“Au Marautaka na Nomuni Veivakadreti”

“Na ka kecega sa volai eliu sa volai me da vakatavulici kina.”​—ROMA 15:​4.

1. E dau vakadreti keda vakacava o Jiova, na cava eda gadreva kina?

E DAU veivakadreti o Jiova vei ira na nona tamata me rawa kina nira vosota tiko ena gauna dredre oqo. Eda vakila e so na veivakadreti oqo ena gauna eda wilika kina na iVolatabu, eda dau rogoca tale ga e so na veivakadreti ena veika e tukuni ena gauna ni soqoni. Levu vei ira na ka eda wilika se rogoca oqori e sega ni ka vou. Eda sa rairai rogoca se wilika oti. Ni rawa meda guilecava, e dau talevi tale tiko na itukutuku me baleta na inaki i Jiova, na nona lawa, kei na nona ivakaro. E dodonu meda marautaka na nona dau veivakadreti na Kalou. E dau uqeti keda meda nanuma matua tiko ga na inaki ni noda mai bulataka na ivakarau ni bula e salavata kei na loma ni Kalou. Oqo na vuna e lagata kina na daunisame vei Jiova: “Au marautaka na nomuni veivakadreti.”​​—Same 119:​24, NW.

2, 3. (a) Na cava e maroroya tu mai kina o Jiova me yacova noda gauna na kedra italanoa e so era cavuti ena iVolatabu? (b) Na italanoa cava ena iVolatabu eda na dikeva ena ulutaga oqo?

² E bula tiko ga na Vosa ni Kalou dina ga ni a volai ena vica na senitiuri sa oti. (Iperiu 4:​12) E vakamacalataki tale ga kina na nodra bula e so era cavuti ena iVolatabu. Sa duatani na itovo vakavanua kei na itovo ni rai mai na gauna e volai kina na iVolatabu, ia e via tautauvata tiko ga na leqa era sotava kei na leqa eda sotava tiko. E levu na italanoa e maroroi tu ena iVolatabu e yaga vei keda baleta e vakaraitaka na nodra ivakaraitaki vinaka na tamata era lomani Jiova ra qai yalodina tiko ena gauna era sotava kina na veika dredre. E so na italanoa e vakaraitaki kina na itovo e cata na Kalou. E vakavuna na Kalou mera volai ena iVolatabu na ivakaraitaki vinaka kei na ivakaraitaki ca oqo meda vakadreti kina. Me vaka e vola na yapositolo o Paula: “Na ka kecega sa volai eliu sa volai me da vakatavulici kina, me noda na vosota kei na vakacegui sa vu mai nai Vola Tabu, me rawa kina nai nuinui.”​​—Roma 15:4.

³ Meda raica mada oqo e tolu na itukutuku ena iVolatabu: na veika e cakava o Tevita vei Saula, na kedrau itukutuku o Ananaiasa kei Safaira, kei na ka e cakava o Josefa vei wati Potifa. E tiko na ka eda vulica ena italanoa tolutolu oqo.

Yalodina ina iTuvatuvanaki i Jiova

4, 5. (a) Na cava e yaco ena kedrau maliwa o Tui Saula kei Tevita? (b) Na cava e cakava o Tevita ni qati koya o Saula?

⁴ Ni sega ni yalodina vei Jiova o Tui Saula sa sega ni ganiti koya me liutaki ira na tamata i Jiova. Ni sa sega ni vakadonui koya na Kalou, e mani talai Samuela na parofita me lai lumuti Tevita me qai tui Isireli. Ni vakilai na yaloqaqa i Tevita ena ivalu ra qai vakacaucautaki koya na tamata, sa tekivu qati Tevita o Saula. E saga vakavica o Saula me vakamatei koya, ia e dro bula ena veigauna oqori o Tevita baleta ni tiko vata kei koya o Jiova.​​—1 Samuela 18:​6-​12, 25; 19:​10, 11.

⁵ E dro voli o Tevita me vica na yabaki. Ena gauna sara ga a rawa vei Tevita me vakamatei Saula kina, ra qai uqeti koya tale ga na nona itokani nira kaya ni sa solia o Jiova na nona meca i ligana, a sega ni vakayacora vaka kina o Tevita. E vakayacora oqori baleta ni yalodina vei Jiova qai doka na itutu i Saula ni a lumuti me nodra tui na tamata ni Kalou. A sega li ni lesi Saula me nodra tui na Isireli o Jiova? Ena qai kauti koya laivi tale ga o Jiova. E raica o Tevita ni sega e kea na nona baigani. Ni vodi na nona saga me ruru na nona cudruvi koya o Saula, e qai kaya o Tevita: “Ena yaviti koya ga ko Jiova; se na yaco na nona siga me mate kina, se na lako sobu ki nai valu, ka mate kina: me kakua sara vei au e na vuku i Jiova me’u dodoka yani na ligaqu vua ka lumuta ko Jiova.”​​—1 Samuela 24:​3-​15; 26:​7-​20.

