Emosi—E Dautatamusuki se Dautava Lolo?
ENA ikaciwa ni senitiuri B.S.K., a vakaroti Emosi o Amasaia, e dua na bete qaravi matakau, me kua ni parofisai tiko e Isireli. E sega ni tu vakasuka o Emosi, e kaya: “Ai vakatawa ni sipi ga koi au, kei na dausamaki [“dautava,” NW] lolo: ka sa kauti au ko Jiova ni’u sa muria na qele ni sipi, ka sa kaya vei au ko Jiova, Mo la’ki parofisai vei ira na noqu tamata na Isireli.” (Emosi 7:14, 15) Io, e sega ni lesi koya ga o Emosi me parofita, o Jiova sara ga a talai koya yani. Ia, na cava e vakaibalebaletaka o Emosi ni tukuna ni “dautava” lolo?
Na vosa vakaIperiu e vakadewataki tiko oqo me “dautava” lolo e laurai ga vakadua ena New World Translation. So tale na iVolatabu era vakadewataka na vosa oqo me “dautatamusuki,” “dausasamaki,” se “dauteitei,” sega ni “dautava” lolo. Ia, e kaya na ivola na Economic Botany ni vakadewa veiganiti ni vosa oqo na “daucula” lolo baleta ni dusia sara ga e dua na itavi era dau qarava na dautei lolo.
Sa kena ivakarau makawa tu ga mai vei ira e Ijipita kei Saipurusi mera dautava se cula na lolo. Sa sega ni vakayacori oqori e Isireli ena gauna oqo baleta ni sa bula tu e kea e so tale na mataqali lolo. Ia, ena gauna i Emosi era dautava lolo na Isireli, baleta ni vunilolo a tu vei ira ena gauna oya a kau mai Ijipita.
Kena irairai, ni dau vakawai na lolo ena gauna e culai kina baleta ni curu vinaka kina na wai. E vakavuna tale ga me buraka mai vakalevu na kasi na ethylene. Na kasi oqo e dau vakavuna me dreu totolo na lolo, vuavuai levu qai kamikamica tale ga. Kena ikuri, era vuki bera na lago, era sega kina ni mai vakacacana na vuanilolo baleta ni sa dreu totolo.
Dina ni sega ni tamata vakaitutu o Emosi, e ivakatawa ni sipi ga qai dautava lolo, ia oqo a sega ni vakayalolailaitaki koya ni sotavi ira na kena meca. Ena yasana adua, a yaloqaqa ni tukuna na veilewai i Jiova vei ira na Isireli. Sa dua na ivakaraitaki veivakauqeti dina vei ira na dauveiqaravi ni Kalou nikua, nira tukuna tale tiko ga na itukutuku e sega ni taleitaki!—Maciu 5:11, 12; 10:22.