Marautaka na Bula ni o Rerevaki Jiova

“Dou rerevaki Jiova, koi kemudou na nona tamata yalosavasava: ni sa sega na ka me yali vei ira era sa rerevaki koya.”​—SAME 34:9.

1, 2. (a) Na cava na rua na mataqali rerevaka na Kalou erau duidui e vakavuvulitaka o lotu ni Veivanua Vakarisito? (b) Na taro cava soti eda na sauma?

O IRA na dauvunau ni lotu ni Veivanua Vakarisito era vakavulici ira na tamata mera rerevaka na Kalou, era vakavuvulitaka cala ni Kalou ena vakararawataki ira tawamudu na tamata ivalavala ca mai eli. Na ivakavuvuli oqori e veicalati kei na ka e vakamacalataka na iVolatabu ni o Jiova e Kalou dauloloma qai dodonu na nona ivalavala. (Vakatekivu 3:​19; Vakarua 32:4; Roma 6:​23; 1 Joni 4:8) E so tale na italatala ni lotu ni Veivanua Vakarisito e veibasai sara na ka era vakavuvulitaka. Era sega sara ga ni vakauqeta me rerevaki na Kalou. Era vakavuvulitaka ga ni Kalou e dau vakatara na ka kece ga qai vakadonui keda kece veitalia se vakacava na noda ivakarau ni bula. E sega ni vakavuvulitaka tale ga na iVolatabu oqori.​—Kalatia 5:​19-​21.

² Ia, e uqeti keda na iVolatabu meda rerevaka na Kalou. (Vakatakila 14:7) Na ivakavuvuli vakaivolatabu oqori e vakavuna me tarogi kina e so na taro oqo. Na cava e vinakata kina na Kalou dauloloma meda rerevaki koya? Na rere vakacava e vinakata na Kalou me tu vei keda? E yaga vakacava na noda rerevaka na Kalou? Eda na sauma na taro oqori nida tomana noda dikeva na ika34 ni Same.

Vu ni Noda Rerevaka na Kalou

3. (a) O raica vakacava na rerevaka na Kalou? (b) Na cava era marau kina na dau rerevaki Jiova?

³ E dodonu me rerevaki o Jiova baleta ni o koya e Dauveibuli qai iLiuliu Cecere ni lomalagi kei vuravura. (1 Pita 2:​17) Ia, na rere oqo e sega ni noda rerevaka e dua na kalou e dauveivakalolomataki. E ivakaraitaki ga ni noda dokai Jiova. E vakaraitaki tale ga kina nida rerevaka na vakacudrui koya. E dokai qai ka cecere na rerevaka na Kalou, e sega ni vakamate yalo se rerevaki. E “Kalou mamarau” o Jiova, e vinakata tale ga mera marautaka na bula na tamata e bulia. (1 Timoci 1:​11, NW) Ia, ena rawa ga oqori kevaka eda muria na ivakatagedegede ni Kalou. Ena vinakati kina vei ira na lewe levu mera veisautaka na ivakarau ni nodra bula. Era na vakila o ira na veisautaki ira na dina ni nona vosa na daunisame o Tevita: “Dou tovolea mada ka raica ni sa yalovinaka ko Jiova; sa kalougata na tamata sa vakararavi vua. Dou rerevaki Jiova, koi kemudou na nona tamata yalosavasava: ni sa sega na ka me yali vei ira era sa rerevaki koya.” (Same 34:​8, 9) Ni vinaka na nodra veiwekani kei na Kalou era na sega ni lekata e dua na ka yaga o ira na rerevaki Jiova.

4. Na cava erau yalataka ruarua o Tevita kei Jisu?

⁴ E dokai ira na nona tamata o Tevita ena nona vakatokai ira mera “yalosavasava.” E baleta nira lewena na matanitu yalosavasava e taukena na Kalou. Era bolemate tale ga nira muri Tevita voli. Dina ga nira drovaki Tui Saula voli, e nuidei tu o Tevita ni na solia vei ira o Jiova na veika era gadreva e veisiga. E vola o Tevita: “Era sa dravudravua na luve ni laioni, ka viakana; ia ena sega na ka vinaka me yali vei ira era sa vakasaqarai Jiova.” (Same 34:10) E vakatale ga oqori na ka e yalataka o Jisu vei ira na nona imuri.​—Maciu 6:​33.

