Gonevuli Era Yaga e Vuravura Raraba

ENA sivia na 98,000 na ivavakoso ni iVakadinadina i Jiova ena 200 vakacaca na vanua, na Kalou sa vakavulici ira tiko na veimataqali tamata e duidui sara na ivakatagedegede ni nodra bula. E yavutaki na vuli oqo ena iVolatabu, kei na inaki levu ni vuli me vukei ira yadua era vakatavulici mera matua vakayalo, ena nodra vulica na loma ni Kalou kei na sala mera bulataka kina. E yaga sara vakalevu na vuli vei ira era ciqoma. Na ka era vulica era wasea yani vei ira na tani, me salavata kei na ivakaro i Jisu Karisito mera qisi ira na tamata mera nona tisaipeli.​​—Maciu 28:​19, 20, VV.

Me ikuri ni porokaramu ni veivakavulici ena nodra ivavakoso, e tauyavutaka na iVakadinadina i Jiova e so na koronivuli ni veivakarautaki ina so na taba ni cakacaka vakaitalatala. E dua gona vei ira na Koronivuli ni Vuli Veiqaravi Vakaitalatala. Na koronivuli oqo a tauyavutaki ena Okotova 1987, e Pittsburgh, Pennsylvania, mai Mereke. A caka na vuli ni imatai ni kalasi ena vosa vakavalagi, ra qai tiko kina e 24 na gonevuli. Tekivu mai na gauna oya, sa caka tiko na vuli ena 21 na vosa ena 43 na vanua. Me yacova mai oqo era sa vuli oti kina na qase ni ivavakoso kei ira na dauveiqaravi era dawai mai na sivia na 90 na vanua. Ni oti na walu na macawa ni vuli, era lesi na gonevuli ina vanua e gadrevi vakalevu kina na cakacaka, ena nodra vanua ga se e vanuatani. Ni mai cava na yabaki 2005, e sivia ni 22,000 na italatala lotu Vakarisito era sa vuli oti ena koronivuli oqo. E vakalougatataki vakalevu nodra cakacaka vakaukaua ena yalomalumalumu me baleta na veika e vauca na Matanitu ni Kalou kei na nodra vukei ira tale e so.​​—Vosa Vakaibalebale 10:22; 1 Pita 5:5.

Era Sasaga Mera Tiko ena Vuli

Me rawa nira tiko ena Koronivuli ni Vuli Veiqaravi Vakaitalatala, e gadrevi vei ira e levu na gonevuli mera taura nodra gade mai na nodra cakacaka saumi se cakacaka vagauna. Sega ni ka rawarawa oqo. E rua na tagane lotu Vakarisito mai Hawaii erau a sureti me rau lai vuli, ia a gadrevi me rau kerea me rau vagalalataki mai na nodrau cakacaka vaqasenivuli. Ni rau vakabauta ni na vukei rau o Jiova, rau mani biuta nodrau ivola ni kerekere, rau vakamacalataka na vuna erau vinakata kina me rau lai vuli kei na kena yaga vei rau. A mani vakadonui na nodrau kerekere.

Ena so na ituvaki, e tukuni vei ira na iVakadinadina era kerea mera vagalalataki mai na nodra cakacaka nira na sega ni vakacakacakataki tale nira lesu yani. Dina ni sa tukuni rawa tu vei ira nira na vakacegui mai na nodra cakacaka, ia era digia ga mera lai vakavulici ena isoqosoqo i Jiova. Ia, e so vei ira, ni oti nodra vuli, e sureti ira tale nodra boso mera lesu yani i cakacaka. Na nodra sasaga mera tiko ena vuli, e rawa ni tukuni vaka oqo: Era kerei koya na nodra itaukei ni cakacaka, ra qai vakararavitaka vei Jiova ena nodra masu.​​—Same 37:5.

“Ena Vakavulici Ira ko Jiova”

Na uto ni vuli ena walu na macawa, oya na kena dikevi vakatitobu na iVolatabu. Era vulica na gonevuli na sala era vakavulici kina na tamata i Jiova mera cakava na loma ni Kalou, ra vulica tale ga me laulau nodra vakayagataka na iVolatabu ena cakacaka vakavunau, ena ivavakoso, ena soqo ni tabacakacaka kei na soqo ni tikina.

