Taro na Dauwiliwili
Na cava “nai valu . . . ni Kalou Kaukauwa” ena Amaketoni, na cava tale ga ena yaco kina?—Vakatakila 16:14, 16.
Kena itukutukuni rawarawa ga, na ivalu ni Amaketoni e dua na ivalu ena vakarau tarai vuravura taucoko. Ena vakarusai ira kina na meca ni Kalou o Jisu Karisito, na Tui sa lesia tu o Jiova. E tukuna na iVolatabu ni o ira na meca oqo, “na tui ni veivanua kei vuravura taucoko,” e uqeti ira na “yalo ni tevoro” mera soqoni vata mai “ki nai valu ni siga dina ko ya ni Kalou Kaukauwa . . . e na vanua na yacana e na vosa vaka-Iperiu ko Amaketone.”—Vakatakila 16:14, 16.
E sega ni vanua dina na vanua ena vakayacori kina na ivalu oqo. Na yaca ‘Amaketoni’ e kena ibalebale “Ulunivanua o Mekito.” (Vakatakila 16:16) E sega ni dua na ulunivanua e vakatokai ena yaca oqo. Kena ikuri, ena sega ni rawa nira kumuni vata ena dua ga na vanua o ira na ‘tui kei vuravura, kei na nodra mataivalu.’ (Vakatakila 19:19) Na “vanua” e dusia tiko na ituvaki era vakamuai kina na iliuliu ni politiki kei na nodra ito—oya mera tovata mera valuti Jiova kei “na mataivalu mai lomalagi” e liutaka o Jisu Karisito, na “nodra Tui na tui, kei na nodra Turaga na turaga.”—Vakatakila 19:14, 16.
Na vosa ‘Amaketoni’ e semati tiko ina korolevu e Isireli makawa o Mekito. A koto o Mekito ena dua na vanua vinaka sara ena tokalau ni ulunivanua o Kameli, e lewa tale tu ga na veitolonisala era dau muria na mataivalu kei na dauveivoli ena gauna oya. E vanua tale ga ni veiraravui. Me kena ivakaraitaki, ena “wai mai Mikito” a ravuta kina o Peraki na dauveilewai e dua na mataivalu kaukaua ni Kenani e liutaka o Jenerali Sisira. (Dauveilewai 4:12-24; 5:19, 20) Na vanua vata tale ga oqori a ravuti ira kina na kai Mitiani o Kitioni na dauveilewai. (Dauveilewai 7:1-22) Na iVolatabu e semati Mekito tiko kei na ivalu sa vakarau cabolo, qai vakadeitaka vei keda ni Kalou ena vakayagataki Luvena me ravuti ira kece na meca era dau veitusaqati.
Na cava ena yaco? Na ivalu na Amaketoni ena cavuraka tani mai vuravura na veidabui kei na ca. Ena tekivu kina na gauna uasivi ena itukutuku ni kawatamata. (Vakatakila 21:1-4) Ena ruku ni veiliutaki yalololoma ni Matanitu ni Kalou, ena veisautaki na vuravura me dua na parataisi mera na bula tawamudu kina na yalododonu.—Same 37:29.