Vakasaqara “na Veika Titobu ni Kalou”

“Ni sa dikeva na ka kecega na Yalo Tabu, io, na veika titobu ni Kalou.”​—1 KORINICA 2:​10.

1. Na ka dina vakaivolatabu cava era marau ni kila na vuli iVolatabu vou?

EDA dau vakananuma e levu na lotu Vakarisito ena ivavakoso na marau eda a vakila ena imatai ni gauna eda vulica kina na ka dina. Da mai kila na vuna e bibi kina na yaca i Jiova, nona vakatara tu na veika rarawa, nodra lako i lomalagi e so, kei na nodra bula ena veigauna se bera mai na tamata yalodina. De dua eda sa dau vakadikeva na veika era volai tu ena iVolatabu ni bera oya, ia eda sega ni kila na kedra ibalebale, me vakataki ira ga e levu nikua. E vaka eda nunu tiko ena dua na cakau. Ena lailai sara na veika totoka e raica kevaka e sega nona iyaya ni nunu. Ia ke vakamatailoilo ni nunu se vodo ena dua na waqa fuloa iloilo, ena matasarasara ga ni qai raica vakadua na lase totoka era duiroka, na ika, na cawaki kei na so tale na ibulibuli vakatubuqoroqoro. E vaka sara ga oqori na noda raica “na veika titobu ni Kalou” ni dua e tuberi keda meda kila na iVolatabu.​—1 Korinica 2:​8-​10.

2. Ena tawamudu vakacava na noda marau nida vulica na Vosa ni Kalou?

² Me sa rauti keda beka ga noda kila e vica ga na ka dina vakaivolatabu? “Na veika titobu ni Kalou” e okati kina na kena kilai na vuku ni Kalou e vakatakilai ga vei ira na lotu Vakarisito ena veituberi ni yalo tabu, ia e vunitaki vei ira e so tale. (1 Korinica 2:7) E sega ni yalani na vuku vakalou, da marau tale ga na vulica! Ia eda na sega ni kila na veika taucoko e vauca na sala vuku ni Kalou. Ke da vakasaqara tiko ga vagumatua “na veika titobu ni Kalou” ena tawamudu kina na marau eda a vakila nida se qai tekivu vulica e so na yavu ni ivakavuvuli ena iVolatabu.

3. Na cava e bibi kina meda kila vinaka na veika eda vakabauta kei na vuna?

³ Na cava meda kila kina “na veika titobu” oqori? Ena vakaukauataki noda vakabauta da qai nuidei nida kila vinaka na yavu ni noda vakabauta kei na vuna. E tukuna na iVolatabu meda dau “vakasama vakatitobu” meda “vakadinata kina na loma ni Kalou, e yaga, e vinaka, qai dodonu sara.” (Roma 12:​1, 2, NW) Ena vakaukauataka noda sasaga meda talairawarawa vei Jiova kevaka eda kila na vuna e kaya kina o koya meda muria e dua na ivakatagedegede ni bula. Noda kila gona “na veika titobu” ena vakaukauataki keda meda vorata na veitemaki ina caka ca, da qai uqeti meda dau “cakacaka vinaka.”​—Taito 2:​14.

4. Na cava soti era okati ena vuli iVolatabu?

⁴ Ena gadrevi me vuli e dua me kila kina na veika titobu. Ia na vuli e sega ni kena ibalebale me wiliki wale tu ga e dua na ka. E okati kina noda dikeva vinaka e dua na itukutuku me kilai se semati vakacava ina veika eda sa kila rawa tu. (2 Timoci 1:​13) Gadrevi meda kila na ibalebale ni ka e tukuni tiko. E okati ena noda vulica na iVolatabu na noda dau vakasamataka se da na vakayagataka vakacava na veika eda sa vulica meda vakatulewa vuku kina da qai tuberi ira e so tale. Kuria oya, ni “sai koya na Kalou sa vakavuna nai Vola Tabu kecega, a sa yaga,” me okati gona ena noda vuli “na vosa kecega sa lako mai na gusu ni Kalou.” (2 Timoci 3:​16, 17; Maciu 4:4) E ka ni sasaga toka na vulici ni iVolatabu! Ia, e ka ni marau qai sega ni dredre na kila “na veika titobu ni Kalou.”