6. Na cava eda taleitaka kina na kedrau italanoa o Tevita kei Saula?

⁶ E tiko ena italanoa oqo e dua na ivakavuvuli bibi. O dau vaqaqa beka se cava e yaco tiko kina e so na leqa ena ivavakoso? De sega beka ni veiganiti na veika e cakava tiko e dua. E sega beka ni okati me ivalavala ca bibi na nona itovo, ia e vakaleqai iko ga. Na cava o na cakava vua? Ena nomu kauaitaki koya kei na nomu yalodina vei Jiova, o na rairai vosa vakayalovinaka vua ena nomu saga me veisautaka na nona ivakarau. Ia, vakacava ke sega ni wali rawa na leqa? Kevaka sa vodi na nomu sasaga, de na vinaka mo biuta ga ina liga i Jiova. Oya na ka e cakava o Tevita.

7. Me vakataki Tevita, na cava meda cakava kevaka eda vakaduiduitaki se cati?

⁷ Se o rairai cati beka se vakaduiduitaki tiko ena vuku ni nomu lotu se bula vakaitikotiko. De o sa sega ni cakava rawa kina e dua na ka ena gauna oqo. E dau dredre dina na vosota na veika oqori, ia e rawa ni vukei keda na ka e cakava o Tevita ni sotava na veika vaka oqori. Na same e vola o Tevita e sega ni kerea ga kina vei Jiova me taqomaki koya mai vei Saula, ia e vakaraitaka tale ga na nona yalodina vei Jiova kei na nona kauaitaka na kena vakacerecerei tiko ga na yaca ni Kalou. (Same 18:​1-6, 25-​27, 30-​32, 48-​50; 57:​1-​11) E yalodina tiko ga vei Jiova o Tevita dina ga ni vica na yabaki na nona cakava tiko vua o Saula na veika tawadodonu. E dodonu tale ga meda yalodina tiko vei Jiova kei na nona isoqosoqo kevaka mada ga eda cati kina se mani cava era cakava e so. Meda nuidei ni kila vinaka tiko o Jiova na veika eda sotava tiko.​​—Same 86:2.

8. Na cava era cakava na iVakadinadina i Jiova e Mozambique ni vakatovolei na nodra yalodina vei Jiova?

⁸ Era ivakaraitaki vinaka ena gauna oqo o ira na lotu Vakarisito mai Mozambique. Era yalodina tiko ga vei Jiova ena gauna era vakatovolei kina. Ena 1984 era mai vakacaca ena nodra veikoro o ira na mataivalu meca nira mai butakoci ira, vakama na nodra veivale, ra qai veivakamatei tale ga. Era sega ni taqomaki ira rawa na lotu Vakarisito dina. Era sagai mera curu ina nodra mataivalu na dauvakacaca oqo se ra vakasaurarataki mera tokoni ira. Era raica na iVakadinadina i Jiova ni oya ena veicoqacoqa kei na nodra tawaveitovaki. E saqati sara vakaukaua na nodra sega ni vakaitavi oqo. E rauta nira lewe 30 taucoko na iVakadinadina era vakamatei ena gauna voravora oya, ia e sega ni bau vakaleqa na nodra yalodina vua na Kalou na nodra vakarerei mera vakamatei.a Me vakataki Tevita, era vosota na veika tawadodonu e caka vei ira ra qai qaqa tale ga.

Veivakadreti e iVakasala

9, 10. (a) Ena yaga vakacava vei keda e so na ivakaraitaki ena iVolatabu? (b) Na cava e cala kina na ka erau cakava o Ananaiasa kei Safaira?

⁹ E so era cavuti ena iVolatabu era vakaraitaka na itovo ca meda kua ni vakatotomuria. Io, era vakamacalataki tu ena iVolatabu e levu na tamata, okati kina e so na tamata ni Kalou, era cakava na veika ca qai sauti ira na nodra ivalavala. (1 Korinica 10:11) Rau vaka kina o Ananaiasa kei Safaira, e dua na veiwatini erau lewe ni ivavakoso vakarisito ena imatai ni senitiuri mai Jerusalemi.

