Meda Kua ni Rere, E Tiko kei Keda o Jiova!

ENA 50 vakacaca na yabaki sa sivi, ni oti ga vakalailai na kena kacabote na imatai ni gasaukuro vakaatomi, a kaya me baleta na gauna mai muri o Harold C. Urey, na saenitisi a bau rawata na icocovi rogolevu na Nobel: “Eda na kana rerere, moce rerere, bula rerere, eda na mate tale ga ena levu ni noda rere.” Io, e dina taucoko na ka a tukuni oya, ni sa vakilai levu tu e vuravura ena gauna oqo na rere. Me qai sega vakacava, ni veisiga e tabaki ena niusipepa na itukutuku vakadomobula me baleta nodra vakacaca na batikadi, na itovo voravora, kei na veimataqali tauvimate e sega na kedra iwali.

Ia, nida lotu Vakarisito, eda kila na vuna e yaco tiko kina na veituvaki oqori. Era dusia nida sa bula tu oqo ena “iotioti ni veisiga” ni ituvaki kei vuravura, a parofisaitaka tu na iVolatabu ni na vakatakilakilataki ena “gauna cacamatua, [qai] lewalewai dredre.” (2 Timoci 3:​1, NW) E dei na noda inuinui ni o Jiova na Kalou ena kauta mai na vuravura vou ena kune kina na ivalavala dodonu. (2 Pita 3:​13) Ia, e kena ibalebale beka nida na sega ni vakila ena gauna oqo na rere na lotu Vakarisito?

Na Nodra Rai na Tamata ni Kalou me Baleta na Rere

E so na dauveiqaravi i Jiova me vakataki Jekope, Tevita, kei Ilaija eratou vakila toka na rere ena gauna eratou sotava kina na ituvaki leqataki. (Vakatekivu 32:​6, 7; 1 Samuela 21:​11, 12; 1 Tui 19:​2, 3) A sega ni kena ibalebale oqo ni a malumalumu na nodratou vakabauta. Kena veibasai ga, eratou a vakaraitaka na kaukaua ni nodratou nuitaki Jiova. Ia, me vaka ni ratou tamata ga me vakataki keda, o Jekope, Tevita kei Ilaija, eratou vakila tale ga na rere. “A tamata sa vakataki keda sara ko Ilaija,” a vola na tisaipeli o Jemesa.​​—Jemesa 5:​17.

E sega ni vakabekataki nida na rere tale ga nida veinanuyaka na ituvaki drakidrakita e tarai keda tiko ena gauna oqo, se na kena eda rawa ni sotava ena gauna e se bera mai. Sa macala ga nida na vakila na rere. E tukuna sara mada ga na iVolatabu ni o Setani na Tevoro e gumatua tiko me “ia na veivala kei ira . . . sa vakabauta na vosa ni Kalou, ka taura tikoga nai tukutuku kei Jisu.” (Vakatakila 12:17) Dina ni veivosa oqo e vakaibalebale tiko vei ira na lotu Vakarisito lumuti, ia a vola o Paula: “Ko ira kecega era na via lotu dina vei Karisito Jisu, era na vakacacataki.” (2 Timoci 3:​12) Ia, e sega ni kena ibalebale oqo me na rawai keda na rere nida sotava na leqa. Na cava na vuna?

“Na Kalou sa Dauia na Veivakabulai”

A vola o Tevita na daunisame: “A noda Kalou na Kalou sa dauia na veivakabulai.” (Same 68:20) Vakavuqa, e vakaraitaka o Jiova ni rawa ni vakabulai ira na nona tamata, oya nona taqomaki ira mai na ituvaki rerevaki era tu kina se nona solia vei ira na kaukaua mera vosota rawa. (Same 34:17; Taniela 6:​22; 1 Korinica 10:13) Ena nomu vulica na iVolatabu, e vica sara mada na nona cakacaka ni “veivakabulai” o rawa ni nanuma?

Ni o vakayagataka na Watch Tower Publications Index,a vakacava mo vakekeli ena so na itukutuku ni veika a yaco dina me vaka na Walavu ni siga i Noa, nona vakabulai o Loti kei rau na luvena yalewa mai Sotoma kei Komora, nodra sereki mai Ijipita na Isireli kei na nodra takosova na Wasa Damudamu, se na kena seva na vere vuni i Emani me vakarusai ira na Jiu? Nomu wilika qai vakasamataka vakatitobu na itukutuku vaka oqo ena vakaukauataka na nomu vakabauta ni o Jiova na Kalou e dau veivakabulai. Oqo ena vakayaloqaqataki iko ena gauna e vakatovolei kina na nomu vakabauta.