5. (a) Era tamata vakacava e levu na imuri i Jisu? (b) Na ivakasala cava e solia o Jisu me baleta na rere?

⁵ E levu ga vei ira na rogoci Jisu era Jiu tauvanua. Oya na vuna e “lomani ira [kina], ni ra sa malumalumu, ka biu wale tu, me vaka na sipi sa sega na nodrai vakatawa.” (Maciu 9:​36) Era na yaloqaqa beka na tauvanua oqori mera muri Jisu? Ena vinakati mera rerevaki Jiova, mera kua ni rerevaki ira na tamata. E kaya o Jisu: “Dou kakua ni rerevaki ira era sa vakamatea na yago ga, ia emuri sa sega tale na ka era cakava rawa. Ia ka’u sa tukuna vei kemudou se ko cei mo dou rerevaka: Dou rerevaki koya sa rawata me vakamatea, ka oti sa rawata talega me biuta ki eli; io, au sa kaya vei kemudou, Dou rerevaki koya. Sa sega li ni volitaki na separo e lima e na facigi e rua? ia ka sega e dua vei iratou sa guileca e na mata ni Kalou. Ia sa wili kecega na drau ni ulumudou. O koya oqo mo dou kakua ni rere: dou sa uasivi cake vei ira na separo e vuqa.”​—Luke 12:​4-7.

6. (a) Na vosa cava i Jisu e vakaukauataki ira na lotu Vakarisito? (b) Na cava e ivakaraitaki uasivi kina o Jisu ena noda rerevaka na Kalou?

⁶ Nira saga na meca mera tarovi ira na rerevaki Jiova mera qarava na Kalou, me nanumi tiko na ivakasala i Jisu: “O koya yadua ena vakatusai au e na matadra na tamata, ena vakatusai koya talega na Luve ni tamata e na matadra na agilose ni Kalou; ia ko koya ena cakitaki au e na matadra na tamata, ena cakitaki e na matadra na agilose ni Kalou.” (Luke 12:​8, 9) Na vosa oqori e dau vakaukauataki ira na lotu Vakarisito, vakauasivi ena veivanua e vakatabui kina na sokalou dina. Era na saga o ira na tiko ena vanua vaka oqori mera vakacaucautaki Jiova ena nodra dau soqoni lo voli ga ra qai cakacaka vakavunau tiko. (Cakacaka 5:​29) E ivakaraitaki vinaka duadua o Jisu ena nona ‘rerevaka na Kalou.’ (Iperiu 5:7) E parofisaitaki me baleti koya: “[E]na tiko ga vua na Yalo i Jiova, na Yalo ni . . . rerevaki Jiova: Ena rekitaka sara ko koya na rerevaki Jiova.” (Aisea 11:​2, 3) Oya na vuna e veiganiti kina nona vakaraitaka o Jisu na yaga ni rerevaka na Kalou.

7. (a) Era ciqoma vakacava na lotu Vakarisito na veisureti e via tautauvata kei na veisureti i Tevita? (b) Era na muria vakacava na itubutubu na ivakaraitaki vinaka i Tevita?

⁷ O ira kece na muria na ivakaraitaki i Jisu ra qai talairawarawa ina nona ivakavuvuli era sa ciqoma tiko na veisureti e via tautauvata kei na veisureti i Tevita oqo: “Dou lako mai, ragone, vakarorogo mai vei au; ka’u na vakavulici kemudou mo dou rerevaki Jiova.” (Same 34:11) E sega ni cala na nona vakatokai ira na nona tamata o Tevita me “ragone” baleta nira vakaliuci koya me nodra iliuliu. E dau vukei ira vakayalo tale ga na nona imuri o Tevita me rawa kina nira duavata tiko me qai vakadonui ira tale ga na Kalou. Oqo e ivakaraitaki vinaka vei ira na itubutubu lotu Vakarisito. E vakaroti ira na itubutubu o Jiova mera vakavulici luvedra “ena ivakavuvuli kei na ivakarau ni vakasama i Jiova.” (Efeso 6:​4, NW) Nira veitalanoataka vata kei luvedra na veika vakayalo e veisiga ra qai vuli iVolatabu wasoma kei ira, era na vukei ira tiko mera marautaka na bula nira rerevaki Jiova tiko.​—Vakarua 6:​6, 7.

