Vakatotomuria na iVakaraitaki i Emosi
1. Na cava e veivakayaloqaqataki kina na ivakaraitaki i Emosi?
1 O dau nanuma ni sega ni ganiti iko mo vunau ni o sega ni vuli vinaka? Ke dina qori, e rawa ni vakayaloqaqataki iko na ivakaraitaki i Emosi. O Emosi e daususu sipi, e tiko tale ga na gauna e cakacaka kina ena iteitei. Ia e vakayaloqaqataki koya o Jiova me kacivaka e dua na itukutuku bibi. (Emosi 1:1; 7:14, 15) Nikua tale ga, o Jiova e vakayagataki ira na yalomalumalumu. (1 Kor. 1:27-29) Na cava eso tale na ka eda vulica vua na parofita o Emosi me baleta na noda cakacaka vakaitalatala?
2. Nida tusaqati ena cakacaka vakaitalatala, na cava eda na dei tu ga kina?
2 Meda Dei Nida Tusaqati: Dua na ka na cudru i Amasaia na bete e dau sokaloutaka na luve ni bulumakau matakau ena tini na yavusa ena vualiku kei Isireli ena gauna e rogoca kina na parofisai i Emosi, e vaka me tukuna: ‘Lako i nomudou! Kua tale ni gole mai ke! Sa tiko na neimami lotu!’ (Emosi 7:12, 13) A veisautaka o Amasaia na nona vosa na parofita me kerea kina vei Tui Jeropoami me vakatabui na cakacaka i Emosi. (Emosi 7:7-11) Ia a sega vakadua ni yalolailai o Emosi. Nikua, eso na iliuliu ni lotu era qara na nodra veitokoni na iliuliu vakapolitiki mera vakacacani kina na tamata i Jiova. Ia e vakadeitaka vei keda o Jiova ni na tawayaga na iyaragi kece e buli meda valuti kina.—Aisea 54:17.
3. Na rua na itukutuku cava eda kacivaka nikua?
3 Kacivaka na Veilewai ni Kalou kei na Veivakalougatataki e se Bera Mai: Ni parofisaitaka o Emosi na nodra lewai na yavusa tini e Isireli, sa qai tinia na ivola e vakatokayacataki vua ena nona vakamacalataka na yalayala i Jiova ena kena vakalesui mai na bula totoka kei na veivakalougatataki e sega ni wiliki rawa. (Emosi 9:13-15) Eda kacivaka tale ga na “siga ni lewa” ni Kalou sa roro tiko mai, ia qori e tiki wale ga ni “itukutuku vinaka ni matanitu ni Kalou” e vinakati meda vakarogoya. (2 Pita 3:7; Maciu 24:14) Ni vakarusai ira na tamata ca o Jiova ena Amaketoni, sa na qai parataisi o vuravura.—Same 37:34.
4. Eda vakadeitaka vakacava ni rawa nida vakacavara na inaki i Jiova?
4 Dua na ka na levu ni tamata era tusaqati keda nikua. Nida vunautaka gona na itukutuku vinaka, e vakatovolei sara ga kina na noda vinakata meda dei ena noda yalayala vei Jiova kei na noda via cakava na lomana. (Joni 15:19) Ia eda vakabauta dei ni na vakarautaka tiko ga o Jiova na ka eda gadreva meda vakacavara kina na nona inaki, me vaka ga a cakava vei Emosi.—2 Kor. 3:5.