Vuli ena Nodrau Vosovoso o Jiova kei Jisu

“Moni okata na nona dauvosota na noda Turaga me sala eda vakabulai kina.”​—2 PITA 3:15.

O NA SAUMA VAKACAVA?

E vakaraitaka vakacava o Jiova na nona vosovoso?

Na cava e vinakati kina me vosovoso o Jisu ena dua na gauna balavu?

Eda na vakatotomuria vakacava na nona vosovoso na Kalou?

1. Na cava era lomatarotarotaka eso na tamata yalodina?

E DUA na yalewa lotu vaKarisito yalodina a sotava e levu na veika dredre me vica vata na yabaki, a taroga: “Au na bula tiko meu raica na icavacava?” E va tale ga qori na ka era lomatarotarotaka eso sa dede na nodra qaravi Jiova. Eda nanamaki tu ena siga ena vakavouya kina na ka kece na Kalou, qai kauta laivi na leqa eda sotava tu nikua. (Vkta. 21:5) E levu na vuna meda vakabauta kina ni sa voleka sara na icavacava ni vuravura e lewa tu o Setani, ia ena rairai dredre meda vosota nida waraka tiko na gauna qori.

2. Na taro cava eda na veivosakitaka me baleta na nona vosovoso na Kalou?

² Ena yasana adua, e tukuna na iVolatabu ni dodonu meda vosota. Me vakataki ira ga na tamata ni Kalou ena veigauna sa oti, eda na marautaka na veika e yalataka na Kalou ke dei na noda vakabauta, ke da vosota tale ga me yacova na gauna me vakayacora kina na nona yalayala. (Wilika Iperiu 6:11, 12.) O Jiova mada ga e dau vosovoso. A rawa sara ga ni sa muduka oti na veika ca, ia e waraka tiko na gauna donu me cakava kina qori. (Roma 9:20-24) Na cava sa rui vosovoso kina o Jiova? E vakatotomuria vakacava o Jisu na nona vosovoso na Kalou? Ena yaga vakacava vei keda na noda vakatotomuria tale ga na nona vosovoso na Kalou? Ke da rairai nanuma tiko ni berabera o Jiova, na isau ni taro qori ena vukei keda meda vosota qai vakaukauataka na noda vakabauta.

VUNA E VOSOVOSO KINA O JIOVA

3, 4. (a) Na cava e vosovoso tiko kina o Jiova ena nona vakayacora na nona inaki me baleta na vuravura? (b) Na cava a cakava o Jiova me baleta na talaidredre mai Iteni?

³ E tiko na vuna vinaka e vosovoso tiko kina o Jiova. E sega tale ni dua e lewa na lomalagi kei vuravura, o Jiova duadua ga. Ia na talaidredre mai Iteni a basika kina eso na taro era vauci kina na kabula e lomalagi kei vuravura. E vosovoso tiko o Jiova baleta ni kila ni na taura na gauna me saumi vinaka sara na taro qori. E cakava tiko o Jiova na veika ena yaga vei keda ni kila vinaka tu na ka era cakava kei na nodra rai na kabula e lomalagi kei vuravura.​—Iper. 4:13.

⁴ A nona inaki o Jiova mera tawani vuravura na nodrau kawa o Atama kei Ivi. Na nona bacani Ivi o Setani kei na nona talaidredre o Atama a sega ni veisautaka na inaki ni Kalou. A sega ni taqaya na Kalou, a sega ni vakatulewa totolo se nanuma ni tawayaga na nona vukea na kawatamata. Ia a tuvanaka na sala me vakayacori kina na nona inaki me baleta na kawatamata kei na vuravura. (Aisea 55:11) Dua na ka na nona lewa vinaka o Jiova kei na nona vosovoso me rawa ni vakayacori na nona inaki qai vakacerecerei na nona veiliutaki. A wawa mada ga me vica vata na udolu na yabaki me vakayacori kina ena gauna kei na sala veiganiti duadua na nona inaki.