Me Rerevaki Vakacava na Kalou

8, 9. (a) Na cava e totoka kina na noda rerevaka na Kalou? (b) Na cava e okati ena noda tarova na yameda?

⁸ Me vaka sa tukuni oti, na noda rerevaki Jiova e sega ni tarova noda marau. E taroga o Tevita: “O cei na tamata sa vinakata na bula. Ka sa via raica na veisiga vinaka?” (Same 34:12) E vakatau ena noda rerevaki Jiova na noda marautaka na bula dede kei na noda raica na veisiga vinaka. E ka rawarawa wale na noda kaya, “Au rerevaka na Kalou.” Ia e sega ni ka rawarawa na noda vakaraitaka ena noda itovo. Oya na vuna e vakamacalataka tarava kina o Tevita na sala meda rerevaka kina na Kalou.

⁹ “Tarova na yamemu mai na ca, kei na tebenigusumu me kakua ni vosataka na ka lasu.” (Same 34:13) E vakauqeti na yapositolo o Pita me lavetaka na tikina oqo ni Same 34 ena nona vakasalataki ira na lotu Vakarisito mera veilomani me vaka na veitacini. (1 Pita 3:​8-​12) Ke da tarova na yameda mai na ca eda na sega ni daukakase. Ia, eda na dau veiuqeti ga nida vosa vei ira e so tale. Eda na saga tale ga meda yaloqaqa ni tukuna na ka dina.​—Efeso 4:​25, 29, 31; Jemesa 5:​16.

10. (a) Vakamacalataka na ibalebale ni lesu tani mai na ca. (b) Na cava e okati ena noda cakava na veika vinaka?

¹⁰ “Lesu tani mai na ca, ka kitaka na ka vinaka; qara na veivinakati, ka muria sara.” (Same 34:14) Eda na sega ni cakava na veika e vakacala na Kalou me vaka na veidauci kei na veibutakoci, raici ni iyaloyalo se ivola vakasisila, na butako, vakatevoro, itovo kaukaua, mateni, kei na vakayagataka na wainimate gaga. Eda na sega tale ga ni lakova na veivakamarautaki e vakayacori kina na veika vakasisila oqori. (Efeso 5:​10-​12) Ia, eda na vakayagataka ga na noda gauna ena veika e vinaka. Na ka vinaka duadua eda rawa ni cakava oya na noda vunautaka wasoma na Matanitu ni Kalou kei na veivakatisaipelitaki, nida vukei ira e so tale mera rawata na bula tawamudu. (Maciu 24:14; 28:​19, 20, VV) Noda cakava na veika vinaka e okati kina na tiko ena soqoni vakaivavakoso, noda cau me baleta na cakacaka e veiyasa i vuravura, noda samaka noda Kingdom Hall, kei na noda qaravi ira na lotu Vakarisito era gadreva na veivuke.

11. (a) E vakayacora vakacava na veika e tukuna me baleta na veivinakati o Tevita? (b) O rawa ni ‘qara vakacava na veivinakati’ ena ivavakoso?

¹¹ E ivakaraitaki vinaka tale ga o Tevita ena nona qara na veivinakati. A rawa sara ga ni vakamatei Saula ena rua na gauna. E tarovi koya ena gauna ruarua oqori qai vosa vua na tui ena veidokai baleta ni qara na veivinakati. (1 Samuela 24:​8-​11; 26:​17-​20) Na cava e rawa ni caka nikua ke vakaleqai na duavata se veivinakati ena ivavakoso? Meda “qara na veivinakati, ka muria sara.” Ke sega ni vinaka noda veimaliwai kei na dua eda vakabauta vata, meda muria na ivakasala i Jisu: “Drau lai veivinakati mada e liu kei na wekamu.” Oti oya meda qai tomana tale na noda sokalou.​—Maciu 5:​23, 24; Efeso 4:​26.