¹⁰ Ni oti toka ga na Penitiko ena 33 S.K., a vinakati mera vukei vakayago o ira na vakabauta vou era se tiko e Jerusalemi era se vuli tiko vei ira na yapositolo. E so vei ira na lewe ni ivavakoso e Jerusalemi era volitaka na nodra qele me rawa nira qaravi kina o ira oqori. (Cakacaka 2:​41-​45) Rau volitaka e dua na nodrau tikiniqele o Ananaiasa kei Safaira rau qai kauta ga mai e dua na kena iwase ni ilavo vei iratou na yapositolo. Rau tukuna ni oya kece na ilavo e isau ni tikiniqele. Dina ni a vakatau vei rau o Ananaiasa kei Safaira na ka erau via solia, ia e ca na nodrau inaki, ni rau a lawaki. Rau via rogo vinaka ena nodrau tukuna ni rau solia kece na ilavo ni qele, ia erau solia ga e dua na kena iwase. Ni uqeti koya na yalo tabu, e toboka rawa na yapositolo o Pita na nodrau veidabui kei na nodrau veivakaisini. E qai vakamatei rau o Jiova.​​—Cakacaka 5:​1-​10.

11, 12. (a) Na cava e so na ivakasala vakaivolatabu me baleta na dau dina? (b) Na cava so e yaga ni noda dau dina?

¹¹ Kevaka eda temaki meda lasu meda rogo vinaka kina, me ivakavuvuli mada ga vei keda na kedrau italanoa o Ananaiasa kei Safaira. Ena rawa beka meda dabui ira na tamata, ia e sega ni rawa meda lasutaki Jiova. (Iperiu 4:​13) E vakaroti keda wasoma na iVolatabu meda dau dina vei ira na tani baleta era na sega ni lai bula na dau lasu ena vuravura ena sega kina na itovo ca. (Vosa Vakaibalebale 14:2; Vakatakila 21:8; 22:15) E matata vinaka na vuna, ni o Setani na Tevoro ga e cuqena tiko na lasu.​​—Joni 8:​44.

¹² E levu sara na yaga ni noda dau dina. E vinaka kina na noda lewaeloma, da qai vakila tale ga kina nira nuitaki keda na tani. E dau vakalevu mera kunea e dua na cakacaka se ra taura dei tiko ga na nodra cakacaka na lotu Vakarisito baleta nira tamata dodonu. Na yaga levu duadua ga ni noda dau dina oya nida na veiwekani vinaka kina kei na Kalou Cecere Duadua.​​—Same 15:​1, 2.

Mo Savasava Tiko Ga

13. Na cava e sotava o Josefa, ia na cava e cakava?

¹³ O Josefa, na luve i Jekope na peteriaki, e volitaki me bobula ena gauna e se qai yabaki 17 kina. E voli koya o Potifa, e dua na matanivanua ni Ijipita. E qai mateci Josefa o wati nona turaga. E vinakata me rau veiyacovi kei Josefa, ni cauravou matavinaka. Ena veisiga kece ga e dau kaya tiko vua: “Me daru moce vata.” E tiko o Josefa ena dua na vanua e sega ni kilai kina qai yawa tale ga mai na nona vuvale. Ke a rawa me rau veiyacovi kei na marama oqo qai sega ni dua e kila. Ia, ni via toboki koya na wati Potifa, e qai dro o Josefa.​​—Vakatekivu 37:​2, 18-​28; 39:​1-​12.

14, 15. (a) Na cava e talei kina vei keda na italanoa kei Josefa? (b) Na cava e marautaka kina e dua na goneyalewa lotu Vakarisito na nona muria na veivakadreti ni Kalou?

¹⁴ E susugi o Josefa ena dua na vuvale e qarava na Kalou, e kila o koya ni cala na nodrau veiyacovi e le rua rau sega ni veiwatini. “Au na qai cakava rawa vakaevei na ka ca vakaidina oqo, kai valavala ca vua na Kalou?” e taroga o koya. E rairai vu oqo ena nona kila na ivakatagedegede ni Kalou e vakaraitaka mai Iteni, oya me rau tiko vata ga na veiwatini. (Vakatekivu 2:​24) E yaga vakalevu vei ira na tamata ni Kalou nikua na ka e cakava oya o Josefa. Ni rui vakawaleni na veiyacovi ena so na vanua, era veiwalitaki tale mai vei ira na nodra icaba na gone era sega ni via cakava na itovo tawadodonu oqo. E vakilai tale ga na nodra veiyacovi vakaveitalia na uabula. E ivakavuvuli vinaka gona kina vei keda na italanoa kei Josefa. E se sega ni veisau na nona vakacala na Kalou na veidauci kei na veibutakoci. (Iperiu 13:4) E levu era rawai ena veiyacovi tawadodonu vaka oya era qai dau veivutunitaka na ka era cakava. Oqo e so na ka era qai dau vakila e muri: na madua, ca ni lewaeloma, veivuvutaki, bukete, kei na kena tauvi ira na mate ca ni veiyacovi vakaveitalia. E vakadreti keda na iVolatabu ni o ira na veibutakoci era ‘ivalavala ca ina yagodra.’​​—1 Korinica 5:​9-​12; 6:​18, VV; Vosa Vakaibalebale 6:​23-​29, 32.

