqa kei na doudou.​​—⁠Jeremaia 20:​11.

16. Na cava meda cakava meda marautaka tiko ga kina na noda vunautaka na itukutuku vinaka?

¹⁶ A marautaka beka na parofita o Jeremaia na nona cakacaka? Me qai sega! A kaya o koya vei Jiova: “Sa kune na nomuni vosa, ia ka’u a kania; ka sa yaco na nomuni vosa me ka ni reki kei na ka ni marau ki na lomaqu: ni ka’u sa vakatokai e na yacamuni, Jiova.” (Jeremaia 15:16) E marautaka o Jeremaia na itavi dokai e vakacolati vua, oya me matataka na Kalou kei na nona vunautaka na nona vosa. E vu ni marau tale ga vei keda oqori. Kena ikuri, eda marau me vakataki ira ga na agilosi mai lagi, baleta ni levu nikua mai na veiyasa i vuravura era sa ciqoma tiko na itukutuku ni Matanitu ni Kalou, ra veivutuni, ra sa mai muria sara tiko na sala e basika ina bula tawamudu.​​—⁠Luke 15:⁠10.

“Na Dauvosota Nei Jope”

17, 18. Vakamacalataka mada na vosota i Jope, na cava sa qai yaco ena vuku ni nona vosota?

¹⁷ Ni tukuni ira oti na parofita era a bula sara e liu vua, sa qai vola na tisaipeli o Jemesa: “Dou a rogoca na dauvosota nei Jope, dou sa raica talega ni sa tinia vakaevei na Turaga [o Jiova]; ni sa yalovinaka sara na Turaga, ka sa dauloloma.” (Jemesa 5:​11) Na vosa vakirisi e vakadewataki e ke me “dauvosota” e duidui mai na vosa e vakadewataki me “vosota” ena tikina e 10. E vola e dua na vuku me baleta na duidui ni rua na vosa oqo: “Na vosota e volai e liu e mataqali vosota eda vakaraitaka ni dua e vakacacani keda, na kena e volai e muri e dau vakaraitaki ni sotavi na ituvaki dredre.”

¹⁸ E dua na ituvaki dredre sara a sotava o Jope. E vakarusai na nona iyau, ra mate na luvena, qai mai tauvi koya yani e dua na mate mosimosi sara. Qai kena ikuri na nona beitaki vakailasu ni totogitaki koya na Kalou ni cakava e dua na ka ca. E sega ni galuvaka o Jope na nona rarawa; a talaucaka ga na lomana, yaco sara me sa vaka e tukuna ni uasivi cake na nona yalododonu mai na yalododonu ni Kalou. (Jope 35:​2) Ia, e sega vakadua ni luluqa nona vakabauta kei na nona via qaravi Jiova ena yalodina. A sega ni vosavakacacataka na Kalou me vaka e tukuna o Setani ni na cakava. (Jope 1:​11, 21) Na cava e qai yaco? E “vakalougatataka vakalevu ko Jiova na veiyabaki i Jope sa muri, ka vakalailai eliu.” (Jope 42:12) E kauta laivi o Jiova na mate e tauvi Jope voli, vakaruataka na nona iyau, vakalougatataki koya tale ga kei iratou na lewe ni nona vuvale ena bula marau. Kena ikuri, a yaga na vosota voli i Jope kei na nona yalodina tiko ga, baleta ni a vulica kina e levu tale na ka me baleti Jiova.

19. Na cava eda vulica ena vosota i Jope?

¹⁹ Na cava eda vulica ena vosota i Jope? E rawa nida tauvimate, se sotava e so tale na ka rarawa me vakataki Jope. De dua eda na sega ni kila na vuna e vakatara kina o Jiova meda sotava na veika dredre vaka oqo. Ia, oqo ga e dua na ka eda kila deivaki: Eda na vakalougatataki ke da yalodina tiko ga. Sega ni vakataratutu ni o Jiova ena vakaicovitaki ira dina ga era vakasaqarai koya ena yalogu. (Iperiu 11:⁠6) E kaya o Jisu: ‘O koya e vosota me yacova na ivakataotioti ena vakabulai.’​​—⁠Maciu 10:22; 24:⁠13.

‘Ena Yaco Dina Mai na Siga i Jiova’

20. Eda kila vakacava ni na yaco dina mai na siga i Jiova?

²⁰ E dau vosota o Jiova, ia e Kalou lewadodonu tale ga, ena sega kina ni vosota tiko na ca me tawamudu. E tiko na iyalayala ni nona vosota. E vola o Pita ni a ‘sega ni vosota tiko ga na vuravura makawa na Kalou.’ A luvuca na vuravura ena nona kauta mai na waluvu, qai vakabulai Noa kei na nona vuvale. A tauca tale ga o Jiova na itotogi ni koro e rua o Sotoma kei Komora, rau tini dravusa sara ga kina. Na vakatau itotogi vaka oqo e “i vakaraitaki ni ka e na yaco vei ira na tamata ca e na gauna e muri.” O koya gona, e matata vakasigalevu ni na ‘yaco dina mai na siga i Jiova.’​​—⁠2 Pita 2:​5, 6, VV; 3:​10.

21. Sala cava e rawa nida vakaraitaka kina na noda vosota, na cava eda na veivosakitaka ena ulutaga e tarava?

²¹ Meda vakatotomuria mada ga na dau vosota i Jiova me rawa nida vukei ira kina e so mera veivutuni, mera vakabulai kina. Meda vakatotomuri ira tale mada ga na parofita ena noda tukuna tiko ga ena yalovosota na itukutuku vinaka, dina ni sega ni kauaitaki na noda itukutuku. Kena ikuri, ena vakalougatataki keda o Jiova ke da ucui Jope ena noda vosota na veika dredre da qai yalodina tiko ga. E dodonu meda marautaka na noda cakacaka vakaitalatala nida raica na nona vakalougatataka vakalevu o Jiova na vunautaki ni itukutuku vinaka ena veiyasa i vuravura kece ga. Eda na dikeva oqo ena ulutaga e tarava.

O se Nanuma?

• Na cava e vosota voli kina o Jiova?

• Na cava eda vulica ena nodra vosota na parofita?

• E vakaraitaka vakacava o Jope na vosota, cava e yaco kina?

• Eda kila vakacava ni vakaiyalayala na vosota i Jiova?

[iYaloyalo ena tabana e 18]

Ucui Tamana vinaka o Jisu ena nona dau vosota

[iYaloyalo ena tabana e 20]

E vakaicovitaki Jeremaia vakacava o Jiova ena nona vosota?

[iYaloyalo ena tabana e 21]

E vakaicovitaki Jope vakacava o Jiova ena nona vosota?