Vakavulici Ira na Yalomalumalumu o Jiova Mera Kilaka

5. E vakatakilai vei cei “na veika titobu ni Kalou?”

⁵ Kevaka mada ga o sega ni rawata vinaka nomu vuli, se o sega ga ni dau vakamatauni iko ena vuli, kua ni nanuma ni o na sega ni kila “na veika titobu ni Kalou.” Gauna e veiqaravi tiko kina vakaitalatala e vuravura o Jisu, a sega ni vakatakilai na inaki i Jiova vei ira na vuku, ia a vakatakilai ga vei ira na sega ni vuku se o ira na lewenivanua ra yalomalumalumu mera vuli vei ira na dauveiqaravi ni Kalou. O ira qo era vaka na gonelalai nira vakatauvatani kei ira na vuli vinaka. (Maciu 11:25; Cakacaka 4:​13) Me baleta na “veika sa vakarautaka na Kalou me nodra era sa lomani koya,” e vola na yapositolo o Paula vei ira nona itokani vakabauta vata: “Vei keda ga sa vakatakila mai na Kalou e na Yalo Tabu; ni sa dikeva na ka kecega na Yalo Tabu, io, na veika titobu ni Kalou.”​—1 Korinica 2:​9, 10.

6. Na cava na ibalebale ni 1 Korinica 2:​10?

⁶ E cakacaka vakacava na yalo tabu ni Kalou ena kena ‘dikevi na veika titobu kece ga ni Kalou’? E sega ni vakatakila na ka dina o Jiova vei ira yadudua na lotu Vakarisito, ia e vakayagataka ga na yalona tabu me dusimaka nona isoqosoqo, me tuberi ira na nona tamata era duavata ena sokalou mera kila na iVolatabu. (Cakacaka 20:28; Efeso 4:​3-6) E tautauvata na porokaramu ni vuli iVolatabu era sa muria tiko na ivavakoso kece e vuravura raraba. E vica vata na yabaki na nodra dau tuberi tiko ena ivakavuvuli kece ena iVolatabu. E veivuke sara vakalevu na yalo tabu me dusimaka na ivavakoso ina nodra tuberi na lewena mera vulica “na veika titobu ni Kalou.”​—Cakacaka 5:​32.

Na Ka e Okati ena “Veika Titobu ni Kalou”

7. Na cava era sega ni kila kina e levu “na veika titobu ni Kalou”?

⁷ Meda kua ni nanuma ni dredre na kilai ni “veika titobu.” Sega ni dredre na kilai ni vuku vakalou, ia na kena vunitaki tu vei ira e levu “na veika titobu ni Kalou” e baleta sara tiko ga na nona veivakacalai o Setani mera cata na veituberi i Jiova e vakarautaka ena nona isoqosoqo.​—2 Korinica 4:​3, 4.

8. Na veika titobu cava e tukuna tiko o Paula ena wase tolu ni nona ivola vei ira e Efeso?

⁸ Ena wase tolu ni nona ivola o Paula vei ira e Efeso, e vakaraitaka kina ni “veika titobu ni Kalou” era dusia tiko e levu na ka dina era sa kila tu na tamata i Jiova, me vaka na nodra digitaki e so e vuravura mera lai bula i lomalagi, o cei na Mesaia yalataki, kei na Matanitu ena veiliutaki kina o koya. Vola o Paula: “Oqori sa sega ni vakatakilai vei ira na tamata e na gauna sa oti, me vaka sa qai vakatakilai e na Yalo Tabu vei ira na nonai apositolo yalosavasava kei na nona parofita; ni ra sai taukei vata na veimatanitu tani, ka sa mataveiwekani vata, ka sa rawata vata talega na ka sa yalataka ko koya, e na vuku i Karisito.” E kaya o Paula ni a lesi me “vakarairaitaka vei ira na tamata kecega se sa vakaevei na ka ka vuni tu, sa vunia mai nai vakatekivu kei vuravura na Kalou.”​—Efeso 3:​5-9.