E dua na gonevuli sa vuli oti mai na koronivuli oya, qai marautaka vakalevu na ka a vulica, a vola oqo vua e dua e vakarau tale ga me lako ena vuli oya: “E totoka dina na vuli! Oqo e dua na vuli mo kua ni calata. Au sa qai taura vinaka sara ga na ibalebale ni tikinivolatabu e kaya ni na ‘vakavulici keda o Jiova.’ E vakavinakataki keda, na lomada kei na noda itovo meda vakatotomuri Karisito Jisu vakavoleka sara. Ni o vuli kina, o na guiguilecava dredre.”​​—Aisea 54:13.

Daukaulotu, iVakatawa, kei na Dauveivakavulici

Era sa veiqaravi tiko ena gauna oqo ena 117 na vanua na gonevuli ni Koronivuli ni Vuli Veiqaravi Vakaitalatala. E wili kina na veiyanuyanu ena wasawasa na Atalanitika, ena Caribbean, kei na Wasa Pasifika, vaka kina ena levu na vanua era tiko kina na valenivolavola ni tabana ni iVakadinadina i Jiova. Era ripotetaka na veivalenitabana ni laurai nodra vakavulici vinaka na gonevuli ena nodra cakacaka vakadaukaulotu, vakaivakatawa, kei na nodra veivakavulici. Era vulica mera vakayagataka vinaka na iVolatabu ena cakacaka vakavunau. (2 Timoci 2:​15) Nira sauma nodra taro na itaukeinivale, era vakayagataka vakalevu na ivola na Reasoning From the Scriptures,a ra qai vakavulici ira tale ga na vo ni dautukutuku mera cakava vaka kina. E veivakauqeti na nodra gugumatua na gonevuli, qai vakaukauataka na ivavakoso na nodra cakacaka.

E itavi dokai vei ira na qase ni ivavakoso mera “vakatawa na qele ni sipi,” ena nodra vukei ira vakayalo na tacidra. (1 Pita 5:​2, 3, VV) E kaya e dua na qase ni ivavakoso me baleta na tikina oqo: “Keimami vakavinavinakataka na valenivolavola ni tabana ni lesi ira na mataveitacini tagane era vakavulici vinaka me vukei keimami ena nodra vakatawani na qelenisipi ni Kalou.” Tautauvata tale ga na ka e dikeva e dua na valenivolavola ni tabana ena Tokalau kei Esia: “Era dauloloma na gonevuli era sa vuli oti mai. Era cakacaka vakaukaua, ra qai dokai kina vei ira na lewe ni ivavakoso. Nodra yalomalumalumu, veikauaitaki, kei na nodra gugumatua, e kilai levu qai taleitaki tale ga. Era tu vakarau mera soli ira, ra qai marau mera toki ina ivavakoso cava ga e gadrevi kina na ivakatawa.” (Filipai 2:4) O ira na tagane vaka oqo era vakaukauataki ira na tacidra vakayalo, e ganita gona mera vakacaucautaki.​​—1 Korinica 16:18.

Kena ikuri, o ira na qasenivuli ena Koronivuli ni Vuli Veiqaravi Vakaitalatala era vukei ira na gonevuli mera maqosa ena vunau e matanalevu. Nira muria na vakatutu kei na ivakasala e tau vei ira, e levu na gonevuli era sa vuli oti oqo, e sega ni bera ga nodra sa rawa ni vakayagataki mera vunau ena soqo ni tabacakacaka kei na soqo ni tikina. E raica e dua na ivakatawa ni tabacakacaka ni o ira na gonevuli oqo e “momona na nodra vunau ra qai sema vakavinaka na vakasama era cauraka.”​​—1 Timoci 4:​13.

E vinaka sara na ivakarau ni veivakavulici ena ivavakoso ena dua na vanua e Aferika ni oti na kena vakayacori kina na Koronivuli ni Vuli Veiqaravi Vakaitalatala, ra qai lesi na gonevuli mera veiqaravi ena yalava tiko ga oya. O ira na qase ni ivavakoso era vuli oti ena koronivuli oqo era veivuke ena cakacaka vakadaukaulotu, ena veivakatawani kei na veivakavulici, e taraicake kina vakayalo na ivavakoso.​​—Efeso 4:​8, 11, 12.

Laveta na iVakatagedegede ni Qaravi ni iVavakoso

Ena vuqa na vanua, era vinakati kina na qase ni ivavakoso kei ira na dauveiqaravi. So na vanua oqo e sega sara ga na kena qase ni ivavakoso, me yacova ni lesi yani kina e dua na gonevuli ni Koronivuli ni Vuli Veiqaravi Vakaitalatala. Levu gona na gonevuli era lesi ena vanua vaka oqori.

