Drau Dau Veivosaki Beka Vakaveiwatini?

“TALAUCAKA ena iVola Nona Lomani Watina e Dua e Yabaki 60.” Oqori na ulutaga ni veisisivi volavola a tuvanaka e dua na baqe mai Japani ena vica na yabaki sa sivi. Era vakauqeti kina o ira na lewenivanua e Japani e tiko na yabaki ni nodra bula ena 50 se 60 vakacaca, mera tukuna “vakadodonu na lomadra” vei watidra. Dua gona vei ira a curu ena veisisivi oqo a vola vei watina yalewa: “Rairai ena lasa vei iko, ia au sa talaucaka mada ga na lomaqu deu qai veivutunitaka: Vinaka vakalevu na nomu vakamautaki au.”

Ena levu na vanua, okati kina e so na vanua vakaesia, e sega ni nodra itovo vakavanua mera dau tukuna vakadodonu na ka e tu e lomadra. Ia, e laurai ni sivia e 15,000 na lewenivanua e Japani era a vakaitavi ena veisisivi oqori. A taleitaki vakalevu sara mani yaco kina me tuvanaki e dua tale na veisisivi volavola vaka oya, qai tabaki tale ga e so na ivola dabani e yavutaki ena ivola era tauri oqori. Laurai ena ivakaraitaki oqo, ni levu era dau gadreva dina mera talaucaka na lomadra vua na watidra lomani. Ia, so tale era na rairai sega ni via cakava oqori. Na cava na vuna? De dua e nodra nanuma ni na gadrevi na maqosa kei na sasaga me rawa nira qai talaucaka kina vei ira na tani​​—⁠oya o ira beka na kedra isa​​—⁠na veika e tu e lomadra kei na nodra vakasama.

Ena ivola i Hitoshi Kato, me baleta na nona cegu e dua mai na nona cakacaka, e tukuna kina ni vuqa na veisere ena kedra maliwa na veiwatini qase mai Japani era vakaliuliu sara ga kina na marama vakawati, baleta e sa vakayabaki na nodra yaloca voli mai. “Ia,” e kaya o Hitoshi, “e dua tale ga na ka e vakavuna, oya ni sega ni rau dau vakameautaka na leqa erau sotava.”

So gona na gauna ena kidroa o tagane vakawati sa vinakata o watina me rau sere ni oti ga nona sa cegu ena cakacaka. De dua sa vakayabaki na nodrau sega ni dau veivosakitaka vakaveiwatini na veika me baleti rau ga. Rairai erau sa dau saga beka vakaveiwatini me rau dui talaucaka na lomadrau, ia vakavuqa e dau tini ga vakaca. Sa sega gona ni rau veivolekati, sa vakavuna ga na nodrau veiba wasoma.

Erau na walia rawa vakacava ena sala malumu na veiwatini na veileqaleqati e dau basika, vaka kina na nodrau veivosakitaka vakayalovinaka na veika e dui tu e lomadrau? Ena vinaka mo kila ni vakatutu yaga duadua e sega ni kune ena nona ivola e dua na daunivakasala ena bula vakawati e se qai tabaki wale ga oqo, ia e kune ga ena dua na ivola makawa e vakamareqeti tu mai ena vica vata na senitiuri, oya na iVolatabu.