iVakaraitaki ni Yaloqaqa ena Gauna Oqo

E rawa beka ni o vakasamataka e so era ivakaraitaki vinaka ni vosota ena nomu yalava? Rairai e dua a vesu ena vuku ni nona yalodina vua na Kalou. O na rairai kila e dua na lotu Vakarisito sa kena qase sara qai tautauvimate, ia se qaravi Jiova tiko ga. Se vakasamataki ira na itabagone era sega ni vakavuravura, dina ga ni kaukaua sara na idre ni nodra icaba mai koronivuli. Sa qai tiko o ira na itubutubu le dua, e sega na kedra isa me veivuke ena nodra tuberi na gone, se o ira na dawai era qaravi Jiova tiko, dina ga ni so na gauna era dau galili. Na cava eda vulica vei ira oqo? Na nomu vakasamataka nodra yalodina ena vukei iko mo yaloqaqa ni o vosota na veivakatovolei cava ga o sotava.

E sega wale ga ni gadrevi na yaloqaqa nida sotava na veitusaqati kei na veivakacacani, ia e gadrevi tale ga ena gauna eda lomalomaruataka kina na nona lomani keda o Jiova. Vinakati gona meda bucina e lomada na noda nuitaka dei ni nona mate vakaisoro o Karisito e baleti keda yadua. (Kalatia 2:​20) Ena sala oqo, eda na sega ni ririko na torovi Jiova se da rere vakalialia. Kevaka eda nanuma ni sega ni ganiti keda na loloma i Jiova, eda rawa ni vakasamataka vakabibi na vosa i Jisu vei ira na nona imuri: “Sa sega li ni volitaki na separo e rua e na dua na facigi? ia ka sega e dua vei rau ena lutu walega ki na qele, me tabogo vua na Tamamudou. A sa wiliki vakaaduaga na drau ni ulumudou. O koya mo dou qai kakua ni rere: dou sa uasivi cake vei ira na separo e vuqa.”​​—Maciu 10:​29-​31.

E dau tabaki ena Vale ni Vakatawa kei na Yadra! na kedra italanoa na iVakadinadina i Jiova ena gauna oqo era yaloqaqa nira sotava na ituvaki leqataki. Sega ni kena ibalebale oqo nira a sega ni rarawa se leqataka na ituvaki era sotava. Ia era a sega ga ni vakalaiva na yalo vaka oqori me tarova nodra qaravi Jiova. Ena vukei iko na kedra italanoa mo vosota tale ga. Dikeva mada e rua na ivakaraitaki.

Veisautaka Nona Bula na Nona a Coqa

A tabaki ena ilavelave ni Yadra!, Okotova-Tiseba, 2003, na italanoa “Veisautaka Noqu Bula na Noqu a Coqa.” E talanoataka kina o Stanley Ombeva, e dua na iVakadinadina i Jiova mai Kenya, na ituvaki dredre a sotava ni oti nona coqai koya e dua na motoka. Ena vuku ni nona sa dau tautauvimate, a yaco na gauna me vakacegui kina mai na nona cakacaka qai muduki tale ga nodratou inisua vakavuvale. “[Ena] gauna au ciqoma kina na ituvaki au mai sotava tu oqo,” e kaya o Brother Ombeva, “au yalolailai, dau nanumi au ga, qai cudrucudru.” A dredre na ituvaki oya, ia, e yaloqaqa tiko ga na turaga lotu Vakarisito oqo. E sega ni vakalaiva na yalolailai me rawai koya, a sega tale ga ni soro koso. Ia, a vakararavi ga vei Jiova. “E dau tokoni au o koya ena veituvaki dredre kece ga au dau sotava. Na levu ni nona dauveitokoni, au lai maduataki au tale kina ena so na gauna,” e kaya o Brother Ombeva. “Au mani saga vakaukaua kina meu dau wilika qai vakananuma vakatitobu na veitikinivolatabu au kila ena vakacegui au.”

Nona tukuna vakadodonu o Brother Ombeva na ka a sotava e lai vukea e levu tale mera vosota rawa kina na ituvaki dredre era sotava tiko. “Au tagi sara ga niu wilika na italanoa oqo,” e vola e dua na marama lotu Vakarisito. “Au vakila ni o Jiova e vakayagataka na ulutaga oqo me vakaraitaka nona veikauaitaki kei na nona yalololoma, au vakacegui sara ga kina.” E vola e dua tale na iVakadinadina: “Na italanoa vaka oqo e vakaukauataki keimami sara ga na sotava tu na ituvaki vaka oya, keimami dau qai kubuta lo tu ga na neimami rarawa.”