5. Na veivakalougatataki cava ena rawati ena nona vosovoso o Jiova?

⁵ E dua tale na vuna e vosota voli kina o Jiova, oya me rawa ni levu tale era bula tawamudu. Ena gauna qo, sa vakarautaka tiko na sala me vakabula kina “e dua na isoqosoqo levu.” (Vkta. 7:9, 14; 14:6) E vakayagataka tiko o Jiova na noda cakacaka vakavunau me vukei ira kina na tamata, e sureti ira tiko mera vulica na veika me baleta na nona Matanitu kei na nona ivakatagedegede dodonu. E “itukutuku vinaka” ina kawatamata na itukutuku ni Matanitu ni Kalou. Qori na itukutuku vinaka duadua. (Maciu 24:14) Na tamata yadua e vagolea mai o Jiova ena lewena na ivavakoso e veiyasa i vuravura, era tiko kina na itokani dina era taleitaka na ka dodonu. (Joni 6:44-47) Na Kalou dauloloma eda qarava e vukei ira tiko na tamata va qori mera rawata na nona veivakadonui. Sa digitaki ira tale tiko ga eso ena kedra maliwa na kawatamata mera lewe ni nona matanitu vakalomalagi. Nira gole i lomalagi o ira qori, era na qai vukei ira na kawatamata talairawarawa mera bula uasivi ra qai bula tawamudu. Ia ni se vosota tiko qo o Jiova, e cakacaka tiko me vakayacora na nona yalayala me rawa ni yaga vei keda.

6. (a) A vakaraitaka vakacava o Jiova na nona vosovoso ena siga i Noa? (b) E vakaraitaka tiko vakacava nikua o Jiova na vosovoso?

⁶ E dau vosovoso o Jiova nira vakararawataki koya e levu ena veika ca era cakava. E laurai qori ena veika a cakava ena ivakarau ca a yaco tu ni bera na Waluvu. A sinai tu o vuravura ena gauna oya ena ivalavala dukadukali kei na itovo voravora, qai ‘rarawa na lomai’ Jiova ena torosobu ni itovo ni tamata. (Vkte. 6:2-8) Ena sega ni vakalaiva me yaco tiko ga na ituvaki qori, mani vakatulewataka me luvuca na vuravura ena vukudra na tamata talaidredre. Ni ‘wawa voli ena vosota na Kalou ena siga i Noa,’ a vakarautaka o Jiova na sala me vakabulai Noa kina kei na nona vuvale. (1 Pita 3:20) A tukuna vei Noa o Jiova ena gauna veiganiti na ka sa vakatulewataka, a lesi koya tale ga me taya e dua na waqa. (Vkte. 6:14-22) Ena gauna vata qori a “dauvunautaka na ka dodonu” o Noa, a vakasalataki ira na tiko tikivi koya ni sa vakarau yaco na veivakarusai. (2 Pita 2:5) A tukuna o Jisu ni tautauvata kei na siga i Noa na gauna eda donuya tu qo. Sa lokuca tu o Jiova na gauna me muduka kina na ituvaki ca qo. E sega ni dua na tamata e kila na ‘siga kei na aua’ ena yaco kina qori. (Maciu 24:36) Na noda ilesilesi vakalou ena gauna qo meda veivakasalataki, meda tukuna vei ira na lewenivanua na ka mera cakava me rawa nira bula.

7. E dau berabera ni vakayacora o Jiova na nona yalayala? Vakamacalataka.

⁷ Ia na vosovoso i Jiova e sega ni kena ibalebale ni waraka tiko ga me toso na gauna. Meda kua sara ni nanuma ni nona vosovoso e vakaraitaka na vakawelewele se ni sega ni kauai! Ena rawarawa sara me va qori na noda rai ni toso tiko na noda yabaki ni bula se nida sotava na veika rarawa ena ituvaki ca qo. Eda rawa ni yalolailai se nanuma ni berabera ni vakayacora na nona yalayala na Kalou. (Iper. 10:36) Meda kua sara ni guilecava ni tiko na vuna vinaka e vosovoso voli kina o Jiova, na veika tale ga e cakava tiko ena gauna ni nona vosovoso ena yaga vei ira na nona tamata yalodina. (2 Pita 2:3; 3:9) Meda veivosakitaka mada na sala e vakatotomuria kina o Jisu na nona vosovoso na Kalou.