9. Na cava e ka dokai kina noda kila “na veika titobu ni Kalou”?

⁹ E tomana o Paula na nona vakamacalataka na loma ni Kalou mera kila tale ga ena “veiyasana vakalomalagi na vuku ni Kalou e na kena veivatukana kece e vuqa.” (Efeso 3:​10, VV) Era vuli gona na agilosi ena nodra vakaraica kei na nodra kila na vuku i Jiova ena nona veimaliwai kei na ivavakoso vakarisito. E ka dokai noda kila na veika era kauai tale ga kina na agilosi! (1 Pita 1:​10-​12) Sa qai tukuna tarava o Paula meda gumatua ni “kila vata kei ira kecega era sa lotu, se cava na kena raraba, kei na kena balavu, kei na kena titobu, kei na kena cecere” na vakabauta vakarisito. (Efeso 3:​11, 18) Meda dikeva mada oqo e so na ivakaraitaki e vakarabailevutaka na noda kila na veika titobu.

So na iVakaraitaki ni Veika Titobu

10, 11. Na gauna cava e tukuna na iVolatabu ni qai “kawa” kina ni “yalewa” vakalomalagi o Jisu?

¹⁰ Eda kila ni o Jisu na “kawa” ni “yalewa” vakalomalagi ni Kalou e tukuni ena Vakatekivu 3:​15. Me rabailevu gona na veika eda kila eda na rairai taroga: ‘Gauna cava e qai Kawa yalataki kina o Jisu? Ena dua beka na gauna ni se bera ni mai bula vakatamata, gauna a sucu kina, papitaiso, se ni sa vakaturi?’

¹¹ E yalataka na Kalou ni nona isoqosoqo vakalomalagi​—e tukuni ena parofisai me “yalewa”​—ena vakasucuma e dua na kawa ena qai butuqaqia na ulu ni gata. Ia ni oti e vica vata na udolu na yabaki, a se sega tiko ga ni vakasucuma na yalewa e dua na kawa e tu vua na kaukaua me vakarusai Setani kei na nona cakacaka. Tukuna kina o Aisea ni “yava” na yalewa oqo qai “rarawa.” (Aisea 54:​1, 5, 6) Yaco na gauna sa qai sucu o Jisu e Peceliema. Na gauna e papitaiso oti kina e sobuti koya na yalo tabu me dua kina na luve vakayalo ni Kalou, mani kacivaka sara o Jiova: “Oqo na noqu Gone ni toko.” (Maciu 3:​17; Joni 3:3) E sa qai basika gona ena gauna oya na “kawa” ni yalewa. Era a lumuti tale ga na imuri i Jisu ni oti oya, qai sobuti ira na yalo tabu. Sa qai rawa ni “kaila” ena marau na “yalewa” nei Jiova a ‘sega tu ni vakasucu’ ena dua na gauna balavu.​—Aisea 54:1; Kalatia 3:​29.

12, 13. Na tikinivolatabu cava e vakaraitaka ni o ira na lotu Vakarisito lumuti kece e vuravura era dusi koya tiko na “dauveiqaravi yalodina ka vuku”?

¹² Na ikarua ni ivakaraitaki ni veika titobu sa vakatakilai vei keda e okati kina nona inaki na Kalou me digia e le 144,000 mai vei ira na kawatamata. (Vakatakila 14:​1, 4) Eda ciqoma na ivakavuvuli ni “dauveiqaravi yalodina ka vuku” e dusi ira tiko vakailawalawa na lumuti kece era bula tiko ena dua na gauna cava ga e vuravura. E kaya o Jisu ni na vakarautaka na “kakana” ena kena gauna dodonu vei ira nona matavuvale. (Maciu 24:​45, VV) Na tikinivolatabu cava e vakadinadinataka oqo? A tukuna tiko beka e ke o Jisu e dua ga na lotu Vakarisito e dau vakaukauataki ira na tacina ena kakana vakayalo?