E vica na valenitabana era ripotetaka ni o ira na gonevuli oqo era “buta vinaka ena kena cicivaki na isoqosoqo,” “era taura vakabibi na nodra itavi,” “era vukei ira tale e so mera kila qai doka na isoqosoqo i Jiova,” vaka kina nodra “vukei ira na lewe ni ivavakoso mera dau veikauaitaki, ra qai tara cake tale ga nodra bula vakayalo.” Era cakava oqo baleta nira muria na gonevuli na ka e volai ena Vosa ni Kalou, ra qai sega ni vakararavi ena nodra yalomatua se na nodra vuku. (Vosa Vakaibalebale 3:​5-7) O ira na tagane vaka oqo era isolisoli vakayalo ena ivavakoso era lesi kina.

Veiqaravi ena Yalava Ribayawa

E so na gonevuli era lesi mera painia lavotaki era lai vukea e so na iwasewase ribayawa mera yaco me ivavakoso. Dua na qase ni ivavakoso ena dua na vanua ribayawa mai Guatemala, e vakavinavinakataka nodra veivuke na gonevuli, ena nona kaya: “Sa 20 oqo na yabaki noqu leqataka tu se na qaravi vakacava na yalava levu oqo. E dau wewe ni noqu masu. Era vakavulici vinaka mai o ira na mataveitacini tagane era vuli ena Koronivuli ni Vuli Veiqaravi Vakaitalatala mera maqosa ena vunau, vaka kina ena kena qaravi na veika e baleta na isoqosoqo, au vakavinavinaka tale ga ni sa qaravi vinaka kina na yalava oqo.”

Era vulica na gonevuli me laulau nodra cakacaka vakavunau vakauasivi ena yalava ribayawa era gole kina, nira na cabeta na veiulunivanua mera yacova yani na veikorokoro lalai. E totolo ga nodra tekivutaka ra qai tuvanaka na iwasewase lalai, dina ga nira a sega ni rawata taumada e so tale na dautukutuku. Me kena ivakaraitaki, a kerea e dua na qase ni ivavakoso mai Niger na nodra veivuke na gonevuli, baleta ni kila nira na cakacaka vinaka sara ena yalava e vakaitikotiko kina. Ena vanua ribayawa, ena rairai rawarawa vei ira na tagane dawai mera lai veiqaravi kina vakapainia lavotaki, se ivakatawa ni tabacakacaka. Me vaka na yapositolo o Paula, era na rawa ni sotava ‘na ca ena veiuciwai, na ca mai vei ira na daubutako, na ca ena loma ni veikau,’ kei na nodra vosota e so na ituvaki dredre, vaka kina nodra lomaleqataka na ivavakoso era qarava.​​—2 Korinica 11:​26-​28.

Era iVakaraitaki Vei Ira na iTabagone

E uqeti ira na itabagone na iVolatabu mera nanumi koya a buli ira. (Dauvunau 12:1) Era ivakaraitaki gona vei ira na itabagone lotu Vakarisito o ira na gonevuli gugumatua ni Koronivuli ni Vuli Veiqaravi Vakaitalatala. Ni oti nodrau yaco yani ina dua na ivavakoso e Mereke e rua na gonevuli, e vakaruataki sara ga na levu ni gauna era vakayagataka na mataveitacini ena cakacaka vakavunau. Kena ikuri, e tubu na iwiliwili ni painia tudei, se daukacivaka vakatabakidua na Matanitu ni Kalou, mai na 2 ina 11. Oqo na ka e dau yaco ena levu sara na ivavakoso.

O ira na gonevuli era vakauqeti ira tale ga na cauravou mera vakasamataka na vuli ena Koronivuli ni Vuli Veiqaravi Vakaitalatala. Oqo e uqeti ira e so mera sauva mera dauveiqaravi ni ivavakoso. E tukuna na valenitabana mai Necaladi ni o ira na gonevuli ni Koronivuli ni Vuli Veiqaravi Vakaitalatala era “ivakaraitaki bula vei ira na cauravou era veinanuyaka voli se cava mera cakava ena nodra bula.”