IVAKARAITAKI VINAKA O JISU ENA VOSOVOSO

8. Na ituvaki cava a vakaraitaka kina o Jisu na vosovoso?

⁸ E cakava tiko o Jisu na loma ni Kalou, qai vica vata na udolu na yabaki na nona cakava voli qori ena marau. Ni veivorati o Setani, a vakatulewataka o Jiova me lako mai vuravura na Luvena e duabau ga me Mesaia. Vakasamataka mada na nona vosovoso o Jisu ena nona waraka tu me vica vata na udolu na yabaki me yaco mai na gauna qori. (Wilika Kalatia 4:4.) A sega ni wawa wale tu ga qai sega ni cakava e dua na ka, ia a ogaoga tiko ena cakacaka a lesia vua o Tamana. A kila o Jisu ena gauna e lako mai kina e vuravura ni o Setani ena vakavuna na nona vakamatei me vaka ga e parofisaitaki. (Vkte. 3:15; Maciu 16:21) A vakamalumalumu me cakava na loma ni Kalou, dina ga ni na vinakati me vosota e levu na ka mosimosi. E ivakaraitaki uasivi ni yalodina o Jisu. A sega ni nanumi koya ga se na nona itutu, e dodonu meda vakatotomuri koya tale ga.​—Iper. 5:8, 9.

9, 10. (a) Na cava a cakava o Jisu ni vosota voli me yacova na gauna me yavala kina o Jiova? (b) Meda raica vakacava na gauna lokuci i Jiova?

⁹ Ni vakaturi oti o Jisu, a soli vua na lewa e lomalagi kei vuravura. (Maciu 28:18) E vakayagataka na lewa qori me vakayacora kina na inaki i Jiova ena gauna sa lokuca tu na Kalou. A wawa voli ena vosota o Jisu ena ligaimatau ni Kalou me yacova na 1914, mera vakamalumalumutaki kina na kena meca me itutu ni yavana. (Same 110:1, 2; Iper. 10:12, 13) Sa vakarau yavala qo me muduka na vuravura i Setani. E vosovoso tiko ena gauna qo o Jisu me vukei ira na tamata qai tuberi ira ina “wai ni bula.”​—Vkta. 7:17.

¹⁰ O raica rawa na sala mo vakatotomuria kina na rai i Jisu me baleta na gauna e lokuca o Jiova? A gu na lomai Jisu me cakava na ka kece a tukuna vua o Tamana; ia a dau yalorawarawa me waraka na gauna e lokuca na Kalou. Nida waraka tiko na icavacava ni vuravura ca i Setani, e bibi meda vakatotomuria na nona vosovoso na Kalou, meda waraki koya, meda kua tale ga ni soro ena gauna eda yalolailai kina. Na cava meda cakava meda vakatotomuria kina na nona vosovoso na Kalou?

VAKATOTOMURIA NA VOSOVOSO NI KALOU

11. (a) E veisemati vakacava na vakabauta kei na vosovoso? (b) Na cava me sa qai dei ga kina na noda vakabauta?

¹¹ Ni bera ni lako mai vuravura o Jisu, era vakaraitaka na parofita kei na so tale na tamata yalodina ni rawa tale ga vua na tamata ivalavala ca me vosovoso. E veisemati voleka na nodra vakabauta kei na nodra vosovoso. (Wilika Jemesa 5:10, 11.) Ke ra vakatitiqataka se ra sega ni vakabauta na ka e tukuna vei ira o Jiova, ena rawa beka mera vosota me yacova na kena vakayacori na nona yalayala? Era dau sotava e levu na ituvaki leqataki se ituvaki e vakatovolei kina na nodra vakabauta, ia era nuidei ni na vakayacora dina na Kalou na veika e yalataka. (Iper. 11:13, 35-40) E dodonu me sa qai dei sara na noda vakabauta ena gauna qo ni o Jisu sa “Vakataucokotaka noda vakabauta.” (Iper. 12:2) A vakayacori vua na parofisai qai vakatakila na inaki ni Kalou, na sala tale ga e vakatakila kina na inaki ni Kalou e vakaraitaka ni bibi na vakabauta.

