E Ka Vakavuku Meda Rerevaka na Kalou!

“A rerevaki Jiova na vu ni vuku.”​—VOSA VAKAIBALEBALE 9:​10.

1. Na cava e sega ni vakaibalebale kina vei ira e levu na kena tukuni mera rerevaka na Kalou?

DUA na gauna a dau isakisaki tu me tukuni vua e dua ni dau rerevaka na Kalou. Nikua, e sa sega, sa sega tale ga ni vakaibalebale vei ira e levu. Era na taroga beka: ‘Ke dau loloma na Kalou, na cava meu rerevaki koya kina?’ Ena nodra rai, e ka ca na rere, e ka vakadomobula. Ia, na rerevaki dina ni Kalou e duatani na kena ibalebale, eda na dikeva ni sega ni yalani ga ena taqaya se domobula.

2, 3. Na cava e okati ena noda rerevaka dina na Kalou?

² E vakaraitaki ena iVolatabu ni rerevaki ni Kalou e ka vinaka. (Aisea 11:3) E vakaibalebaletaki ena nona dokai kei na nona rokovi na Kalou, kei na noda saga meda kua ni vakararawataki koya. (Same 115:11) E okati kina na noda ciqoma na ivakatagedegede savasava ni Kalou, noda muria vakavoleka, kei na noda guta meda moica noda bula me salavata kei na ka e vinakata. E kaya e dua na ivola, ni rere dina vaka oqo ena rawa kina vua e dua me tu vua “na rai dodonu me baleti koya na Kalou. Ena vinaka kina nona ivalavala, ena cata tale ga na veika ca kece.” Sa rauta me kaya na Vosa ni Kalou: “A rerevaki Jiova na vu [“na itekitekivu,” NW] ni vuku.”​​—Vosa Vakaibalebale 9:​10.

³ Na noda rerevaka na Kalou ena cakayaco ena levu sara na basoga ni noda bula. Ena sega ni vakavukui keda wale ga, ia ena kauta tale ga mai na reki, vakacegu, tiko vinaka, bula dede, kei na nuidei. Ena uqeti keda tale ga meda vakararavi vua na Kalou, meda nuitaki koya, meda raici koya me noda idrodro. (Same 2:​11; Vosa Vakaibalebale 1:7; 10:27; 14:26; 22:4; 23:​17, 18; Cakacaka 9:​31) E veivolekati sara kei na vakabauta, na loloma tale ga. Ena vakatau sara ga kina na veika kece e vauca na noda veiwekani kei na Kalou, kei ira noda itokani. (Vakarua 10:12; Jope 6:​14; Iperiu 11:7) Noda rerevaka na Kalou e okati kina noda kila deivaki ni o koya na Tamada vakalomalagi e kauaitaki keda yadua sara ga, qai dau tu vakarau me vosota noda cala. (Same 130:4) O ira ga na daucaka ca ra qai sega ni veivutuni e dodonu mera domobulataki koya na Kalou.a​​—Iperiu 10:​26-​31.

Vulica Mo Rerevaki Jiova

4. Eda na vulica vakacava meda rerevaki Jiova?

⁴ Me vaka ni noda vakatulewa vakayalomatua kei na nona vakadonui keda na Kalou e vakatau tiko ena noda rerevaki koya, eda na via ‘vulica’ sara ga na rere oqo. Ia, eda na vulica vakacava? (Vakarua 17:19) E rawa nida ‘vuli’ ena kedra ivakaraitaki e levu na tagane kei na yalewa dau rerevaka na Kalou e volai tu na kedra itukutuku ena iVolatabu. (Roma 15:4) Me rawa nida kila se cava sara mada na ibalebale ni noda rerevaka na Kalou, ena vinaka meda raica mada e dua na kena ivakaraitaki. Oqo e baleti Tui Tevita e Isireli makawa.

5. E yaga vakacava vei Tevita na vakatawasipi ena nona lai kila na rerevaki Jiova?

⁵ O Jiova a sega ni vakadonui Saula, na imatai ni tui kei Isireli, baleta ni a rerevaka vakalevu cake na tamata, sega ni rerevaka na Kalou. (1 Samuela 15:​24-​26) Ena yasana kadua, e vakadinadinataki ena bula i Tevita ni dua o koya e rerevaka dina na Kalou. Ni se gone, e dau lai vakatawani ira voli na sipi i tamana. (1 Samuela 16:11) Na nona rerevaki Jiova o Tevita e rairai vu mai na nona dau vakasarava na veikalokalo ni vakatawa sipi duadua voli e veibogi. E sega ni kila taucoko sara o koya na levu ni kalokalo, ia e donu na vanua e lai tini kina nona vakanananu​​—oya ni dodonu me dokai na Kalou, me vakalagilagi tale ga. A vola o koya: “Ni’u sa vakananuma na nomuni lomalagi, na cakacaka ni qaqalo ni ligamuni, na vula kei na kalokalo ko ni sa lesia; a cava na tamata mo ni nanumi koya kina? Kei na luve ni tamata, mo ni dautalevi koya kina?”​​—Same 8:​3, 4.