E Rawa ni Vosoti na Tauvimate e Vu Kina na Veilecayaki ni Lomada

E dua tale na italanoa vakasakiti, e baleti Herbert Jennings, a volai ena ruku ni ulutaga “Dou sa Sega ni Kila na Ka sa na Yaco e na Mataka.”b E tauvi Brother Jennings na mate e vakavuna me dau veilecayaki na lomana, e vakatokai na bipolar disorder. Ni vakasamataka lesu na gauna e se qai tekivu tauvimate kina, e kaya: “E sa bau ka dina . . . ni bolebole meu tikova na soqoni vakarisito. Ia, au sega ga ni vakamelea rawa na yaga ni veimaliwai vakayalo vakamataveitacini. Au tovolea meu qai dau curu ina Kingdom Hall ni sa vagagalu na vanua ni soqoni, vaka kina na noqu lesu tale ni sa oti na soqoni ni se bera nira tekivu veivosaki na mataveitacini.”

E ka ni bolebole tale ga vua na cakacaka vakavunau. “So na gauna, niu sa dau yaco rawa mada ga yani ena dua na katuba, sa bau vaka toka oya meu qai tukituki,” e kaya o Brother Jennings. “Au sega ga ni yalolailai, niu kila ni na vakabulai keda na noda cakacaka vakaitalatala, vaka kina o ira era rogoci keda. (1 Timoci 4:16) Vakalailai ga au sa dau yaloqaqa tale, au lako yani ina vale e tarava meu tovolea tale. E vakaukauataki au na noqu vakaitavi ena cakacaka vakaitalatala, e solia tale ga vei au na igu meu toso tiko ga kina.”

E sega tale ni wereubiubi na italanoa i Brother Jennings, e vukei ira gona e levu na dauwiliwili mera yaloqaqa tale ga ena vuku ni leqa era sotava tiko. Me kena ivakaraitaki, a vola e dua na marama lotu Vakarisito: “Ena loma ni 28 na yabaki ni noqu dau wilika Na Vale ni Vakatawa kei na Yadra!, sa qai dua na italanoa oqo me tarai au sara ga ena gauna au vakawilika tiko kina. A vinakati meu muduka na noqu cakacaka vakaitalatala vakatabakidua. E ora kina na lomaqu niu vakasamataka ni rairai malumalumu na noqu vakabauta, kevaka a kaukaua au se rawa ni tomana tiko ga na noqu veiqaravi. Noqu wilika na nona biuta na nona ilesilesi o Brother Jennings me qaravi vinaka kina na nona tauvimate, e vukei au me donu na noqu rai ena vuku ni kequ ituvaki. Sa saumi sara ga na noqu masu!”

A vola tale ga e dua na turaga lotu Vakarisito: “Ni oti e tini na yabaki noqu veiqaravi tu vaqase ni ivavakoso, a vinakati meu muduka noqu veiqaravi baleta a tauvi au e dua na mate ni vakasama. E tarai au sara ga vakaca na yalolailai, e vakavuqa meu sega ni dau via wilika na italanoa ni nodra bula na mataveitacini, niu vakasamataka na vakasakiti ni ka era rawata. Ia e vakayaloqaqataki au na nona vosota o Brother Jennings. Au sa wilika vakavica na kena italanoa.”

Toso Tiko ga ena Nuidei

Me vakataki rau o Brother Ombeva kei Jennings, e levu na iVakadinadina i Jiova era yaloqaqa tiko ga ena nodra qaravi Jiova, dina ga nira sotava na ituvaki dredre. Ke o dua vei ira, o vakacaucautaki. Mo nuidei: “Sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana ni dou a qaravi ira era sa lotu, ia dou sa qarava tikoga.”​​—Iperiu 6:​10.

A vukei ira nona tamata yalodina ena gauna makawa o Jiova mera qaqa vei ira na nodra meca, e rawa tale ga ni vukei iko mo vosota na ituvaki dredre o sotava tiko ena gauna oqo. O koya gona, taura dei tiko ga na vosa a tukuna o Jiova ena gusu i Aisea na parofita: “Kakua ni ko rere; ni’u sa tiko vata kei iko: kakua ni ko taqaya; ni’u sa nomu Kalou: ka’u na vakaukauwataki iko; io, ka’u na vukei iko; io, ka’u na tokoni iko e na ligaqu i matau sa daudina.”​​—Aisea 41:10.

[iVakamacala e ra]

[iYaloyalo ena tabana e 16]

Me vakataki Stanley Ombeva (e cake) kei Herbert Jennings (ena imatau), e levu era qaravi Jiova tiko ena yaloqaqa

[iTaba ni Credit Line ena tabana e 14]

USAF photo