12. Na cava eda rawa ni cakava me dei kina na noda vakabauta?

¹² Na cava eda rawa ni cakava me dei kina na noda vakabauta, meda vosovoso tale ga vakalevu? E bibi meda muria na ivakasala ni Kalou. Kena ivakaraitaki, vakasamataka mada na vuna o vakaliuca kina na Matanitu ni Kalou. Vakacava o rawa ni vakavinakataka na nomu muria na ivakasala ena Maciu 6:33? De dua ena gadrevi mo vakalevutaka na gauna ni nomu cakacaka vakaitalatala se cakava eso na veiveisau ena nomu ivakarau ni bula. Kua sara ni guilecava na sala e vakalougatataka kina o Jiova na nomu sasaga me yacova mai nikua. A rairai vukei iko mo vakavulica e dua ena iVolatabu, se solia vei iko “na vakacegu ni Kalou e uasivia na vakasama kece.” (Wilika Filipai 4:7.) Ni o dau vakasamataka na yaga ni nomu muria na ivakasala i Jiova, o na vakadinata ni vinaka ga mo dau vosovoso.​—Same 34:8.

13. E rawa ni vakatauvatani ena cava na noda sasaga me dei na noda vakabauta, meda vosovoso tale ga vakalevu?

¹³ Na noda sasaga me dei na noda vakabauta, meda vosovoso tale ga vakalevu, e rawa ni vakatauvatani ina veika e dau caka ena gauna ni kakaburaki, teitei, kei na tatamusuki. Na vakalewe vinaka ni nona were na dauteitei ena gauna kece e tatamusuki kina, ena qai vakanuideitaki koya ga ni kakaburaki ena dua tale na gauna. Ena gadrevi me vosota qai waraka na gauna ni tatamusuki, ia qori ena sega ni tarova na nona kaburaka na sorenitei. De dua ena kakaburaki ena levu na were ni vakatauvatani kei na nona kakaburaki e liu, qai nuitaka ni na tamusuka na ka e kaburaka. Ni wasoma tale ga na noda vulica, na noda muria na ivakasala i Jiova kei na noda vakila na kena yaga, e sa na qai dei ga na noda nuitaki koya. Ena dei na noda vakabauta, ena rawarawa tale ga meda waraka na veivakalougatataki eda kila nida na marautaka.​—Wilika Jemesa 5:7, 8.

14, 15. Na rai cava me tiko vei keda me baleta na noda rarawa?

¹⁴ Dua tale na sala eda na vulica kina na vosovoso, oya meda vakatotomuria na rai i Jiova me baleta na vuravura kei na veika eda dau sotava. Kena ivakaraitaki, vakasamataka na nona rai me baleta na rarawa ni kawatamata. Dua na gauna balavu e vakararawataki koya voli kina na nona raica na noda rarawa; ia e sega ni vakalaiva na rarawa qori me tarova na nona caka vinaka. A tala mai na Luvena duabau ga “me mai vaqeavutaka na cakacaka ni Tevoro,” me kauta laivi na ka rarawa kece e vakavuna o Setani vua na kawatamata. (1 Joni 3:8) Ena vakadinadinataki ena gauna qori ni lekaleka wale na gauna ni rarawa, ia na kena iwali e vakarautaka na Kalou ena yaga tawamudu. Me kua ni vakayalolailaitaki keda na vuravura ca e lewa tu o Setani, ia meda vosota tiko ga me yacova na gauna ena muduki kina qori, meda vakabauta tale ga na veika eda na marautaka me tawamudu ena veigauna se bera mai. Sa lokuca tu o Jiova na gauna me muduka kina na veika ca, ena cakava dina qori ena kena gauna donu.​—Aisea 46:13; Neumi 1:9.