6. E tarai Tevita vakacava nona raica na cakacaka ni liga i Jiova?

⁶ Sa rauta me qoroqoro o Tevita ni vakatauvatana na nona somidi kei na lomalagi vakaitamera. E sega ni domobula ena ka e raica, e uqeti koya ga me vakacaucautaki Jiova ena nona kaya: “Sa tukuna na lagilagi ni Kalou ko lomalagi; ka sa vakatakila na cakacaka ni ligana na maliwa levu.” (Same 19:1) Nona qoroya o Tevita na ibulibuli i Jiova e vakavolekati koya vua, e uqeti koya tale ga me via vulica qai muria na nona ivakatagedegede uasivi. Vakasamataka mada na titobu ni nona dokai Jiova o Tevita ni sa lagata: “Sai kemuni ka levu, ka sa cakava na ka e veivakurabuitaki: sai kemuni duaduaga na Kalou. Mo ni vakavulici au, Jiova, e nomuni sala; au na muria na nomuni vosa dina: mo ni vakaduataka na lomaqu me rerevaka na yacamuni.”​​—Same 86:​10, 11.

7. E vakayaloqaqataki Tevita vakacava na nona rerevaka na Kalou me vala kei Koliaci?

⁷ Nira kaba yani na nodra vanua na Isireli na kai Filisitia, e qai vakalialiai ira na Isireli na nodra toanivala​—o Koliaci, e dua na tuwawa vakaitamera e rauta ni tolu na mita na kena balavu. E vaka me cavuta tiko na vosa ni veivakalialiai oqo o Koliaci: ‘Digia mai e dua me keirau vala! Ke qaqa, keimami na qaravi kemuni.’ (1 Samuela 17:​4-​10) E curumi Saula kei na nona mataivalu na rere. O Tevita? Sega sara. E kila o koya ni o Jiova ga e dodonu me rerevaki. Na tamata? Sega, veitalia se mani vakacava na nona kaukaua. “Ka’u sa lako mai vei iko e na yaca i Jiova ni lewe vuqa,” e kaya o Tevita vei Koliaci, “me ra kila talega kina ko ira nai vavakoso taucoko oqo ni sa sega ni ia na veivakabulai ko Jiova e nai seleiwau kei na moto; ni sa lewa nai valu ko Jiova.” Ena nona irabo wale ga kei na dua bulu na vatu​​—salavata kei na veivuke i Jiova​​—e qai vakadavora na tuwawa oya o Tevita.​​—1 Samuela 17:​45-​47.

8. Na cava eda vulica ena kedra ivakaraitaki e so era dau rerevaka na Kalou?

⁸ De dua e so na meca se ka dredre eda sotava tiko e via tautauvata ga kei na ka a sotava o Tevita. Na cava meda cakava? E rawa nida vakatotomuri Tevita kei ira na tamata ni Kalou ena gauna sa oti​​—ena nodra rerevaka na Kalou. Na rerevaki ni Kalou ena kauta laivi na rerevaki ni tamata. A uqeti ira na nona itokani Isireli na tamata yalodina ni Kalou o Niemaia ena gauna era veitusaqati tiko kina na meca: “Ni kakua ni rerevaki ira: ni nanumi Jiova, sa levu ka rerevaki.” (Niemaia 4:​14) O ira na tamata ni Kalou me vakataki Tevita kei Niemaia era vakayacora vinaka nodra ilesilesi ni tokoni ira o Jiova. E rawa tale ga nida vakayacora na noda ilesilesi kevaka eda rerevaka na Kalou.

Rerevaka Tiko ga na Kalou ni O Sotava na Leqa

9. iTuvaki cava soti e vakaraitaka kina o Tevita nona rerevaka na Kalou?