Yaga Vakalevu na Rerevaka na Kalou

12, 13. (a) E yaga vakacava na noda rerevaka na Kalou ena gauna oqo? (b) Na icovi lagilagi cava era na vakarau marautaka o ira na sokalou tiko ena yalodina?

¹² “Sa vakaraici ira na tamata yalododonu ko Jiova, ka sa qara tu na daligana ki na nodra masu.” (Same 34:15) Na veika e cakava na Kalou vei Tevita e vakadeitaka na vosa oqori. Eda marautaka na noda lomavakacegu nikua baleta ni vakaraici keda tiko o Jiova. Eda nuidei ni na solia vei keda na veika eda gadreva, vakabibi kevaka eda sotava tiko na veika dredre. Eda kila ni sa voleka na gauna me ravuti ira kina na dau sokalou dina o Koki mai Mekoki, kei na kena voleka tale ga ‘na siga i Jiova e rerevaki.’ (Joeli 2:​11, 31; Isikeli 38:​14-​18, 21-​23) Se mani vakacava na dredre ni veika eda sotava ena gauna oya, eda na vakila ga na dina ni vosa i Tevita: “Era sa tagi na yalododonu, a sa rogoca ko Jiova, ka sa vakabulai ira mai na nodra rarawa kecega.”​—Same 34:17.

¹³ Eda na marautaka dina ena gauna oya na nona sa vakalagilagia na yacana o Jiova! Eda na qoroqoro ga ena gauna era sa vakarusai kina na dauveitusaqati kece. “Sa dua tani na mata i Jiova vei ira sai valavala ca, me bokoca laivi e vuravura na kedrai vakananumi.” (Same 34:16) Sa na dua dina na icovi lagilagi na noda vakabulai yani ina vuravura vou e vakarautaka na Kalou!

Vosa ni Yalayala e Vukei Keda Meda Vosota

14. Na cava ena vukei keda meda vosota nida sotava na leqa?

¹⁴ E vinakati meda dau vosota nida talairawarawa tiko vei Jiova ena vuravura torosobu oqo. Noda rerevaka na Kalou e vukei keda meda talairawarawa vua. E so na tamata ni Kalou era sotava tiko na veika dredre e vakavuna me ramusu na yalodra se ra yalolailai. Ia, mera nanuma tiko ni kevaka era vakararavi vei Jiova, ena vukei ira o koya mera vosota tiko. E veivakacegui dina na vosa i Tevita: “Sa voleka ko Jiova vei ira sa ramusu na yalodra; ka sa vakabulai ira sa dasila na lomadra.” (Same 34:18) E kuria o Tevita ena nona veivakayaloqaqataki: “Sa levu na ka rarawa sa yaco vua na yalododonu; ia sa vakabulai koya ko Jiova mai na ka kecega.” (Same 34:19) Se mani vakacava na levu ni leqa eda sotava, ena vakabulai keda o Jiova baleta ni kaukaua sara o koya.

15, 16. (a) Na leqa cava e rogoca o Tevita ni oti ga nona vola na Same 34? (b) Na cava ena vukei keda meda vosota na veivakatovolei?

¹⁵ Ni oti ga nona vola o Tevita na Same 34, e rogoca sara na veika e yaco mai Nopi, ni a vakamatei ira na lewenikoro kei na levu na bete o Saula. E rairai rarawa dina o Tevita baleta ni a vakacudrui Saula na nona lako i Nopi. (1 Samuela 22:​13, 18-​21) E sega ni vakabekataki ni dau kerea na veivuke i Jiova o Tevita, qai vakacegui koya tale ga na nona namaka na nodra vakaturi “na yalododonu.”​—Cakacaka 24:15.

