Kilai ni iVolatabu e Rawa Nida Marautaka Kece
E VOLAI tu ena iVolatabu na ka dina vakasakiti mai vua na Kalou. E tukuna vei keda na inaki ni noda bula, na vuna eda sotava tu kina na rarawa, kei na noda bula ena gauna se bera mai. Na iVolatabu e vakavulica vei keda na sala eda na kunea kina na bula marau, na sala ni veitokani vinaka, kei na sala eda rawa ni walia kina na leqa e dau basika. Ia, na kena e bibi sara, oya nida rawa ni vulica kina na veika me baleti Jiova na noda Dauveibuli, na Tamada vakalomalagi. Noda rawata na kilaka oqori e sega wale ga ni vakamarautaki keda, e vakainaki tale ga kina na noda bula.
Na iVolatabu e vakatauvatana na noda kana kei na noda rawata na kilaka me baleti koya na Kalou. A kaya o Jisu: “Ena sega ni bula na tamata e na madrai duaduaga, sa bula ga e na vosa kecega sa lako mai na gusu ni Kalou.” (Maciu 4:4; Iperiu 5:12-14, VV) E bibi meda kania e veisiga na kakana bulabula me rawa nida bula tiko kina. E vaka tale ga oqori na kena bibi na noda wilika wasoma na Vosa ni Kalou me rawa ni qai yaga vei keda na nona vosa ni yalayala me baleta na bula tawamudu.
Eda dau malekata na kana ni sega wale ga nida a buli meda marautaka na ka eda kania, e vakaceguya tale ga e dua na ka bibi, oya ni yagoda ena bula ga ke vakani. Ia, e tiko e dua tale na ka bibi ena gadrevi meda vakaceguya kevaka eda via bula marau. A kaya o Jisu: “Era marau o ira era kauaitaka na nodra gagadre vakayalo.” (Maciu 5:3, NW) Io, e rawa nida bula marau ke da vakaceguya na noda gagadre vakayalo ena noda kila na Vosa ni Kalou.
So era vakadinata ni sega ni ka rawarawa na kilai ni iVolatabu. Me kena ivakaraitaki, o na rairai gadreva na veivuke ena so na tikinivolatabu e cavuti kina e so na vosa vakatautauvata se itovo vakavanua o vulagitaka. Sa qai tiko tale ga na veiparofisai era volai tu ena vosa vakaivakatakarakara, e rawa ni kilai wale ga na kena ibalebale ke da raica vata kei na so tale na tikinivolatabu era vakamacalataka na ulutaga vata ga oya. (Taniela 7:1-7; Vakatakila 13:1, 2) Ia, se mani cava o nanuma, se rawa ga vei iko mo kila na iVolatabu. O na vakadeitaka vakacava?
E Rawa Nida Marautaka Kece
Na iVolatabu e Vosa ni Kalou. E vakamacalataka kina vei keda na Kalou na lomana. Ke nona ivola na Kalou, ena kilakilai dredre beka, se ra na kila wale ga na tamata vuli vinaka? Sega, o Jiova e sega ni tawaloloma me cakava vaka oqori. A kaya o Jisu Karisito: “O cei li vei kemudou na tama kevaka e kere ika vua na luvena, me na solia vua e dua na gata, se kevaka e kere yaloka, me na solia vua e dua na pi? O koya gona kevaka dou sa kila, ko i kemudou na tamata ca, mo dou solia na ka vinaka vei ira na luvemudou, sa na qai wacava sara na levu ni nona via solia na Yalo Tabu na Tamamudou vakalomalagi vei ira era kerea vua!” (Luke 11:11-13, VV) Io, e vakadeitaka vei iko na vakasama oqo ni rawa ni o kila na iVolatabu. Kevaka gona o kere veivuke vua na Kalou mai vu ni lomamu ena vukei iko mo kila na nona Vosa. Ni rawa sara mada ga vei ira na gone mera kila na ivakavuvuli rawarawa ena iVolatabu!—2 Timoci 3:15.
Dina ni ka ni sasaga toka na noda kila na iVolatabu ia ke da cakava vaka kina, ena vakauqeti keda qai vakaukauataki keda tale ga. Laurai oqo ena nona vakaturi oti o Jisu, a rairai vei rau e rua na nona tisaipeli qai tukuna vei rau me baleta na parofisai ena iVolatabu. E kaya na ivola i Luke: “Ka sa vakatekivu e nai vola i Mosese ka yacovi ira kecega na parofita, ka sereka vei rau mai nai Vola Tabu kecega na vosa ka tukuni kina ko koya.” Na cava a qai yaco? Ena bogi oya, nodrau raica lesu tiko na tisaipeli na veika rau sa vulica, erau veikayaka vakairau: “Sa sega li ni katakata sara na yalodaru, ni datou sa veivosaki kaya e na gau-ni-sala, ni sa vakamacalataka talega vei kedaru nai Vola Tabu ko koya?” (Luke 24:13-32) Erau a marautaka na tisaipeli e rua oqo me rau kila na Vosa ni Kalou baleta e vakaukauataka na nodrau vakabauta na vosa ni yalayala ni Kalou, qai vukea tale ga me donu na nodrau rai me baleta na gauna se bera mai.
E sega ni icolacola bibi na noda mai kila na Vosa ni Kalou, ia e ka marautaki, yaga, qai taleitaki me vaka na noda kania e dua na itakitaki kakana maleka. Na cava o na cakava mo rawata kina na kila oqori? Ena vakamacalataki ena ulutaga e tarava na ka e dodonu mo cakava me rawa kina ni o ‘kila na Kalou.’—Vosa Vakaibalebale 2:1-5.
[iYaloyalo ena tabana e 4]
Me vaka ga e dua na tama dauloloma, ena solia o Jiova na yalona tabu me vukei keda meda kila na iVolatabu