⁹ Ni vakamatei Koliaci oti o Tevita, a vukei koya o Jiova ena levu tale na sala. A saga vakavica o Saula ena levu ni nona vuvu, me vakamatei Tevita. A tekivu ena nona via vakamatei koya sara ga e matanavotu, ni sega ni rawa, sa qai saga vaqaseqase, lai tini sara ena nona tala yani e dua na mataivalu. E dina ni sa vakaraitaka oti o Jiova vei Tevita ni na yaco me tui, ia a dro tale tiko o Tevita me vicavata na yabaki, so na gauna e vala, lakovata kei na nona waraka tiko na gauna me qai solia kina vua o Jiova na itutu vakatui. Ena gauna kece oqo, e vakaraitaka tiko kina o Tevita nona rerevaka na Kalou dina.​​—1 Samuela 18:​9, 11, 17; 24:2.

10. Ni sotava o Tevita na ituvaki leqataki, e vakaraitaka vakacava nona rerevaka na Kalou?

¹⁰ Dua na gauna a lai qara bula sara o Tevita vei Akisi, na tui Kaca, na koro nei Koliaci e Filisitia. (1 Samuela 21:​10-​15) Ra mani vakatukutuku vua na tui na nona tamata ena nodra kaya ni o Tevita e meca ni nodra matanitu. Na cava e qai cakava o Tevita ena ituvaki leqataki oya? E talaucaka na lomana vei Jiova ena masu. (Same 56:​1-4, 11-​13) Dina ni qai vakalialiai koya vakailasu me bula kina, ia e kila o Tevita ni o Jiova dina ga a vakalougatataka na nona sasaga me vakabulai. Nona dau vakararavi vei Jiova mai vu ni yalona kei na nona nuitaki koya e vakaraitaka ni dua o koya e dau rerevaka dina na Kalou.​​—Same 34:​4-6, 9-​11.

11. Me vakataki Tevita, eda na vakaraitaka vakacava noda rerevaka na Kalou nida sotava na leqa?

¹¹ Me vakataki Tevita, e rawa nida vakaraitaka noda rerevaka na Kalou ena noda nuitaka nona vosa ni yalayala ni na vukei keda nida sotava na leqa. E kaya o Tevita: “Laiva na nomu sala vei Jiova; vakararavi vua, ka na vakayacora ko koya.” (Same 37:5) Sega ni kena ibalebale oqo meda sa biuta ga vei Jiova na noda leqa da qai sega ni bau cakava kina e dua na ka. A sega ni kerea wale ga o Tevita na veivuke ni Kalou qai mai vakawelewele tu yani. A vakayagataka na kaukaua kei na vuku e solia vua o Jiova me walia kina na leqa e sotava. Ena gauna vata oya, e kila o Tevita ni sega ni rawa ni walia na nona leqa ena kaukaua ga vakatamata. Dodonu meda vaka tale ga oya. Nida sotava na leqa, meda saga meda walia ena noda kaukaua kece, da qai laiva vei Jiova na kena vo. So na gauna eda dau vakila ni sa sega tale ni dua na ka e rawa nida cakava, meda sa vakararavi ga vei Jiova. Gauna vaka oqo eda sa na qai vakaraitaka kina ni vu dina mai lomada noda rerevaki Jiova. E rawa ni vakacegui keda ena tikina oqo na ka e cavuta o Tevita: “A vosa vuni nei Jiova sa tu [“E dau tu voleka o Jiova,” NW] vei ira era rerevaki koya.”​​—Same 25:14.

12. Na cava meda taura kina vakabibi na noda masu, ia na rai vakacava me kua sara ni tiko vei keda?

¹² O koya gona, e dodonu meda raica vakabibi na noda masu vua na Kalou kei na noda veiwekani kei koya. Nida masu vei Jiova, e dodonu meda “vakabauta ni sa bula ko koya, ni sa saumi ira talega era sa dauvakasaqarai koya.” (Iperiu 11:6; Jemesa 1:​5-8) Ni sa vukei keda, e dodonu meda ‘vakavinavinakataka,’ me vaka e vakasalataki keda kina na yapositolo o Paula. (Kolosa 3:​15, 17) Meda kua sara ni vakataki ira e so, me vaka a tukuna e dua na lotu Vakarisito lumuti: “Era nanuma ni Kalou e vakataki ira na dauveiqaravi e valenikana. Nira vinakata ga e dua na ka era sikinala yani me kusa mai. Ni yaco oti na lomadra, era sega ni qai via kauaitaki koya tale.” Na ivakarau vaka oqo e dusia vakasigalevu na nona sega ni rerevaki dina na Kalou.