¹⁵ E vakavinavinakataka o Jenny,b e dua na iVakadinadina i Jiova goneyalewa, na nona vakadreti koya na Kalou. A wedevi koya e dua na tagane matavinaka e vale ni cakacaka. Ni galu toka ga o Jenny, e toroya cake sara nona veisamei na tagane oya. “Au via tataivatia vakalailai,” e kaya o Jenny, “baleta e bau vaka toka ya kevaka e marici iko e dua na tagane.” Ia e qai kila ni tagane oya e vinakata wale ga me rawai koya me lai oka vata kei ira na yalewa sa veiyacovi kaya. Ni vakila ni sa via luluqa na nona sabaya na veitemaki oya, e masuti Jiova me vukei koya me yalodina tiko ga. Na veika e vulica o Jenny ena nona vakekeli ena iVolatabu kei na ivola ni isoqosoqo era veivakadreti vinaka me qaqarauni tiko ga kina. E veivakadreti tale ga vua na kedrau italanoa o Josefa kei na wati Potifa. “Kevaka e qaqaco vinaka tiko ga na noqu lomani Jiova,” e tinia o koya, “au vakadeitaka niu na sega ni vakayacora e dua na cala levu meu valavala ca kina vua.”

Muria na Veivakadreti ni Kalou!

16. E yaga vakacava vei keda na noda railesuva se vakasamataka na nodra bula e so era cavuti ena iVolatabu?

¹⁶ E rawa nida taleitaka vakalevu na ivakatagedegede i Jiova kevaka eda saga meda kila na vuna e maroroya kina ena iVolatabu na kedra itukutuku e so me yaga vei keda. Na cava era vakavuvulitaka? Na itovo se imoimoi cava era vakaraitaka na vakamacalataki ena iVolatabu e vinakati meda muria se kua ni muria? Era le vicanadrau era vakamacalataki ena Vosa ni Kalou. Meda saga o keda kece na marautaka na ivakaro ni Kalou meda dau gadreva na vuku e rawa ni solia vei keda na bula tawamudu, okati kina na veika eda vulica vei ira era ivakaraitaki e maroroya vinaka tu o Jiova na kedra itukutuku. E sa dau vakamacalataki vakalevu ena ivoladraudrau oqo na kedra italanoa e levu vei ira oqori meda vuli kina. Vakacava meda vakayagataka na gauna meda railesuva kina na nodra bula o ira oqori?

17. O raica vakacava na veivakadreti i Jiova, ena vuku ni cava?

¹⁷ Eda vakavinavinakataka na nona kauaitaki ira o Jiova na saga tiko mera cakava na lomana. Eda sega ni tamata uasivi, me vakataki ira ga na turaga kei na marama era cavuti ena iVolatabu. Ia e yaga dina vei keda na kedra itukutuku e volai tu. Nida muria na veivakadreti i Jiova, eda na levea kina na veicala lelevu, da qai vakatotomuria tale ga na nodra ivakaraitaki vinaka o ira era lako ena sala ni yalododonu. Nida cakava oqori, eda sa lagata vata tiko kei na daunisame: “Sa kalougata ko ira era vakabauta na nona vosa [“veivakadreti,” NW], era qarai koya ena lomadra taucoko. Sa vakabauta na nomuni vosa [“veivakadreti”] na yaloqu; ia ka’u sa lomana vakalevu.”​​—Same 119:​2, 167.

[iVakamacala e ra]

O na Sauma Vakacava?

• Na cava eda vulica mai na ka e cakava o Tevita vei Saula?

• Na cava eda vulica mai na kedrau itukutuku o Ananaiasa kei Safaira?

• Na cava eda taleitaka vakalevu kina nikua na italanoa kei Josefa?

[iYaloyalo ena tabana e 26]

Na cava e sega ni vakatara kina o Tevita me vakamatei o Saula?

[iYaloyalo ena tabana e 27]

Na cava eda vulica ena kedrau itukutuku o Ananaiasa kei Safaira?

[iYaloyalo ena tabana e 28]

Na cava e tusaqata rawa kina o Josefa na veitemaki ina itovo vakasisila?