¹⁵ Ena iotioti ni veisiga qo e vakilai kina e levu na ka dredre, eda na rairai sotava eso na ituvaki leqataki ena vakatovolei kina na noda vakabauta. Meda kua ni cudru ke vakayacori vei keda na ivalavala kaukaua se ra vakararawataki na noda lewenivuvale, ia meda vakadeitaka meda nuitaki Jiova vakatabakidua. Ena sega ni rawarawa meda cakava qori nida ivalavala ca. Ia meda kua ni guilecava na ka e cakava o Jisu me vaka e volatukutukutaki ena Maciu 26:39.​—Wilika.

16. Na cava meda kua ni cakava ena gauna e vo tiko qo?

¹⁶ O koya e vakatitiqataka ni sa voleka na icavacava ena rawa ni tekivu kadre e lomana na rai cala. E rawa ni nanuma ni dodonu me tuvanaka eso tale na ka me cakava ke mani sega ni yaco na veika e tukuna o Jiova. Ena rairai nanuma, ‘Au na waraka mada meu raica ke na vakayacora dina o Jiova na ka e tukuna.’ Na rai cala qori ena vakadredretaka na nona vosota, ena saga kina me rogo ena vuravura qo, me dei na nona bula vakailavo qai sega ni vakaliuca na Matanitu ni Kalou, se vakatulewataka me vuli torocake me rawa ni vinaka kina na nona bula ena gauna qo. O koya e cakava qori e vakaraitaka sara tu ga ni sega vua na vakabauta. Meda nanuma tiko ni a uqeti keda o Paula meda vakatotomuri ira na tamata yalodina a vakalougatataki ira o Jiova “ena vuku ni nodra vakabauta kei na yalovosota.” (Iper. 6:12) Ena vakalaiva o Jiova me yaco tiko na ituvaki ca qo me yacova ga na gauna sa lokuca tu me muduka kina. (Apak. 2:3) Ena gauna e vo tiko qo, meda kua ni cakava ga me rawa na noda qaravi Jiova. Ia e bibi meda yadra tiko ga qai gugumatua ena vunautaki ni itukutuku vinaka. E sega ni vakatauvatani rawa na vakacegu eda vakila ena cakacaka qori ena gauna mada ga qo.​—Luke 21:36.

VAKALOUGATATAKI NIDA VOSOVOSO

17, 18. (a) Na cava eda rawa ni vakaraitaka nida waraka tiko na noda vakabulai? (b) Eda na vakalougatataki vakacava nida vosovoso tiko ena gauna qo?

¹⁷ Se mani vica na vula na noda qarava tiko na Kalou se sa vica sagavulu na yabaki, eda vinakata meda qaravi koya me tawamudu. Eda sega ni kila na balavu ni gauna eda na waraka tiko kina na noda vakabulai, ia na vosovoso ena vukei keda meda kua ni soro nida waraka tiko na gauna qori. Sa solia tiko vei keda nikua o Jiova na gauna meda vakaraitaka kina nida nuitaka vakaoti na nona vakatulewa, nida tu vakarau tale ga meda vakararawataki ena vuku ni yacana. (1 Pita 4:13, 14) E vakavulici keda tale tiko ga na Kalou ena sala meda vosota rawa kina me yacova na icavacava kei na noda vakabulai.​—1 Pita 5:10.

¹⁸ Sa soli tu vei Jisu na lewa kece e lomalagi kei vuravura, e sega tale ga ni dua na ka ena kaliraki iko tani mai na nona veitaqomaki ke o yalodina tiko ga. (Joni 10:28, 29) E sega ni dodonu mo rerevaka na veika ena yaco ena gauna se bera mai, se mo rerevaka na mate. Era na vakabulai o ira era vosota me yacova na icavacava. Meda vakadeitaka gona me kua ni rawai keda o vuravura, me kua tale ga ni vakamuai keda tani mai na noda nuitaki Jiova. Ia me noda inaki me dei na noda vakabauta, meda vakayagataka tale ga vakavuku na gauna e se vosovoso tiko kina qo na Kalou.​—Maciu 24:13; wilika 2 Pita 3:17, 18.

[iYaloyalo ena tabana e 21]

Na nona vosovoso na Kalou ena vukei iko mo vakaliuca na veika e vauca na Matanitu ni Kalou, o qai vakalougatataki kina!