Ni Seavu Yani na Rere Dina

13. Gauna cava e beca kina o Tevita na Lawa ni Kalou?

¹³ Nona vakila o Tevita na veivuke i Jiova ena gauna ni nona rarawa e vakatitobutaka sara ga nona rerevaka na Kalou kei na nona nuitaki koya. (Same 31:​22-​24) Ia, e tolu na ka lelevu e sotava o Tevita e vaka me laurai kina na seavu yani ni nona rerevaka na Kalou. Oqo e lai tini sara ena so na leqa lelevu. Na kena imatai e yaco ni vakarautaka na kau lesu ni kato ni veiyalayalati i Jerusalemi. E sega ni laiva mera colata na Livai me vaka e vakamatatataki ena Lawa ni Kalou, sa qai vakavodoka ena qiqi. A liu tiko o Usa ena gauna e tara kina na kato ni voleka ni lutu. A mate koto ga o Usa ena vanua oya ena vuku ni “nona cala.” E cala levu dina o Usa, ia e rawa ni bale tale ga vei Tevita na nona mate ni a beca o Tevita na Lawa ni Kalou. Ni dua e rerevaka na Kalou, ena muria na nona veidusimaki ena veika kece e cakava.​​—2 Samuela 6:​2-9; Tiko Voli mai na Lekutu 4:​15; 7:9.

14. Na cava e yaco ena nona wiliki ira na Isireli o Tevita?

¹⁴ E muri, e qai wiliki ira na dauvala ni Isireli o Tevita ena veiuqeti i Setani. (1 Veigauna 21:1) Ena nona vakayacora oqo, e vakaraitaka kina ni sa seavu yani na nona rerevaka na Kalou, tini sara ena nodra mate e 70,000 na Isireli. Dina ni qai veivutuni o Tevita, ia sa yaco vei koya kei ira na lewe ni nona matanitu na leqa vakaitamera.​​—2 Samuela 24:​1-​16.

15. Na cava e vakavuna me lai tini o Tevita ena cala ni veibutakoci?

¹⁵ Nona sega ni rerevaka na Kalou o Tevita ena dua tale na gauna e lai tini me veibutakoci kina kei Pacisepa, na wati Uraia. Kila vinaka tu o Tevita ni cala na veibutakoci se nona via domona mada ga na watina e dua tani tale. (Lako Yani 20:​14, 17) E tekivu na leqa ena nona raici Pacisepa ni sili tiko. Ke rerevaka dina na Kalou ena gauna oya, ke a lako tani ga se vakamua tani na nona vakasama. Ia, e qai “vakararai tiko ga.” Na levu ni nona gagano e lai seavu wale kina nona rerevaka na Kalou. (Maciu 5:​28, NW; 2 Samuela 11:​1-4) E guilecava vakadua o Tevita ena gauna oya ni dodonu me nanumi Jiova ena veika kece e cakava.​​—Same 139:​1-7.

16. Na cava e qai yacovi Tevita ena vuku ni nona cala?

¹⁶ Na veibutakoci i Tevita e basika kina e dua na gonetagane. Sega ni dede a talai Necani o Jiova me lai vakavotuya na ivalavala ca i Tevita. E qai kilai yalona tale o Tevita, veivutuni sara ni sa qai rerevaki Jiova tale. E masuti Jiova me kua ni biuti koya, me kua tale ga ni kauta laivi vua na yalona tabu. (Same 51:​7, 11) E vosoti Tevita o Jiova, vakamamadataka na kena itotogi, ia a vakalaiva me se sauti koya mada ga na ca ni nona ivalavala. E mate na luve i Tevita, tekivu tale ga e kea na vakilai tu ni rarawa kei na ca ena nona vuvale. Na veika rarawa kece oqo e yaco ena vuku ni kena seavu vakalailai vua na nona rerevaka na Kalou!​​—2 Samuela 12:​10-​14; 13:​10-​14; 15:14.

17. Vakamacalataka na rarawa e rawa ni vu mai na dua na ivalavala ca.

¹⁷ Nikua tale ga, ena vakilai vakalevu sara na leqa kevaka e sega ni rerevaki na Kalou. Vakabibi ena ka e vauca na nona ivakatagedegede savasava. Vakasamataka mada na nona rarawa e dua na yalewa vakawati gone ena nona qai kila ni a sega ni yalodina vua o watina ena gauna e lai cakacaka tu kina i valagi. Ena levu ni nona rarawa kei na vutugu, sa qai tabaka na tagi. Ena vakacava na dede ni gauna me na qai rawa ni nuitaki watina tale, me dokai koya tale ga? Ena sega ni yaco na leqa lelevu vaka oqo kevaka eda rerevaki koya dina na Kalou.​​—1 Korinica 6:​18.

