O se Nanuma Tiko?

O taleitaka na ka o wilika ena itabataba ni Vale ni Vakatawa era se qai taba oti ga? Raica mada ke rawa ni o sauma e vica na taro oqo:

• Na cava soti e sa rui levu kina na ca nikua?

E dua na ka e vakavuna na ca, oya na ka ca ga e nanuma na loma ni tamata. (Vakatekivu 8:​21) Dua tale, e levu era lecava na kilaka dodonu me baleta na loma ni Kalou. Kuria oqori na nona siova vakalevu o Setani, na vunica, na veika e vauca na bula ni tamata.​​—⁠1/1, tabana e 4-6.

• Na cava sara mada na kena yaga na vosa vinaka e tau ena gauna veiganiti? (Vosa Vakaibalebale 12:⁠25)

Ena rawa ni vakadeitaki koya e ciqoma, vakaukauataki koya qai veiuqeti tale ga. Eda nuitaki keda sara tale ga nida vakacaucautaki se tau vei keda na vosa vinaka. Na veivakacaucautaki e vukea meda raica na veika vinaka era cakava na tani.​​—⁠1/1, tabana e 16-​17.

• Na cava soti e lewena na kato ni veiyalayalati?

E lewena e rua na vatu raraba e volai kina na Lawa, kei na bilo koula e tawa tu kina na mana. Ni oti na vukitani i Kora, a biu tale ga kina na ititoko i Eroni me ivakadinadina ni nodra cakacala na itabatamata ena gauna i Kora. (Iperiu 9:⁠4) Ia, rairai a se kau tani na ititoko kei na mana mai na kato ni veiyalayalati ni bera sara na vakatabui ni valenisoro a tara o Solomoni.​​—⁠1/15, tabana e 31.

• Na cava era kau buka kina na Jiu ina valenisoro ena gauna i Niemaia?

A sega ni vakaroti ena Lawa a soli vei Mosese me cabori na buka. Ia ena gauna i Niemaia a vinakati vakalevu na buka me rawa ni vakamai kina na isoro ena icabocabonisoro.​​—⁠2/1, tabana e 11.

• Na cava na Muratorian Fragment?

Oqo e dua na wase ni ivola e vakatokai na codex, e volai ena vosa vakalatina. Ia, a volai taumada ena vosa vakirisi ni voleka ni cava na ikarua ni senitiuri S.K. E lewena na ivolatukutuku makawa duadua e se bau kune e volai tu kina na lisi ni yaca ni ivola era lewe ni iVolatabu Vakirisi Vakarisito, e vakamacalataka tale ga na iwase ni iVolatabu oqo kei ira era vola.​​—⁠2/15, tabana e 13-​14.

• Na cava e bese tiko ga kina ni rairai vua na tui o Ranadi Vasitai ni Perisia? (Esiteri 1:​10-​12)

E sega ni tukuna na iVolatabu na vu ni nona talaidredre. Ia, era kaya e so na vuku ni a talaidredre baleta ni sega ni via vakalolovirataki koya vei ira na vulagi ni tui era mateni tu. Ena yasana kadua, de vakavuna nona talaidredre na ranadi matavinaka oqo na viavialevu, e ivakaraitaki ca gona vei ira na yalewa vakawati kece e Perisia.​​—⁠3/1, tabana e 9.

• Ena sala cava e sereki keda kina na ivoli?

Na isoro i Jisu e sereki keda mai na ivalavala ca e vakadewa mai vei keda o Atama qai sereki keda tale ga mai na itotogi ni ivalavala ca, na mate. (Roma 6:​23) Na isoro oqo e rawa ni vinaka kina na noda lewaeloma na lotu Vakarisito. Nida vakabauta na ivoli eda na sega ni nuiqawaqawataka na noda veiwekani kei na Kalou. (1 Joni 2:⁠1)​​—⁠3/15, tabana e 8.

• Na cava eda vulica ena vakatatabu ena Lawa i Mosese me kakua ni vakasaqari na luve ni me ena wainisucu i tinana? (Lako Yani 23:⁠19)

A rairai nodra ivalavala na lotu butobuto mera vakasaqara na luve ni me ena wainisucu i tinana me rawa ni tau kina na uca. (Vunau ni Soro 20:23) Na Kalou e vakarautaka na wainisucu ni tina ni me, me vakania kina na luvena, me vukea tale ga na nona tubu na luve ni me. Ni vakasaqari gona na luve ni me ena wainisucu i tinana, e vakaraitaka na kena vakawaletaki na ituvatuva ni Kalou me baleta na ka e dodonu me rokovi, oya na nodrau veiwekani o tina kei luvena. Eda raica tale ga ena vakatatabu oqo na yalololoma i Jiova.​​—⁠4/1, tabana e 31.