¹³ E tukuna na Kalou vua na matanitu o Isireli: “Sai kemudou na noqu dauvakadinadina, kei na noqu tamata ka’u sa digitaka.” (Aisea 43:10) Ia, qai tukuna o Jisu vei ira na iliuliu ni lotu e Isireli ena 11 ni Naisani 33 S.K., ni sega ni vakadonuya o Jiova na nodra matanitu, sa na sega tale ga ni nona dauveiqaravi. E kaya: “Ni na kau tani mai vei kemudou na matanitu ni Kalou, ka me soli ki na dua na matanitu e vuataka mai na vuana.” E kaya o Jisu vei ira na lewenivanua: “Raica, sa qai biu vei kemudou na nomudou vale me lala didi.” (Maciu 21:​43, VV; 23:38) Dina ga ni a dauveiqaravi ni Kalou na lewe ni vuvale e Isireli, ia sa sega ni yalodina se vuku. (Aisea 29:​13, 14) Ena siga tiko ga a cavuta kina o Jisu na veivosa oya, a taroga tale ga: “O cei mada na dauveiqaravi yalo dina ka vuku?” A taroga dina tiko e keri o koya se ‘Na matanitu yalodina cava ena sosomitaki Isireli me dauveiqaravi yalodina ni Kalou?’ E sauma na yapositolo o Pita ni tukuna vei ira na ilawalawa lotu Vakarisito lumuti: “Koi kemudou . . . a matanitu yalosavasava, a tamata sa taukena na Kalou.” (1 Pita 1:4; 2:9) Sa mai dauveiqaravi vou gona i Jiova na matanitu vakayalo, “na Isireli ni Kalou.” (Kalatia 6:​16) Me vaka ga nona yaco na matanitu o Isireli ena gauna makawa me dua na “dauveiqaravi” ni Kalou, era vaka kina na lumuti lotu Vakarisito era bula tiko ena dua na gauna cava ga e vuravura, nira dusi koya tiko na “dauveiqaravi yalo dina ka vuku.” Dua dina na ka dokai noda kania na “kakana” vakayalo e vakarautaka na dauveiqaravi ni Kalou!

E Marautaki na Vuli Vakataki Keda

14. E ka ni marau vakacava na vulici ni iVolatabu mai na kena wiliki tu ga?

¹⁴ Eda dau marautaka noda kila na ibalebale ni dua na tikinivolatabu baleta ni vaqaqacotaka noda vakabauta. Oya na vuna e ka ni marau kina na noda vulica na iVolatabu, sega ni noda wilika wale tu ga. Ni o wiliki ira tiko na ivoladusidusi vakaivolatabu, vakacava mo dautarogi iko: ‘E duidui vakacava na ivakamacala oqo kei na ka au sa kila rawa tu? Na tikinivolatabu se tikina cava tale au rawa ni vakasamataka me tokona na veika e cauraki ena ulutaga oqo?’ Ke gadrevi mo kila e so tale na ka me baleta e dua na ulutaga, vola na kena taro, qai lalawataka mo na vakekeli kina.

15. Na ulutaga cava so o na marau na vakekeli kina, ena yaga tawamudu vakacava?

¹⁵ Na ulutaga cava beka o na marau ni vakekeli kina mo kila e levu tale na ka vou? Vakacava mo vakadeuca vakatitobu na veiyalayalati e so a cakava na Kalou me yaga vei keda. Ena qaqaco nomu vakabauta ni o vulica na parofisai era dusi Jisu se nomu dikevi ira yadua na veitikinivolatabu ena dua na ivola vakaparofisai ena iVolatabu. Ke tiko ena nomu vosa na ilavelave ni Jehovah’s Witnesses​—Proclaimers of God’s Kingdom,a ena vakayaloqaqataki iko nomu railesuva nodra cakacaka na iVakadinadina i Jiova ena noda gauna. Ni o vakekeli tale ga ena ulutaga “Taro na Dauwiliwili” era sa tabaki oti ena Vale ni Vakatawa, ena matata vinaka e so na ibalebale ni tikinivolatabu. Saga mo kila na yavu vakaivolatabu e vakayagataki me tokona e dua na vakasama. Ena yaga oqo ina nomu vakavulica na ‘lomamu,’ mo vuku tale ga kina. (Iperiu 5:​14, VV) Ni o vuli tiko ena nomu vakekeli, dau vakavola e so na ka ena nomu iVolatabu se dua na ivola, ni na yaga sara vakalevu vei iko, vaka kina o ira o na lai vakavulica.