Noda Rerevaka na Kalou ena Tarovi Keda mai na Ca

18. Cava na inaki i Setani, ia na cava e dau vakayagataka me rawa kina nona inaki?

¹⁸ Sa qai torosobu ga nikua o vuravura ena veivakamuai i Setani, e nona sasaga levu tale ga me vakadukadukalitaki keda na lotu Vakarisito dina. Dau saga sara ga o koya me rawa na noda vakasama kei na lomada. E vakayacora oqo ena nona vakayagataka e rua na ka erau dau veitaratara sara ga vakadodonu i lomada kei na noda vakasama​​—oya na matada kei na daligada. (Efeso 4:​17-​19) Na cava o na cakava ke o raica vakidacala, rogoca, se sotava sara ga e dua na ituvaki e rawa ni vecei iko mo caka ca?

19. E yaga vakacava na nona rerevaka na Kalou e dua na lotu Vakarisito me drotaka kina na veitemaki?

¹⁹  Vakasamataka mada oqo na italanoa kei André,b e qase ni ivavakoso, vakaluveni, e vuniwai ena dua na vanua mai Urope. Ni dau yadra e valenibula o André ena veibogi, dau nodra cakacaka e so na yalewa era cakacaka vata mera vakauta vua e so na itukutuku veivagarogaroi era vola ena tikiniveva. Na itukutuku oqo era dau sureti koya kina mera veiyacovi. Dei toka ga o André ena nona sega ni kauaitaka nodra sasaga. Mani vakatulewataka o André ni sa na vinaka me vagalala mai na vanua oya, lai kunea sara e dua na cakacaka ena dua tale na vanua. E ka vakayalomatua dina nona digia me rerevaka na Kalou, e vakalougatataki kina. Nikua, sa cakacaka vagauna tiko ena valenivolavola ni tabana ni iVakadinadina i Jiova ena nona vanua.

20, 21. (a) Ena vukei keda vakacava noda rerevaka na Kalou meda kua ni caka cala? (b) Cava ena vakamatatataki ena ulutaga e tarava?

²⁰ Na vakasamataki tiko ga ni ka ca e rawa ni vakarawarawataka sara vua e dua me vakanadakuya na nona veiwekani talei kei na Kalou, qai douvaka na ka e sega sara ga ni dodonu me cakava. (Jemesa 1:​14, 15) Ena yasana kadua, kevaka eda rerevaki Jiova, eda na vakayawaki keda, se da na lako tani sara ga mai na ka ni veivakamarautaki, vanua, ituvaki, se vei ira e rawa nira vakacacana na noda itovo savasava. (Vosa Vakaibalebale 22:3) De o na madua kina vakalailai, ia e lailai sara oya ni vakatauvatani kei na kena bibi vei iko na veivakadonui ni Kalou. (Maciu 5:​29, 30) Nida rerevaka na Kalou, eda na sega ni nakita meda raica na veika vakasisila me vaka na iyaloyalo ca, eda na ‘tarova’ ga na matada mai na veika vaka oya. Ke da vakayacora oqo, sa rawa nida nuidei ni na vukei keda o Jiova meda ‘gumatua’ tiko ga me yacova sara na icavacava, me vakarautaka tale ga vei keda na ka kece eda gadreva.​​—Same 84:11; 119:37.

²¹ Io, e ka vakavuku dina ga meda rerevaka na Kalou e veigauna kece. Ena kauta tale ga mai vei keda na marau dina. (Same 34:9) Ia, oqo ena qai vakamatatataki ena ulutaga e tarava.

[iVakamacala e ra]

Rawa Mo Vakamacalataka?

• Na itovo vakarisito cava soti e okati tiko ena noda rerevaka na Kalou?

• Ena vakamalumalumutaka vakacava na rerevaki ni tamata na noda rerevaka na Kalou?

• Eda na vakaraitaka vakacava ni donu tiko na noda rai me baleta na masu?

• Ena tarovi keda vakacava mai na caka cala na noda rerevaka na Kalou?

[iYaloyalo ena tabana e 23]

Vulica o Tevita me rerevaka na Kalou ena nona dau sarava na nona ibulibuli

[iYaloyalo ena tabana e 24]

Cava o na cakava ke o temaki vakasauri ena dua na ituvaki o sotava?