Meda Vosovoso ena Cakacaka Vakaitalatala

1. E vakaraitaka vakacava vei keda o Jiova na nona vosovoso?

¹ Dua na ka na nona dauvosoti keda na Kalou. (Lako 34:6; Same 106:41-45; 2 Pita 3:9) E vakavotui vinaka na nona vosovoso kei na nona yalololoma ena cakacaka vakavunau e veiyasa i vuravura. Sa rauta ni 2,000 na yabaki na nona vosoti keda tiko o Jiova, ia se vagolei ira tiko ga mai na yalomalumalumu mera qaravi koya. (Joni 6:44) Eda na vakatotomuria vakacava na vosovoso i Jiova ena noda cakacaka vakaitalatala?

2. Eda rawa ni vakaraitaka vakacava na vosovoso nida vunau ena yalava?

² Vunau e Veivale: Eda vakatotomuria na vosovoso i Jiova nida “sega ni cegu” na vunau ena yalava era se sega ni kune kina na tataleitaki. (Caka. 5:42) Eda vosota na veivakalialiai, veitusaqati, kei na noda sega ni kauaitaki nida vunau. (Mari. 13:12, 13) Eda vakaraitaka tale ga na vosovoso nida saga tiko ga meda vakasuasuataka na sore ni ka dina ke mani dredre mada ga meda kunei ira e vale na tataleitaki.

3. Na cava e vinakati kina na vosovoso nida veisikovi lesu se veivakavulici ena iVolatabu?

³ Vuli iVolatabu: Ena vinakati meda vosovoso nida teitei. E rawa nida qarava vinaka na ka eda tea, ia eda sega ni rawa ni vakatotolotaka na kena tubu. (Jeme. 5:7) E va tale ga qori na tubu vakayalo, ena taura na gauna qai veitaravi na ka ena yaco. (Mari. 4:28) De dua ena dredre vei ira eda vakavulica mera biuta na ivakarau vakavanua e sega ni vakaivolatabu se vakabauta ni lotu lasu. Meda kua ni vakusa na nodra tubu vakayalo na gonevuli ena noda vakasaurarataki ira mera veisau. Ena vinakati meda vosovoso qai veiganiti na gauna eda solia me cakacaka kina na yalo tabu ni Kalou e lomai gonevuli.—1 Kor. 3:6, 7.

4. E yaga vakacava na vosovoso me laulau kina na noda vunau vei ira na wekada era sega ni vakabauta?

⁴ Wekada Era Sega ni Vakabauta: Eda vinakata sara ga mera vulica na ka dina na wekada era sega ni vakabauta. Ia ena vinakati na vosovoso meda kila kina na gauna veiganiti meda wasea kina na ka eda vakabauta, da qarauna tale ga me kua ni sivia na ka eda tukuna. (Dauv. 3:1, 7) Nida waraka tiko qori, me laurai na ka dina eda sa vulica ena noda itovo, da qai vakarau tu ni wasea na ka eda vakabauta ena yalomalua kei na veidokai dina. (1 Pita 3:1, 15) Io, ena laulau na noda cakacaka vakaitalatala da qai vakamarautaka na Tamada vakalomalagi ke da dauvosovoso.