Tuberi Ira na Gone Mera Marautaka na Vuli iVolatabu

16. O na tuberi ira vakacava na gone mera marautaka na vuli iVolatabu?

¹⁶ E levu sara na ka e rawa nira cakava na itubutubu mera tuberi ira kina vakayalo na luvedra mera veiwekani kei na Kalou. Mera kua vakadua ni dau beci na gone ni rawa tale ga nira kila na veika titobu. Ke o lesi ira na luvemu mera vakekeli ena ulutaga mo dou veivosakitaka ena vuli iVolatabu vakavuvale, tarogi ira se cava era vulica kina. Na vuli vakavuvale e gauna vinaka mera vakatovotovotaka kina na gone nodra tutaka nodra vakabauta ra qai vakadinadinataka ni dina na veika era vakavulici kina. Vakayagataka tale ga na brochure “Raica na Vanua Vinaka”b mera vulica kina na vanua e so era cavuti ena iVolatabu, qai vakamatatataki kina na veika e kovuti ena wili iVolatabu vakamacawa.

17. Na cava me veiraurau kina noda dau vulica ga vakataki keda e so na ulutaga vakaivolatabu?

¹⁷ O na kila e so na ka vakasakiti ni o vakekeli ena so na ulutaga vakaivolatabu, qai qaqaco kina nomu vakabauta, ia me kua ga ni lai vakawaleni tale nomu dau vakavakarau ina soqoni ni ivavakoso. Na soqoni vaka oqori e dua tale na ituvatuva e vakayagataka kina o Jiova na “dauveiqaravi yalodina ka vuku” me vakavulici keda. Ia na vakekeli ena vakaibalebale cake kina na nomu ivakamacala ena soqoni​—Vulivola ni iVavakoso, se ni veivosakitaki tiko ena Koronivuli ni Vuli Vunau na tikinivolatabu e wiliki vakamacawa.

18. Na cava e yaga kina noda saga meda vulica na “veika titobu ni Kalou”?

¹⁸ Eda na volekati Jiova nida vulica na veika titobu ena Vosa ni Kalou. E tukuna na iVolatabu me baleta na yaga ni vuli vaka oqo: “Ni sai vakaruru na vuku, ka sai vakaruru nai lavo: Ia na kena yaga na kila ka, ni sa vu ni bula vei ira na kenai taukei na vuku.” (Dauvunau 7:​12) Io, ena yaga dina nomu saga mo kila na veika titobu vakayalo. E yalataka na iVolatabu vei ira na dau vakasaqaqara tiko ga: ‘O na kunea dina na Kalou, o na qai kilai koya sara.’​—Vosa Vakaibalebale 2:​4, 5.

[iVakamacala e ra]

Vakamacalataka Mada

• Na cava “na veika titobu ni Kalou”?

• Cava meda vulica tiko ga kina na veika titobu?

• Na cava e sega ni vakuai kina e dua na lotu Vakarisito mai “na veika titobu ni Kalou”?

o• Ena yaga vakacava vei iko “na veika titobu ni Kalou”?

[iYaloyalo ena tabana e 28]

Gauna cava e qai yaco kina o Jisu me Kawa yalataki?

[iYaloyalo ena tabana e 31]

E rawa nira lesi ira na luvedra na itubutubu mera vakekeli ena so na ulutaga nira vakavakarau ina vuli vakavuvale