¹⁶ E vakaukauataki keda tale ga nikua na inuinui ni veivakaturi. Eda kila ni na sega ni dua na ka era cakava na noda meca e rawa ni vakaleqai keda tiko ga. (Maciu 10:28) E vakatale ga oqori na vakabauta i Tevita ni a kaya: “Sa maroroya kecega na suina [na yalododonu]; sa sega e dua sa musulaki.” (Same 34:20) E vakayacori na tikinivolatabu oqori vei Jisu. Dina ni vakararawataki o Jisu ena gauna e vakamatei kina, ia e sega ni bau “ramusu” e dua na suina. (Joni 19:​36, VV) Na rabailevu ni kena vakayacori na Same 34:20 e vakadeitaka nira na sega ni vakaleqai tiko ga na lotu Vakarisito lumuti kei ira na nodra itokani ‘so tani tale na sipi’ se mani veivakatovolei cava era sotava. Ena vaka ga ni sega ni bau ramusu na suidra.​—Joni 10:16.

17. Na leqa cava era na sotava o ira na sega ni veivutuni ra qai saqati ira na tamata i Jiova ?

¹⁷ E duidui na ka era na sotava na tamata ca. Sa voleka oqo mera tauca na vua ni veika ca era cakava. “Ena vakamatei ira na tamata ca na ka ca: era na vakacalai ko ira sa cati koya na yalododonu.” (Same 34:21) Era na vakaleqai vakaca sara o ira kece na saqati ira tiko na tamata ni Kalou. Ni sa rairai mai o Jisu Karisito, era ‘na cudruvi ena veivakarusai tawamudu.’​—2 Cesalonaika 1:9.

18. Era sa vakabulai vakacava “nai soqosoqo levu,” ia na cava era na vakila ena veigauna e se bera mai?

¹⁸ E tinia o Tevita na same oqo ena vosa e veivakadeitaki: “Sa vakabula na yalodra na nona tamata ko Jiova: ia ena sega ni vakacalai e dua vei ira sa vakararavi vua.” (Same 34:22) E kaya o Tui Tevita ni voleka ni cava na 40 na yabaki ni nona veiliutaki: E “vakabulai au mai na ka rarawa kecega [na Kalou].” (1 Tui 1:​29) Me vakataki Tevita, sa voleka na gauna mera qai raica lesu mai kina ena marau na daurerevaki Jiova na nodra vakabulai mai na nodra ivalavala ca kei na nodra vakatovolei. Ena gauna oqo sa ra voleka ni taura kece na lotu Vakarisito lumuti na nodra icovi ni bula i lomalagi. Era sa tomani ira tale tiko ga na taci Jisu e dua “nai soqosoqo levu” ena nodra qarava tiko na Kalou ra qai marautaka nira okati mera savasava ena mata i Jiova. Oqo e baleta nira vakabauta na kaukaua ni kena veisereki na dra i Jisu. Era na qai vakila na yaga taucoko ni isoro i Jisu ena duanaudolu na yabaki e veiliutaki kina o Karisito, nira na qai yaco kina mera tamata uasivi.​—Vakatakila 7:​9, 14, 17; 21:​3-5.

19. Na cava era vakadeitaka mera cakava “nai soqosoqo levu”?

¹⁹ Na cava era na tauca kina na veivakalougatataki kece oqo o ira “nai soqosoqo levu” era qarava na Kalou? Baleta era vakadeitaka mera rerevaki Jiova tiko ga, ra qai dokai koya ena nodra talairawarawa vua nira qaravi koya tiko. Eda na marau nida rerevaki Jiova ena gauna oqo, ena vukei keda meda “rawata tale ga na bula, sa i koya na bula dina”​—na bula tawamudu ena vuravura vou e vakarautaka na Kalou.​—1 Timoci 6:​12, 18, 19, VV; Vakatakila 15:​3, 4.

O se Nanuma?

• Na cava e vu ni noda rerevaka na Kalou, eda na rerevaki koya vakacava?

• E tara vakacava na noda itovo na rerevaka na Kalou?

• E yaga vakacava noda rerevaka na Kalou?

• Na vosa ni yalayala cava e vukei keda meda vosota na veivakatovolei?

[iYaloyalo ena tabana e 26]

Era qaqarauni na dau rerevaki Jiova ni vakatabui nodra cakacaka

[iYaloyalo ena tabana e 28]

Na ka vinaka duadua eda rawa ni cakava oya meda tukuna na itukutuku vinaka ni Matanitu ni Kalou vei ira na wekada