Veiqaravi ena iVavakoso e Duidui na Kena Vosa

Ena levu na vanua, sa toso sara tiko na kena vunautaki na itukutuku vinaka vei ira na tamata ena nodra vosanisucu. Vakavuqa mera dau vulica na gonevuli oqo e so tale na vosa, ra lai veiqaravi gona ena yalava e levu kina o ira na curuvanua. Me kena ivakaraitaki, mai Belgium, e gadrevi sara kina vakalevu na dautukutuku ni Matanitu ni Kalou mera vunau ena vosa vakaAlbania, vakaPerisia, kei na vosa vakaRusia.

Na veivavakoso kei na veiwasewase lalai e duatani na kena vosa mai Itali, Jamani, Mereke, Mexico, Peritania kei na veivanua tale e so era vakila na yaga ni nodra veiqaravi na ivakatawa dauveilakoyaki, qase ni ivavakoso, kei na dauveiqaravi era a vuli ena Koronivuli ni Vuli Veiqaravi Vakaitalatala. E ripotetaka na valenitabana mai Korea ni “sivia e 200 na gonevuli era veiqaravi sara vakalevu ena kena vukei na veivavakoso kei na veiwasewase lalai e duatani na kena vosa.”

Era Qarava ena Yalomalumalumu e So Tale na iTavi

Me ikuri ni nodra qarava na veiwasewase lalai kei na veivavakoso e duatani na kena vosa, o ira era a vuli ena Koronivuli ni Vuli Veiqaravi Vakaitalatala era qase ni ivavakoso, dauveiqaravi, ra qai ivakatawa dauveilakoyaki. So era lesi ina so tale na vanua, rairai era na lai veiqaravi ena Service Department ena dua na valenitabana ke gadrevi kina na veivuke. O ira era kila toka na cakacaka vakamatai era dau lai vakaitavi ena tara Kingdom Hall.

Na tubu ni iwiliwili ni ivavakoso kei na tabacakacaka e veiyasa i vuravura, e dusia ni gadrevi vakalevu me so tale na ivakatawa dauveilakoyaki. Me rawa oqo, e digitaki e so na gonevuli era sa vuli oti ena Koronivuli ni Vuli Veiqaravi Vakaitalatala mera lai vulica na cakacaka vakaivakatawa dauveilakoyaki me tini na macawa, oti era na veisosomitaki se ra veiqaravi sara ga vakaivakatawa ni tabacakacaka. Rauta ni 1,300 na gonevuli era veiqaravi vakaivakatawa dauveilakoyaki tiko ena gauna oqo ena 97 na vanua. Ena dua na vanua mai Aferika, e 55 na pasede ni ivakatawa dauveilakoyaki era a vuli ena Koronivuli ni Vuli Veiqaravi Vakaitalatala. Ena dua tale na vanua e kea, e tiko sara ena 70 na pasede na kedra iwiliwili na ivakatawa dauveilakoyaki era a vuli ena koronivuli oqo.

Ena veivanua vakataki Kenada, Mereke, Ositerelia, Tokalau kei Esia, Urope, era sa lesi e vica vata na drau na gonevuli ina veivanua tale e so ni vinakati mai kina na nodra veivuke. Ena sala oqo, e vakilai e vuravura raraba na yaga ni ka era vulica na gonevuli.

O Jiova e vakayagataki Jisu Karisito na Luvena me vakarautaki ira na daukaulotu, ivakatawa, kei na dauveivakavulici, mera veiqaravi ena vuku ni Matanitu ni Kalou ena iotioti ni veisiga oqo. Ena rawa ni tubu tale beka na kedra iwiliwili na tamata ni Kalou? E vaka dina kina! O koya gona, sa qai gadrevi tiko ga mera tadolova e so na itavi bibi ni veiqaravi o ira na tagane yalodina. (Aisea 60:22; 1 Timoci 3:​1, 13) Na Koronivuli ni Vuli Veiqaravi Vakaitalatala e vakarautaki ira na qase ni ivavakoso kei ira na dauveiqaravi mera vakarabailevutaka nodra cakacaka vakavunau, ena yaga vakalevu vei ira, vaka kina vei ira tale e so e vuravura raraba.

[iVakamacala e ra]

[iYaloyalo ena tabana e 10]

Na Koronivuli ni Vuli Veiqaravi Vakaitalatala e veivuke ena kena qaravi na veika e vauca na Matanitu ni Kalou e vuravura raraba

[iYaloyalo ena tabana e 13]

O vinakata mo vuli ena Koronivuli ni Vuli Veiqaravi Vakaitalatala mo yaga cake kina vakalevu vei ira e so?